ARTIK POU ÉTIDYÉ 41
Kouman nou pouvé idé sa-ya ki ka étidyé Labib-a vansé pou yé rivé batizé ?(1é parti-a)
« Tout moun ka byen wè zòt sa roun lèt di Jézi Kris nou ékri gras a travay nou fè-a » (2 COR. 3:3).
KANTIK 78 « Toi qui enseignes la Parole de Dieu »
KOUTWÉY ASOU SA NOU KÉ WÈ *
Ès i gen roun bagaj ki ka bay frè ké sò-ya annan roun asanblé plis tchò kontan pasé wè roun moun ki ka étidyé Labib-a é ki yé kontan, batizé ? (gadé paragraf 1).
1. Kouman 2 Corinthiens 3:1-3 ka fè nou konprann ki étidyé Labib-a ké roun moun é wè li batizé sa roun bèl kado di Jéova ? (gadé zimaj-a anlè prémyé paj-a).
KISA to ka santi lò roun moun ki étidyé Labib-a ké roun moun annan to asanblé ka batizé ? To divèt kontan toubonnman ! (Mat. 28:19). É si a ké to sa moun-an étidyé, to divèt pi kontan ankò ! (1 Thess. 2:19, 20). Nouvo disip-ya sa dé « lèt » ki ka di ki ni ansényan-an ni asanblé-a « vayan » (li 2 Corinthiens 3:1-3).
2. a) Ki késyon enpòrtan nou divèt réponn, é poukisa ? b) Roun léson biblik a kisa ? (gadé nòt-a).
2 Pannan sa kat lannen ki pasé-ya, Témwen Jéova-ya bay dis milyon léson biblik * chak mwa asou tout latè-a. Mé bèl ankourajman ! É pannan sa menm lannen-yan, chak lannen, 280 000 moun batizé Témwen Jéova é konsa yé divini disip Jézi. Kouman nou pouvé idé ankò plis moun ki ka étidyé Labib-a batizé ? Jéova ka kontinyé bay moun posibilité divini so Témwen. A pou sa nou ka fè tousa nou pouvé pou idé yé batizé san pédi tan. I pa ka rété bokou tan ! (1 Cor. 7:29a ; 1 Pierre 4:7).
3. Kisa nou ké wè annan sa artik-a ?
3 Kou sa enpòrtan pou nou idé moun-yan divini disip jòdla, Kolèj santral-a chaché kouman idé plis moun ki ka étidyé Labib-a batizé. A pou sa yé doumandé plizyèr filyal sa yé ka pansé asou sa. Annan sa artik-a ké ròt-a nou ké wè apré, nou ké wè sa pyonyé, misyonèr ké rèsponsab sirkonskripsyon-yan ki gen bokou èspéryans pouvé anprann nou * (Prov. 11:14 ; 15:22). Tout lidé yé bay, ka montré sa ansényan-an ké étidyan-an pouvé fè pou étidyan-an pouvé profité ankò plis di so léson biblik. Annan sa artik-a, nou ké wè senk bagaj roun ansényan divèt idé étidyan-an fè pou i rivé chanjé ké batizé.
ÉTIDYÉ LABIB-A CHAK SIMENN
Doumandé to étidyan si zòt pouvé asiz roun koté pou kontinyé palé di Labib-a (gadé paragraf 4-6).
4. Kisa nou divèt sonjé si nou lé idé roun étidyan vansé pou i rivé batizé ?
4 Bokou proklamatèr ka bay moun léson biblik douvan yé lapòt kaz. Sa ka idé yé kontinyé anvi konnèt Labib-a. Mé lò a konsa, souvan, to pa pouvé rété lontan é a pa chak simenn to ka wè moun-an. Pou idé roun moun kontinyé anvi étidyé Labib-a, sèrten proklamatèr ka doumandé moun-an so niméro téléfonn épi, anvan yé routounen wè l’, yé ka aplé l’ ouben yé ka voyé l’ roun mésaj pou palé di roun bagaj ki annan Labib-a. Roun léson biblik konsa pouvé fèt pannan plizyèr mwa. Mé ès roun moun pouvé rivé chanjé ké batizé si i pa ka pran plis tan é si i pa ka fè plis éfòr pou étidyé Labib-a ? Non i pa pouvé.
