1. Kisa to anprann asou Jéova ?

 SI TO lévé annan roun fanmi Témwen Jéova, to anprann konnèt Jéova lò to té toupiti toujou. To papa ké to manman divèt anprann to ki a li ki kréyé tout bagaj, ki i gen roun patché bèl kalité é ki i lé fè latè-a divini roun paradi (Gen. 1:1 ; Actes 17:24-27).

2. Kisa roun ran moun ka pansé di sa-ya ki ka krè ki i gen roun moun ki fè tout bagaj ?

² Mé, i gen roun patché moun ki pa ka krè ki i gen roun Bondjé, ouben ki a li ki fè tout bagaj. Yé pito ka krè ki lavi-a yenki parèt konsa, é ki, piti piti, ti bagaj vivan tou senp bay bagaj vivan pi konpliké. Sa moun-yan ka di ki lasyans byen montré ki Labib-a pa ka di lavérité é ki, si to ka krè ki i gen roun moun ki fè latè-a, a paské to pa alé lékòl, to pa konnèt anyen é ki to ka krè tousa yé ka d’ to.

3. Poukisa sa enpòrtan pou nou fè nou lafwa vin pi fò ?

³ Ès nou ké douté ki Jéova sa roun Kréyatèr ki plen ké lanmou akoz di sa moun ki fè gran lékòl ka di ? Oro ! Sa ka dépann bokou di poukisa nou ka krè ki a Jéova ki fè tout bagaj. Ès nou ka krè sa paské a sa yé di nou ouben paské nou menm nou pran tan byen gadé prèv-ya ki ka montré nou sa ? (1 Cor. 3:12-15). Ki nou Témwen Jéova dipi lontan ouben dipi ayè, nou divèt fè nou lafwa vin pi fò. Si nou lafwa fò, nou pa ké lésé pyès ‘paròl san sans pou bloublou moun’ ki pa k’alé ké paròl Bondjé-a bloublou nou (Col. 2:8 ; Héb. 11:6). Annan sa artik-a, nou ké wè 1) poukisa roun patché moun pa ka krè ki i gen roun moun ki fè tout bagaj, 2) kouman nou pouvé fè nou lafwa annan Sa-la ki fè tout bagaj, Jéova, vin pi fò, é 3) kouman nou pouvé kontinyé gen roun lafwa ki fò.

4. Dapré Hébreux 11:1, asou kisa lafwa divèt apiyé ?

⁴ I gen sa ki ka di ki lò to gen lafwa, sa lé di ki to ka krè roun bagaj san pyès anyen pa ka di to ki a vré. Mé a pa sa Labib-a ka di asou lafwa (li Hébreux 11:1). I ka èspliké ki lafwa ka apiyé asou prèv ki solid (Héb. 11:3). Parèkzanp, menm si nou pa pouvé wè Jéova, Jézi ké Rwayonm-an, i gen plizyèr bagaj ki ka montré ki yé la. Men sa roun syantifik ki Témwen Jéova ka di asou sa : « Nou pa ka krè pou krè, nou lafwa ka tchenbé kont di bagaj lasyans ka di. »

5. Poukisa bokou moun pa ka krè ki i gen roun moun ki fè tout bagaj ?

⁵ Pitèt nou ka doumandé nou kò : « Si i gen prèv ki ka montré ki i gen roun moun ki fè tout bagaj, poukisa bokou moun ka pansé ki a pa Bondjé ki fè si i gen lavi asou latè-a ? » I gen sa ki pa janmen pran tan gadé sa prèv-ya. A sa Robert ki Témwen Jéova jòdla ka di : « Kou yé pa jen ka anprann nou lékòl ki i gen roun moun ki fè tout bagaj, mo pa té ka krè sa. Mé lò mo té gen 22 an, mo kontré ké Témwen Jéova ki montré mo ki Labib-a ka bay nou plizyèr bon rézon pou nou pouvé krè ki i gen roun moun ki fè tout bagaj b. » (Gadé karé-a «  Kozman pou papa ké manman-yan ».)

