« Lò mo té piti, mo frè té ka maltrété mo touléjou Bondjé fè jou, é fason i té ka palé pou mo-a pa té bon menm menm menm. Lò mo vin maryé, mo bèlmè kontinyé asou menm balan-an. Li ké mo bopè té ka trété mo kou roun èsklav. Sèl bagaj mo té ka wè, a té tchwé mo kò » (Madhu a, End).

 Organisation mondiale de la Santé ka di ki « toupatou asou latè-a yé ka fè fanm-yan soufri ». Dapré sa òrganizasyon-an, asou trwa fanm, i gen roun yé ja maltrété ouben yé ja touché l’ roun fason yé pa té divèt.

 Si sa ja rivé ou, pitèt ou pa ka santi ou kò an sékirité, paské nenpòrt ki koté ou ké alé, yé ké riské mal palé pou ou, ouben maltrété ou, ouben touché ou roun fason yé pa divèt. Akoz di tout méchansté yé ka fè fanm-yan, pitèt ou ka pansé ki près tout moun ka di fanm-yan pa gen valò. Mé ès sa vré ? Ès fanm-yan vréman gen valò pou Bondjé ?

 Vèrsé : « [Bondjé] fè yé wonm ké fanm » (Genèse 1:27).

 Sa sa lé di : Bondjé kréyé ni wonm ni fanm. Pou li, yé toulédé mérité rèspè. Anplis di sa, i ka doumandé mouché-ya ki maryé « kontan [yé] madanm kou [yé] pròp kò ». É yé pa divèt sèrvi paròl ki rèd, ni divini vyolan pou éséyé kontrolé yé madanm (Éphésiens 5:33 ; Colossiens 3:19). Sa klè kou dlo ròch : sékirité fanm-yan gen bokou enpòrtans pou Bondjé.

 « Lò mo té piti, roun moun annan mo fanmi touché mo roun fason i pa té divèt. Lò mo té gen 17 an, mo patron di mo i té ké mété mo dèrò di antrépriz-a si mo pa té ka kouché li. É lò mo vin gran, mo mari, moun annan mo fanmi, ké vwazen-yan té gen labitid fè mo ronté épi trété mo san rèspè. Mé pita annan mo lavi, mo anprann konnèt Jéova b, Sa-la ki kréyé nou. I ka rèspèkté fanm-yan. Sa idé mo vin sir ki i kontan mo é ki mo gen valò pou li » (Maria, Arjantin).

 Vèrsé : « I gen zanmi ki pi fidèl pasé roun frè » (Proverbes 18:24).

 Sa sa lé di : Roun vré zanmi ké idé ou. Si ou ka santi ou bézwen palé, chwézi roun moun ou ka fè konfyans, épi di li tousa ou ka rousanti.

 « Pannan 20 an, mo pa janmen di pésonn ki yé té touché mo roun fason yé pa té divèt. Akoz di sa, mo tchò té gro, mo té angwasé ké déprimé. Mé lò mo di roun moun ki té paré kouté mo tousa ki té rivé mo, sa soulajé mo tèlman ! » (Elif, Tirki).

 Vèrsé : « Jité tout zòt enkyétid asou li, paské i ka pran swen di zòt » (1 Pierre 5:7).

 Sa sa lé di : Lò ou ka priyè, Bondjé ka vréman kouté ou (Psaumes 55:22 ; 65:2). Kou i ka pran swen di ou, i pouvé idé ou konprann ki ou gen valò pou li.

 « Anprann konnèt Jéova idé mo alé pi byen épi géri tout soufrans mo té gen annan mo tchò. Aprézan, mo ka priyè Bondjé é mo ka di li tousa mo gen annan mo tchò. I sa roun zanmi ki ka vréman konprann sa mo ka rousanti » (Ana, Béliz).

 Vèrsé : « Jéova […] ké défann sa-ya ki pa gen ni manman ni papa épi sa-ya ki krazé, pou moun asou latè-a pa fè yé pè ankò » (Psaume 10:17, 18).

 Sa sa lé di : Titalò, Bondjé ké fini ké tout vyolans épi ké tout méchansté yé ka fè fanm-yan.

 « Lò mo anprann ki titalò Jéova ké fini ké tout méchansté yé ka fè fanm-yan ké tifi-ya, a té kousidiré yé té ka froté roun chwit ti dilwil koko asou mo. A konsa mo viré gen lapè annan mo tchò » (Roberta, Mèksik).

 Pou anprann plis bagaj asou èspwar Labib-a ka bay, asou sa ki pouvé fè ou gen konfyans annan so promès, é asou fason Témwen Jéova-ya pouvé idé ou jòdla grasa Labib-a, doumandé moun-an ki bay ou sa ti dépliyan-an vini wè ou, san ou pa bézwen péyé.

 Télécharjé sa artik-a pou enprimé l’.