5. Kisa Jézi di annan Luc 14:27-33, é kouman nou pouvé sèrvi sa lidé-a pou idé moun-yan ki ka étidyé Labib-a ké nou ?
5 Roun jou, Jézi èspliké ki si roun moun lé divini so disip, sa ké kouté l’ roun bagaj. I pran èkzanp roun wonm ki té lé fè roun kaz é roun rwa ki té lé alé fè lagèr ké rounòt rwa. Jézi byen di ki mouché-a té divèt asiz anvan pou ‘kalkilé konmyen soumaké sa té ké kouté l’, é wè si i té gen asé pou fini kaz-a’. É kanta pou rwa-a li menm i té divèt an prémyé alé wè moun-yan ki té ka bay li konsèy, pou wè si so larmé té pouvé alé briga ké so lèlmi (li Luc 14:27-33). Jézi té ka montré ki roun moun ki lé divini so disip divèt byen savé sa i ké divèt fè pou swiv li. A pou sa nou divèt ankourajé tout sa ki lé divini disip Jézi, étidyé Labib-a ké nou chak simenn. Kouman nou pouvé fè sa ?
6. Kisa to pouvé fè pou idé to étidyan alé douvan ?
6 Pou koumansé, si to ka kozé ké moun-an douvan so lapòt kaz éséyé rété roun tibi pi lontan. Parèkzanp, pasé to palé di roun vèrsé rounso annan Labib-a to pouvé pran dé vèrsé. Lò to étidyan abitchwé kozé ké to pi lontan, to pouvé doumandé li koté zòt pouvé asiz pou kontinyé kozé-a. Sa i ké réponn to ké fè to savé si étidyé Labib-a enpòrtan pou li. Apré sa, pou idé l’ vansé ankò pi vit to pouvé menm doumandé l’ si i lé étidyé Labib-a dé fwa annan simenn-an. Mé, étidyé roun fwa ouben dé fwa annan simenn-an pa ké asé pou idé étidyan-an alé douvan.
BYEN PRÉPARÉ TO KÒ
Byen préparé to kò anvan chak léson biblik, é montré étidyan-an kouman i pouvé préparé so kò (gadé paragraf 7-9).
7. Kouman roun ansényan pouvé byen préparé so kò ?
7 Pou to sa roun bon ansényan, to divèt byen préparé to kò anvan chak léson biblik. Pou koumansé, li paragraf-ya ké vèrsé Labib-ya zòt ké li pannan léson-an. Épi chaché wè lidé pi enpòrtan annan paragraf-ya. Pran tan byen réfléchi asou tit chapit-a, entèrtit-ya, késyon-yan, vèrsé-ya yé ka doumandé nou « li » ké zimaj-ya. Désidé osi, dipi aprézan, ki vidéyo to ké sèrvi. Épi, toupannan to ka sonjé sa to étidyan bézwen, éséyé wè kouman to pouvé èspliké sa lidé-a roun fason ki senp é ki klè kou dlo ròch. A konsa i ké pouvé byen konprann yé é apliké yé annan so lavi (Néh. 8:8 ; Prov. 15:28a).
8. Kou Pòl ka di annan Colossiens 1:9, 10, kisa nou pouvé doumandé Jéova pou nou étidyan-yan ?
8 Lò to ka préparé to kò pou to léson biblik, pa bliyé priyè Jéova pou to étidyan é pou sa i bézwen. Doumandé l’ idé to sèrvi Labib-a pou touché so tchò (li Colossiens 1:9, 10). Dipi aprézan, doumandé to kò ès i gen bagaj étidyan-an pa ké rivé konprann ouben asèpté lanmenm. Épi sonjé ki sa to lé, a idé étidyan-an vansé pou i rivé batizé.
9. Kouman roun ansényan pouvé idé so étidyan préparé so léson ?
9 Roun léson biblik ki ka fèt chak simenn ké idé étidyan-an kontan tousa Jéova ké Jézi fè, é bay li anvi konnèt plis bagaj (Mat. 5:3, 6). Mé pou i byen profité di so léson, i divèt mété tout so lidé asou sa i ka anprann. Montré li ki, pou i rivé fè sa, sa trè enpòrtan pou i préparé so kò anvan chak léson : i divèt li chapit-a é réfléchi asou fason i pouvé fè sa i ka anprann. Kouman to pouvé idé l’ préparé so kò ? Préparé roun chapit ké li *. Montré l’ kouman i pouvé trouvé répons késyon paragraf-ya é montré l’ ki si i ka soulinyé déztrwa mo, sa ké idé l’ sonjé répons-a. Épi doumandé l’ kouman li menm té ké èspliké sa lidé-a. Sa ké idé to wè si i byen konprann. Mé to pouvé ankourajé to étidyan fè rounòt bagaj ankò.
