1-2. Kisa ki ka rivé souvan lò roun moun ki ka étidyé Labib-a ka batizé, é kisa nou ké wè annan sa artik-a ?

 ÈS TO ja gadé roun group moun ki ka alé batizé ? To ka sonjé ? Lò yé réponn dé késyon-yan yé ka pozé yé anvan yé batizé, to tandé annan yé vwa ki yé té byen désidé. To wè ki yé zanmi ké yé fanmi té fyèr di yé. Lò yé soti di dlo-a, to tandé tout moun bat lanmen, é to wè lajwa asou yé vizaj. Chak simenn, plizyèr milyé moun ki ka étidyé Labib-a ka vouwé yé lavi pou Jéova é ka batizé Témwen Jéova.

² É to menm, ès to ka réfléchi pou pran batenm-an ? Si to lé batizé, to sa roun moun èspésyal annan sa monn-an ki méchan, paské to ka « chaché Jéova » (Ps. 14:1, 2). Sa artik-a fèt pou to, ki to jenn, ki to ja gran moun. Mé a pou nou ki ja batizé osi, paské nou menm osi nou lé pi désidé ankò adoré Jéova pou tout-tan. Donk, annou wè trwa rézon nou gen pou nou adoré Jéova.

3. Poukisa sa-ya ki ka adoré Jéova kontan lavérité ké sa ki drèt ? (Psaume 119:128, 163).

³ Jéova doumandé so sèrvitèr « kontan lavérité » (Zach. 8:19). É Jézi doumandé so disip kontinyé chaché sa ki drèt (Mat. 5:6). Donk sa lé di ki nou divèt vréman lé fè sa ki bon ké sa ki drèt douvan Bondjé. Ès to kontan lavérité ké sa ki drèt ? Nou sir ki to kontan sa. To rayi manti é to rayi tousa ki mové (li Psaume 119:128, 163). Roun moun ki ka manti ka imité Satan, chèf sa monn-an  (Jean 8:44 ; 12:31). Satan lé sali non Bondjé-a ki sen. Dipi Adan ké Èv dézobéyi annan jarden Édèn-an, Satan ka di roun patché manti asou Jéova. I ka éséyé fè moun krè ki Jéova sa roun chèf ki ka gadé yenki pou so douvan lèstomak, ki malonnèt é ki ka anpéché nou gen sa ki bon pou nou (Gen. 3:1, 4, 5). Akoz di tout sa manti-ya, roun patché moun ka pansé ki Bondjé pa bon. É lò sèrten moun pa ka chwazi « kontan lavérité », Satan pouvé fè yé fè roun patché bagaj ki pa bon (Rom. 1:25-31).

4. Kouman Jéova montré ki i sa « Bondjé lavérité-a » ? (gadé zimaj-a osi)

⁴ Kou Jéova sa « Bondjé lavérité-a », i ka pran plézi anprann sa-ya ki kontan li, lavérité (Ps. 31:5). Konsa i ka idé yé pou Satan pa bloublou yé ankò. I ka anprann yé osi divini dé moun ki onèt é ki ka fè sa ki drèt. Sa ka idé yé gen plis rèspè pou yé pròp kò, é sa ka pèrmèt yé gen lapè annan yé tchò (Prov. 13:5, 6). A sa Jéova dèt fè pou to, toupannan to té ka anprann sa Labib-a ka di. A la to wè ki sa Jéova ka doumandé pi bon pou tout moun é pou to osi (Ps. 77:13). A pou sa to lé fè sa ki drèt pou Bondjé (Mat. 6:33). To lé défann lavérité-a pou montré ki sa Satan di asou nou Bondjé Jéova, a manti. Kouman to pouvé rivé fè sa ?

