1-2. a) Kisa roun ran gouvèrnman ka fè kont sèrvitèr Jéova-ya, é kouman nou ka réyaji ? b) Kouman nou tchò pouvé kontan menm si yé ka pèrsékité nou ? (palé osi di zimaj-a anlè prémyé paj-a).

 ANNAN pasé 30 péyi, swa yé ka défann nou adoré Jéova, swa yé pa lé nou adoré l’ kou nou lé. Yé jis mété roun ran annan nou frè ké sò-ya lajòl. Kisa yé fè pou mérité sa ? Pou Jéova, yé pa fè pyès mové bagaj. Yé li ké étidyé Labib-a, yé palé moun-yan di sa yé ka krè, yé alé annan réinyon-yan, épi osi yé réfizé pran parti annan lapolitik. Pa plis ki sa. Magré patché mizè moun ka fè yé wè, sa krétyen-yan ki fidèl ka kontinyé fè sa ki drèt b ; anyen pa pouvé anpéché yé adoré Jéova. É sa ka fè yé tchò kontan !

² To dèt ja wè foto plizyèr annan sa Témwen-yan ki plen ké kouraj é to dèt rété èstébékwé lò to wè kouman yé ka souri. Yé tchò kontan paské yé savé ki, kou yé ka rété fidèl, sa ka fè Jéova plézi (1 Chron. 29:17a). Jézi di : « Sa-ya yé ka pèrsékité paské yé ka fè sa ki jis, yé tchò kontan [...]. A pou zòt kontan, a pou zòt kontan menm, paské zòt gen roun gran rékonpans » (Mat. 5:10-12).

3. Dapré Actes 4:19, 20, kouman apot-ya réyaji lò yé pèrsékité yé, é poukisa ?

³ Nou frè ké sò-ya ka jwenn menm problèm apot-ya jwenn annan prémyé syèk-a. Yé pèrsékité apot-ya paské yé té ka palé di Jézi. Plizyèr fwa, jij annan gran tribinal Jwif-ya « défann yé ni palé ni ansényé annan non Jézi » (Actes 4:18 ; 5:27, 28, 40). Kouman apot-ya réyaji ? (li Actes 4:19, 20). Yé té savé ki i té gen roun moun pi rot pasé sa jij-ya ki té ‘bay yé lòrd préché pou pèp-a’ épi bay roun témwanyaj ki konplè asou Jézi (Actes 10:42). Pyèr ké Jan, ki té ka réprézanté apot-ya, palé ké kouraj pou sa mouché-ya. Yé di ki yé té simyé adoré Bondjé pasé yé obéyi yé. Yé di ki yé pa té ké arété palé di Jézi é yé té dibout dèyè sa yé té ka di. A kousidiré yé té ka di yé : « Zòt konprann di ki lòrd zòt ka bay nou pi rot pasé lòrd Bondjé ka bay nou ? »

4. Dapré Actes 5:27-29, ki èkzanp apot-ya lésé pou vré krétyen-yan, é kouman nou pouvé imité yé ?

⁴ Apot-ya ‘obéyi Bondjé pasé yé obéyi moun-yan’ (li Actes 5:27-29). Yé lésé roun bon èkzanp pou vré krétyen-yan jòdla. É a sa èkzanp-a yé toujou swiv. Apré yé té fin pran kou paské yé pa té lé arété sèrvi Bondjé, apot-ya lésé tribinal-a, yé té tou « kontan paské Bondjé té trouvé ki tèlman yé té gen valò, yé té pouvé pran mépri pou non Jézi ». Yé roukoumansé préché lanmenm (Actes 5:40-42).

5. Désizyon apot-ya ka fè nou réfléchi asou ki késyon ?

⁵ Sa apot-ya désidé fè ka fè nou réfléchi asou roun késyon ki enpòrtan. Kouman yé té pouvé obéyi Bondjé pasé yé obéyi moun-yan é an menm tan obéyi koumannman-an ki annan Labib-a ki ka di « obéyi sa-ya ki gen otorité » ? (Rom. 13:1). Jòdla, kouman nou pouvé « obéyi gouvèrnman ké otorité-ya », kou  Pòl di, toupannan nou ka soutni souvérènté Jéova-a ké fidélité ? (Tite 3:1).

