1-2. a) Ki lòrd Bondjé bay trwa annan apot Jézi-ya é kouman yé obéyi ? b) Kisa nou ké wè annan sa artik-a ?

 APRÉ Lapannkot 32, apot Pyèr, Jak ké Jan wè roun vizyon ki fè yé rété èstébékwé. Toupannan yé té laro roun montangn, pitèt a té montangn Èrmon, kò Jézi chanjé douvan yé. « So vizaj koumansé kléré kou solèy-a é so lenj té ka kléré kou limyèr-a » (Mat. 17:1-4). Roun tibi tan anvan vizyon-an fini, apot-ya tandé Jéova di : « Men mo pitit, sa-la mo kontan-an é ki ka fè mo plézi. Kouté li » (Mat. 17:5). Asou fason sa trwa apot-ya mennen yé lavi, yé montré ki yé té ka kouté Jézi. É nou menm nou lé swiv yé èkzanp.

² Annan artik nou fin wè-a, nou anprann ki kouté vwa Jézi sa lé di arété fè sèrten bagaj. Annan sa artik-a, nou ké palé di dé bagaj Jézi ka doumandé nou fè.

3. Dapré Matthieu 7:13, 14, kisa nou divèt fè ?

³ (Li Matthieu 7:13, 14.) Jézi palé di dé lapòt ki ka bay asou dé chimen : prémyé-a « gran », é dézyèm-an, « piti ». Mé i pa gen trwa chimen. A pou sa nou divèt désidé kilès nou ké pran. A désizyon pi enpòrtan-an nou divèt pran : paské rounsèl chimen ka bay lavi pou tout-tan.

4. Kisa to pouvé di asou chimen-an ki « gran » ?

 ⁴ A pa pou nou bliyé ki diférans i gen ant sa dé chimen-yan. I gen roun patché moun asou « gran » chimen-an paské sa fasil pou maché asou l’. Malérèzman, bokou moun ka désidé rété asou sa chimen-an é fè kou tout moun. Yé pa ka wè ki a Satan Djab-a ki ka fè yé pran sa chimen-an épi rété asou l’ é ki, annan bout sa chimen-an, a lanmò yé ké jwenn (1 Cor. 6:9, 10 ; 1 Jean 5:19).

5. Ki éfòr roun ran té gen pou fè pou trouvé « piti » chimen-an é pou pran l’ ?

⁵ Dézyèm chimen-an, li menm, « piti », é Jézi di ki i pa gen bokou moun ki ka trouvé l’. Poukisa ? Nou ka wè ki, annan vèrsé-a ki ka vin apré, Jézi ka di so disip panga fo profèt-ya (Mat. 7:15). Sèrten moun ka di ki i gen milyé rélijyon, é près yé tout ka di yé ka anprann moun lavérité. Lò yé ka wè sa, roun patché moun pa menm ka éséyé chaché savé ankò ki chimen ka bay lavi-a. Pourtan, nou pouvé trouvé l’. Jézi di : « Si zòt ka kontinyé swiv mo paròl-ya, zòt sa vréman mo disip, é zòt ké konnèt lavérité, é lavérité-a ké libéré zòt » (Jean 8:31, 32). To menm, to pa fè kou tout moun ; to chaché koté lavérité-a fika. To étidyé Labib-a fon pou savé kisa Bondjé lé nou fè, é to kouté ansèyman Jézi-a. Parèkzanp, to anprann ki Jéova pa lé nou kouté ansèyman fo rélijyon-yan é i pa lé nou swiv ni yé lafèt ni yé tradisyon. To wè osi ki détan sa pouvé rèd di fè sa Jéova ka doumandé nou é di lésé bagaj i pa kontan (Mat. 10:34-36). To dèt travay rèd pou to chanjé sa to té divèt chanjé annan to lavi. Mé to pa moli, paské to kontan to Papa ki annan syèl-a é to lé fè l’ plézi. A pa ti fyèr i divèt fyèr di to ! (Prov. 27:11).

6. Dapré Psaume 119:9, 10, 45, 133, kisa ki ké idé nou rété asou ti chimen-an ?

⁶ Lò nou ja pran sa ti chimen-an, kisa ki ké idé nou rété asou l’ ? Annou pran roun èkzanp : Annan sèrten péyi, lò to ka pran larout-a asou roun montangn, i gen roun ti baryè asou koté pou protéjé sa ki ka roulé. I ka anpéché yé alé tro pròch di bò larout-a ouben menm tonbé anba. Pyès moun pa ké janmen plenn so kò paské ti baryè-a ka anpéché l’ tonbé ouben tchwé so kò ! Ében nou pouvé di ki règ Jéova ka bay nou annan Labib-a kou roun baryè pou protéjé nou. Yé ka anpéché nou lésé ti chimen-an (li Psaume 119:9, 10, 45, 133).