ANPRANN LI PALÉ KÉ JÉOVA É KOUTÉ L’ CHAK JOU
Anprann to étidyan kouté Jéova ké palé ké li (gadé paragraf 10-11).
10. Poukisa nou divèt li Labib-a chak jou, é kisa roun moun ki ka étidyé Labib-a divèt fè pou sa i ka li-a itil pou li ?
10 Anplis di léson étidyan-an gen ké so ansényan chak simenn, i gen bagaj i divèt fè tousèl chak jou. I divèt kouté Jéova épi palé ké li. I pouvé kouté Bondjé lò i ka li Labib-a touléjou (Jos. 1:8 ; Ps. 1:1-3). Montré li kouman i pouvé sèrvi « Programme de lecture de la Bible » asou jw.org. I pouvé enprimé l’ si i lé *. Pou idé l’ byen profité di sa i ka li annan Labib-a, a pou to ankourajé l’ réfléchi asou sa sa ka anprann li asou Jéova, é kouman i pouvé apliké sa annan so lavi (Actes 17:11 ; Jacq. 1:25).
11. a) Kouman roun étidyan pouvé anprann priyè kou Jéova lé ? b) Poukisa sa enpòrtan ki roun étidyan priyè Jéova souvan ?
11 Ankourajé to étidyan priyè pou palé ké Jéova touléjou. Pou koumansé léson-an é pou fini l’, priyè Jéova ké tout to tchò é palé di étidyan-an annan to lapriyè. Lò i ké kouté to, i ké anprann priyè ké tout so tchò é i ké anprann priyè Jéova annan non Jézi (Mat. 6:9 ; Jean 15:16). Lò i ké li Labib-a touléjou, i ké kouté Bondjé, é lò i ké priyè l’ i ké palé pou li. Sonjé kouman sa ké fè li vin pi pròch di Jéova ! (Jacq. 4:8). Si i ka fè sa touléjou sa ké idé li vansé pou i rivé vouwé so kò pou Bondjé é batizé. Ki ròt bagaj ké idé l’ ?
IDÉ L’ DIVINI ZANMI KÉ JÉOVA
12. Kouman roun ansényan pouvé idé so étidyan divini zanmi ké Jéova ?
12 Sa roun étidyan ka anprann annan so léson biblik divèt touché so tchò ; i pa divèt wè sa kou roun bon bagaj rounso. Poukisa ? Paské nou tchò (sa nou ka santi, sa nou anvi) ka fè nou aji. Sa Jézi té ka ansényé té lojik, é moun-yan té ka pran plézi kouté l’. Mé si yé té ka swiv li osi, a paské i té ka touché yé tchò (Luc 24:15, 27, 32). To étidyan divèt konprann ki Jéova sa roun vré moun, é ki i pouvé gen roun lanmityé ki fò ké li. I divèt wè li kou so Papa, so Bondjé, so Zanmi (Ps. 25:4, 5). A pou sa to divèt byen fè li wè bèl kalité Bondjé gen (Ex. 34:5, 6 ; 1 Pierre 5:6, 7). Kèlkéswa sa zòt ka étidyé, byen fè li wè so kalité, kou so lanmou, so bonté, so konpasyon. Jézi di ki « pi gran ké prémyé koumannman-an » a « To divèt kontan Jéova to Bondjé » (Mat. 22:37, 38). Éséyé idé étidyan-an kontan Jéova ké tout so tchò.
13. Kouman roun moun ki ka étidyé Labib-a pouvé anprann bèl kalité Jéova gen ?
13 Lò to ka ansényé to étidyan, di li poukisa to kontan Jéova toubonnman. Sa ké idé li konprann ki li menm osi divèt divini zanmi ké Jéova é anprann kontan li (Ps. 73:28). Ès i gen annan roun vèrsé ouben annan liv zòt ka étidyé-a roun lidé ki ka montré roun kalité Jéova gen, kou so lanmou, so jistis, so sajès ouben so pwisans ? Ès sa lidé-a ka touché to tchò èspésyalman ? Atò, di to étidyan sa, é fè li savé ki a roun annan so kalité-ya ki ka fè to kontan to Papa ki annan syèl-a. Mé roun moun ki ka étidyé Labib-a gen ròt bagaj ankò pou fè pou vansé pou i rivé batizé.
ANKOURAJÉ L’ VINI ANNAN RÉINYON ASANBLÉ-A
Ankourajé to étidyan koumansé vini annan nou réinyon bònò ! (gadé paragraf 14-15).
