1. Kisa ki pi enpòrtan pou roun patché moun jòdla ?

 ÈS TO wè kouman roun patché moun jòdla ka gadé yenki pou yé douvan lèstomak ? Parèkzanp, roun ran ka mété bagaj asou rézo sosyal-ya pou fè moun wè é pou moun poté yé anlè. Parkont, i pa gen bokou moun ki ka bay Jéova laglwar. Annan sa artik-a, nou ké wè sa sa lé di bay Jéova laglwar é poukisa nou divèt fè l’. Nou ké wè osi kouman nou pouvé bay li laglwar i mérité-a é kouman i ké bay so non laglwar titalò.

KISA SA LÉ DI BAY JÉOVA LAGLWAR ?

 2. Kouman Jéova montré so laglwar asou montangn Sinayi-a ? (gadé zimaj-a osi).

² Laglwar, a kisa ? Détan, lò Labib ka palé di « laglwar » a pou palé di sa roun moun ka fè ki ka fè nou rété èstébékwé. Roun ti moso tan apré Jéova fè Israyélit-ya soti Éjip, i montré yé so laglwar. Imajiné sa : roun patché Israyélit rasanblé anba montangn Sinayi-a pou kouté sa yé Bondjé gen pou di yé. Roun gro niyaj nwè ka kouvri montangn-an épi rounsèl kou, latè-a ka tranblé, zéklè ké loraj ka pété é yé ka tandé son roun gro tronpèt, son-an fò menm (Ex. 19:16-18 ; 24:17 ; Ps. 68:8). Imajiné kouman Israyélit-ya dèt rété èstébékwé lò Jéova montré yé kouman i fò !

 3. Kisa sa lé di bay Jéova laglwar ?

 ³ Mé nou menm nou pa anyen ! Ès nou pouvé bay Jéova laglwar ? Wi nou pouvé fè l’. Parèkzanp, nou pouvé palé di so pwisans ké di so bèl kalité. Nou ka bay li laglwar osi lò nou ka fè moun savé ki a li ki ka bay nou fòrs pou fè tousa nou ka fè (Is. 26:12). Rwa David bay nou roun bon èkzanp annan zafè bay Jéova laglwar. Annan roun lapriyè i fè pou asanblé Israyèl-a, i di so Bondjé : « O Jéova, to gran, to gen bokou pwisans, to bèl, to plen ké laglwar é to gen bokou pouvwar ; paské tout bagaj, annan syèl-a ké asou latè-a, a di to. » Lò i fin priyè, « tout moun annan asanblé-a louwé Jéova » (1 Chron. 29:11, 20).

 4. Kouman Jézi bay Jéova laglwar ?

⁴ Lò Jézi té asou latè-a, i bay so Papa laglwar. I fè tout moun savé ki a so Papa ki té ka pèrmèt li fè mirak (Marc 5:18-20). I bay so Papa laglwar osi annan fason i té ka palé di li épi annan fason i té ka aji ké ròt-ya. Roun jou i té ka ansényé annan roun sinagòg, i té gen roun madanm ki té gen roun démon annan so kò dipi 18 lannen. Akoz di sa démon-an, i té ka maché kroubé é i pa té pouvé drésé so kò. Sa dèt té rèd pou li ! Jézi pran so lapenn, i alé òbò li é i di li ké bokou lanmou : « Fanm, to géri. » Apré sa, i pozé so lanmen asou li é lanmenm, madanm-an drésé so kò é « i koumansé louwé Bondjé ». I té gen rékonésans pou Jéova pas i té géri l’ ! (Luc 13:10-13). Sa madanm-an té gen rézon louwé Jéova é a menm bagaj-a pou nou.

POUKISA NOU KA BAY JÉOVA LAGLWAR ?