6. Poukisa roun ran moun pa lé krè ki i gen roun moun ki fè tout bagaj ?

⁶ I gen sa ki ka di : « Mo pa ka krè i gen roun moun ki fè tout bagaj, pou mo, a sa  mo ka wè rounso mo ka krè ». Pourtan, i gen sèrten bagaj yé pa pouvé wè mé yé savé ki yé la, kou van-an parèkzanp, paské i gen sèrten bagaj ki ka byen montré yé sa. Menm fason-an, Labib-a ka palé di lafwa annan ròt « bagaj nou pa pouvé wè », mé pou sa bagaj-ya osi i gen prèv ki ka byen montré nou ki yé la (Héb. 11:1). Kou sa ka pran tan pou gadé tout sa prèv-ya, roun patché moun ka lésé sa tonbé. Mé lò nou pa ka pran tan fè sa, vitman nou pouvé di ki i pa gen Bondjé.

7. Ès a tout syantifik-ya ki ka di ki a pa Bondjé ki fè tout bagaj ? Èspliké.

⁷ Lò yé pran tan gadé prèv-ya, roun lo syantifik vin krè ki a Bondjé ki fè tout bagaj c. Kou Robert nou ja palé  anvan, roun ran té ka di ki i pa dèt gen pyès moun ki fè tout bagaj paské yé pa ka anprann yé sa annan gran lékòl-ya. Mé yé anprann konnèt ké kontan Jéova. Kou sa syantifik-ya, kèlkéswa lékòl nou fè, nou divèt fè nou lafwa annan Bondjé vin pi fò. Pyès moun pa pouvé fè l’ pou nou.

8-9. a) Ki késyon nou ké wè aprézan ? b) Si nou ka pran tan byen gadé lanatir kouman sa pouvé idé nou ?

⁸ Kouman to pouvé fè to lafwa annan Sa-la ki fè tout bagaj vin pi fò ? Annou wè dé bagaj to pouvé fè.

⁹ Byen gadé lanatir. To pouvé fè to lafwa annan Sa-la ki fè tout bagaj vin pi fò lò to ka gadé zannimo-ya, plant-ya ké zétwèl-ya (Ps. 19:1 ; Is. 40:26). Pi to ké pran tan byen gadé lanatir, pi to ké sir ki a Jéova ki fè tout bagaj. Annan nou piblikasyon, i gen artik ki ka fè nou wè bèl bagaj Bondjé fè. Éséyé li yé, menm si yé rèd pou konprann. Éséyé tchenbé tousa to pouvé é pa bliyé alé asou jw.org pou rouwè bèl vidéyo asou sa Bondjé fè. Yé montré nou sa vidéyo-ya annan dèrnyé asanblé réjyonal-ya.

10. Dapré Romains 1:20, lanatir ka montré ki i gen roun moun ki fè l’. Bay roun èkzanp.

¹⁰ Lò to ka gadé lanatir, pran tan byen gadé sa i ka anprann to asou Sa-la ki fè nou (li Romains 1:20). Parèkzanp, to savé ki Solèy-a ka bay chalò é a sa ki ka fè si i gen lavi asou latè-a. Mé Solèy-a ka voyé osi sa yé ka aplé rayon ultraviolet, é a roun bagaj ki mové pou nou. Ès nou protéjé ? Wi, nou protéjé. Latè-a vlopé annan roun boukliyé yé ka aplé la couche d’ozone. Ozone-an, a roun gaz ki ka protéjé nou di sa réyon-yan ki pa bon pou nou. Pi i gen sa réyon-yan ki mové pou nou pi i gen ozone. Ès to pa krè ki i blijé gen roun moun ki fè sa, ki sa moun-an divèt entélijan é ki i kontan nou bokou ?

11. Ki koté nou pouvé trouvé enfòrmasyon ki ké fè nou lafwa vin pi fò ? (gadé karé-a «  Plizyèr bagaj ki pouvé fè to lafwa vin pi fò »).

