1. Annan Psaume 18:46, ké kisa David konparé Jéova ?

 NOU ka viv annan roun monn koté nou pouvé jwenn roun patché problèm. Sa problèm-yan pouvé fè bagaj-ya vin rèd ouben menm chanjé nou lavi nèt. Nou gen bokou rékonésans pou Jéova paské nou pouvé konté asou l’ ! Artik ki anvan-an fè nou sonjé ki i sa Bondjé ki vivan-an é ki i toujou paré pou idé nou. Lò nou ka santi ki i ka idé nou, nou ka vin sir ki « Jéova vivan » (li Psaume 18:46). Mé si to byen gadé, David ka aplé Bondjé « so gro Ròch ». Poukisa i konparé Jéova, Bondjé ki vivan-an, ké roun gro ròch, roun bagaj ki pa vivan ?

2. Kisa nou ké wè annan sa artik-a ?

² Annan sa artik-a, nou ké wè poukisa Labib ka di ki Jéova sa roun gro ròch é kisa sa ka anprann nou asou li. Nou ké wè osi kisa nou divèt fè pou nou wè l’ kou nou gro Ròch. Pou fini, nou ké wè kouman nou pouvé imité so kalité ki ka fè ki i sa roun gro ròch.

POUKISA LABIB KA DI KI JÉOVA SA ROUN GRO RÒCH

3. Poukisa, plizyèr koté, Labib ka konparé Jéova ké roun gro ròch ? (gadé zimaj-a ).

³ Labib ka konparé Jéova ké roun gro ròch pou idé nou konprann sèrten bagaj asou so pèrsonalité. I ka fè l’ annan plizyèr vèrsé ki ka louwé Jéova é ki ka montré ki i pa gen pyès Bondjé kou li. An Deutéronome 32:4, a prémyé fwa Labib ka aplé Jéova « gro Ròch-a ». Ann priyè Bondjé, i di : « I pa gen pyès gro ròch kou nou Bondjé » (1 Sam. 2:2). Abakik aplé Jéova « mo gro Ròch » (Hab. 1:12). É Jéova li menm di ki i sa roun gro ròch (Is. 44:8). Annou wè trwa bagaj ki ka fè ki Jéova ka sanblé roun gro ròch é annou wè  kouman nou pouvé fè l’ divini « nou gro Ròch » (Deut. 32:31).

4. Poukisa Labib ka di ki Jéova sa roun koté nou an sékirité ? (Psaume 94:22).

⁴ Jéova sa roun koté nou an sékirité. Menm fason roun moun pouvé paré annan roun trou ròch lò i gen roun gro tanpèt, Jéova ka protéjé nou lò bagaj-ya rèd annan nou lavi (li Psaume 94:22). I ka protéjé nou lanmityé ké li é i ka promèt nou ki bagaj ki ka fè nou soufri jòdla pa ké fè nou soufri pou tout-tan. I ka promèt nou osi ki, titalò, i ké tiré tousa ki ka anpéché nou viv annan lapè é santi nou kò an sékirité (Ézéch. 34:25, 26).

5. Kouman Jéova pouvé divini roun koté nou an sékirité ?

⁵ Jéova pouvé divini roun koté nou an sékirité si nou ka priyè l’. A konsa i ké bay nou so lapè ki ké protéjé nou tchò ké nou lèspri (Phil. 4:6,7). Yé mété roun frè yé ka aplé Artem lajòl akoz di so lafwa. I té gen roun mouché ki té méchan ki té fè roun ankèt asou l’ é ki vin konmyen fwa pozé l’ késyon. I té ka mété présyon asou li é i té ka fè l’ ronté. Artem ka di : « Chak fwa mouché-a té ka fè yé vin chaché mo, mo té pè. […] Mo toujou té ka priyè Jéova. Mo té ka doumandé l’ kalmé mo tchò é bay mo sajès. » I ka di ankò : « Magré sa pèrsékisyon-an, mo té ka rété kalm. […] Grasa Jéova, a kousidiré mo té séré dèyè roun gro mir ki fèt ké ròch. »

