Shisharalɔi babaoo yakwɛɔ nui ni kpelekeɔ shi kɛjɛɔ gɔŋ ko ni ehé gbɛ́i waa lɛ nɔ lɛ, gɔŋ nɛɛ bɛŋkɛ maŋ ko ni atsɛɔ lɛ Pagsanjan ni yɔɔ Philippines lɛ. Jɛmɛ ji he ni mipapa ni atsɛɔ lɛ Nardo Leron lɛ da yɛ, no mli lɛ efɔlɔi lɛ ohiafoi ji amɛ. Be ni ena bɔ ni juu kɛ fɔ̃ yaa nɔ yɛ he ni etsuɔ nii yɛ, polisi nitsumɔ lɛ, kɛ maŋ nɔyeli lɛ mli lɛ, edɔ lɛ waa, ni emli fũ.

 Mifɔlɔi tsu nii waa ko ni amɛkɛkwɛ amɛbii kpaanyɔ lɛ. Okwaa ni amɛyeɔ yɛ gɔji lɛ anɔ hewɔ lɛ, efɔɔ kaa akɛ, amɛshiɔ wɔ be kplaŋŋ. Bei pii lɛ, mi kɛ minyɛminuu nukpa Rodelio tsuɔ nii kɛkwɛɔ wɔhe, shi bei babaoo lɛ hɔmɔ yeɔ wɔ waa. Be ni wɔji gbekɛbii lɛ wɔnáaa be kwraa kɛshwɛ. Wɔteŋ mɔ fɛɛ mɔ ni baaná afii kpawo lɛ, esa akɛ eyatsu nii yɛ akooshi ŋmɔ mli, ni wɔtereɔ akooshi ni tsii kɛkpelekeɔ gɔji. Kɛ́ jatsu lɛ eko tsii bɔ ni wɔnyɛɛɛ wɔwó lɛ, wɔgbalaa yɛ shikpɔŋ.

 Wɔpapa fɔɔ wɔ yii waa bɔ ni wɔnyɛɛɛ he nɔ ko wɔfee, shi nɔ ni dɔɔ wɔ fe fɛɛ ji bɔ ni eyiɔ wɔmami lɛ. Wɔbɔ mɔdɛŋ akɛ wɔbaahã ekpa wɔmami yii, shi wɔnyɛɛɛ he nɔ ko wɔfee. Mi kɛ Rodelio kpaŋ akɛ kɛ́ wɔda fioo lɛ, wɔbaagbe wɔpapa. Kwɛ bɔ ni mishwe waa akɛ maná papa ni sumɔɔ wɔ!

 Be ni miye afii 14 lɛ, mipapa yiwalɛ nifeemɔi lɛ hã mihao ni mimlifu waa, no hewɔ lɛ, mishi shĩa. Be ni mishi shĩa lɛ, miwɔɔ he fɛɛ he kɛkɛ ni maná, enɛ hé be fioo, ni mibɔi wii shɛremɔ. Sɛɛ mli lɛ, nitsumɔ ni miná ji kɛ́ mɛi miitao amɛyakwɛ nui ni kpelekeɔ shi kɛjɛɔ gɔŋ lɛ nɔ lɛ, mikɛ amɛ taa lɛlɛ mli kɛyaa.

 Afii fio komɛi asɛɛ lɛ, mitee yunivɛsiti ni yɔɔ Manila. Shi akɛni yɛ otsii lɛ anaagbee lɛ mibatsuɔ nii yɛ Pagsanjan hewɔ lɛ, mináaa be kɛkase nii. Shihilɛ lɛ mli bawa waa kɛhã mi ni minaaa nɔ hewɔ ni miyɔɔ wala mli, ni ebafee tamɔ wii ni mishɛreɔ lɛ hu nyɛɛɛ aye abua mi. Mibɔi tsofai tamɔ kokein kɛ ehenɔi lɛ kɛnitsumɔ. Bei pii lɛ, tsofai nɛɛ hãa mɔ kɛ ehe woɔ bɔlɛnamɔ jeŋba sha mli. Miyɔse akɛ ohia, jalɛsane ni ayeee, kɛ amanehulu yɛ he fɛɛ he. Miná hetsɛ̃ mihã nɔyeli lɛ, ni mishwa lɛ yɛ naagbai nɛɛ ahewɔ. Mibi Nyɔŋmɔ akɛ, “Mɛni hewɔ shihilɛ lɛ yɔɔ nɛkɛ?” Mikɛ jamɔi srɔtoi shãra shi mináaa hetoo lɛ. Akɛni minijiaŋ je wui hewɔ lɛ, mitee nɔ mikɛ tsofai gbohii lɛ tsu nii fe tsutsu lɛ.

 Yɛ afi 1972 lɛ, nikaselɔi ni yɔɔ Philippines lɛ bua amɛhe naa koni amɛte shi amɛwo amralo lɛ. Mifata amɛhe kɛtee, ni basabasafeemɔ je mli kɛba. Amɔmɔ mɛi babaoo, ni nyɔji komɛi asɛɛ lɛ, akɛ mlai ni hãa asraafoi kudɔɔ nifeemɔi ni yaa nɔ yɛ maŋ lɛ mli lɛ bɔi nitsumɔ.