6. a) Lò Romains 13:1 ka palé di « sa-ya ki gen otorité », a kimoun, é kisa nou blijé fè ? b) Ès sa-ya ki ka dirijé pouvé fè tousa yé lé ?

⁶ (Li Romains 13:1.) Annan sa vèrsé-a, « sa-ya ki gen otorité », a moun asou latè-a ki ka dirijé é ki gen pouvwar asou ròt moun. Krétyen-yan ka obéyi sa moun-yan. Sa otorité-ya ka pèrmèt i gen lapè annan péyi-a, yé ka fè moun-yan rèspèkté lalwa é détan yé jis ka défann sèrvitèr Jéova-ya (Rév. 12:16). A pou sa, Labib-a ka di nou bay yé sa yé ka doumandé, ki a enpo ki a taks ki a lakrent ki a lònò (Rom. 13:7). Mé, si yé gen sa pouvwar-a, a sèlman paské Jéova ka pèrmèt yé gen l’. A sa Jézi di lò gouvèrnèr romen-an Pons Pilat pozé l’ késyon. Lò Pilat di li ki a li ki té ké désidé si i té ké viv ouben si i té ké mouri, Jézi réponn li : « To pa té ké gen pyès pouvwar si to pa té rousouvwè l’ di laro » (Jean 19:11). Menm fason sa té vré pou Pilat, jòdla, a roun tibi pouvwar rounso sa-ya ki ka dirijé ké sa-ya ki ka fè lapolitik gen.

7. a) Annan ki kalité sitiasyon nou pa pouvé obéyi moun ki gen otorité ? b) Kisa sa-ya ki ka dirijé é ki ka profité anlè nou divèt byen konprann ?

⁷ Nou ka rèspèkté lalwa péyi koté nou ka rété-a, dipi yé pa ka kontrédi lalwa Bondjé. Mé nou pa pouvé obéyi lò yé ka doumandé nou fè sa Bondjé défann nou fè. Nou pa pouvé obéyi non plis lò yé ka défann nou fè bagaj Bondjé doumandé nou fè c. Parèkzanp, roun patché gouvèrnman ka doumandé jennjan-yan fè larmé. Roun ran ka défann nou sèrvi nou tradiksyon di Labib-a ké nou piblikasyon-yan ki ka apiyé asou Labib-a é yé ka anpéché nou préché ké rasanblé. Sa-ya ki gen pouvwar mé ki ka profité anlè nou, parèkzanp lò yé ka pèrsékité nou, yé ké gen kont pou randé Bondjé. Wi, paské Bondjé ka ‘véyé sa yé ka fè’ (Eccl. 5:8).

8. Ki diférans i gen ant « sa-ya ki gen otorité » ké « Sa-la ki Pi-Rot-a », é poukisa sa diférans-a enpòrtan ?

⁸ A vré ki « sa-ya ki gen otorité » pouvé koumandé, yé pouvé fè bèl bagaj é yé gen drwa fè ròt-ya obéyi. Mé sa pa lé di ki yé parfè é ki yé pi rot pasé nou. I gen Rounsèl moun ki parfè é ki pi rot pasé pyès moun, a Jéova. Kat fwa annan Labib-a yé ka aplé Jéova « Sa-la ki Pi-Rot-a » (Dan. 7:18, 22, 25, 27).

9. Kisa Danyèl wè annan roun vizyon ?

⁹ Profèt Danyèl wè plizyèr vizyon ki ka byen montré ki pouvwar Jéova gen lontan pi gran pasé sa-la moun-yan gen. Pou koumansé, i wè kat bi papa bèt ki ka réprézanté pwisans mondyal-ya (Babilòn, Anpir médopèrs-a, Lagrès ké Ròm). I wè osi pwisans mondyal-a ki la jòdla, alyans anglé ké amériken-an (Dan. 7:1-3, 17). Épi i wè Jéova ki té asiz asou so tronn annan tribinal-a annan syèl-a (Dan. 7:9, 10). Sa profèt-a wè apré divèt sa roun avèrtisman pou sa-ya ki ka dirijé jòdla.

