Mo fèt an 1927 annan roun ti vil bò d’ Chikago, Illinois (Étazini). Mo papa ké mo manman lévé senk timoun : Jetha, Don, mo menm, Karl ké Joy. Nou tout nou té byen désidé sèrvi Jéova ké tout nou nanm. Jetha fè dézyèm klas Galaad an 1943. Don antré Bétèl Brouklin (Nouyòrk) an 1944, Karl an 1947 é Joy an 1951. Yé bèl èkzanp ké sa di mo papa ké mo manman ankourajé mo bokou.

Nou papa ké nou manman té ka li Labib é yé té kontan Bondjé ; é yé anprann nou kontan Bondjé nou menm osi. Mé, mo papa fè lagèr an Éròp pannan Prémyé Lagèr mondyal-a é akoz di sa, i pa té ka rèspèkté Légliz-a ankò. Kou mo manman té gen bokou rékonésans pou Bondjé paské mo papa pa té mouri, i di li : « Karl, annou alé lanmès kou nou té gen labitid fè l’. » Papa réponn : « Mo ka mennen to, mé mo menm mo pa ka antré. » Manman doumandé l’ : « Poukisa ? » Papa réponn : « Pannan lagèr, annan chak péyi, monpè-ya té ka béni sòlda-ya ki té ka briga roun ké ròt menmsi yé té annan menm rélijyon-an ! Ki larmé Bondjé té ka soutni ? »

Roun ti moso tan apré sa, pannan mo manman té légliz, dé Témwen-Jéova vini lakaz. Yé propozé mo papa dé liv yé té ka aplé Lumière ki té ka palé di liv Révélation-an. Kou sa té ka entérésé l’, i pran liv-ya. Lò mo manman wè liv-ya, i koumansé li yé. Roun jou, i wè annan journal-a ki yé té ka envité tout sa ki té lé, vini étidyé Labib asou sa liv-ya. I désidé alé. Lò i rivé, roun madanm ki té ja granmoun rousouvwè l’. Mo manman té gen roun di sa dé liv-ya annan so lanmen é i doumandé l’ : « Zòt ka étidyé sa liv-a isi-a ? » Madanm-an réponn li : « Wi, mo ti chéri, antré. » Roun simenn apré sa, mo manman mennen nou ké li. Apré sa, nou alé chak simenn.

Pannan roun réinyon, frè-a ki té ka dirijé kozé-a doumandé mo li Psaume 144:15 ki ka di ki sa-ya ki ka sèrvi Jéova, yé tchò kontan. Sa vèrsé-a marké mo. É a té menm bagaj-a pou 1 Timothée 1:11 ki ka di ki Jéova  sa « Bondjé ki éré-a », épi Éphésiens 5:1 osi ki ka ankourajé nou divini dé moun ki ka « imité Bondjé ». Mo konprann ki mo té divèt kontan sèrvi Sa-la ki kréyé mo é ki mo té divèt di li mèrsi pou sa lònò-a. Mo éséyé fè sa dé bagaj-ya pannan tout mo lavi.

Asanblé-a ki té pi pròch di nou té a 32 kilomèt, a Chikago. Mé nou té k’alé annan réinyon-yan kanmenm. Sa idé mo anprann plis bagaj asou Labib. Mo ka sonjé ki roun jou, Jetha réponn pannan réinyon-an. Lò mo tandé l’, mo di mo kò : « Mo té konnèt répons-a, mo té pouvé lévé mo lanmen. » Atò, dipi sa jou-a, mo koumansé préparé répons mo té pouvé bay pannan réinyon-yan. Sa ki pi enpòrtan ankò, a ki mo divini pi pròch di Jéova kou mo dé frè ké mo dé sò. Mo batizé an 1941.

Mo ka sonjé roun asanblé réjyonal ki fèt Cleveland (Ohio) an 1942. Tout moun té pouvé swiv sa program-an ké yé téléfonn annan plis pasé 50 ròt vil Ozétazini. Nou fanmi té ka rété anba tant annan roun camping frè-ya té monté pa lwen di koté asanblé-a té ka fèt. Dézyèm Lagèr mondyal-a té ka kontinyé toujou é yé té ka pèrsékité Témwen Jéova-ya plizanplis. Roun jou aswè, mo wè ki plizyèr group frè té garé yé loto roun fason pou limyèr loto-ya kléré tout lantou camping-a. Annan chak loto, i té gen roun frè ki té ka véyé tout lannwit. Si i té gen roun problèm, frè-ya té paré pou limen yé limyèr pou vèrglé moun ki té ké lé ataké nou épi klaksonnen pou avèrti ròt frè-ya ki té ké pouvé vini idé yé. Mo di mo kò : « Pèp Jéova vréman paré pou jéré tout sitiasyon ki pouvé rivé. » Mo santi mo kò an sékirité é mo rivé byen dronmi. Finalman, anyen pa rivé.