 Miyaje mitsutsu shihilɛ lɛ mli ekoŋŋ, ni mibɛ he ko ni miwɔɔ, shi mibashe gbeyei waa, akɛni mifata he kɛtse atua lɛ hewɔ. Bɔ ni afee ni maná shika kɛhé tsofai gbohii ni mikɛtsuɔ nii lɛ, mibɔi juu, ni naagbee lɛ, mibɔi ashawo feemɔ, ni niiatsɛmɛi kɛ maŋsɛɛbii titri kɛ mi náa bɔlɛ. Jeee mihe sane ko ji mahi wala mli loo magbo.

 No mli lɛ, Yehowa Odasefoi kɛ mimami kɛ minyɛminuu fioo lɛ ebɔi Biblia lɛ kasemɔ. Mipapa mli fuu waa, ni eshã woji ni amɛkɛkaseɔ Biblia lɛ. Shi fɛɛ sɛɛ lɛ, amɛfi shi ni abaptisi amɛ akɛ Odasefoi.

 Gbi ko lɛ, Yehowa Odasefonyo ko kɛ mipapa gba Biblia shiwoo ko he sane, shiwoo nɛɛ tsɔɔ akɛ wɔsɛɛ lɛ, abaaye jalɛ sane yɛ shikpɔŋ lɛ nɔ fɛɛ. (Lala 72:12-14) Hiɛnɔkamɔ nɛɛ ta mipapa tsuiŋ aahu akɛ, ekpɛ eyiŋ akɛ lɛ diɛŋtsɛ ebaatao mli. Jeee shi ni Nyɔŋmɔ ewo akɛ, ekɛ nɔyeli ni yeɔ jalɛsane baaba lɛ pɛ ena yɛ Biblia lɛ mli, shi ena Nyɔŋmɔ taomɔ nii kɛhã wumɛi kɛ tsɛmɛi hu yɛ mli. (Efesobii 5:28; 6:4) Be fioo sɛɛ lɛ, ekɛ minyɛmimɛi krokomɛi lɛ fɛɛ batsɔmɔ Odasefoi. Akɛni mibɛ shĩa hewɔ lɛ, mileee nibii ni tee nɔ nɛɛ ahe nɔ ko nɔ ko.

 Yɛ afi 1978 lɛ, mishi kɛtee Australia. Yɛ maŋ ni toiŋjɔlɛ kɛ shika yɔɔ mli nɛɛ po mli lɛ, mináaa toiŋjɔlɛ. Ebawa kɛhã mi akɛ makpa dãatɔɔ kɛ tsofai fɔji kɛnitsumɔ. Sɛɛ mli yɛ nakai afi lɛ mli lɛ, Yehowa Odasefoi basara mi. Minya nɔ ni amɛtsɔɔ mi yɛ Biblia lɛ mli ni kɔɔ shikpɔŋ ko ni toiŋjɔlɛ baahi nɔ lɛ he, shi akɛni mileee amɛ jogbaŋŋ hewɔ lɛ, minyaaa he akɛ mikɛ amɛ baabɔ.

 Enɛ sɛɛ be fioo lɛ, miku misɛɛ mitee Philippines miyaye otsii fioo. Minyɛmimɛi lɛ kɛɛ mi akɛ, mipapa ebɔ mɔdɛŋ ebatsɔ gbɔmɔ kpakpa agbɛnɛ, shi no mli ehe mlifu ni yɔɔ mitsui mli lɛ hewɔ lɛ misumɔɔɔ ni mikɛ lɛ ashara.

 Minyɛmiyoo fioo lɛ jɛ Biblia lɛ mli etsɔɔ mi nɔ hewɔ ni amanehulu kɛ jalɛsane ni ayeee efa yɛ shihilɛ mli lɛ. Bɔ ni oblayoo fioo ni bɛ niiashikpamɔ tsɔ lɛ hã misanebimɔi lɛ ahetoo lɛ hã minaa kpɛ mihe waa. Dani mashi lɛ, mipapa hã mi wolo ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ a lɛ. Ekɛɛ mi akɛ: “Kaasusu akɛ tsofai fɔji kɛnitsumɔ lɛ baahã oná onaagbai lɛ anaa tsabaa. Wolo nɛɛ baaye abua bo ni onine ashɛ nɔ ni otaoɔ lɛ nɔ.” Ekɛfata he akɛ kɛ́ mitee Australia lɛ miyatao Yehowa Odasefoi asɛɛgbɛ.