6. Poukisa nou ké toujou pouvé fè Jéova konfyans ? (Isaïe 26:3, 4).

⁶ Jéova sa roun moun nou pouvé fè konfyans. Menm fason roun gro ròch ké toujou rété menm koté-a, Jéova ké toujou la pou nou. Nou pouvé fè l’ konfyans paské i sa « gro Ròch-a ki la pou tout-tan » (li Isaïe 26:3, 4). Donk, i ké toujou la pou tchenbé so promès, kouté nou lapriyè é pou idé nou lò nou bézwen. Anplis di sa, i fidèl ké so sèrvitèr (2 Sam. 22:26). I pa ké janmen bliyé sa nou ka fè é i ké toujou rékonpansé nou (Héb. 6:10 ; 11:6).

7. Kisa nou ké wè si nou ka konté asou Jéova ? (gadé zimaj-a osi).

⁷ Jéova ka divini nou gro Ròch lò nou ka konté asou l’ pou tout bagaj. Nou sir ki si nou ka obéyi l’, menm lò bagaj-ya rèd, nou ké jwenn bénédiksyon (Is. 48:17, 18). Chak fwa nou ka wè ki i ka soutni nou, nou ka fè l’ konfyans ankò plis. Sa ka idé nou gen plis fòrs pou sipòrté éprèv li rounso pouvé idé nou sipòrté. A souvan lò nou annan roun sitiasyon koté a li rounso ki pouvé idé nou, nou ka wè ki nou pouvé fè l’ konfyans vré. A sa Vladimir wè. Yé té mété l’ lajòl akoz di so lafwa. I ka di : « Lò mo té lajòl, a la mo lanmityé ké Jéova té vin pi fò pasé pyès tan. Mo anprann fè Jéova plis konfyans paské mo té tousèl é paské a pa anyen mo té pouvé fè. »

8. a) Poukisa nou pouvé di ki Jéova pa ka chanjé ? b) Ki bénédiksyon nou gen paské Jéova sa nou gro Ròch ? (Psaume 62:6, 7).

⁸ Jéova pa ka chanjé. Menm fason roun gro ròch byen dibout é pa ka boujé, Jéova  pa ka chanjé : i toujou gen menm pèrsonalité-a ké menm projè-a (Mal. 3:6). Lò Adan ké Èv tounen yé do bay li, i pa chanjé sa i té lé fè-a. Kou apot Pòl ékri, Jéova « pa pouvé alé kont so pròp kò » (2 Tim. 2:13). Sa lé di ki kèlkéswa sa ki rivé, kèlkéswa sa ròt-ya ka fè, i ké toujou menm moun-an é so projè ké so prensip pa ké chanjé. Kou nou Bondjé pa ka chanjé, nou pouvé sir ki i ké idé nou sipòrté sa tan-yan ki rèd é ki i ké sové nou (li Psaume 62:6, 7).

9. Kisa èkzanp Tatiana ka anprann nou ?

⁹ Jéova ka divini nou gro Ròch lò nou toujou ka mété nou lidé asou ki kalité Moun i sa é asou so projè. Konsa, lò nou ké gen éprèv nou ké rété kalm é nou ké rété fidèl (Ps. 16:8). A sa ki rivé Tatiana. Lapolis té oblijé l’ rété annan so kaz akoz di so lafwa. I ka di : « Mo té mo rounso. O koumansman, sa té rèd menm. Souvan, mo té ka santi ki mo pa té ké gen fòrs pou tchenbé. » Mé lò i konprann pi byen ki i té gen sa éprèv-a paské i té ka sèrvi Jéova é paské i té ka soutni so projè, Tatiana santi so kò pi byen é i viré gen fòrs. I ka di ankò : « Lò mo réfléchi asou poukisa sa bagaj-a té ka rivé mo, mo sonjé ki a pou Jéova mo annan sa sitiasyon-an. Sa ka idé mo pa rété asou sa ki ka rivé mo. »