 5. Poukisa nou ka rèspèkté Jéova ?

⁵ Nou ka bay Jéova laglwar paské nou ka rèspèkté l’ bokou. Roun patché rézon ka fè ki nou ka rèspèkté Jéova. I tou-pwisan é so pwisans pa gen limit (Ps. 96:4-7). Tousa i fè ka montré nou ki i gen bokou sajès. A li ki bay nou lavi é a li ka pèrmèt nou kontinyé viv (Rév. 4:11). I fidèl (Rév. 15:4). Tousa i ka fè ka maché é i toujou ka tchenbé so promès (Jos. 23:14). Nou ka konprann poukisa profèt Jérémi di li : « Annan tout sa ki gen sajès annan nasyon-yan é annan tout yé rwayonm, i pa gen pyès moun kou to » ! (Jér. 10:6, 7). I gen roun patché bagaj ki ka fè ki nou ka rèspèkté nou Papa ki annan syèl-a, asiré pa pitèt. Mé anplis di rèspèkté Jéova, nou kontan l’ osi.

 6. Poukisa nou kontan Jéova ?

⁶ Nou ka bay Jéova laglwar paské nou kontan l’ ké tout nou tchò. Annou wè déztrwa bèl kalité i gen ki ka fè ki nou kontan l’. I gen pityé pou nou, i lé pardonnen nou é i ka pran nou lapenn (Ps. 103:13 ; Is. 49:15). Lò nou ka soufri, i ka soufri li menm osi (Zach. 2:8). I ka idé nou vini òbò li épi divini so zanmi (Ps. 25:14 ; Actes 17:27). I ka fè so kò toupiti ; « i ka bésé pou gadé syèl-a ké latè-a, é sa-la ki toupiti, i ka fè l’ soti annan lapousyè » (Ps. 113:6, 7). Tout sa bèl kalité-ya ka bay nou anvi bay nou Bondjé laglwar ! (Ps. 86:12).

 7. Kisa nou tout pouvé fè ?

⁷ Nou ka bay Jéova laglwar paské nou lé tout moun konnèt li. I gen roun patché  moun ki pa konnèt lavérité asou Jéova. Poukisa ? Paské Satan ka vèrglé yé, i ka manti asou li (2 Cor. 4:4). I ka fè yé krè ki Jéova sa roun Bondjé ki ka vanjé so kò, ki rèd é ki a li ka fè nou soufri. Mé nou menm, nou savé sa pa vré ! Atò, nou pouvé fè moun konnèt lavérité asou Bondjé, épi konsa bay li laglwar ! (Is. 43:10). Psaume 96-a ka palé bokou di zafè bay Jéova laglwar. Toupannan nou ké étidyé sèrten vèrsé annan sa psaume-an, réfléchi asou sa to pouvé fè pou bay Jéova laglwar i mérité-a.

KOUMAN NOU POUVÉ BAY JÉOVA LAGLWAR I MÉRITÉ-A ?

 8. Di sa to pouvé fè pou bay Jéova laglwar (Psaume 96:1-3).

⁸ (Li Psaume 96:1-3.) Nou pouvé palé di Jéova pou bay li laglwar. Annan sa vèrsé-ya, yé ka di sa-ya ki ka adoré Jéova « chanté pou Jéova », « louwé so non », « fè tout moun konnèt bon nouvèl délivrans »-a, épi « fè tout nasyon-yan konnèt so laglwar ». A déztrwa bagaj nou pouvé fè pou bay nou Papa ki annan syèl-a laglwar. Jwif-ya ki té fidèl épi krétyen-yan annan 1^é syèk-a pa té pè palé bay moun-yan di tousa Jéova té fè pou yé épi défann so répitasyon (Dan. 3:16-18 ; Actes 4:29). Kouman nou pouvé imité yé ?

9-10. Kisa sa ki rivé Angelena ka anprann to ? (gadé zimaj-a osi).