¹¹ Si to ka gadé annan Index des publications des Témoins de Jéhovah é si to ka chaché asou jw.org, to pouvé trouvé plizyèr enfòrmasyon ki ké fè to lafwa vin pi fò. Pou koumansé, to pouvé li artik-ya ké gadé vidéyo-ya annan parti « Évolution ou conception ? ». Yé pa long é yé ka bay nou détay asou zannimo ké plant-ya ki ké fè to rété èstébékwé.Yé ka palé osi di plizyèr bagaj annan lanatir ki syantifik-ya ka éséyé imité.

12. Lò nou ka étidyé Labib-a, kisa nou divèt pran tan byen gadé ?

¹² Étidyé Labib-a. Syantifik nou palé anvan-an pa té ka asèpté ki i gen roun moun ki fè tout bagaj, mé piti piti i chanjé lidé. I ka di : « Si mo gen lafwa, a pa sèlman ké sa mo anprann gras a lasyans, a osi paské mo pran tan byen étidyé Labib-a ». Pitèt to ja konnèt bokou bagaj annan Labib-a. Mé a pa pou sa to pa divèt étidyé Paròl Bondjé-a pou fè to lafwa annan Sa-la ki fè tout bagaj vin pi fò (Jos. 1:8 ; Ps. 119:97). Parèkzanp, sonjé kouman Labib-a ka palé an détay di tout bagaj ki fèt tan-lontan. Sonjé osi tout profési Labib-a ki ja fèt, é gadé kouman sa-ya ki ékri Labib-a ka tonbé dakò. Si to ka fè sa, to ké pi sir ankò ki Jéova sa roun kréyatèr ki saj,  plen ké lanmou é ki a li ki fè moun ékri Labib-a d (2 Tim. 3:14 ; 2 Pierre 1:21).

13. Bay roun bon konsèy Labib-a ka bay nou.

¹³ Lò to ka étidyé Paròl Bondjé-a, gadé kouman konsèy i ka bay bon pou nou. Parèkzanp, dipi nanninannan i ka di nou pa kontan soumaké-a paské i danjéré é i ka fè nou gen « roun patché soufrans » (1 Tim. 6:9, 10 ; Prov. 28:20 ; Mat. 6:24). Ès sa konsèy-a bon toujou jòdla ? Roun liv ki ka palé di fason moun-yan ka pansé jòdla e ka di : « Sa-ya ki ka pansé ki soumaké a sa ki pi enpòrtan, yé tris é yé déprésif. Menm sa ki lé jis gen plis soumaké, yé tris é yé gen plis problèm lasanté. » Donk, lò Labib-a ka di nou panga ké zafè kontan soumaké-a, sa vréman itil pou nou ! Mé pitèt to ka sonjé ròt prensip ki idé to annan to lavi. Sa-la ki fè nou-a é ki kontan nou, bay nou roun bèl kado, Labib-a. Pi nou ké byen konprann ki tout konsèy ki annan Labib-a gen valò, pi nou ké apliké yé annan nou lavi é pi nou tchò ké kontan (Jacq. 1:5 ; Is. 48:17, 18).

14. Gras a sa nou ké étidyé annan Labib-a, kisa nou ké anprann asou Jéova ?

¹⁴ Lò to ka étidyé Labib-a, chaché anprann konnèt Jéova (Jean 17:3). Lò to ké étidyé Paròl Bondjé-a, to ké anprann konnèt roun moun ki gen bèl kalité, é to ké wè sa menm kalité-ya lò to ké konnèt plis bagaj asou lanatir ! A sèlman roun moun ki ka èkzisté vréman ki pouvé gen sa kalité-ya. A pa roun moun nou ka imajiné annan nou tèt (Ex. 34:6, 7 ; Ps. 145:8, 9). Pi to ké anprann konnèt Jéova, pi to lafwa annan li, pi to lanmou pou li, pi to lanmityé ké li ké vin fò.

15. Kouman lò nou ka palé di nou lafwa sa pouvé idé nou ?

¹⁵ Palé di to lafwa annan Bondjé. A roun bon fason pou fè li divini pi fò. Mé si roun moun ka doumandé to si i gen roun Bondjé épi to pa savé kouman pou to réponn li, kisa to pouvé fè ? Chaché annan nou piblikasyon kisa Labib-a ka di asou sa épi palé di sa ké moun-an (1 Pierre 3:15). To pouvé doumandé osi roun frè ouben roun sò ki gen èspéryans idé to. Ki moun-an asèpté, ki i pa asèpté sa to ké di li, répons to ké trapé-ya ké idé to. Sa ké fè to lafwa vin pi fò. Konsa lò to ké tandé sa-ya ki saj é ki konnèt bokou bagaj dapré yé, di ki i pa gen pyès moun ki fè tout bagaj, to pa ké krè yé.

