1-2. Kouman nou pouvé swiv konsèy ki annan Proverbes 4:25 ? Bay roun èkzanp.

IMAJINÉ sa sitiasyon-yan. Roun sò ki ja granmoun, ka sonjé bèl bagaj ki rivé li annan so lavi. Menm si so lavi pi rèd jòdla, i ka kontinyé fè tousa i pouvé pou Jéova (1 Cor. 15:58). Chak jou, i ka wè so kò annan monn nouvo-a ké moun i kontan. Rounòt sò ka sonjé kouman roun konpanyen krétyen fè li lanpenn, mé i ka désidé pa rété asou sa ankò (Col. 3:13). Roun frè byen savé i fè mové bagaj anvan, mé aprézan, i byen désidé rété fidèl douvan Jéova (Ps. 51:10).

² Kisa sa trwa krétyen-yan ka fè ? Yé ka sonjé sa ki rivé yé annan yé lavi, mé yé pa ka rété tròp asou sa. A ‘drèt douvan yé yé ka gadé’, sa ki ka vin dimen (li Proverbes 4:25).

3. Poukisa nou divèt ‘gadé drèt douvan nou’, sa ki ka vin dimen ?

³ Poukisa sa enpòrtan di ‘gadé drèt douvan nou’, sa ki ka vin dimen ? Menm fason nou pa pouvé maché drèt si nou toujou ka gadé dèyè nou, nou pa pouvé kontinyé byen sèrvi Jéova si nou toujou ka sonjé sa ki rivé nou annan nou lavi ouben sa nou fè anvan (Luc 9:62).

4. Kisa nou ké wè annan sa artik-a ?

⁴ Annan sa artik-a, nou ké wè trwa pyèj ki pouvé fè nou rété tròp asou sa ki rivé nou annan nou lavi * : 1) lé nou lavi viré kou i té fika anvan, 2) tchenbé roun moun asou nou  tchò é 3) lò nou ka lésé nou konsyans bat nou tròp. Nou ké wè kouman prensip-ya ki annan Labib-a pouvé idé nou pa rété asou « sa ki dèyè », mé pito kontinyé gadé « sa ki douvan » (Phil. 3:13).

5. Kisa Ecclésiaste 7:10 ka di nou panga ?

⁵ (Li Ecclésiaste 7:10.) Vèrsé-a pa ka di ki to pa pouvé pansé ki « lavi tan-lontan » té bon ; sonjé sa ki fèt anvan é ganyen souvénir sa roun kado di Jéova. Nou ka li annan sa vèrsé-a : « Pa di : “Poukisa lavi tan-lontan té pi bon pasé jòdla ?” » Atò, nou divèt panga pa konparé nou lavi anvan ké nou lavi jòdla é pansé ki tout bagaj anvan té pi bon. Rounòt vèrsyon di Labib-a ka bay sa vèrsé-a konsa : « Pa di : Poukisa jou tan-lontan-yan té pi bon pasé sa di jòdla ? paské sa késyon-an pa gen sans » (La Sainte Bible, L-C Fillion).

6. Poukisa a pa roun bon bagaj lò nou ka di toulong ki nou lavi té pi bon anvan ? Bay roun èkzanp.

⁶ Poukisa a pa roun bon bagaj lò nou ka di toulong ki nou lavi té pi bon anvan ? Lò nou lé ki nou lavi viré kou i té fika anvan, sa pouvé fè nou sonjé sèlman bèl bagaj ki rivé nou é bliyé tousa ki té mové. Annou palé di Israyélit-ya. Lò yé pati di Éjip, yé bliyé vitman kouman yé lavi té rèd laba. Kisa ki té ka maché annan yé lidé ? Yé té ka di : « A pa ti bèl bagaj nou ka sonjé, nou té gen poson, nou té ka manjé san péyé lò nou té an Éjip, kanta konkonm, moulondo, pwaro, zonyon ké lay pa menm palé ! » (Nomb. 11:5). Mé ès yé té ka vréman manjé tout sa bagaj-ya « san péyé » ? Awa. Yé té ka soufri bokou : Yé té èsklav, é Éjipsyen-yan té ka fè yé wè mizè ! (Ex. 1:13, 14 ; 3:6-9). Mé apré sa, yé bliyé sa problèm-yan é yé koumansé rigrété yé lavi tan-lontan. Pasé yé té mété yé lidé asou sa Jéova té fin fè pou yé, yé té ka sonjé kouman  annan « sa tan-an, lavi-a té bèl ». Sa pa fè l’ plézi menm (Nomb. 11:10).

