1-2. Poukisa nou ka alé chak lannen annan Mémoryal-a ?

 I GEN apéprè 2000 lannen, Jézi bay so lavi pou nou, é gras a sa, nou gen posibilité viv pou tout-tan. Lannwit anvan i mouri, i di so disip-ya sonjé sa i fè ké bokou lanmou gras a roun sérémoni tout senp. Annan sa sérémoni-a, yé té ké sèrvi dipen ké diven (1 Cor. 11:23-26).

² Nou ka obéyi lòrd Jézi bay nou-a paské nou kontan li bokou (Jean 14:15). Chak lannen, pannan lépòk Mémoryal-a, nou ka montré ki nou kontan sa i fè pou nou lò nou ka pran tan réfléchi asou sa so lanmò lé di pou nou é lò nou ka pran tan priyè pou sa. Anplis di sa, nou kontan pasé plis tan annan prédikasyon-an pou envité roun patché moun vini ké nou pou sa lévènman-an ki enpòrtan. É pou fini, nou byen désidé vini annan Mémoryal-a é nou pa ka lésé anyen anpéché nou fè l’.

3. Di kisa nou ké palé annan sa artik-a ?

³ Komémorasyon lanmò Jézi vréman enpòrtan pou sèrvitèr Jéova-ya. Pou montré ki sa enpòrtan pou yé, yé ka fè trwa bagaj : 1) yé ka rèspèkté modèl Jézi bay-a, 2) yé ka envité moun-yan pou Mémoryal-a é 3) yé ka fè Mémoryal-a menm lò sitiasyon-an rèd. A di sa trwa bagaj-ya nou ké palé annan sa artik-a.

4. Ki vérité nou ka répété chak lannen annan diskour Mémoryal-a, é poukisa nou pa janmen divèt di ki sa vérité-ya pa enpòrtan ? (Luc 22:19, 20).

⁴ Chak lannen, pou Mémoryal-a, nou ka kouté roun diskour ki ka apiyé asou Labib-a é ki ka réponn plizyèr késyon. I ka èspliké nou poukisa nou bézwen roun ranson é kouman ; gras a lanmò roun moun, Bondjé pouvé pardonnen péché roun patché moun. I ka fè nou sonjé osi kisa dipen ké diven-an ka réprézanté, é kimoun ki pouvé manjé dipen-an épi bwè diven-an (li Luc 22:19, 20). Pou fini, i ka bay nou lokazyon réfléchi asou bénédiksyon sa-ya ki gen èspwar viv asou latè-a ké gen (Is. 35:5, 6 ; 65:17, 21-23). A pa pou nou janmen di ki sa vérité-ya pa enpòrtan. Milyar moun pa konnèt yé é yé pa savé ki sakrifis Jézi gen valò. Anplis di sa, menm si yé ka fè Mémoryal so lanmò, yé pa ka fè l’ soulon modèl i bay nou-a. Poukisa ?

5. Apré lanmò près tout apot-ya, poukisa moun-yan arété swiv modèl Jézi bay nou-a ?

⁵ Roun ti moso tan apré lanmò près tout apot-ya, fo krétyen koumansé antré annan asanblé-a (Mat. 13:24-27, 37-39). Yé sonmen « ansèyman pou bloublou moun, pou fè disip-ya swiv yé » (Actes 20:29, 30). Parèkzanp, sa krétyen-yan ansényé ki Bondjé pa « bay Kris rounsèl kou pou i poté péché roun patché moun », kou Labib-a ka di. Yé té ka di ki yé té ké divèt répété so sakrifis san yé pa té jen fini fè l’ (Héb. 9:27, 28). Jòdla, roun patché moun ki sensèr ka krè sa ansèyman-an ki pa vré. Yé ka alé légliz chak simenn, pitèt menm chak jou, pou yé fè sa sèrten moun ka aplé « le sacrifice de la Messe b ». I gen ròt moun ki pa ka fété lanmò Jézi souvan, mé yé pa djè savé sa so sakrifis lé di. Roun ran ka doumandé yé kò : « Ès Bondjé pouvé vréman pardonnen mo péché gras a lanmò Jézi ? » Poukisa yé ka pozé yé kò sa késyon-yan ? Détan, a akoz sa ki ka di ki sakrifis Jézi pa pouvé pèrmèt Bondjé pardonnen nou péché. Mé kouman vré disip Jézi-ya rivé trapé lavérité asou sa é kouman yé fè tout moun savé sa ?

6. An 1872, kisa roun group étidyan Labib-a rivé konprann ?

⁶ Dipi 19^è syèk-a, roun group étidyan Labib-a koumansé byen étidyé sa i ka di. A Charles Russell ki té ka dirijé yé. Yé té ka chaché konprann kisa sakrifis Jézi lé di vréman é kouman nou divèt sélébré so lanmò. An 1872, yé konprann ki Jézi té byen bay roun ranson pou sové tout moun. Mé yé pa tchenbé sa vérité-a pou yé menm. Yé fè tout moun konnèt li. Yé èspliké l’ annan liv, journal papyé ké ròt bagaj. É vitman, yé koumansé sélébré Mémoryal-a roun fwa chak lannen sèlman, kou prémyé krétyen-yan té ka fè.