Plizyèr lannen pita, lò mo sonjé sa asanblé-a, mo randé mo kò kont ki mo manman pa té jen montré ki i té enkyèt sa jou-a ouben ki i té pè. I té ka fè Jéova ké so òrganizasyon konfyans toubonnman. Mo pa ké janmen bliyé so bèl èkzanp.

Roun tibi tan anvan sa asanblé-a, manman té pran sèrvis pyonyé pèrmanan. Donk, i pran tan byen kouté tout diskour-ya ki té ka palé di sèrvis a plen tan-an. Asou chimen pou viré lakaz, i di mo : « Mo té ké byen kontan rété pyonyé, mé mo pa pouvé byen okipé di kaz-a an menm tan. » Apré sa, i doumandé nou si nou pa té ké lé idé l’. Nou di li wi. Atò, i bay nou chak roun ouben dé parti annan kaz-a pou nétwayé chak bonmanten anvan nou tchenbé tchò. Nou té k’alé lékòl é apré sa, i té ka byen gadé toupatou pou wè si kaz-a té byen pròp épi i té k’alé préché. A té roun madanm ki té gen bokou bagaj pou fè, mé i pa jen mété so pitit asou koté. Lò nou té ka viré lakaz, ki midi ki aswè, i té toujou la pou nou. Détan, apré lékòl nou té k’alé préché ké li. Sa idé nou konprann a kisa ki roun pyonyé.

Mo divini pyonyé lò mo té gen 16 lannen. Menmsi mo papa patékò Témwen, i té lé savé kouman mo sèrvis té ka pasé. Roun jou aswè, mo di li ki magré tousa mo té fè, mo pa té rivé trapé pyès moun ki té lé étidyé Labib.  Mo antann roun ti moso épi mo doumandé li : « To pa té ké lé étidyé ké mo ? » I réfléchi roun ti moso épi i réponn mo : « Mo pa ka wè poukisa mo té ké di to non. » Donk, prémyé moun mo ansényé Labib, a mo papa. Mo té tèlman kontan !

Nou étidyé asou liv « La vérité vous affranchira ». Piti piti, mo wè ki mo papa té ka idé mo étidyé ké ansényé Labib pi byen. Parèkzanp, roun jou aswè, nou té fin li roun paragraf lò i di mo : « Mo ka konprann sa yé ka di annan liv-a, mé kouman to ka fè savé ki a vré » ? Mo pa té ka antann i pozé mo sa késyon-an, atò mo réponn li : « Mo pa ké pouvé réponn to jòdla, mé prochen léson-an, mo krè mo ké pouvé bay to roun répons. » É a sa mo fè. Mo trapé plizyèr vèrsé ki té ka byen montré ki sa ki té marké annan liv-a té vré. Dipi sa jou-a, mo pran labitid préparé mo léson biblik pi byen é mo anprann fè réchèrch. Sa idé ni mo ni mo papa étidyé Labib pi byen. I apliké tousa i té ka anprann é i batizé an 1952.

Mo lésé kaz mo papa ké mo manman, mo té gen 17 lannen. Jetha a divini misyonèr é Don antré Bétèl. Yé té kontan yé afèktasyon é sa ankourajé mo bokou. Donk, mo ranpli roun démann pou Bétèl-a é roun pou fè Lékòl Galaad, épi mo lésé sa annan lanmen Jéova. Kouman i réponn mo ? Yé envité mo Bétèl an 1946.

Mo travay annan diféran sèrvis, donk sa pèrmèt mo anprann bokou bagaj. Mo rété 75 lannen o Bétèl é pannan tout sa tan-an, mo anprann enprimé liv é yé anprann mo fè kontabilité. Mo anprann achté sa nou té bézwen annan Bétèl-a épi fè bagaj ki té enpòrtan rivé ròt koté. Mé sa mo pi kontan, a ansèyman èspirityèl Bétèl-a ka bay grasa ladorasyon pou koumansé lajournen-an épi diskour biblik-ya.

