1. Bay roun rézon ki pitèt fè Jézi konparé so disip-ya ké brébi.

 JÉZI konparé lanmityé i gen ké so disip ké rélasyon roun bèrjé gen ké so mouton (Jean 10:14). A roun bon èkzanp paské mouton-yan konnèt yé bèrjé, é yé ka réyaji lò yé ka tandé so vwa. A sa roun mouché wè roun jou. I di : « Kou nou té lé filmé déztrwa mouton, nou éséyé fè yé vini òbò nou. Mé, yé pa té ka swiv nou, paské yé pa té konnèt nou vwa. Apré sa, roun jenn ti bèrjé rivé. I pa té fin aplé yé ki mouton-yan swiv li. »

2-3. a) Kouman nou pouvé montré ki nou ka kouté vwa Jézi ? b) Di kisa nou ké palé annan sa artik-a, ké ròt-a ki ka vin dèyè-a ?

² Sa sa mouché-a rakonté, ka fè nou sonjé sa Jézi di asou so brébi, sa lé di so disip : « Yé ké kouté mo vwa » (Jean 10:16). Mé Jézi laro syèl-a, alòr kouman nou pouvé kouté l’ ? Nou ka kouté li èspésyalman lò nou ka fè sa i anprann nou (Mat. 7:24, 25).

³ Annan sa artik-a ké sa-la ki ka vin dèyè-a, nou ké palé di déztrwa bagaj Jézi anprann nou. Kou nou ké wè l’, détan, Jézi ka di nou arété fè sèrten bagaj, épi détan, i ka di nou fè sèrten bagaj. Pou koumansé, annou wè dé bagaj pi bon Bèrjé-a ka doumandé nou arété fè.

4. Dapré Luc 12:29, pou ki bagaj nou té ké pouvé enkyété nou kò ?

⁴ (Li Luc 12:29.) Jézi di so disip-ya ‘arété kasé yé tèt’ parapòrta sa yé té ké bézwen pou viv. Nou savé ki konsèy Jézi ka bay toujou saj. Donk, nou ka fè tousa nou pouvé pou apliké yé. Mé a pa tout tan sa fasil. Poukisa ?

5. Poukisa roun ran moun ka enkyété yé kò parapòrta sa yé bézwen pou viv ?

  ⁵ Roun ran ka enkyété parapòrta sa yé bézwen pou viv, kou manjé, lenj, ouben kaz. Pitèt yé ka rété annan roun péyi koté moun-yan maléré, épi sa rèd pou trapé roun travay, é pitèt sa rèd pou yé ganyen asé soumaké pou bay yé fanmi sa yé bézwen pou viv. Ouben, pitèt moun-an annan fanmi-a ki té ka mennen soumaké annan kaz-a mouri. Roun patché moun pédi yé travay ké soumaké yé té ka touché-a, akoz di pandémi Covid-19-a (Eccl. 9:11). Si nou annan roun di sa sitiasyon-yan, kouman nou pouvé swiv konsèy Jézi ka bay nou, épi arété enkyété nou kò ?

6. Èspliké sa ki rivé Pyèr roun jou.

⁶ Roun jou, Pyèr ké ròt apot-ya té annan roun bato asou lanmè Galilé-a. Roun tanpèt lévé, é yé wè Jézi maché asou dlo-a. Pyèr di : « Sényèr, si a to, di mo vini ké to asou dlo-a. » Lò Jézi di li vini jwenn li, Pyèr désann di bato-a, é i ‘maché asou dlo-a pou alé òbò li’. Gadé sa ki pasé apré : « Lò i wè kouman van-an té ka souflé fò, i pran pè. Kou i té ka koumansé koulé, i rélé : “Sényèr, sové mo !” » Jézi lonjé so lanmen, é i sové l’. Sa enpòrtan pou nou wè ki pannan tout tan Pyèr té ka gadé Jézi, i té ka rivé maché asou dlo lanmè-a ki té fò. Mé, lò i koumansé gadé tanpèt-a, i pran pè, i douté, é i koumansé koulé (Mat. 14:24-31).

