Yehowa Odasefoi yɛ bulɛ kɛhã nɔyelii kɛ okadii ni damɔ shi kɛhã amɛmaji lɛ. Wɔkpɛlɛɔ nɔ akɛ mɛi baanyɛ amɛkpɛ amɛyiŋ akɛ amɛbaakɛɛ plɛji, amɛbaaŋa aflaŋaa, loo amɛbaalá jakumaŋ lalai.

 Shi akɛ Yehowa Odasefoi lɛ, wɔkɛ wɔhe wooo nifeemɔi ni tamɔ nɛkɛ lɛ amli, ejaakɛ wɔheɔ wɔyeɔ akɛ amɛkɛ Biblia mli tsɔɔmɔi kpãaa gbee. Kɛ́ mɛi tsɔɔ akɛ amɛyɛ bulɛ kɛhã wɔhemɔkɛyelii lɛ tamɔ bɔ ni wɔ hu wɔjieɔ bulɛ kpo kɛhãa amɛhemɔkɛyelii lɛ, wɔhiɛ sɔɔ amɛ waa.

Nɔ ni wɔbaasusu he yɛ sane nɛɛ mli

•  Mɛɛ Biblia mli shishitoo mlai kɔɔ sane nɛɛ he?

•  Ni kɛ́ maŋ lɛ mla biɔ ni mɔ fɛɛ mɔ kɛ ehe awo nifeemɔi nɛɛ amli hu?

•  Ani Yehowa Odasefoi kɛ amɛhe miiwo maŋ saji amli loo amɛmiifee pɔlitis yɛ gbɛ ko nɔ?

 Biblia mli shishitoo mlai titrii enyɔ ni nyiɛ sɛɛ nɛɛ yeɔ ebuaa wɔ ni wɔkpɛɔ wɔyiŋ yɛ sane nɛɛ he:

•   Nyɔŋmɔ pɛ esa akɛ wɔjá. Biblia lɛ kɛɔ akɛ: “Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.” (Luka 4:8) Bei pii lɛ, plɛji ni akɛɔ kɛ jakumaŋ lalai ni aláa lɛ amli wiemɔi lɛ tsɔɔ akɛ, mɔ lɛ miiwo shi akɛ ebaatuu ehe fɛɛ ehã emaŋ lɛ loo ebaasumɔ emaŋ lɛ fe nɔ fɛɛ nɔ. No hewɔ lɛ, Yehowa Odasefoi ahenilee eŋmɛɛɛ amɛ gbɛ ni amɛkɛ amɛhe awo nifeemɔi ni tamɔ nɛkɛ amli.

   Agbɛnɛ hu, Yehowa Odasefoi nuɔ he akɛ aflaŋaaŋamɔ ji jamɔ nifeemɔ loo amaga jamɔ, ni Biblia lɛ ekpɛlɛɛɛ enɛ nɔ. (1 Korintobii 10:14) Yinɔsaneŋmalɔi komɛi kɛɔ akɛ maŋ aflaŋai ji jamɔŋ okadii. Yinɔsaneŋmalɔ Carlton J. H. Hayes ŋma akɛ: “Maŋhedɔɔ tamɔ jamɔ nɔŋŋ, ni ekadimɔ nii titri kɛ nɔ ni ajáa lɛ ji aflaŋaa lɛ.” a Woloŋmalɔ Daniel P. Mannix ŋma yɛ mra be mli Kristofoi lɛ ahe akɛ: “Kristofoi kpoo akɛ . . . amɛbaashã afɔle amɛhã [Roma] nɔyelɔ lɛ mumɔ ni akɛɛ ebuɔ ehe lɛ​—ni enɛ tamɔ aflaŋaa ni akpoɔ akɛ abaaŋa ŋmɛnɛ lɛ nɔŋŋ.” b

  Eyɛ mli akɛ Yehowa Odasefoi ŋaaa aflaŋaa moŋ, shi amɛfiteee lɛ, amɛshãaa, loo amɛfeee nɔ ko ni tsɔɔ akɛ amɛbɛ bulɛ kɛhã aflaŋaa lɛ loo maŋ okadi kroko.

•   Gbɔmɛi fɛɛ yeɔ egbɔ yɛ Nyɔŋmɔ hiɛ. (Bɔfoi 10:34, 35) Biblia lɛ kɛɔ akɛ, “gbɔmɔ kome mli [Nyɔŋmɔ jɛ] efee gbɔmɛi ajeŋmaji fɛɛ.” (Bɔfoi 17:26) Enɛ hewɔ lɛ, Yehowa Odasefoi heɔ amɛyeɔ akɛ ejaaa akɛ abaabu maŋ ko loo mɛi ni wieɔ wiemɔ pɔtɛɛ ko akɛ amɛhi fe mɛi krokomɛi. Wɔkɛ woo hãa gbɔmɛi srɔtoi fɛɛ, ekɔɔɔ he eko he ni amɛjɛ loo he ni amɛyɔɔ.​—1 Petro 2:17.

 Yehowa Odasefoi eteee shi amɛwooo nɔyelii. Wɔheɔ wɔyeɔ akɛ nɔyelii fata “gbɛjianɔtoo” ni Nyɔŋmɔ eŋmɛ gbɛ ni ehi shi lɛ he. (Romabii 13:1-7) Wɔheɔ wɔyeɔ hu akɛ, esa akɛ Kristofoi abo hegbɛi ni yeɔ nɔ toi.​—Luka 20:25.

 Shi kɛ́ maŋ lɛ mlai bi ni wɔfee nɔ ko ni kɛ Nyɔŋmɔ mlai kpãaa gbee hu? Yɛ hei komɛi lɛ, wɔbaanyɛ wɔbi nɔyeli lɛ koni efee tsakemɔi yɛ mlai lɛ amli ehã wɔ. c Shi kɛ́ eba lɛ akɛ anyɛŋ afee tsakemɔi ni tamɔ nɛkɛ lɛ, no lɛ, Yehowa Odasefoi jɛɔ bulɛ mli amɛhalaa akɛ, amɛbaabo “Nyɔŋmɔ moŋ toi akɛ nɔyelɔ fe gbɔmɛi.”​—Bɔfoi 5:29.

 Dabi. Yehowa Odasefoi fĩii afã ko sɛɛ yɛ maŋ saji amli, ni amɛfeee pɔlitis. Kɛ́ wɔkɛɛɛ plɛji, wɔŋaaa aflaŋaa, ni wɔláaa jakumaŋ lalai lɛ, jeee akɛ wɔmiifee pɔlitis kɛmiite shi wɔmiiwo maŋ lɛ. Moŋ lɛ, wɔhiɔ shi yɛ nibii ni wɔkase yɛ Biblia lɛ mli lɛ anaa, ni no hewɔ ni wɔkɛ wɔhe wooo nifeemɔi nɛɛ amli lɛ.