Ès to byen li chak Tourdégard sa lannen-an ? Annou wè si to ka rivé trapé répons asou sa késyon-yan :

Jacques 5:11 ka di ki Jéova « kontan nou ké tout so tchò » é ki i gen « mizérikòrd ». Di kisa sa ka pèrmèt nou sir ?

Nou savé ki, kou Jéova gen mizérikòrd, i paré pou pardonnen nou. Jacques 5:11 ka pèrmèt nou sir osi ki, kou i kontan nou, i lé idé nou. Annou imité l’ (w21.01, p. 21).

Poukisa Jéova mété prensip otorité-a ?

A paské i kontan nou. Gras a sa prensip-a, tout moun annan so fanmi pouvé travay ansanm annan lapè, é tout bagaj ka fèt byen. Tout sa-ya ki ka asèpté sa, savé kimoun ki ka pran dèrnyé désizyon-an é kimoun ki ka gadé si moun-yan ka obéyi (w21.02, p. 3).

Poukisa krétyen-yan divèt panga lò yé ka sèrvi aplikasyon pou voyé ké rousouvwè mésaj élèktronik ?

Roun moun ki ka désidé sèrvi roun aplikasyon konsa divèt byen chwazi so zanmi. Sa pi rèd lò i gen bokou moun annan group-a (1 Tim. 5:13). Sa moun-an divèt panga osi pa kouté ni répété pyès bagaj pyès moun pa savé si a vré, é i pa divèt sèrvi frè ké sò-ya pou fè so komèrs maché (w21.03, p. 31).

Poukisa Bondjé lésé so pitit soufri épi mouri ?

Annou bay trwa rézon. 1) Yé té divèt maré Jézi asou roun poto pou libéré Jwif-ya anba roun malédiksyon ki té asou yé èspésyalman. (Gal. 3:10, 13). 2) A konsa Jéova bay li roun fòrmasyon pou lò i té ké divini Gran Prèt. 3) Kou Jézi rété fidèl jouktan i mouri, i byen montré ki roun moun pouvé rété fidèl menm si i ka jwenn éprèv ki rèd menm (Job 1:9-11) (w21.04, p. 16-17).

Kisa to pouvé fè si to pa ka rivé jwenn moun-yan annan yé kaz ?

To pouvé éséyé jwenn yé lò to gen plis chans trapé yé annan yé kaz. To pouvé osi préché rounòt koté to pa abitchwé préché ouben éséyé rounòt fason pou préché. To pouvé ékri lèt parèkzanp (w21.05, p. 15-16).

Kisa apot Pòl té lé di lò i di : « Paské mo asèpté lalwa-a, mo mouri parapòrta lalwa » ? (Gal. 2:19).

Lalwa Jéova té bay Moyiz té ka byen montré ki pyès moun pa parfè é i té ka idé Israyélit-ya konprann ki a té Jézi désandans-a (Gal. 3:19, 24). A konsa Pòl vin asèpté Kris. Atò, i « mouri parapòrta lalwa-a » : sa lalwa-a pa té gen pyès pouvwar asou li ankò (w21.06, p. 31).

Ki èkzanp Jéova ka bay nou annan zafè kontinyé tchenbé ?

Jéova ka sipòrté roun patché sitiasyon difisil : yé dérèspèkté so non ; bokou moun pa lé asèpté Bondjé é yé pa lé i dirijé yé ; roun ran annan so pitit tounen yé do bay li ; Djab-a ka kontinyé manti asou li ké so sèrvitèr-ya ; i ka wè kouman so sèrvitèr ka soufri ; i pa pouvé wè so zanmi ki mouri ; moun ki mové ka fè moun méchansté ; moun-yan ka détrwi latè i fè-a (w21.07, p. 9-12).

Annan ki sitiasyon Jozèf montré i té gen pasyans ?

So frè-ya fè l’ méchansté. Apré sa, yé akizé l’ pou roun bagaj i pa té fè é yé mété l’ lajòl pannan roun patché lannen (w21.08, p. 12).

Kisa Aggée 2:6-9, 20-22 ka anprann nou asou soukous nasyon-yan ?

Nasyon-yan pa lé tandé mésaj Rwayonm-an, mé lavérité-a ka fè roun patché moun vini òbò Bondjé. Titalò, Bondjé ké soukouyé nasyon-yan pou krazé yé nèt (w21.09, p. 15-19).

Poukisa nou pa divèt moli annan prédikasyon-an ?

Jéova ka wè tout éfòr nou ka fè é i kontan sa nou ka fè. Si nou pa ka moli é si nou ka kontinyé tchenbé, nou ké gen lavi pou tout-tan (w21.10, p. 25-26).

Kouman Lévitique chapit 19 pouvé idé nou apliké sa konsèy-a : « A pou zòt divini sen annan tousa zòt ka fè » ? (1 Pierre 1:15).

Pitèt a Lévitique 19:2 Pyèr té ka roupran. Lévitique chapit 19 ka bay plizyèr fason nou pouvé apliké 1 Pierre 1:15 (w21.12, p. 3-4).