10. Dapré Daniel 7:13, 14, 27, kimoun Jéova ka bay pouvwar pou dirijé latè-a, é kisa sa ka montré asou Jéova ?

¹⁰ (Li Daniel 7:13, 14, 27.) Dapré sa liv Daniel-a ka di, Jéova ka tiré tout pouvwar annan lanmen gouvèrnman-yan asou latè-a é i ka bay ròt moun sa  pouvwar-a. Sa moun-yan ka mérité sa pouvwar-a plis é yé pi fò pasé yé. A kimoun ka rousouvwè sa pouvwar-a ? A roun moun ki « kou pitit roun wonm », Jézi Kris, ké « sen-yan ki ka sèrvi Sa-la ki Pi-Rot-a », sa lé di 144 000-ya ki ké dirijé « pou tout-tan » (Dan. 7:18). Kou Jéova sa « Sa-la ki Pi-Rot-a », a li sèl ki gen pouvwar fè sa kalité bagaj-ya.

11. Ki ròt paròl Danyèl di ka montré ki pouvwar Jéova-a lontan pi gran pasé sa-la nasyon-yan gen ?

¹¹ Sa Danyèl wè annan sa vizyon-an ka montré ki sa i té di anvan té vré. I té di ki « Bondjé-a ki annan syèl-a » « ka tiré rwa-ya é i ka mété rwa-ya ». I té di dèyè sa « ki Sa-la ki Pi-Rot-a ka dominé asou rwayonm imen-yan, é sa-la i lé bay, a li i ka bay sa rwayonm-an » (Dan. 2:19-21 ; 4:17). Ès Jéova ja tiré moun ki ka dirijé ouben ès i ja mété moun pou dirijé ? Wi i ja fè l’ !

12. Palé di roun okazyon koté Jéova tiré pouvwar roun rwa té gen (gadé zimaj-a).

¹² Tan-lontan, Jéova byen montré ki so pouvwar té pi gran pasé pouvwar « sa-ya ki gen otorité ». Annou pran trwa èkzanp. Roun faraon annan péyi Éjip té fè Ébré-ya divini èsklav é plizyèr fwa i réfizé lésé yé pati. Mé Jéova libéré so pèp é i néyé faraon annan lanmè Rouj-a (Ex. 14:26-28 ; Ps. 136:15). Pannan roun lafèt, rwa Babilòn-an, Baltazar, té ‘fè so kò monté pi rot pasé Sényèr-a ki annan syèl-a’ é pasé i bay Jéova laglwar, i té « louwé bondjé ki fèt ké lò é ki fèt an arjan » (Dan. 5:22, 23). Mé Bondjé fè sa mouché-a ki té ka fè ròklò ronté menm. « Sa lannwit-a menm », yé tchwé Baltazar é a Mèd-ya ké Pèrs-ya ki pran so rwayonm (Dan. 5:28, 30, 31). Éròd Agripa 1^é ki té rwa an Palèstin té fè yé tchwé apot Jak, é i té mété apot Pyèr lajòl pou i té pouvé tchwé l’ osi. Mé Jéova anpéché l’ fè sa. « Zanj Jéova-a frapé l’ », é i mouri (Actes 12:1-5, 21-23).

13. Bay roun èkzanp koté Jéova ganyen plizyèr nasyon ki té mété yé kò ansanm.

¹³ Jéova montré osi ki menm lò plizyèr nasyon ka mété yé kò ansanm, i toujou pi pwisan pasé yé. Parèkzanp, i briga pou Israyélit-ya : i pèrmèt yé ganyen asou 31 rwa kananéyen ki té mété yé kò  ansanm é i pèrmèt yé rivé pran roun patché latè annan Péyi i té promèt bay yé-a (Jos. 11:4-6, 20 ; 12:1, 7, 24). Gras a li, Israyélit-ya krazé Bèn-Adad ké 32 ròt rwa siryen ki té ka briga kont yé (1 Rois 20:1, 26-29).

14-15. a) Kisa rwa Nabikodonozòr ké rwa Daryis rékonnèt asou souvérènté Jéova-a ? b) Kisa roun Psaume ka di asou Jéova ké so nasyon ?