7. Kisa tousa Charles Russell ké so zanmi fè ka mennen pou nou ?

⁷ Sa sa krétyen-yan ki té sensèr chaché i gen lontan ka idé nou bokou jòdla. A konsa Jéova louvri nou wéy asou sa sakrifis Jézi lé di é sa i ka pèrmèt nou gen (1 Jean 2:1, 2). Nou anprann osi ki Labib-a ka palé di dé èspwar pou sa-ya ki ka fè Bondjé plézi : lavi pou tout-tan  annan syèl-a pou roun ran épi lavi pou tout-tan asou latè-a pou roun patché ròt moun. Lò nou ka konprann ki Bondjé kontan nou é ki bèl bénédiksyon sakrifis Jézi ka poté pou nou, sa ka fè nou vini pi pròch di nou Bondjé (1 Pierre 3:18 ; 1 Jean 4:9). A pou sa, kou nou frè tan-lontan-yan ki té fidèl, nou ka envité tout moun vini ké nou pou sélébré Mémoryal-a dapré modèl Jézi bay nou-a.

8. Kisa sèrvitèr Jéova-ya fè dipi plizyèr lannen pou envité moun-yan pou Mémoryal-a ? (gadé zimaj-a).

⁸ Sa ka fè lontan ki sèrvitèr Jéova-ya ka envité moun-yan vini annan Mémoryal-a. An 1881 Ozétazini, yé envité frè ké sò-ya rasanblé koté roun frè a Alégéni, an Pennsilvani, pou komémoré lanmò Jézi. Apré sa, chak asanblé sélébré Mémoryal-a. An mars 1940, yé di proklamatèr-ya ki yé té pouvé envité tout moun annan yé téritwar ki té kontan lavérité-a ki annan Labib-a. An 1960, pou prémyé fwa, Bétèl-a bay asanblé-ya envitasyon. Dipi sa jou-a, nou distribiyé milyar envitasyon pou Mémoryal-a. Annou wè poukisa nou ka bay nou kò mouvman konsa pou envité moun-yan pou Mémoryal-a.

9-10. Kimoun nou ka envité pou Mémoryal-a, é kouman yé ka profité di sa ? (Jean 3:16).

⁹ Poukisa nou ka envité moun-yan pou Mémoryal-a ? A paské nou lé ki sa-ya ki ka vini pou prémyé kou-a anprann sa Jéova ké Jézi fè pou nou tout (li Jean  3:16). Nou ka èspéré ki sa yé ké wè é sa yé ké tandé ké bay yé anvi anprann plis bagaj ankò épi divini sèrvitèr Jéova. Mé a pa yé sèlman ki ka profité di envitasyon nou ka bay.

¹⁰ Nou ka envité osi nou frè ké sò-ya ki arété adoré Jéova. Sa nou lé, a fè yé sonjé ki Bondjé kontan yé toujou. Roun patché annan yé ka asèpté nou envitasyon, é nou kontan toubonnman lò nou ka wè yé jou Mémoryal-a ! Souvan, lò yé ka vini annan sa lévènman-an, yé ka sonjé kouman yé té kontan lò yé té ka sèrvi Jéova. Annou wè èkzanp Monica c. I roukoumansé préché pannan pandémi Covid-19-a. Apré i vini annan Mémoryal 2021, i di : « Mo pa ké janmen bliyé Mémoryal-a sa lannen-an. Sa té ka fè 20 lannen mo pa té préché. Mé la, mo té pouvé roukoumansé palé di mo lafwa épi envité moun-yan pou Mémoryal-a. Mo fè l’ ké tout mo tchò paské mo lé di Jéova ké Jézi mèrsi pou sa yé fè pou mo » (Ps. 103:1-4). Ki moun-yan ka asèpté vini annan Mémoryal-a, ki yé pa ka asèpté vini, nou ka bay annan kanpagn envitasyon pou Mémoryal-a ké tout nou tchò, paské nou savé ki nou ka fè Jéova plézi.

11. Kouman Jéova béni éfòr nou fè pou envité moun-yan pou Mémoryal-a ? (Aggée 2:7).

¹¹ Jéova vréman béni tout éfòr nou fè pou envité moun-yan pou Mémoryal-a. An 2021, magré tout rèstriksyon yé té mété akoz di pandémi Covid-19-a, 21 367 603 moun vini annan Mémoryal-a. A prémyé fwa i gen moun konsa. A près dé fwa é dimi kantité Témwen Jéova-ya i gen asou tout latè-a. A vré, a pa sa ki pi enpòrtan pou Jéova. A moun-yan ki enpòrtan pou li. Nou sir ki i ka sèrvi nou kanpagn envitasyon pou idé nou trapé moun-yan ki sensèr (li Aggée 2:7).