7. Kisa ki idé nou sò pa kontinyé pansé ki so lavi té miyò anvan ?

⁷ Kisa nou pouvé fè pou nou pa kontinyé pansé ki nou lavi té miyò anvan ? Annou palé di roun sò ki antré Bétèl Brouklin an 1945. Plizyèr lannen apré, i maryé ké roun bétélit, é yé kontinyé sèrvi Jéova ansanm annan Bétèl-a pannan bokou lannen. Mé an 1976, so mari tonbé malad. Lò so mari konprann so lanmò té tou pròch, i bay li déztrwa konsèy pou idé l’ lò i pa té ké la ankò. I di li : « Nou maryaj bay nou tchò kontan, bokou moun pa ké janmen viv sa. » Mé i bay li sa konsèy-a : « To pa ké bliyé tout bèl bagaj nou fè ansanm, mé pa mété to lidé asou sa rounso. Ké tan ka pasé, to tchò ké géri. Pa lésé sa ki rivé to, dékourajé to tròp ouben bay to tròp chagren. A pou to kontan pou tout lajwa ké bénédiksyon to trapé. [...] Souvénir-ya sa roun kado Bondjé ka fè nou. » Ès a pa bon konsèy ki la ?

8. Ki bénédiksyon nou sò trapé paské i pa té ka kontinyé sonjé kouman so lavi té fika anvan ?

⁸ Nou sò byen swiv konsèy so mari té bay li. I sèrvi Jéova ké fidélité, jistan i mouri lò i té gen 92 lannen. Plizyèr lannen anvan i mouri, i di : « Lò mo ka sonjé sa 63 lannen, mo pasé annan sèrvis Jéova, mo pouvé di ki mo viv ké tchò kontan tout mo lavi. » Kisa ki bay li tchò kontan konsa ? I èspliké : « Sa ki ka bay to lavi roun sans, a nou bèl fanmi frè ké sò, épi èspwar nou gen di viv annan roun paradi asou latè-a, ansanm ké yé pou sèrvi nou Gran Kréyatèr, sèl vré Bondjé-a, Jéova, pou tout-tan *. » Sa sò-a, sa roun bèl èkzanp pou nou toubonnman : i té ka gadé drèt douvan li, sa ki té ka vin dimen !

9. Dapré Lévitique 19:18, kitan sa pouvé èspésyalman rèd di pa tchenbé roun moun asou nou tchò ?

⁹ (Li Lévitique 19:18.) Pa tchenbé roun moun asou nou tchò pouvé rèd, èspésyalman lò a roun frè ouben roun sò di nou asanblé, nou zanmi ouben roun moun annan nou fanmi, ki fè nou lanpenn. Parèkzanp, roun sò akizé rounòt sò annan asanblé-a, i di i té vòlò so soumaké. Lò i randé so kò kont ki i té tronpé so kò, i doumandé pardon, mé sò i té akizé-a pa té ka rivé bliyé sa ki té pasé. Ès roun bagaj konsa ja rivé to ? Asiré, sa rivé nou tout tchenbé roun moun asou nou tchò é pansé ki nou pa té ké janmen rivé bliyé sa i fè nou.

10. Kisa ki pouvé idé nou pa tchenbé roun moun asou nou tchò ?

¹⁰ Kisa ki pouvé idé nou pa tchenbé roun moun asou nou tchò ? Pou koumansé, annou sonjé ki Jéova ka wè tout bagaj. I ka wè tout problèm nou ka jwenn, é i ka wè osi lò moun pa jis ké nou (Héb. 4:13). Lò nou ka soufri, i ka soufri ansanm ké nou (Is. 63:9). É i ka promèt ki roun jou, i ké tiré tout chagren annan nou tchò, akoz di sa moun fè nou (Rév. 21:3, 4).