¹⁴ A pa dé fwa Jéova montré ki i sa Sa-la ki Pi-Rot-a. Parèkzanp, pasé rwa Babilòn-an Nabikodonozòr rékonnèt ki a sèlman vré Bondjé-a ki ka mérité yé louwé l’, i voyé so kò monté akoz di ‘so fòrs’, di ‘so pwisans’, di ‘so laglwar’ ké di ‘so grandèr’. Akoz di sa, Jéova fè l’ divini fou. Lò i géri, Nabikodonozòr « louwé Sa-la ki Pi-Rot-a » é i rékonnèt ki « so dominasyon, a roun dominasyon ki pa ké jen fini ». É i di dèyè sa : « I pa gen pésonn ki pouvé anpéché l’ aji » (Dan. 4:30, 33-35). Kou Danyèl té lé rété fidèl, yé jité l’ annan roun trou koté i té gen lyon. Mé Jéova protéjé l’. É apré tousa, rwa Daryis bay sa lalwa-a : « A pou tout moun annan mo rwayonm tranblé douvan Danyèl so Bondjé. Paské i sa Bondjé ki vivan-an é i ka rété pou tout-tan. So rwayonm pa ké janmen disparèt, é so dominasyon, a pou tout-tan » (Dan. 6:7-10, 19-22, 26, 27, nòt).

¹⁵ Nou ka li annan Psaume 33:10 : « Jéova fè projè nasyon-yan tonbé a dlo ; i anpéché pèp-ya fè yé projè. » I ka di ankò : « Nasyon-an so Bondjé a Jéova, so tchò kontan, pèp i chwazi-a pou i sa so pèp » (Ps. 33:12). Ès sa pa ka bay nou anvi rété fidèl ?

16. Di kisa nou pouvé sir, é poukisa ? (gadé zimaj-a).

¹⁶ Nou wè sa Jéova fè tan-lontan. Mé titalò, kisa ki ké rivé ? Nou pouvé sir ki pannan « gran tribilasyon-an », Jéova ké sové so sèrvitèr ki fidèl (Mat. 24:21 ; Dan. 12:1). I ké protéjé yé kont nasyon-yan ki ké mété yé kò ansanm pou ataké  yé ké méchansté. Labib-a ka aplé yé Gòg ki soti Magòg. Menm si 193 péyi-ya annan Nations unies-ya té ka ataké yé tout ansanm, yé pa té ké fò asé pou vin douvan Sa-la ki Pi-Rot-a ké so larmé ki annan syèl-a. Jéova ka promèt : « Wi, mo ké montré mo pwisans, mo ké montré ki mo sa roun Bondjé ki sen é mo ké fè roun patché nasyon konnèt mo. É yé ké savé ki mo sa Jéova » (Ézéch. 38:14-16, 23 ; Ps. 46:10).

17. Dapré Labib-a, kisa ki ké rivé rwa-ya asou latè-a, é kisa ki ké rivé sa-ya ki ka fè sa ki drèt ?

¹⁷ Lò Gòg ké ataké, sa ké mennen lagèr Armagédon-an, é pannan sa lagèr-a, Jéova ké montré pwisans i gen paské i ké krazé « rwa-ya asou tout latè-a » (Rév. 16:14, 16 ; 19:19-21). A sa moman-an, « a sèlman moun ki drèt ki ké rété asou latè-a, é a sèlman sa-ya ki ka fè sa ki drèt ki ké rété asou l’ » (Prov. 2:21).

18. Kisa roun patché vré krétyen té paré pou fè, é poukisa ? (Daniel 3:28).

¹⁸ Lannen apré lannen, roun patché vré krétyen té paré pou pédi yé libèrté. Yé jis té paré pou pédi yé lavi paské yé té kontan Jéova é paské yé té ka wè l’ kou yé Souvéren. Sa wonm-yan ké sa fanm-yan ki té fidèl té byen désidé kou trwa Ébré-ya ki soti annan four difé-a paské yé rété fidèl douvan Sa-la ki Pi-Rot-a (li Daniel 3:28).

19. Kisa Jéova ké gadé pou jijé so sèrvitèr-ya, é kisa nou divèt fè ?

¹⁹ David di kouman sa enpòrtan pou nou rété fidèl. Parèkzanp, i ékri : « Jéova ké jijé pèp-ya. Jijé mo, o Jéova, paské mo ka fè sa ki drèt é mo fidèl » (Ps. 7:8). I ékri osi : « A pou mo fidélité ké mo jistis protéjé mo » (Ps. 25:21). Nou ké gen pi bèl lavi nou pouvé gen si nou ka rété fidèl é si nou ka fè sa ki drèt douvan Jéova kèlkéswa sa ki rivé. A la nou ké rousanti menm bagaj ki sa ki marké annan Psaume 119:1 : « Sa-ya ki drèt annan tousa yé ka fè é ki ka obéyi lalwa Jéova-a, yé tchò kontan ».