Etsɛko tsɔ nɛ ní Yesu tĩ gbɛtsɔɔmɔi ni kɔɔ sɔlemɔ he lɛ mli, shi jeee no pɛ ji sane ni ewie he fe shi kome yɛ esɔɔmɔ nitsumɔ lɛ mli. Be ni Yesu feɔ naakpɛɛ nii yɛ Galilea lɛ, mɛi kɛ sane fɔ̃ enɔ akɛ daimonioi lɛ anɔyelɔ lɛ hewalɛ ekɛfeɔ nakai lɛ. Amrɔ nɛɛ eyɛ Yudea, ni mɛi miiwie nakai sane lɛ nɔŋŋ amɛmiishi lɛ.

Be ni Yesu fã daimonio ko ni hãaa nuu ko anyɛ awie lɛ kɛje emli lɛ, asafoku lɛ anaa kpɛ amɛhe. Shi enɛ efeee mɛi ni wieɔ shiɔ lɛ lɛ naakpɛɛ. Amɛkɛ sane kome too lɛ nɔŋŋ fɔ̃ enɔ akɛ: “Beelzebul, daimonioi lɛ anɔyelɔ lɛ, hewalɛ ekɛfãmɔɔ daimonioi lɛ.” (Luka 11:15) Mɛi komɛi hu miitao amɛna nɔ ko ni tsɔɔ akɛ Yesu jɛ Nyɔŋmɔ ŋɔɔ, no hewɔ lɛ, amɛbi ni efee okadi ko ni jɛ ŋwɛi etsɔɔ amɛ.

Akɛni Yesu na akɛ amɛmiitao amɛka lɛ hewɔ lɛ, ehã amɛ hetoo taakɛ ehã mɛi ni wie shi lɛ yɛ Galilea lɛ hetoo lɛ nɔŋŋ. Ekɛɛ maŋtsɛyeli fɛɛ maŋtsɛyeli ni kɛ lɛ diɛŋtsɛ ehe shiɔ mple lɛ gbeɔ shi. No hewɔ lɛ, ebi amɛ akɛ: “Kɛ́ Satan hu kɛ lɛ diɛŋtsɛ ehe miishi mple lɛ, te aaafee tɛŋŋ ni emaŋtsɛyeli lɛ aaadamɔ shi?” Kɛkɛ ni Yesu kɛma amɛhiɛ tɛ̃ɛ akɛ: “Kɛ́ Nyɔŋmɔ wao mikɛfãmɔɔ daimonioi lɛ, no lɛ Nyɔŋmɔ Maŋtsɛyeli lɛ ebati nyɛ shi diɛŋtsɛ.”​—Luka 11:18-20.

Esa akɛ “Nyɔŋmɔ wao” ni Yesu tsĩ tã lɛ ahã etoibolɔi lɛ akai nɔ ko ni tee nɔ yɛ Israel yɛ Mose beiaŋ lɛ. Mɛi ni yɔɔ Farao we lɛ ní na naakpɛɛ nii ni Mose fee lɛ wie akɛ: “Enɛ lɛ Nyɔŋmɔ wao nɛ!” “Nyɔŋmɔ wao” lɛ nɔŋŋ ŋmala Kitãi Nyɔŋma lɛ yɛ tɛi tɛtrɛbii enyɔ nɔ lɛ. (2 Mose 8:19; 31:18) Nakai nɔŋŋ hu “Nyɔŋmɔ wao,” ni ji emumɔ krɔŋkrɔŋ, loo ehewalɛ ni miitsu nii lɛ, ji nɔ ni amrɔ nɛɛ eyeɔ ebuaa Yesu ni efãmɔɔ daimonioi, ni etsaa helatsɛmɛi lɛ. No hewɔ lɛ, Nyɔŋmɔ Maŋtsɛyeli lɛ ebati mɛi ní teɔ shi woɔ lɛ nɛɛ ashi lɛɛlɛŋ, ejaakɛ Yesu, mɔ ni ahala lɛ akɛ Maŋtsɛyeli lɛ nɔ Maŋtsɛ lɛ yɛ amɛteŋ yɛ nakai be lɛ mli, ni eetsu nitsumɔi nɛɛ.