7. Kisa Satan té ké lé fè jenn-yan krè ?

⁷ Zòt ki jenn, ès détan zòt ka trouvé ki règ Jéova ka bay ka anpéché zòt viv ? A sa Satan té ké lé fè zòt krè. I ka éséyé montré zòt tousa sa-ya ki asou gran chimen-an pouvé fè. Yé té ké di ki yé ka anmizé bon anmizé-a. I lé fè zòt krè ki zòt pa ka byen anmizé kou zòt kanmarad lékòl ouben kou moun-yan ki ka mété yé lavi asou Entèrnèt. I té ké kontan fè zòt krè ki règ Jéova ka anpéché zòt byen profité di lavi-a b.  Mé pa bliyé ki i pa jen ka di kisa ka antann sa-ya ki asou so chimen. Jéova, li menm, ka èspliké sa-ya ki asou ti chimen-an ki bèl bagaj ka antann yé ! (Ps. 37:29 ; Is. 35:5, 6 ; 65:21-23).

8. Kisa sa ki rivé Olaf pouvé anprann jenn-yan ?

⁸ Annou palé di sa ki rivé roun jenn frè yé ka aplé Olaf c. So kanmarad lékòl té ka éséyé fè l’ kouché ké tifi. É lò i èspliké yé ki Témwen Jéova-ya ka rèspèkté règ ki annan Labib-a asou sa ki bon ké sa ki pa bon, plizyèr tifi annan so klas désidé yé té ké trouvé roun mwayen pou kouché ké li. Magré sa, Olaf tchenbé. Mé yé éséyé fè présyon asou li rounòt fason. I ka di : « Mo pròfésèr-ya té ka éséyé fè mo fè gran lékòl. Yé té ka di ki a konsa sèlman mo té ké rivé annan mo lavi. » Kisa ki idé Olaf pou i pa krè yé ? I ka èspliké : « Mo chaché vin pi pròch di frè ké sò-ya annan mo asanblé. Yé divini kou mo pròp fanmi.  Épi osi mo koumansé étidyé Labib-a pi fon. Pi mo té ka étidyé, pi mo té sir ki a té lavérité. É pi mo té byen désidé adoré Jéova. »

9. Kisa sa-ya ki lé rété asou piti chimen-an divèt fè ?

⁹ Satan té ké lé fè to soti asou chimen lavi-a. I té ké kontan si to té ka alé jwenn patché moun-yan ki ka maché asou « chimen lanmò-a » (Mat. 7:13). Mé, to ké rété asou piti chimen-an si to ka kontinyé kouté Jézi é si to toujou ka sonjé ki sa ké protéjé to. Aprézan, annou wè rounòt bagaj Jézi ka doumandé nou fè.

10. Dapré Matthieu 5:23, 24, ki lòrd Jézi bay nou ?

¹⁰ (Li Matthieu 5:23, 24.) Annan sa vèrsé-ya, Jézi ka palé di roun lévènman ki té enpòrtan pou Jwif-ya ki té ka kouté li. Imajiné sa : Roun moun annan Tanp-a, paré pou bay roun prèt roun zannimo pou sakrifyé pou Bondjé. Mé a la i ka sonjé ki so frè gen roun bagaj kont li. Kisa i divèt fè atò ? I divèt lésé so sakrifis la la, épi roupati. Mé kisa ki pouvé pi enpòrtan ki bay Jéova roun sakrifis ? Répons Jézi ka bay klè : « Pou koumansé, fè lapè ké to frè. »

11. Di kouman Jakòb fè pou fè lapè ké Ézayu.

¹¹ Sa ki rivé Jakòb ka anprann nou bokou bagaj asou fason nou divèt fè lapè. Sa té ka fè 20 lannen Jakòb té lésé péyi koté i té fèt, lò Jéova voyé roun zanj pou di li routounen (Gen. 31:11, 13, 38). Mé so gran frè, Ézayu, té promèt ki i té ké tchwé l’ (Gen. 27:41). « Jakòb koumansé pran pè é i santi i té mal menm » : i té pè ki so frè té faché ké li toujou (Gen. 32:7). Kisa i fè pou fè lapè ? Pou koumansé, i palé ké Jéova di so problèm. Apré sa, i voyé kado ki té ka kouté chè pou Ézayu (Gen. 32:9-15). Pou fini, lò dé frè-ya kontré, Jakòb pran douvan pou bay Ézayu lònò : i kroubé douvan li. I pa fè l’ roun kou ni dé kou, mé sèt kou ! Si Jakòb rivé fè lapè ké so frè, a paské i fè so kò toupiti é i montré li bokou rèspè (Gen. 33:3, 4).

12. Kisa èkzanp Jakòb ka anprann nou ?

¹² Nou pouvé anprann bokou asou sa Jakòb fè anvan i jwenn so frè é asou fason i bòrdé l’. A ké imilité i doumandé Jéova idé li. Épi i montré ki sa i té ka doumandé annan so lapriyè té sensèr. I fè tousa i té pouvé pou fè lapè ké so frè. É lò yé kontré, Jakòb pa éséyé fè Ézayu konprann ki i pa té divèt fè sa i té fè é ki a té li ki té gen rézon. Sa i té lé, a té fè lapè ké so frè. Kouman nou pouvé fè kou li ?