5. Kouman to pouvé défann lavérité ké sa ki drèt ?

⁵ To pouvé chwazi viv roun fason ki ka montré ki to pa ka asèpté manti Satan ka di, ki to ka défann sa ki vré, ki to lé Jéova sa to chèf, é ki to lé fè sa i ka di ki bon é ki drèt. Kouman to pouvé montré ki to chwazi pran pou Jéova ? A pou to di Jéova annan roun lapriyè ki to ka promèt li adoré l’ pou tout-tan é apré sa, pran batenm-an. Si to kontan lavérité ké sa ki drèt, sa ké bay to anvi batizé.

6. Ki bon rézon Psaume 45:4 ka bay nou pou nou kontan Jézi ?

⁶ Poukisa to kontan Jézi ? Gadé déztrwa bon rézon nou ka jwenn annan Psaume 45:4 (li). Jézi kontan lavérité ké lajistis ké sa-ya ki gen imilité. Si to kontan lavérité ké lajistis, sa lé di ki to kontan Jézi Kris paské Jézi li menm défann sa ki vré ké sa ki drèt ké kouraj (Jean 18:37). Mé kouman Jézi ka montré ki i kontan sa-ya ki gen imilité ?

7. Poukisa imilité Jézi ka fè to anvi vin pròch ké li ?

⁷ Jézi ka montré nou sa ké so pròp èkzanp. Li menm gen imilité. Parèkzanp, i toujou bay so Papa laglwar. I pa janmen voyé so kò monté (Marc 10:17, 18 ; Jean 5:19). Kisa sa ka fè to lò to ka sonjé imilité Jézi ? Ès sa pa ka fè to kontan Pitit Bondjé-a épi bay to anvi swiv li ? Asiré pa pitèt ! Poukisa Jézi gen imilité ? Paské i kontan é i ka imité so Papa ki gen imilité (Ps. 18:35 ; Héb. 1:3). Ès to pa anvi vin pròch ké Jézi ki ka imité kalité Jéova parfètman ?

8. Poukisa nou kontan Jézi sa nou Rwa ?

⁸ Nou kontan Jézi sa nou Rwa paské a pi bon Chèf nou pouvé gen. A Jéova li menm ki fòrmé l’ é a li ki chwazi li pou i divini Rwa. (Is. 50:4, 5). Sonjé osi ki kalité lanmou i montré nou (Jean 13:1). Paské i sa to Rwa, i mérité to kontan li. Kouman to pouvé montré li ki to kontan li ? I èspliké ki sa-ya ki vréman kontan li, sa-ya i ka aplé so zanmi, ka obéyi so koumannman pou montré yé lanmou pou li (Jean 14:15 ; 15:14, 15). Nou pouvé sa zanmi Pitit Jéova-a. Men roun bèl lònò !

9. Poukisa nou pouvé di ki batenm roun krétyen ka sanblé batenm Kris ?

⁹ Jézi di ki so disip divèt batizé (Mat. 28:19, 20). É a sa li menm fè. I gen plizyèr bagaj ki ka fè ki batenm Jézi ké batenm so disip diféran (gadé karé-a «  Batenm Jézi ké batenm so disip : poukisa yé diféran »). Mé i gen déztrwa bagaj ki ka sanblé annan sa dé batenm-yan. Lò i batizé, Jézi vini douvan so Papa pou montré li ki i té paré pou i fè tousa i té lé (Héb. 10:7). Menm fason-an, lò roun krétyen ka batizé é ka vouwé so lavi pou Jéova, i ka montré douvan tout moun ki sa ki pi enpòrtan aprézan annan so lavi, a pa fè sa i lé mé a fè sa Bondjé lé. Konsa, i ka swiv èkzanp so mèt.

10. Poukisa to pouvé kontan Jézi, é kisa sa divèt bay to anvi fè ?

¹⁰ To sir ki Jézi sa sèl Pitit Jéova é ki a li Jéova chwazi pou i divini Rwa é pou i dirijé nou. To savé ki Jézi gen imilité é ki i ka imité so Papa parfètman. To anprann ki i bay sa-ya ki té fen manjé, i konsolé sa ki té dékourajé, é i menm géri sa-ya ki té malad (Mat. 14:14-21). To ka wè ki i ka dirijé asanblé-a jòdla (Mat. 23:10). É to savé ki kou i Rwa rwayonm Bondjé-a, i ké fè ankò plis bagaj pou nou dimen. Kouman to pouvé montré ki to kontan li ? A pou to swiv so èkzanp (Jean 14:21). É prémyé bagaj to divèt fè pou to swiv so èkzanp, a vouwé to lavi pou Jéova é batizé.