11. Poukisa nou ka di a roun bon bagaj pou nou si nou pa ka tchenbé roun moun asou nou tchò ?

¹¹ Annou sonjé osi ki, pa tchenbé roun moun asou nou tchò ké roun bon bagaj pou nou. A sa sò-a yé té akizé san i pa té fè anyen rivé konprann. Piti piti, i rivé pa tchenbé sò-a asou so tchò. I sonjé ki Jéova ka pardonnen nou sèlman si nou ka pardonnen ròt moun (Mat. 6:14). I té savé ki sa sò-a té fè pa té bon, mé i désidé pa tchenbé l’ asou so tchò. A konsa i rivé gen plis tchò kontan, é mété tout so lidé asou so sèrvis pou Jéova.

12. Kisa 1 Jean 3:19, 20 ka anprann nou ?

¹² (Li 1 Jean 3:19, 20.) Sa ka rivé nou tout santi nou kò koupab (Rom. 3:23). Pou roun ran yé ka santi yé kò koupab pou bagaj yé fè anvan yé té konnèt lavérité. Rounòt ran ka santi yé kò koupab pou bagaj yé fè apré yé té batizé. Menm si nou ka fè tousa nou pouvé pou maché drèt, « nou tout ka tonbé souvan » (Jacq. 3:2 ; Rom. 7:21-23). A vré, a pa jen roun bagaj ki chwit lò nou konsyans ka bat nou, mé sa pouvé itil pou nou. Poukisa ? Paské lò nou konsyans ka bat nou, sa pouvé idé nou chanjé bagaj annan nou lavi é fè nou pi désidé ankò pa roufè menm fot-ya (Héb. 12:12, 13).

13. Poukisa nou pa divèt lésé nou konsyans bat nou tròp ?

¹³ Mé sa pouvé rivé ki nou konsyans ka bat nou tròp : nou pouvé santi nou kò koupab menm si nou ja répanti nou kò é Jéova ja montré nou ki i pardonnen nou. Sa santiman-an pouvé sa roun pyèj pou nou (Ps. 31:10 ; 38:3, 4). Roun sò ki té ka santi so kò koupab akoz di péché i té fè, di : « Mo té ka di ofon mo tchò ki, kou mo pa té ké sové, sa pa té ka sèrvi anyen travay rèd pou Jéova. » Roun patché frè ké sò ka rousanti menm bagaj-a. Mé nou divèt savé ki, si nou konsyans ka bat nou tròp, a roun pyèj pou nou. Satan té ké kontan si nou té ka arété sèrvi Bondjé menm si i ja pardonnen nou ! (gadé 2 Corinthiens 2:5-7, 11).

14. Kouman nou pouvé sir ki Jéova pardonnen nou ?

¹⁴ Magré tousa, pitèt nou pouvé doumandé nou kò : « Kouman mo pouvé sir ki Jéova pardonnen mo ? » Lò to ka pozé  to kò sa késyon-an, to ja gen répons-a. I gen plizyèr lannen, roun Tour de Garde té ka èspliké ki sa pouvé rivé nou tonbé ankò annan roun vyé labitid menm si nou té rivé lésé l’ anvan. Mé i té ka di osi : « Pa dékourajé. Pa di ou fè roun bagaj Jéova pa ké janmen pardonnen. A konsa menm Satan té ké lé ou réfléchi. Paské ou ka santi ou krazé é ou konsyans ka bat ou, sa ka montré ki ou pa alé tro lwen. Kontinyé gen imilité é kontinyé doumandé Bondjé pardonnen ou, pou i bay ou roun bon konsyans é pou i idé ou arété fè sa péché-a. Alé bò d’ li kou roun timoun ki ka alé wè so papa lò i gen lanpenn, menm si i ka fè l’ souvan akoz di menm problèm-an, é Jéova lé idé ou akoz di so [favèr] nou pa mérité *. »

15-16. Kisa sèrten sèrvitèr Bondjé santi lò yé konprann ki Jéova té pardonnen yé ?