13-14. Si nou fè roun annan nou frè ouben nou sò lapenn, kisa nou divèt fè ?

¹³ Kou nou ka maché asou chimen lavi-a, nou lé viv annan lapè ké nou frè ké nou sò-ya (Rom. 12:18). Si nou ka randé nou kò kont ki nou fè roun annan nou frè ouben nou sò-ya lapenn, kisa nou divèt fè ? Pou koumansé, kou Jakòb, annou priyè Jéova. Parèkzanp, a pou nou doumandé li béni tousa nou ké fè pou rété byen ké nou frè ouben ké nou sò.

¹⁴ Annou pran tan osi réfléchi asou fason nou ka fè. Parèkzanp annou  doumandé nou kò : « Ès mo paré mété mo fyèrté asou koté, doumandé pardon ké imilité épi fè lapè ? Kisa Jéova ké Jézi ké rousanti si mo ka pran douvan pou fè lapè ké mo frè ouben mo sò ? » Répons asou sa késyon-yan pouvé fè nou sir ki sa enpòrtan di kouté Jézi é alé wè nou frè ouben nou sò ké imilité paské nou lé fè lapè. La ankò, nou pouvé swiv èkzanp Jakòb.

15. Kouman konsèy nou ka jwenn annan Éphésiens 4:2, 3 pouvé idé nou fè lapè ké nou frè ouben nou sò ?

¹⁵ Si Jakòb pa té aji ké bokou imilité lò i kontré ké so frè, bagaj-ya pa té ké byen pasé konsa. Lò nou ka alé wè nou frè ouben nou sò pou réglé roun problèm, nou divèt fè l’ ké bokou imilité (li Éphésiens 4:2, 3). Proverbes 18:19 ka di : « Roun frè yé fè lapenn pi rèd pasé roun vil fòrtifyé ; i gen blo ki kou bar asou lapòt roun fòrtérès » Lò nou ka doumandé pardon ké imilité, nou pouvé antré annan sa fòrtérès-a.

16. Asou kisa nou divèt pran tan byen réfléchi, é poukisa ?

¹⁶ Nou divèt osi pran tan byen réfléchi asou sa nou ké di é asou fason nou ké di l’. Lò nou paré, nou divèt alé palé ké moun-an nou fè lapenn pou éséyé idé l’ viré byen ké nou. Pitèt pou koumansé, i ké di bagaj nou pa ké kontan. Sa pouvé fè nou kòlè ouben sa pouvé fè nou éséyé chaché èskiz. Mé si nou ka réyaji konsa, ès sa ké idé nou viré byen ké nou frè ouben nou sò ? Awa. Annou pa bliyé ki viré byen ké nou frè ouben nou sò pi enpòrtan pasé chaché savé kimoun ki té mal fè ouben kimoun ki té gen rézon. (1 Cor. 6:7).

17. Kisa èkzanp Gilbert ka anprann nou ?

¹⁷ Roun frè yé ka aplé Gilbert fè tousa i té pouvé pou fè lapè. I ka di : « Mo té gen gro problèm ké mo tifi. Pannan pasé dé lannen, mo fè tousa mo té pouvé pou palé jantiman ké li é pou di li tousa mo té gen asou mo tchò pou nou viré byen. » Ki ròt bagaj i fè ? I ka di : « Anvan mo té alé palé ké li, mo té ka  priyè é mo té ka préparé mo kò pou mo byen réyaji si i té ka di mo bagaj ki té ké fè mo lapenn. Mo té divèt paré pou pardonnen. Mo konprann ki mo pa té divèt chaché montré ki mo té gen rézon, mé sa mo té divèt fè a té fè lapè. » Ki bon rézilta Gilbert trapé ? I ka réponn : « Jòdla, mo byen menm paské mo byen ké tout moun annan mo fanmi. »

18-19. Si nou fè roun moun lapenn, kisa nou divèt byen désidé fè, é poukisa ?

¹⁸ Dapré sa nou wè, kisa nou divèt byen désidé fè si nou ka randé nou kò kont ki nou fè roun moun lapenn ? Kou Jézi ka doumandé nou fè l’, a pou nou fè lapè ké li. A pou nou palé ké Jéova di sitiasyon-an, é doumandé li so lèspri pou i idé nou fè lapè. Si nou ka fè sa, nou tchò ké kontan é nou ké montré ki nou ka kouté Jézi (Mat. 5:9).

¹⁹ Nou gen bokou rékonésans pou Jéova ki ka sèrvi Jézi Kris, « chèf asanblé-a », pou bay nou bèl konsèy plen ké lanmou (Éph. 5:23). Kou apot Pyèr, Jak ké Jan, a pou nou byen désidé kouté li (Mat. 17:5). Annan sa artik-a, nou wè ki, kouté Jézi, sa lé di parèkzanp fè lapè ké nou frè ouben nou sò nou fè lapenn. Si nou ka chaché viré byen ké nou frè ké nou sò, é si nou ka rété asou ti chimen lavi-a, nou ké rousouvwè roun patché bénédiksyon é nou ké viv pou tout-tan ké tchò kontan.