11. Dapré to, pi bèl rézon nou gen pou nou batizé, a kisa é poukisa ?

¹¹ Ki pi bèl rézon nou gen pou nou batizé ? Jézi di ki pi gran koumannman Bondjé, a sa-la : « To divèt kontan Jéova to Bondjé ké tout to tchò, ké tout to nanm, ké tout to pansé épi ké tout to fòrs » (Marc 12:30). Ès a konsa to kontan Bondjé ?

12. Poukisa to kontan Jéova ? (gadé zimaj-a osi).

¹² I gen tèlman bagaj ki ka fè nou kontan Jéova ! Parèkzanp, aprézan to sir ki a li ki « sours lavi-a » é ki i sa Sa-la ki ka bay nou « tout bèl bagaj ké tout kado parfè » (Ps. 36:9 ; Jacq. 1:17). Tout bon bagaj to gen jòdla ka vini di nou Bondjé ki kontan nou é ki ka bay san konté.

13. Poukisa ranson-an a roun kado ki bèl toubonnman ?

¹³ Ranson-an, a roun bèl kado Jéova bay nou. Poukisa nou pouvé di sa ? Sonjé kouman Jéova ké so Pitit pròch. Jézi di : « Papa-a kontan mo » é « Mo kontan Papa-a » (Jean 10:17 ; 14:31). Yé rété ansanm pannan lontan, a pou sa yé lanmityé vin fò toubonnman (Prov. 8:22, 23, 30). Imajiné kouman Jéova té divèt gen lapenn lò i wè so Pitit soufri épi mouri ! Mé Jéova té tèlman kontan monn-an, é to menm osi annan, ki i bay so Pitit i kontan-an an sakrifis pou pèrmèt to ké ròt-ya osi viv pou tout-tan (Jean 3:16 ; Gal. 2:20). I pa pouvé gen pi bèl rézon pou nou kotan Bondjé.

14. Ki pi bon òbjèktif to pouvé gen annan to lavi ?

¹⁴ Pi to anprann konnèt Jéova, pi to lanmou pou li vin fò. É to lé kontinyé vin pròch ké li pou tout-tan. To pouvé fè l’ ! I ka ankourajé to fè so tchò kontan (Prov. 23:15, 16). To pouvé fè li plézi gras a sa to ka di, mé osi gras a sa to ka fè. A fason to ké aji annan to lavi ki ké montré li ki to vréman kontan l’ ké tout to tchò (1 Jean 5:3). A pi bon òbjèktif to pouvé gen annan to lavi.

15. Kouman to pouvé montré ki to kontan Jéova ?

¹⁵ Kouman to pouvé montré ki to kontan Jéova ? Pou koumansé, to divèt fè roun lapriyè èspésyal. Annan sa lapriyè-a, to ka vouwé to lavi pou sèl vré Bondjé-a (Ps. 40:8). Apré sa, to ka fè tout moun savé sa to di annan sa lapriyè-a lò to ka batizé. Kou nou wè l’ annan sa artik-a, lò to ké batizé, a ké moman-an ki ké pi enpòrtan annan to lavi, é sa jou-a, to tchò ké kontan. To ké arété viv pou to menm, to ké koumansé viv pou Jéova (Rom. 14:8 ; 1 Pierre 4:1, 2). Lò to ka gadé sa konsa, pitèt to ka di a roun gran désizyon pou pran. É a vré. Mé sa ké pèrmèt to gen pi bèl lavi i pouvé gen.