¹⁵ Bokou sèrvitèr Jéova trouvé konsolasyon lò yé konprann ki Bondjé té pardonnen yé. Parèkzanp, i gen plizyèr lannen, sa idé roun frè lò i wè èkzanp roun sò annan parti « Labib-a ka chanjé lavi moun ». Sa sò-a té ka èspliké ki akoz di sa i té fè anvan, i pa té ka rivé krè ki Jéova té pouvé kontan li. É i briga ké sa santiman-an plizyèr lannen apré i batizé. Mé lò i koumansé réfléchi asou ranson-an, i wè bagaj-ya rounòt fason *.

¹⁶ Kouman sa sò-a di idé frè-a ? I ékri : « Lò mo té jenn, mo pa té ka rivé arété gadé pòrnografi. Mo briga ké sa labitid-a. I pa gen lontan, mo tonbé annan sa ankò. Mo doumandé bèrjé-ya annan mo [asanblé] idé mo. Yé idé mo konprann ki Bondjé kontan mo é lé pardonnen mo. Dipi sa jou-a, mo ka rivé briga pi byen ké sa problèm-an. Mé sa ka rivé mo ankò santi ki mo pa gen pyès valò, kousidiré Jéova pa pouvé kontan mo. Istwè [sa sò-a] vréman idé mo konprann mo sitiasyon : lò mo ka pansé ki Bondjé pa pouvé pardonnen mo, a kousidiré mo té ka di ki sakrifis so pitit pa  asé pou kouvri mo péché. Mo dékoupé sa artik-a pou li l’ ké réfléchi asou l’ lò mo ka santi kousidiré Bondjé pa kontan mo. »

17. Kisa ki idé Pòl pa lésé so konsyans bat li tròp ?

¹⁷ Témwanyaj kou sa di sa frè-a ké sa sò-a ka fè nou sonjé apot Pòl. Anvan i divini roun krétyen, i té fè péché ki té grav. Mé, menm si i té ka sonjé sa i té fè, i pa té ka rété asou sa toulong (1 Tim. 1:12-15). I té ka wè ranson-an kou roun kado Bondjé té fè l’ (Gal. 2:20). Sa pèrmèt li pa lésé so konsyans bat li tròp. A konsa i rivé fè tousa i té pouvé pou sèrvi Jéova.

18. Kisa nou anprann annan sa artik-a ?

¹⁸ Annan sa artik-a nou palé di trwa pyèj. Kisa nou anprann ké sa nou wè asou sa pyèj-ya ? 1) Souvénir-ya sa roun kado di Jéova. Menm si annan nou lavi, bokou bagaj bay nou tchò kontan, lavi annan monn nouvo-a ké lontan miyò. 2) Lò roun moun ka fè nou lanpenn, annou désidé pardonnen li. Konsa, nou ké pouvé kontinyé byen sèrvi Jéova. 3) Si nou ka lésé nou konsyans bat nou tròp, sa pouvé anpéché nou sèrvi Jéova ké tchò kontan. Atò, kou Pòl, a pou nou sir ki Jéova pardonnen nou.

19. Kouman nou savé ki annan monn nouvo-a, nou pa ké sonjé pyès bagaj ki fè nou lanpenn ?

¹⁹ Nou gen èspwar viv pou tout-tan. É annan monn nouvo-a, nou pa ké sonjé pyès bagaj ki fè nou lanpenn. Asou sa lépòk-a, Labib-a ka di : « Nou pa ké sonjé bagaj tan-lontan » (Is. 65:17). Sonjé sa : roun ran annan nou ka sèrvi Jéova dipi nanninannan, mé annan paradi-a yé ké viré jenn ! (Job 33:25). A pou sa, a pou nou byen désidé pa gadé dèyè. Annou gadé douvan é annou sonjé bèl lavi nou ké gen !