⁹ Annou gadé sa ki rivé Angelena a, roun sò ki ka rété Ozétazini. I pran kouraj pou i défann répitasyon Jéova annan so travay. I té fin koumansé annan travay-a lò yé envité tout sa ki té fin rivé annan roun réinyon pou yé prézanté yé kò épi palé roun ti moso di yé lavi douvan yé kolèg. Donk, i préparé so kò, i chwazi plizyèr foto pou montré lajwa i gen dipi i sa roun Témwen Jéova. Mé jou-a i té divèt palé, anvan i pasé, roun di so kolèg bay sopa. I di ki i té lévé annan roun fanmi Témwen Jéova. I koumansé ari di sa nou ka krè. Angelena ka di : « Mo pran pè. Mé mo di an mo tchò : “Ès mo ké lésé roun moun manti asou Jéova ouben ès mo ké défann li ?” »

 ¹⁰ Lò so kolèg fini palé, Angelena priyè annan so tchò. Apré sa, i di li jantiman : « I gen roun bagaj ka fè ki nou ka sanblé. Mo menm osi mo lévé annan roun fanmi Témwen Jéova é mo Témwen Jéova jòdla. » Sa pa té fasil, mé Angelena rété kalm. I montré tout moun déztrwa foto di li ké so zanmi ka adoré Jéova ké tchò kontan é i défann sa i té ka krè ké rèspè (1 Pierre 3:15). Kisa sa bay ? Lò i fini, mouché-a vin pi dous. I jis di ki i té ka sonjé bon moman i té pasé ké Témwen Jéova-ya lò i té piti. Men sa Angelena ka di : « Jéova mérité nou défann li. A roun lònò pou nou fè moun konnèt lavérité asou li. » Nou menm osi, nou gen lònò louwé épi bay Jéova laglwar, menm lò ròt moun ka dérèspèkté l’.

11. Kouman sa-ya ki ka adoré Jéova toujou swiv prensip-a ki annan Psaume 96:8 ?

¹¹ (Li Psaume 96:8.) Nou pouvé sèrvi sa nou gen pou bay Jéova laglwar. Sa-ya ki ka adoré Jéova toujou sèrvi sa yé gen pou bay li lònò (Prov. 3:9). Parèkzanp, Israyélit-ya bay soumaké pou konstrwi épi pou pran swen di Tanp-a (2 Rois 12:4, 5 ; 1 Chron. 29:3-9). Plizyèr disip Jézi « sèrvi sa yé té gen » pou soutni li ké so apot (Luc 8:1-3). É krétyen-yan annan 1^é syèk-a voyé bagaj pou idé roun ran annan yé frè ké sò (Actes 11:27-29). Jòdla, nou menm osi nou pouvé fè ofrann pou bay Jéova laglwar.

12. Kouman ofrann nou ka fè pouvé bay Jéova laglwar ? (gadé zimaj-a osi).

¹² Annou palé di roun bagaj ki rivé ki ka montré kouman ofrann nou ka fè-ya ka bay Jéova laglwar. An 2020, lapli pa tonbé pannan lontan o Zimbabwé. Pasé roun milyon moun té ka riské mouri pas yé pa té gen anyen pou yé manjé. É roun di nou sò yé ka aplé Prisca té annan sa sitiasyon-an. Menmsi i té gen laséchrès, Prisca kontinyé préché chak mèrkrédi ké chak vandrédi, menm lò a té sézon pou rabouré latè-a. So vwazen té ka ari di li paské i té k’alé préché pasé i alé travay annan so bitasyon. Yé té ka di li : « To ké mouri di fen. » Mé Prisca té sir ki Jéova té ké pran swen di li. Donk, i toujou té ka réponn yé : « Jéova pa  janmen lésé so sèrvitèr tonbé. » Roun ti moso tan apré sa, nou òrganizasyon voyé manjé pou li épi déztrwa bagaj i té bézwen. É òrganizasyon-an rivé fè sa grasa ofrann nou ka fè-ya. So vwazen rété èstébékwé, yé di li : « Bondjé pa lésé to tonbé, atò nou lé anprann plis bagaj asou li. » Sèt annan yé koumansé vini annan nou réinyon.