7. Kisa sa ki rivé Pyèr ka anprann nou ?

⁷ Sa ki rivé Pyèr ka anprann nou roun bagaj enpòrtan. Lò i désann di bato-a, é ki i koumansé maché asou dlo-a, i pa té ka imajiné ki tanpèt-a té ké fè l’  pè, é ki i té ké koumansé koulé. I té prévwè maché asou dlo-a jouktan i té rivé jwenn so mèt. Mé, i pa rivé fè so lidé rété asou sa i té lé fè. Menm fason Pyèr té bézwen lafwa pou maché asou dlo-a, nou bézwen lafwa pou nou tchenbé lò nou gen problèm. Si nou pa ka fè Jéova konfyans, é si nou pa gen konfyans annan so promès ankò, nou ké koumansé koulé annan domenn èspirityèl. Donk, menm si nou gen roun patché problèm, a pou nou toujou sonjé ki Jéova pouvé idé nou.

8. Kisa ki pouvé idé nou pa enkyété nou kò tròp parapòrta sa nou bézwen pou viv ?

⁸ Nou ké arété enkyété nou kò si nou ka fè nou konfyans annan Jéova vin pi fò. Annou pa bliyé ki nou Papa ki kontan nou, promèt nou bay nou tousa nou bézwen pou viv, si nou ka mété l’ an prémyé annan nou lavi (Mat. 6:32, 33). Jéova toujou tchenbé so promès (Deut. 8:4, 15, 16 ; Ps. 37:25). Kou i ka pran swen di zozo-ya ké flèr-ya, annou pa janmen douté ki i ké bay nou manjé ké lenj pou nou mété (Mat. 6:26-30 ; Phil. 4:6, 7). A pas yé kontan yé timoun, ki manman ké papa ka bay yé pitit manjé. Menm fason-an, a paské nou Papa ki annan syèl-a kontan nou ki i ka gadé pou so sèrvitèr-ya gen tousa yé bézwen pou viv. Donk, a pou nou sir ki Jéova ké pran swen di nou !

9. Kisa sa ki rivé roun frè ké so madanm ka anprann nou ?

⁹ Sa nou ké wè aprézan-an ka montré kisa Jéova pouvé fè pou bay nou sa nou bézwen pou viv. Roun frè ké so madanm pyonyé té alé chaché plizyèr sò ki té ka rété annan roun kan réfijyé pou mennen yé annan roun réinyon. Yé roulé pasé roun lèr annan yé vyé loto pou alé chaché yé. Frè-a ka rakonté : « Apré réinyon-an, nou propozé sa sò-ya vini manjé koté nou. Mé apré, nou sonjé ki nou pa té gen anyen pou bay yé. » Kisa ki rivé atò ? Frè-a ka kontinyé : « Lò nou rivé annan nou kaz, nou wè dé gran sak plen ké manjé douvan lapòt-a. Nou pa té savé kimoun ki té mété sa la. Jéova té pran swen di nou. » Roun tibi tan apré, yé loto tonbé an pann. Yé té bézwen yé loto pou préché, mé yé pa té gen soumaké pou ranjé loto-a. Frè-a mennen l’ annan roun garaj kanmenm pou savé konmyen soumaké sa té ké kouté l’ pou yé ranjé loto-a. Toupannan mékanisyen-an té ka gadé loto-a, roun mouché rivé é i doumandé : « A di kimoun sa loto-a ? » Frè-a réponn ki é a té so loto, mé i té an pann. Mouché-a di li : « Sa pa ka fè anyen. A sa modèl-a mo madanm ka chaché, é a sa koulò-a i lé. Konmyen ou ka vandé l’ ? » Frè-a vandé loto-a, é i té gen asé soumaké pou achté rounòt loto. Men sa i ka di pou fini : « Zòt pouvé imajiné kouman nou té kontan lò lajournen-an té fini ! Nou té savé ki a pa té roun bagaj ki té rivé konsa. A Jéova ki té gadé pou nou. »