Mo anprann bokou bagaj osi grasa mo ti frè Karl, ki antré Bétèl an 1947. I té vayan menm pou étidyé ké ansényé Labib. Roun jou, mo doumandé li idé mo préparé roun diskour mo té divèt fè. Mo èspliké Karl ki mo té fè bokou réchèrch, mé mo pa té savé kouman pou mo té sèrvi yé. I idé mo konprann sa mo té divèt fè. I pozé mo rounsèl ti késyon : « A kisa tèm to diskour ? » Mo konprann lanmenm ! A té piblikasyon ki té ka palé di tèm-an rounso mo té divèt sèrvi épi mété tout ròt-ya asou koté. Mo pa janmen bliyé sa i montré mo.

 Pou nou tchò kontan lò nou Bétèl, a pou nou fè tousa nou pouvé pou nou préché. Sa ka pèrmèt nou viv roun patché bèl bagaj. Parèkzanp, mo ka byen sonjé sa ki rivé roun jou lò mo té Bronx, Nouyòrk. Soukou té koumansé tonbé. Mo té ké roun frè é nou kontré ké roun madanm ki té ja asèpté journal Tourdégard ké Réveillez-vous ! Nou prézanté nou kò épi nou di : « Aswè-a, nou ka idé moun-yan wè kouman Labib pouvé ankourajé yé. » I réponn nou : « Si a pou palé di Labib, antré. » Nou li épi nou èspliké plizyèr vèrsé asou rwayonm Bondjé-a é asou monn nouvo-a. Sa touché li tèlman ki i envité déztrwa annan so zanmi vin jwenn nou ròt simenn-an. Pita, li ké so mari divini Témwen Jéova é yé rété fidèl.

Sa té ka fè près dis lannen mo té lé maryé lò mo kontré ké mo madanm. Kisa ki idé mo trouvé roun madanm ki té k’alé ké mo ? Mo priyè Jéova é mo réfléchi asou òbjèktif mo té lé gen ké mo madanm apré nou maryé.

An 1953, pannan asanblé réjyonal-a ki fèt annan Yankee Stadium-an, mo kontré ké roun sò yé ka aplé Mary Aniol. Mo sò Jetha ké li menm, té fè dézyèm klas Lékòl Galaad é yé toulédé té misyonèr menm koté-a. Mary té tou kontan palé di so sèrvis misyonèr Ozantiy é di patché léson biblik i té gen a sa lépòk-a. Toupannan nou té ka anprann konnèt nou konpanyen, mo randé mo kò kont ki nou toulédé té lé sèrvi Jéova a plen tan. Pi sa té k’alé, pi nou té kontan nou konpanyen, donk nou maryé an avril 1955. Mo wè ki Mary té sa roun kado di Jéova é roun èkzanp pou mo té imité. Kèlkéswa koté òrganizasyon-an té ka voyé nou, so tchò té kontan. I té ka travay rèd, i té ka gadé pou moun-yan ké tout so tchò é i té toujou ka mété Rwayonm-an an prémyé (Mat. 6:33). Nou rété annan sèrvis sirkonskripsyon-an pannan trwa lannen épi an 1958, yé envité nou o Bétèl.

Mo anprann bokou bagaj grasa Mary. Parèkzanp, dipi lò nou té fin maryé, nou té désidé li Labib ansanm. Nou té ka li apéprè 15 vèrsé chak jou. Lò nou té fin li roun parti, nou té ka palé di sa vèrsé-ya pou wè kouman nou té ké pouvé apliké yé annan nou lavi. Mary té ka palé souvan di sa i té anprann pannan Lékòl Galaad ouben annan so sèrvis misyonèr. Sa ti kozman-yan idé mo vin pi vayan annan zafè fè diskour épi anprann ankourajé sò-ya (Prov. 25:11).

Mo ti Mary mouri an 2013. Mo présé rouwè l’ annan monn nouvo-a ! An atandan, mo byen désidé kontinyé anprann ròt bagaj é fè Jéova konfyans ké tout mo tchò (Prov. 3:5, 6). Lò mo ka sonjé tousa sèrvitèr Jéova-ya ké fè annan monn-nouvo-a, sa ka bay mo bokou lajwa é an menm tan sa ka konsolé mo. Asiré pa pitèt, nou Gran Ansényan ké pouvé anprann nou roun patché ròt bagaj asou li ankò ! Mo pa ké janmen rivé di li mèrsi asé pou tousa i anprann mo jouk atò é osi pou so favèr mo pa mérité-a.