12. Détan, akoz di ki problèm sa rèd pou nou sélébré lanmò Jézi ? (gadé zimaj-a).

¹² Jézi di ki pannan dèrnyé jou-ya, nou té ké jwenn tout kalité sitiasyon ki té ké rèd ; i palé di nou fanmi ki té ké baré nou chimen, di pèrsékisyon-an, di lagèr ké épidémi (Mat. 10:36 ; Marc 13:9 ; Luc 21:10, 11). Détan, akoz di sa problèm-yan, sa rèd pou nou sélébré lanmò Jézi. Annou wè kouman sèrten frè ké sò rivé alé annan Mémoryal-a magré sa problèm-yan é sa Jéova fè pou idé yé.

13. Kouman Jéova béni Artem pou so kouraj é paské i té byen désidé fè Mémoryal-a ofon lajòl-a ?

¹³ Lajòl. Nou frè ké sò-ya ki lajòl akoz di yé lafwa ka fè sa yé pouvé pou yé sélébré lanmò Jézi. A sa ki rivé Artem. Anvan ké apré Mémoryal 2020-an, i té annan roun sélil ki té ka fè 17 mèt karé koté yé té ka mété détan senk prizonyé an menm tan. Kou i té lajòl, i sèrvi sa i té rivé trapé pou dipen-an ké diven-an, é i désidé fè diskour Mémoryal-a li menm. Mé sa-ya ki té ofon lajòl-a ké li té ka fimen é yé pa té ka arété jouré. Sa i té pouvé fè ? I doumandé yé si yé té pouvé arété fimen épi arété jouré pannan roun lèr sèlman. I rété èstébékwé lò yé asèpté. Alòr i propozé yé bay yé èsplikasyon asou Mémoryal-a. Yé pa asèpté, mé apré yé wè l’ fè Mémoryal-a é apré yé  tandé so diskour, yé pozé li roun patché késyon.

14. Kouman Mémoryal-a rivé fèt pannan pandémi Covid-19-a ?

¹⁴ Pandémi Covid-19-a. Akoz di sa pandémi-a, pannan roun tan, Témwen Jéova-ya pa té pouvé alé annan roun sal di Rwayonm pou fè Mémoryal-a. Mé sa pa anpéché yé fè l’ kanmenm d. Asanblé-ya ki té gen Entèrnèt rivé fè l’ asou Entèrnèt. Mé kouman bagaj-ya pasé pou milyon frè ké sò-ya ki pa té gen Entèrnèt ? Annan sèrten péyi, yé bay diskour-a latélé ouben laradyo. É yé pa bliyé sa-ya ki ka rété annan koté ki lwen. Frè-ya anréjistré diskour-a annan pasé 500 lang é yé pran dispozisyon pou sa-ya ki té bézwen trapé sa anréjistréman-an.

15. Kouman roun madanm ki ka étidyé Labib-a réyaji lò so fanmi éséyé baré so chimen, é kisa sa ka anprann nou ?

¹⁵ Lò nou fanmi ka baré nou chimen. Pou roun ran frè ké sò, sa ki pi rèd pou yé fè Mémoryal-a, a lò yé fanmi ka baré  yé chimen. Annou palé di Sue ki ka étidyé Labib-a. An 2021, jou anvan Mémoryal-a, i di sò-a ki té ka étidyé Labib-a ké li ki i pa té ké pouvé vini annan Mémoryal-a paské so fanmi pa té lé i alé. Sò-a li Luc 22:44 pou li. Apré sa, i èspliké li ki lò nou ka jwenn problèm, nou divèt swiv èkzanp Jézi, nou divèt priyè Jéova épi fè li konfyans. Landimen-an, Sue préparé dipen-an ké diven-an, é i gadé asou jw.org ladorasyon pou koumansé lajournen-an pou Mémoryal-a. Lò aswè rivé, i alé annan so chanm pou swiv Mémoryal-a ké so téléfonn san pyès moun pa déranjé l’. Apré sa, Sue ékri pou sò-a ki té ka étidyé Labib-a ké li : « To ankourajé mo bokou ayè ! Mo fè tousa mo té pouvé pou alé annan Mémoryal-a, é Jéova fè larèstan. To pa pouvé imajiné kouman mo kontan. » Ès to pa krè ki Jéova ké idé to osi si to ka jwenn roun sitiasyon konsa ?

16. Poukisa nou pouvé sir ki Jéova ké béni tousa nou ké fè pou alé annan Mémoryal-a ? (Romains 8:31, 32).

¹⁶ Jéova kontan bokou tousa nou ka fè pou sélébré lanmò Jézi. Lò nou ka montré ki nou gen rékonésans pou tousa i fè pou nou, i ka wè l’ é i ka béni nou (li Romains 8:31, 32). Donk, annou byen désidé alé annan Mémoryal-a sa lannen-an, épi soulon nou sitiasyon, annou désidé bay plis ankò annan tousa ki ké fèt anvan ké apré Mémoryal-a.