10. Dapré Psaume 37:5, poukisa nou pa divèt enkyété nou kò tròp parapòrta sa nou bézwen pou viv ?

¹⁰ Donk, annou kouté pi bon Bèrjé-a, é annou arété enkyété nou kò tròp parapòrta sa nou bézwen pou viv, paské nou pouvé sir ki Jéova ké pran swen di nou (li Psaume 37:5 ; 1 Pierre 5:7). Ès nou annan roun sitiasyon nou palé annan  paragraf 5-a ? Jouk atò, pitèt  Jéova sèrvi roun chèf fanmi ouben roun patron pou bay nou sa nou bézwen pou viv. Si sa chèf fanmi-a pa pouvé travay ankò, ouben si i mouri, ouben si nou pédi nou travay, Jéova ké sèrvi rounòt mwayen pou bay nou sa nou bézwen pou viv. Mé i ké bay nou sa nou bézwen ! Aprézan, annou wè roun dézyèm bagaj pi bon Bèrjé-a ka doumandé arété fè.

11. Dapré Matthieu 7:1-2, kisa Jézi doumandé nou arété fè, é poukisa sa rèd ?

¹¹ (Li Matthieu 7:1, 2) Jézi té savé ki, nou pa parfè, é ki nou gen tandans ka kritiké ròt-ya. Gadé sa i di : « Arété jijé. » Nou tout ka fè éfòr pou nou pa jijé nou frè ké sò-ya mé, kou nou pa parfè, a pa tout tan nou ka rivé fè l’. Si sa ka rivé nou kritiké roun moun, kisa nou divèt fè ? Nou divèt kouté Jézi, épi fè bokou éfòr pou arété jijé.

12-13. Kouman fason Jéova té ka wè David pouvé idé nou arété jijé ?

¹² Annou réfléchi asou èkzanp Jéova ka bay nou : i toujou ka chaché wè nou bèl kalité. Fason i té ka wè David, ki té fè plizyèr péché grav, ka byen montré nou sa. Parèkzanp, i kouché ké Bètsabé, roun madanm ki té maryé, é i jis doumandé yé tchwé so mari (2 Sam. 11:2-4, 14, 15, 24). Akoz di tout péché i fè, David vin gen roun patché problèm, mé i fè so fanmi ké so ròt madanm-yan soufri osi (2 Sam. 12:10, 11). Rounòt kou ankò, i pa fè Jéova konfyans, i alé fè roun bagaj Lalwa té ka entèrdi. I konté tout larmé Israyèl-a. Pitèt i fè sa paské, kou i té gen roun gran larmé, i té fyèr é i té ka konté asou so larmé pou protéjé nasyon-an. Mé kisa sa bay ? Jéova fè roun épidémi tonbé anlè yé, é pasé 70 000 Israyélit mouri ! (2 Sam. 24:2-4, 10-15).

¹³ Si to té ka rété Israyèl annan sa lépòk-a, kisa to té ké pansé di David ? Ès to té ké di ki i pa té ka mérité mizérikòrd Jéova-a ? A pa konsa Jéova wè bagaj-ya. I sonjé ki tout so lavi, David té montré i té fidèl. É i wè ki i té répanti vré. A pou sa i pardonnen li pou tout péché i té fè ki té grav. Jéova té savé ki David té kontan l’ toubonnman é ki i té lé fè sa ki byen. Ès to pa kontan lò to ka wè ki nou Bondjé ka chaché sa ki bon koté nou ? (1 Rois 9:4 ; 1 Chron. 29:10, 17).

14. Kisa ki pouvé idé nou arété jijé ?

¹⁴ Kou Jéova pa ka doumandé nou pou nou parfè, nou menm osi, nou divèt pardonnen ròt-ya é chaché sa ki bon koté yé. Sa fasil pou nou wè yé défo épi kritiké yé. Mé roun moun ki ka imité Jéova ka rivé byen ké tout moun, menm si i ka wè yé défo. Roun djanman yé pòkò travay pou fè roun bijou ké l’, pa jòlòt. Mé roun èspésyalis savé ki i ké vréman bèl, é i savé ki valò sa djanman-an ké gen apré yé ké fin tayé l’. Kou Jéova ké Jézi, a pa pou nou pézé moun ké wéy, é a pou nou chaché wè ki bèl kalité ròt-ya gen.