14. Dapré Hébreux 10:24, 25, kouman réinyon-yan pouvé idé roun étidyan vansé ?
14 Lò nou ka étidyé Labib-a ké roun moun, nou lé i batizé. Pou idé l’ nou divèt ankourajé li vini annan réinyon asanblé-a. Ansényan-yan ki gen bokou èspéryans ka di ki a étidyan-yan ki ka vini annan réinyon-yan dipi yé koumansé étidyé ki ka alé douvan pi vit (Ps. 111:1). Roun ran ansényan ka èspliké yé étidyan ki, léson biblik ké réinyon-yan ka maché ansanm é ki yé ké anprann bagaj annan réinyon-yan ki yé pa ké anprann annan yé léson biblik. Li Hébreux 10:24, 25 ké to étidyan é byen fè li wè bénédiksyon i ké rousouvwè si i ka vini annan réinyon-yan (li). Montré li vidéyo-a Kisa ki ka pasé annan roun sal di Rwayonm ? *. Idé l’ pran labitid vini chak simenn annan réinyon-yan.
15. Kouman nou pouvé ankourajé nou étidyan vini annan réinyon-yan chak simenn ?
15 Kisa to pouvé fè si to étidyan pa ka vini chak simenn annan réinyon-yan ouben si i pòkò janmen vini annan roun réinyon ? Di li ki bagaj to té kontan anprann annan roun réinyon to alé i pa gen lontan. Lò i ké wè kouman to kontan réinyon-yan pitèt i ké plis anvi vini. Bay li Tourdégard-a ké Cahier Vie et ministère pou mwa-a. Montré li sa nou ké wè annan prochen réinyon-an, épi doumandé li ki parti ki té ké entérésé l’ plis. Sa i ké wè ké tandé annan so prémyé réinyon ké diféran di tousa i ja wè annan ròt rélijyon-yan ! Asiré pa pitèt i pa ké bliyé sa (1 Cor. 14:24, 25). Anplis di sa, annan nou réinyon i ké kontré ké moun ki gen bèl kondwit é ki ké idé l’ vansé pou i rivé batizé.
16. Kisa nou pouvé fè pou nou étidyan vansé pou i rivé batizé, é kisa nou ké wè annan artik ki ka vini dèyè-a ?
16 Kisa nou pouvé fè pou nou étidyan vansé pou i rivé batizé ? Annou ankourajé étidyan-an étidyé Labib-a chak simenn é préparé so kò anvan chak léson pou i konprann ki étidyé Labib-a enpòrtan. Annou ankourajé li palé ké Jéova é kouté l’ touléjou é divini zanmi ké li. É pou fini, annou bay li anvi vini annan nou réinyon. (Gadé ankadré-a « Sa étidyan-an divèt fè ».) Mé kou nou ké wè annan prochen artik-a, i gen senk ròt bagaj roun ansényan divèt fè pou idé roun étidyan batizé.
KANTIK 76 Dis, qu’est-ce que tu ressens ?
^ § 5 Anprann roun moun roun bagaj, sa lé di idé l’ chanjé fason i ka wè, sa i ka santi, ké fason i ka aji. Tèks pou lannen 2020-a, Matthieu 28:19, ka fè nou sonjé ki sa enpòrtan pou nou bay léson biblik. Nou divèt montré moun-yan sa yé divèt fè pou divini disip Jézi é pou yé batizé. Annan sa artik-a ké sa-la ki ka vin apré, nou ké wè kouman nou pouvé divini pi vayan annan sa travay-a ki enpòrtan toubonnman.
^ § 2 POU BYEN KONPRANN : To ka bay roun léson biblik lò to ka palé souvan ké roun moun pou fè li konprann vérité enpòrtan ki annan Labib-a. To pouvé konté roun léson biblik si, apré to èspliké moun-an kouman sa ka pasé, zòt fè l’ dé fwa é si to ka pansé ki sa ké kontinyé.
^ § 3 Annan sa artik-ya nou ké jwenn osi konsèy yé bay nou annan Ministère du Royaume jwiyé 2004 jiska mé 2005 annan parti « Dirigeons des études bibliques qui favorisent les progrès ».
^ § 9 Gadé vidéyo kat minit-a Apprenons à nos étudiants à se préparer (to pouvé trouvé l’ asou JW Library®, annan MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES).
^ § 10 Ou ka trouvé l’ annan LA BIBLE ET VOUS > OUTILS D’ÉTUDE DE LA BIBLE.
^ § 14 Asou JW Library®, alé annan MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