 Mikɛ mipapa ŋaawoo lɛ tsu nii, ni miyatao Yehowa Odasefoi a-Maŋtsɛyeli Asa yɛ he ni miyɔɔ lɛ yɛ Brisbane lɛ. Mikpɛlɛ koni akɛ mi akase Biblia lɛ. Biblia gbalɛi tamɔ nɔ ni yɔɔ Daniel yitso 7 lɛ kɛ Yesaia yitso 9 lɛ hã mina akɛ, wɔsɛɛ lɛ, Nyɔŋmɔ nɔyeli ni juu kɛ fɔ̃ bɛ mli lɛ baaye wɔnɔ. Mikase hu akɛ, wɔbaahi shi yɛ toiŋjɔlɛ mli yɛ Paradeiso shikpɔŋ lɛ nɔ. No mli lɛ, miisumɔ ni masa Nyɔŋmɔ hiɛ, shi mibayɔse akɛ ja miye mihe nɔ, mikpa dãatɔɔ kɛ tsofai gbohii kɛnitsumɔ, kɛ ashawo feemɔ lɛ hu dã. Mikɛ mijɔle lɛ kpa, ni mikpa dãatɔɔ kɛ tsofai gbohii kɛnitsumɔ. Be ni hemɔkɛyeli ni miyɔɔ yɛ Yehowa mli lɛ mli bɔi waa lɛ, misɔle mibi lɛ koni eye ebua mi ni mafee tsakemɔi krokomɛi.

 Fiofio lɛ, mibayɔse akɛ nɔ ni mikaseɔ lɛ nyɛɔ etsakeɔ mɔ. Biblia lɛ kɛɔ akɛ, kɛ́ wɔmia wɔhiɛ lɛ wɔbaanyɛ wɔwo “subaŋ hee lɛ.” (Kolosebii 3:9, 10) Be ni mibɔɔ mɔdɛŋ akɛ mafee tsakemɔi nɛɛ, miyɔse akɛ nɔ ni minyɛmimɛi lɛ kɛɛ mi yɛ tsakemɔi ni mipapa efee lɛ he lɛ baanyɛ afee anɔkwale. Agbɛnɛ, nɔ najiaŋ ni mimli baafu ni mafee basabasa lɛ, minu he akɛ esa akɛ mikɛ ehe ake lɛ. Naagbee lɛ, mikɛ mipapa he ke lɛ, ni mijie ehe hetsɛ̃ ni miná kɛjɛ migbekɛbiiashi tɔ̃ɔ lɛ yɛ mimli.

 Be ni miji oblanyo lɛ, bei pii lɛ minyiɛɔ mɛi krokomɛi asɛɛ kɛyafiteɔ nii loo wɔkɛ wɔhe woɔ jeŋba gbohii amli. Kɔkɔbɔɔ ni Biblia lɛ kɛhãa lɛ ba mli yɛ migbɛfaŋ​—naanyobɔɔ gbonyo hã midũ gbɛ. (1 Korintobii 15:33) Shi miná nanemɛi kpakpai yɛ Yehowa Odasefoi lɛ ateŋ, ni amɛhã mibatsɔ gbɔmɔ kpakpa. Odasefoi lɛ ateŋ nɔŋŋ ni mikɛ miŋa Loretta ni mikɛhi shi amrɔ nɛɛ kpe yɛ. Mi kɛ Loretta fɛɛ tsɔɔ mɛi bɔ ni Biblia lɛ baanyɛ aye abua amɛ.

 Yɛ Biblia lɛ yelikɛbuamɔ naa lɛ, mipapa batsɔ mɔ ni mikpaaa gbɛ akɛ ebaanyɛ etsɔ, no ji ebatsɔ wu kpakpa kɛhã mimami kɛ Kristofonyo heshibalɔ ni sumɔɔ toiŋjɔlɛ. Yɛ afi 1987 be ni abaptisi mi akɛ Yehowa Odasefonyo lɛ sɛɛ lɛ, mikɛ mipapa kpe ni efua mi, enɛ ji be klɛŋklɛŋ ni efua mi yɛ miwala shihilɛ mli!

 Mipapa tee nɔ ekɛ mimami fee ekome kɛshiɛ Biblia lɛ hiɛnɔkamɔ lɛ amɛhã mɛi, ni amɛfee enɛ nɔ ni fe afii 35 sɔŋŋ. Ebatsɔ nuu hiɛshikalɔ ni sumɔɔ mɔ, ni ale akɛ mɔ ni yeɔ ebuaa mɛi. Nakai afii lɛ mli fɛɛ lɛ, mibɔ mɔdɛŋ mijie bulɛ kɛ suɔmɔ kpo mitsɔɔ lɛ. Misumɔɔ ni mɛi ale akɛ ebi ji mi! Egbo yɛ afi 2016, shi kɛ́ mikai lɛ lɛ mimii shɛɔ mihe waa, ejaakɛ mile akɛ Biblia tsɔɔmɔi ni wɔhi shi yɛ naa lɛ hã wɔnyɛ wɔfee tsakemɔi wuji yɛ wɔshihilɛ mli. Mibɛ nyɛɛ ko dɔŋŋ kɛhã mɔ ko. Eŋɔɔ minaa akɛ mibale miŋwɛi Tsɛ ni ji Yehowa Nyɔŋmɔ, mɔ ni ewo shi akɛ ebaafo nibii fɛɛ ni kɛ haomɔi baa wekui ni yɔɔ he fɛɛ he lɛ anɔ lɛ sɛɛ lɛ.