15. Kisa nou pouvé fè ankò pou nou pa kritiké nou frè ké sò-ya ?

¹⁵ Nou wè ki nou divèt gadé ki kalité ròt-ya gen. Mé anplis di sa, kisa ki pouvé idé nou pa kritiké yé ? Annou éséyé imajiné ki kalité lavi yé gen. A sa Jézi té ka fè. Roun jou, annan Tanp-a, i wè roun vèv ki té maléré, ki té ka mété dé ti pyès lanmonnen ki pa té gen bokou valò annan roun di sé bwèt-ya. I pa di : « Poukisa a sa ti soumaké-a rounso i ka bay ? » I pa rété asou kantité soumaké  i té bay. Mé i gadé sa ki té ka pousé l’ mété sa soumaké-a, i tchenbé kont di so sitiasyon, é i di ki a té roun èkzanp, pas i té fè tousa i té pouvé (Luc 21:1-4).

16. Kisa sa Veronica ka di ka anprann nou ?

¹⁶ Pou nou rivé konprann pi byen poukisa sa enpòrtan pou nou tchenbé kont di sitiasyon ròt-ya, annou gadé sa Veronica di. Annan so asanblé, i té gen roun sò ki té ka lévé so ti bolonm li rounso. Men sa Veronica ka di : « Mo té ka di annan mo tchò, ki yé pa té ka fè bokou bagaj annan asanblé-a, é akoz di sa, mo pa té gen roun bon lidé asou yé. Mé roun jou, mo préché ké sa sò-a. I di mo ki so ti bolonm té andikapé, é ki sa té rèd pou i lévé l’. I té ka fè tousa i té pouvé, pou bay li sa i té bézwen pou viv, é pou idé l’ fè so lanmityé ké Jéova rété fò. Détan, paské lasanté so ti bolonm pa té bon, i té oblijé alé annan rounòt asanblé pou pran so réinyon. » Men sa Veronica ka di pou fini : « Mo pa té jen pran tan imajiné ki problèm i té ka jwenn. Jòdla, mo kontan sa sò-a bokou, é mo ka rèspèkté l’ bokou paské i ka fè tousa i pouvé pou adoré Jéova. »

17. Kisa Jacques 2:8 ka doumandé nou fè, é kouman nou pouvé rivé fè sa ?

¹⁷ Kisa nou divèt fè si nou ka randé nou kò kont ki nou pa byen jijé roun frè ouben roun sò ? A pou nou sonjé  ki nou divèt kontan nou konpanyen (li Jacques 2:8). Nou divèt osi sipliyé Jéova idé nou arété jijé. Apré sa, annou fè kou nou doumandé l’ annan nou lapriyè. Annou pasé tan ké moun-an nou gen tandans ka jijé-a. Sa ké pèrmèt nou konnèt moun-an pi byen. Pitèt nou pouvé propozé li préché ké nou, ouben vini manjé ké nou. Toupannan nou ka vin pi pròch ké li, annou fè tousa nou pouvé pou chaché wè sa ki bon koté li, pou nou pouvé imité Jéova ké Jézi. A konsa nou ké montré ki nou ka kouté pi bon Bèrjé-a ki ka doumandé nou arété jijé.

18. Kouman nou pouvé montré ki nou ka kouté vwa pi bon Bèrjé-a ?

¹⁸ Menm fason mouton-yan ka kouté vwa yé bèrjé, disip Jézi ka kouté so vwa. Si nou ka fè tousa nou pouvé pou arété kasé nou tèt parapòrta sa nou bézwen pou viv ké arété jijé, Jéova ké Jézi ké béni nou pou tout éfòr nou ka fè. Ki nou annan « piti troupo »-a ouben annan « ròt brébi »-ya, annou kontinyé obéyi pi bon Bèrjé-a pou nou montré ki nou ka kouté so vwa (Luc 12:32 ; Jean 10:11, 14, 16). Annan artik ki ka vin dèyè-a, nou ké palé di dé bagaj Jézi doumandé so disip-ya fè.