Poukisa nou bézwen rwayonm Bondjé-a ?
O koumansman istwè sé imen-yan, nou Kréyatèr, so non a Jéova, té sa sèl Chèf-a. Fason i té ka dirijé-a té plen ké lanmou. I té fè pou imen-yan roun koté pou yé té rété ki té bèl toubonnman, jarden Édèn-an. I té ka bay yé roun patché bagaj pou manjé. I té bay yé osi roun travay ki té ka bay yé tchò kontan (Genèse 1:28, 29 ; 2:8, 15). Si imen-yan té rété anba so dominasyon plen ké lanmou, yé té ké viv annan lapè.
Prémyé imen-yan rijété otorité Bondjé.
Labib-a ka di ki roun zanj rébèl, ki yé ké aplé Satan Djab-a, di ki Bondjé pa gen drwa dirijé nou. Dapré sa i té di, moun-yan té ké viv pi byen san Bondjé pa dominé yé é san so konsèy. Malérèzman, nou prémyé paran-yan, Adan ké Èv, pran menm chimen ki Satan : yé rébélé yé kò kont Bondjé (Genèse 3:1-6 ; Révélation 12:9).
Paské yé rijété otorité Bondjé, Adan ké Èv pédi bèl ti koté yé té ka rété annan paradi-a, é yé pédi osi lèspwar viv pou tout-tan ké roun lasanté parfè (Genèse 3:17-19). Yé désizyon mennen traka osi pou timoun yé fè apré. Labib-a ka di ki paské Adan péché, « péché-a antré annan monn-an, é akoz di péché-a lanmò antré osi » (Romains 5:12). Péché-a mennen rounòt problèm ankò : « Wonm ka dominé wonm pou so malò » (Ecclésiaste 8:9). Sa lé di ki, lò a imen-yan ki ka dirijé, asiré i ké gen problèm.
WONM KA KOUMANSÉ DOMINÉ WONM
Nèmròd rébélé so kò kont Jéova.
Labib-a ka di ki prémyé chèf ki dominé imen-yan a té Nèmròd. Sa wonm-an rébélé so kò kont dominasyon Jéova. Dipi lépòk Nèmròd, moun-yan ki gen otorité ka itilizé yé pouvwar pou malò lézòt. I gen 3 000 lannen, rwa Salomon ékri : « Mo wè maléré-ya ki té ka pléré, é i pa té gen pyès moun pou konsolé yé. Sa-ya ki té ka fè yé méchansté té gen pouvwar » (Ecclésiaste 4:1).
Anyen pa chanjé jòdla. An 2009, roun artik ONU té ka di ki « mové dominasyon-an » ka plizanpli fè parti di « prémyé bagaj-ya ki ka mennen malò pou moun-yan ».
I TAN POU SA CHANJÉ !
Monn-an bézwen pi bon chèf é roun pi bon dominasyon. É a sa menm nou Kréyatèr ka promèt nou !
Menm pi bon gouvèrnman imen-yan pa rivé trapé solisyon pou tout gro problèm i gen asou latè-a.
Bondjé préparé roun rwayonm, ouben roun gouvèrnman. Sa gouvèrnman-an ké ranplasé tout dominasyon imen-yan é « li sèl ké rété pou tout-tan » (Daniel 2:44). A pou sa rwayonm-an ki milyon moun ka priyè (Matthieu 6:9, 10). A pa Bondjé li-menm ki ké dirijé sa rwayonm-an. A roun moun ki viv asou latè-a ki Bondjé chwazi pou i sa chèf sa gouvèrnman-an. Kimoun i chwazi ?
