Te sanga ne So ne war goa wène
Té Wén 7
Te sanga ne So ne war goa wène
Ha wén ge yo ne gasa mo mo go ha ngimo fet e nde? (1)
O lema goa ne ó, ne meng? (2, 3)
E lema goa a zou ngé kando mo e? (4)
Me lema goa a ngé te ngimo e? (5, 6)
So a zea hio goa mo fet? (7)
1. Goa, yo ne toa wén ne sila mgbe-bém a So. Lema nde me go ne ngimo soé fet. Wène be tè gasa dan me sanga. Jéhovah ne gasa ne ngaya pénte; mo ndang wène a zea goa mo bo. Me a goa So ngimo fet nde?—Psaume 65:2; 1 aThessalonicien 5:17.
2. Goa ne ma war ka o lema loukoso ne So. Lema nde o go ka ne So ndang sona, Jéhovah. Ha ngimo ka Jésus ba doung a zou nou, a goa ka ne bafa, bo ne mawi ne te na. Lema nde o fine o de ka gbesi. (Matthieu 4:10; 6:9) Ma, lema nde goa mo bo fet a doung ne ling Jésus. Deamo mengi osa nde o zoka doungonou be Jésus ne zioa, ne o osa fine nde o ngdéa sila o fet a sadaka mo gasa guene ka wène ha.—Jean 14:6; 1 Jean 2:1, 2.
3. Ka o a goa, o to wén zang sila o fet ha So. Ngdé goa mo bo a doung ne ndanga wén ka o yamba ne e ndong ka o toli a li mbéti na. (Matthieu 6:7, 8) O lema goa So a mgbandi fet ne doungonou ka sila o ngoya, lema nde doungonou bo a osi nde o a youo wene. Ngasé me go ne zang sila me So be ze yo. (1 Samuel 1:12, 13) Ka me ngoy mo go So a zou ma wén ka zo ne me gbate, lema nde me doung a ma mgbandi ka yo ne sélélé, ka li wi lem zok me na.—Marc 1:35.
4. Me lema goa mo a wén zou ngé kando mo e nde? A wén zou doungonou be me hine wène. (aPhilippien 4:6, 7) Goa mo ka Jésus ba osi ha o, osi nde o lema goa a wén zou ling So, ne a wén zou dea mo ka sila Jéhovah ngoya. O lema goa fine a wén kpamo bo, a wén zou pardon mo sembo bo o, o lema goa fine mo to nde wène a ha ngaya o, o pén ne zou hio ngdanga mo. (Matthieu 6:9-13) O de ngdanga ne war goa mo bo o na. Lema nde o go fine a wén zou mo fet ka sila wa ngoya.—1 Jean 5:14.
5. Me lema goa a ngimo fet ka sila me pouso me mo ha mersi a wène ne loukoso wène. (1 Chronique 29:10-13) Me lema goa a ngimo ka me kpa hio ngawen, ha ngimo ka mekara mo beme lem fin na. (Psaume 55:22; 120:1) Ne dedea nde me go songsi mo to nde me yong mo. (Matthieu 14:19) Jéhovah ngoy nde o go “a ngimo fet.”—aÉphésien 6:18.
6. Ka o dea ma gasa sembo, bosi mo fet ne goa mo. Lema nde o ani Jéhovah mo to nde wène a de dede sila ne o ne wène a ha pardon a o. Ka o gbasa sembo bo a So, ne ka o dea ngaya bo fet mo ngdé ne kinong, So ne “sanga mo a pardon ha o.”—Psaume 86:5; aProverbe 28:13.
7. Jéhovah ze ne goa be hio wi ka de mo nzeng. Mo to nde So a ze goa mo be me, lema nde me de ngaya mo de mo lem ne mbonga bèa. (aProverbe 15:29; 28:9) Ka me a goa, doung ne sila mgbe-bém. (Luc 18:9-14) Lema fine nde me de mo a lem ne goa mo be me. Mengi me be osi nde me mekara, ne me takiri ka mo lem ne wén ka me to. Ka ne war dea mo ndong ke ngding Jéhovah be kifiri wén a hio goa mo be me.—aHébreu 11:6.