Kɛ́ nuu hewalɔ ko ni kɛ tawuu nii ewula ehe jogbaŋŋ miibu ewe he, ni nuu ko ni he wa fe lɛ batutua lɛ lɛ, eyeɔ enɔ kunim. Nakai nɔŋŋ bɔ ni Yesu nyɛɔ efãmɔɔ daimonioi lɛ tsɔɔ akɛ, eyɛ hewalɛ fe Satan. Agbɛnɛ hu, Yesu tĩ nɔkwɛmɔnɔ ni kɔɔ nuu ko ni mumɔ ni he tseee je emli lɛ he lɛ mli. Kɛ́ nuu lɛ kɛ nibii kpakpai wooo gbɛ ni ebakã shi efolo lɛ mli lɛ, nakai mumɔ lɛ kuɔ esɛɛ ebaa kɛ mumɔi krokomɛi kpawo, ni no hãa nuu lɛ naagbee shihilɛ tsɔɔ efɔŋ fe klɛŋklɛŋ nɔ lɛ. (Mateo 12:22, 25-29, 43-45) Nakai eba lɛ yɛ Israel maŋ lɛ gbɛfaŋ.

Yesu wiemɔi lɛ ta yoo ko ni no mli lɛ eboɔ lɛ toi lɛ tsuiŋ, ni ewie akɛ: “Musu ni hiɛ bo kɛ fufɔ ni oye lɛ yɛ miishɛɛ!” Yei ni ji Yudafoi lɛ shwe akɛ amɛbaafɔ bi ni baatsɔ gbalɔ, titri lɛ Mesia lɛ. No hewɔ lɛ, ekolɛ yoo nɛɛ susu akɛ Maria mii baashɛ ehe waa akɛ efɔ bi ni etsɔ tsɔɔlɔ tamɔ nɛkɛ. Kɛ̃lɛ, Yesu jaje yoo lɛ ni etsɔɔ lɛ nɔ tuuntu ni hãa anáa miishɛɛ. Ekɛɛ akɛ: “Dabi, moŋ lɛ, mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!” (Luka 11:27, 28) Yesu etsɔɔɔ kɔkɔɔkɔ akɛ akɛ woo krɛdɛɛ ko ahã Maria. Moŋ lɛ, etsɔɔ akɛ nɔ ni hãa nuu loo yoo ko náa anɔkwa miishɛɛ ji, anɔkwayeli ni ekɛsɔmɔɔ Nyɔŋmɔ, shi jeee wekukpaa ni yɔɔ ekɛ mɛi ateŋ loo nɔ ni enyɛ etsu.

Yesu kã mɛi ni biɔ lɛ ni efee okadi ko ni jɛ ŋwɛi lɛ ahiɛ, taakɛ efee yɛ Galilea lɛ. Ekɛɛ amɛ akɛ ahãŋ amɛ okadi ko ja “Yona okadi lɛ.” Yona tsɔ gbii etɛ ni eye yɛ loo lɛ musuŋ kɛ ekãa ni ekɛshiɛ lɛ fɛɛ nɔ efee okadi ehã Ninivebii lɛ, ni no tsirɛ amɛ ni amɛtsake amɛtsui. Yesu wie akɛ: “Shi naa! nɔ ko ni fe Yona yɛ biɛ.” (Luka 11:29-32) Yesu fe Solomon, mɔ ni Sheba maŋnyɛ lɛ ba koni ebabo ehiɛshikamɔ lɛ toi lɛ hu.

Yesu kɛfata he akɛ: “Kɛ́ mɔ ko su kane lɛ, ekɛmaaa teemɔhe ko, ni asaŋ ekɛmaaa kɛntɛŋ shishi, shi moŋ ekɛmaa kanetso nɔ.” (Luka 11:33) Ekolɛ eetsɔɔ akɛ, nii ni etsɔɔ kɛ naakpɛɛ nii ni efeɔ  yɛ mɛi nɛɛ ahiɛ lɛ tamɔ kane ko ni asu ni akɛma teemɔhe. Akɛni amɛkɛ amɛhiŋmɛii kwɛɛɛ nɔ kome hewɔ lɛ, amɛnaaa yiŋtoo ni yɔɔ enitsumɔi lɛ asɛɛ.

Etsɛko tsɔ nɛ ní Yesu fã daimonio ni hãaa nuu ko anyɛ awie lɛ kɛje emli, ni nuu lɛ nyɛ ewie. Kulɛ, esa akɛ enɛ atsirɛ mɛi ní amɛwo Nyɔŋmɔ hiɛ nyam, ní amɛgba mɛi krokomɛi nibii ni Yehowa feɔ lɛ. No hewɔ lɛ, Yesu bɔ mɛi ni wieɔ shiɔ lɛ lɛ kɔkɔ akɛ: “No hewɔ lɛ, kwɛmɔ ni oná nɔmimaa akɛ la ni yɔɔ omli lɛ, jeee duŋ ni. No hewɔ lɛ, kɛ́ ogbɔmɔtso muu lɛ fɛɛ miikpɛ ni ehe ko he ko woko duŋ lɛ, ogbɔmɔtso muu lɛ fɛɛ baakpɛ tamɔ bɔ ni kane kpɛɔ ni ehãa onáa la lɛ.”​—Luka 11:35, 36.