10. Kisa nou pouvé fè dipi aprézan pou Jéova sa nou gro Ròch ?

¹⁰ Titalò, nou ké jwenn éprèv ki ké rèd menm é nou ké divèt konté asou Jéova kou nou pa janmen fè l’ anvan. Donk, a aprézan pou nou fè sa ki fo pou nou ankò pi sir ki i ké bay nou tousa nou ké bézwen pou nou rété fidèl. Kouman to pouvé fè sa ? Li istwè annan Labib ké istwè lavi frè ké sò di nou lépòk. Chaché wè kouman Jéova montré so sèrvitèr ki i té sa roun gro ròch. Pran tan réfléchi asou sa istwè-ya. Konsa, Jéova ké divini to gro Ròch.

IMITÉ JÉOVA, NOU GRO RÒCH

11. Poukisa nou lé imité Jéova ? (gadé osi karé-a «  Roun òbjèktif pou jenn frè-ya »).

¹¹ Nou fin wè poukisa Labib ka di ki Jéova sa roun gro ròch pou nou. Annou wè aprézan kouman nou pouvé imité l’. Pi nou ké travay rèd pou imité l’, pi nou ké pouvé idé asanblé-a vin pi fò. Annou palé di Simon Pyèr. Jézi aplé l’ Séfas (ouben « Pyèr ») ki lé di « moso ròch » (Jean 1:42). Sa non-an té ka montré ki Pyèr té ké ankourajé moun annan asanblé-a é ki i té ké fè lafwa frè ké sò-ya vin pi fò. Labib ka di ki ansyen-yan kou « lonbraj roun bi papa ròch ». Sa ka montré ki yé ka protéjé moun-yan annan asanblé-a (Is. 32:2). Asanblé-a ka jwenn bénédiksyon osi lò chak moun, ki a frè, ki a sò, ka imité kalité Jéova gen ki ka fè ki i sa roun gro ròch (Éph. 5:1).

12. Kouman nou pouvé sa roun koté pou nou frè ké sò-ya an sékirité ?

 ¹² A pou to sa roun koté frè ké sò-ya an sékirité. Détan, lò sèrten frè ké sò blijé chapé di yé kaz akoz di roun katastròf natirèl ouben akoz di lagèr, nou pouvé sa roun vré koté pou yé an sékirité. Nou pouvé envité yé rété annan nou kaz. Kou lavi annan sa « dèrnyé jou-ya » plizanpli rèd, nou ké divèt idé nou konpanyen pi bokou (2 Tim. 3:1). Nou pouvé sa roun koté pou nou frè ké sò-ya an sékirité osi lò nou ka konsolé yé é lò nou ka montré yé nou kontan yé. Parèkzanp, annou fè sa ki fo pou yé alèz lò yé ka vin lasal Rwayonm-an. Konsa, nou ké idé pou i gen roun bèl anbyans annan asanblé-a. Nou ka viv annan roun monn ki rèd, ki frèt é ki ka mété présyon asou nou. A pou sa nou lé fè tousa nou pouvé pou, lò nou frè ké sò ka vin annan réinyon-yan, yé santi ki nou kontan yé, yé roupran fòrs é yé santi yé kò an sékirité.

13. Kouman ansyen-yan pouvé sa roun koté pou yé frè ké sò-ya an sékirité lò yé ka jwenn problèm ? (gadé zimaj-a osi).

¹³ Ansyen-yan pouvé sa roun koté pou yé frè ké sò-ya an sékirité lò yé gen problèm. Si i gen roun katastròf natirèl ouben si roun frè ouben roun sò gen roun problèm lasanté ki grav, yé ka òrganizé yé kò vitman pou idé frè ké sò-ya. Yé ka sèrvi Labib osi pou gidé yé épi ankourajé yé. Frè ké sò-ya ké pi alèz pou doumandé roun ansyen idé yé si i dous, si i ka chaché konprann yé é si i paré pou kouté yé. Lò roun ansyen gen sa kalité-ya, frè ké sò annan asanblé-a ka santi ki i kontan yé. É sa pi fasil pou yé asèpté nenpòrt ki konsèy ansyen-an ka bay ki ka vin di Labib (1 Thess. 2:7, 8, 11).