16. Kou nou ka wè l’ annan Psaume 41:12, kouman Jéova ké rékonpansé sa-ya ki ka sèrvi yé lavi pou adoré li ?

¹⁶ I pa gen pyès moun ki kontan bay kou Jéova. Kèlkéswa sa to ka bay li, i ké toujou randé to plis (Marc 10:29, 30). I ké fè to gen pi bèl lavi i pouvé gen annan sa monn méchan-an. Mé sa ki dèyè pòkò touché ! Lavi to ké koumansé mennen jou-a to ké batizé pouvé kontinyé pou tout-tan. To ké pouvé adoré to Papa to kontan-an pou tout-tan. Lanmou to gen pou to Papa é lanmou to Papa gen pou to ké vin plizanpli fò. É imajiné sa : kou li, to ké viv pou tout-tan ! (li Psaume 41:12).

17. Ki bagaj Jéova pòkò gen to pouvé bay li ?

¹⁷ Lò to ka vouwé to lavi pou Jéova é to ka batizé, to gen roun gran lònò : bay to Papa roun bagaj ki vréman èspésyal. Tout bon bagaj to gen, tout bèl bagaj to viv, a li ki bay to sa. Pou di li mèrsi, to pouvé adoré li ké tout to tchò é rété fidèl. A konsa to ké bay Sa-la ki fè syèl-a ké latè-a roun bagaj i pòkò gen (Job 1:8 ; 41:11 ; Prov. 27:11). A pi bèl bagaj to pouvé fè ké to lavi ! To lanmou pou Jéova, a pi bon rézon i gen pou to batizé, asiré pa pitèt !

18. Ki késyon to pouvé pozé to kò ?

¹⁸ Alòr ès to ké batizé ? A to sèlman ki pouvé réponn. Pou idé to réponn, pozé to kò sa késyon-an : « Kisa mo ka antann pou mo batizé ? » (Actes 8:36). Sonjé trwa rézon nou wè annan sa artik-a. Prémyèrman, to kontan lavérité ké sa ki drèt. Doumandé to kò : « Ès mo lé wè jou-a tout moun ké di lavérité é ké fè sa ki bon ké sa ki drèt ? » Dézyèmman : to kontan Jézi. Doumandé to kò : « Ès mo lé Pitit Bondjé-a sa mo rwa, é ès mo lé swiv so èkzanp ? » É trwazyèmman, pi enpòrtan-an : to kontan Jéova. Doumandé to kò : « Ès mo lé adoré Jéova pou fè so tchò kontan ? » Si to ka réponn wi pou tout sa késyon-yan, alòr poukisa to pa ka batizé ? Kisa ka anpéché to batizé lanmenm ? (Actes 16:33).

19. Poukisa to pa divèt ézité batizé ? Bay roun èkzanp (Jean 4:34).

¹⁹ Si to ka ézité batizé, réfléchi asou roun èkzanp Jézi pran (li Jean 4:34). I di ki so manjé, a té fè volonté so Papa. Poukisa i di sa ? Manjé bon pou nou. É Jézi té savé ki tousa so Papa ka doumandé nou fè bon pou nou. Jéova pa lé nou fè pyès bagaj ki pa té ké bon pou nou. É ès i lé to batizé ? Wi (Actes 2:38). Donk to pouvé sir ki si to ka obéyi sa koumannman-an, sa lé di si to ka batizé, to ké gen bokou bénédiksyon. Si yé té ka bay to manjé pi bon manjé i pouvé gen, ès to té ké ézité manjé sa manjé-a ? Non ! Atò poukisa to ka ézité lò a pou batizé ?

20. Kisa nou ké wè annan ròt artik-a ?

²⁰ Poukisa roun ran ka antann ? Roun patché moun pouvé di : « Mo pòkò paré. » Zafè vouwé to lavi pou Jéova épi batizé, a désizyon pi enpòrtan to ké pran annan to lavi. Donk sa enpòrtan pou to réfléchi, pou to pran tan, épi pou to fè éfòr pou to paré pou sa. Mé si to vréman lé batizé, kisa to pouvé fè jòdla pou to préparé to kò ? A sa nou ké wè annan ròt artik-a.