13. Kouman nou konpòrtman pouvé bay Jéova laglwar ? (Psaume 96:9).

¹³ (Li Psaume 96:9.) Nou pouvé bay Jéova laglwar grasa nou konpòrtman. Prèt-ya ki té ka sèrvi annan tanp Jéova-a té divèt pròp (Ex. 40:30-32). Mé pi enpòrtan-an, yé té divèt gen roun bon konpòrtman (Ps. 24:3, 4 ; 1 Pierre 1:15, 16). Nou divèt travay rèd pou nou tiré « vyé pèrsonalité-a » é pou nou mété « nouvo pèrsonalité-a ». Sa lé di ki nou ka fè tousa nou pouvé pou nou pa ni sonjé ni fè bagaj ki pa ka fè Jéova plézi é nou ka éséyé réfléchi épi aji roun fason ki ka montré ki nou ka imité bèl kalité i gen (Col. 3:9, 10). Grasa Jéova, menm sa ki ka fè bagaj ki mové menm pouvé chanjé épi mété nouvo pèrsonalité-a.

14. Kisa èkzanp Jack ka anprann to ? (gadé zimaj-a osi).

¹⁴ Annou palé di Jack. Afòrs sa mouché-a té vyolan ké danjéré, yé té ka aplé l’ Démon-an. Kou i té fè roun patché mové bagaj, yé té kondané l’ pou i mouri. Toupannan i té ka antann yé tchwé l’, i asèpté étidyé Labib ké roun frè ki té ka vini lajòl koté i té fika-a. Menmsi Jack té fè roun patché mové bagaj, i chanjé, épi apré roun ti moman, i batizé Témwen Jéova. Jack té chanjé tèlman, ki jou yé tchwé l’, roun ran gardyen lajòl pléré lò yé di l’ orévwar. Roun sèrjan ki té ka travay lajòl di : « Anvan, Jack, a té pi mové prizonyé lajòl-a. Mé aprézan, a roun annan sa-ya ki pi bon. » Roun simenn apré yé tchwé Jack, frè-ya routounen lajòl pou fè réinyon-an, é yé kontré ké roun prizonyé ki té ka vini pou prémyé fwa annan réinyon-an. Poukisa i té vini ? Lò i wè Jack chanjé, i rété èstébékwé, atò i té lé savé kisa i té divèt fè pou  adoré Jéova. Fason nou ka aji pouvé bay nou Papa ki annan syèl-a laglwar, asiré pa pitèt ! (1 Pierre 2:12).

KOUMAN JÉOVA KÉ BAY SO NON LAGLWAR TITALÒ ?

15. Titalò, kouman Jéova ké glorifyé so non nèt ? (Psaume 96:10-13).

¹⁵ (Li Psaume 96:10-13.) Dèrnyé vèrsé-ya annan Psaume 96 ka di ki Jéova kou roun rwa ké roun jij ki jis. Kouman Jéova ké bay so non laglwar titalò ? I ké fè jistis fèt. Titalò i ké krazé Gran Babilòn-an pas i sali so non ki sen (Rév. 17:5, 16 ; 19:1, 2). Roun ran moun ki ké wè Gran Babilòn-an krazé ké pitèt koumansé adoré Jéova ansanm ké nou. Épi pannan Armagédon, Jéova ké krazé monn Satan-an. I ké krazé tout sa ki kont li é ki ka manti asou so non. Mé i ké sové tout sa ki kontan li, ki ka obéyi l’ é ki fyèr di bay li laglwar (Marc 8:38 ; 2 Thess. 1:6-10). Apré dèrnyé éprèv-a, lò mil lannen pannan Kris ké dirijé-a ké fini, Jéova ké lavé so non nèt (Rév. 20:7-10). Sa jou-a, « latè-a ké plen ké konésans asou laglwar Jéova menm fason lanmè-a plen ké dlo » (Hab. 2:14).

16. Kisa to byen désidé fè ? (gadé zimaj-a osi).

¹⁶ Sa ké bèl toubonnman lò tout moun ké bay non Jéova laglwar i mérité-a ! Mé toupannan nou ka antann sa jou-a, annou fè tousa nou pouvé pou nou louwé l’. Konsa, nou ké fè noupa pou bay nou Bondjé laglwar. Pou idé nou sonjé sa rèsponsabilité-a ki enpòrtan, Kòlèj santral-a chwazi Psaume 96:8 pou lannen 2025 : « Bay Jéova laglwar so non mérité. »