16. Kisa ki ka riské rivé nou lafwa si nou pa ka fè l’ vin pi fò ?

¹⁶ Ki i gen lontan ki i pa gen lontan nou ka sèrvi Jéova, nou divèt fè nou lafwa rété fò. Poukisa ? Paské si nou pa ka fè sa, i ka riské vin fèb. Annou sonjé ki nou gen lafwa annan bagaj nou pa ka wè. É nou pouvé bliyé fasilman sa nou pa ka wè. Lò Pòl palé di zafè pa gen asé lafwa, i di ki a « péché-a ki pouvé vitman anpéché nou vansé » (Héb. 12:1). Kisa nou pouvé fè pou nou pa tonbé annan sa trap-a ? (2 Thess. 1:3).

17. Kisa nou bézwen pou nou kontinyé gen roun lafwa ki fò ?

¹⁷ Pou koumansé, sipliyé Jéova souvan pou i bay to so lèspri. Poukisa to divèt fè sa ? Paské a gras a lèspri sen nou pouvé gen lafwa (Gal. 5:22, 23). Nou pa té ké pouvé gen lafwa annan Sa-la ki fè tout bagaj si i pa té ka bay nou so lèspri. Si nou  ka kontinyé doumandé Jéova so lèspri, i ké bay nou li (Luc 11:13). Annou pa pè di li : « Bay nou plis lafwa » (Luc 17:5).

18. Dapré Psaume 1:2, 3, ki bèl kado Bondjé bay nou ?

¹⁸ Apré sa, étidyé Paròl Bondjé-a souvan (li Psaume 1:2, 3). Lò yé ékri sa psaume-an, i pa té gen bokou Israyélit ki té gen tout Lalwa Bondjé-a. A déztrwa Israyélit rounso, annan sa i té gen rwa-a ké prèt-ya, ki té pouvé gen l’. É chak sèt lannen ki té pasé « wonm, fanm, timoun ké moun vini », té divèt rasanblé pou kouté Lalwa-a (Deut. 31:10-12). Annan lépòk Jézi-a, a annan lanmen roun ran moun sèlman ké annan sinagòg-ya yé té pouvé trouvé Labib-a. Mé jòdla, près tout moun pouvé li tout Labib-a ouben roun parti. Men roun bèl kado ! Kouman nou pouvé montré nou kontan sa kado-a ?

19. Kisa nou divèt fè pou nou kontinyé gen roun lafwa ki fò ?

¹⁹ Nou ké montré ki nou byen kontan Bondjé fè nou kado so Paròl, si nou ka li l’ souvan. A pa pou étidyé sèlman lò nou gen roun ti moso tan. Nou divèt fè roun program pou étidyé épi swiv sa program-an. A konsa nou ké kontinyé gen roun lafwa ki fò.

20. Kisa nou divèt byen désidé fè ?

²⁰ Nou pa kou « sa-ya ki saj ké sa-ya ki entélijan » annan sa monn-an, nou lafwa fò, é i ka apiyé asou Paròl Bondjé-a (Mat. 11:25, 26). Kou nou ka étidyé sa liv sakré-a, nou savé poukisa sitiasyon jòdla ka vin pi mové é nou savé kisa Jéova ké fè titalò pou ranjé sa. A pou sa, annou byen désidé fè nou lafwa vin pi fò é idé roun patché moun gen lafwa annan Sa-la ki fè nou-a (1 Tim. 2:3, 4). Épi annou kontinyé antann jou-a koté tout moun asou latè-a ké louwé Jéova lò yé ké di : « To ka mérité, wi Jéova nou Bondjé, rousouvwè laglwar [...], paské a to ki kréyé tout bagaj » (Rév. 4:11)