14. Kisa nou pouvé fè pou ròt-ya fè nou konfyans ?

 ¹⁴ A pou to sa roun moun yé pouvé fè konfyans. Nou lé ròt-ya savé ki yé pouvé konté asou nou, èspésyalman lò yé annan traka (Prov. 17:17). Kisa nou pouvé fè pou ròt-ya fè nou konfyans ? Chak jou, a pou nou fè tousa nou pouvé pou montré menm kalité Bondjé gen. Parèkzanp, nou ké tchenbé promès nou ka fè é nou ké fè tousa nou pouvé pou nou pa an rétar (Mat. 5:37). Épi, si nou savé ki roun moun bézwen yé idé l’, annou idé l’. É annou fè sa yé ka doumandé nou fè kou yé ka di nou fè l’.

15. Ki bénédiksyon asanblé-a ka jwenn lò frè ké sò-ya pouvé fè ansyen-yan konfyans ?

¹⁵ Lò frè ké sò-ya pouvé fè ansyen-yan konfyans, a roun bon bagaj pou asanblé-a. Poukisa ? Proklamatèr-ya kontan lò yé savé ki yé pouvé palé ké ansyen-yan chak fwa yé bézwen é èspésyalman ké rèsponsab yé group prédikasyon-an. Anplis di sa, lò yé ka wè ki ansyen-yan paré pou idé yé, yé ka santi ki yé kontan yé. Épi, yé ka fè ansyen-yan konfyans pi bokou lò konsèy yé ka bay ka vin di Labib ouben di piblikasyon-yan, pasé yé vin di sa yé  menm ka pansé. Yé pouvé fè yé konfyans ankò plis si yé pa ka mété tout yé zafè dèrò épi si yé ka tchenbé yé promès.

16. Ki bénédiksyon nou menm ké ròt-ya ka jwenn lò nou toujou ka fè sa Bondjé ka di ki drèt ?

¹⁶ Toujou fè sa Jéova ka di ki drèt. Si nou ka obéyi Jéova annan tout bagaj é si nou ka lésé prensip-ya ki annan Labib gidé nou lò nou gen désizyon pou pran, nou ké sa roun bon èkzanp pou ròt-ya. Lò nou ka étidyé Labib é lò nou ka fè nou lafwa vin pi fò, nou ka rété byen dibout annan lavérité-a. Nou savé lò roun ansèyman pa vré ouben lò roun lidé pa ka alé ké fason Jéova ka pansé, é nou pa ka lésé sa bagaj-ya détenn asou nou (Éph. 4:14 ; Jacq. 1:6-8). Paské nou gen lafwa annan Jéova ké annan so promès, nou ka rété kalm lò nou ka tandé vyé nouvèl (Ps. 112:7, 8). Anplis di sa, nou pouvé soutni sa-ya ki ka wè mizè (1 Thess. 3:2, 3).

17. Kisa ki ka pèrmèt ansyen-yan idé asanblé-a rété byen dibout ?

¹⁷ Ansyen-yan divèt rézonab annan sa yé gen labitid fè, yé divèt pran tan réfléchi, yé divèt byen òrganizé é yé divèt sa dé moun ki rézonab. Lò yé ka « rété byen maré ké paròl fidèl-a », sa wonm-yan ka idé asanblé-a rété kalm é gen roun lafwa ki fò (Tite 1:9 ; 1 Tim. 3:1-3). Ké yé bèl èkzanp é lò yé k’alé wè frè ké sò-ya pou ankourajé yé, yé ka idé yé gen labitid alé annan réinyon-yan, préché épi étidyé yé rounso. Lò frè ké sò-ya ka jwenn sitiasyon ki ka chanboulé yé, ansyen-yan pouvé idé yé bokou lò yé ka ankourajé yé mété yé lidé asou Jéova ké asou so promès.

18. Poukisa nou lé louwé Jéova épi vin toujou pi pròch di li ? (gadé osi karé-a «  Roun fason pou to vin pi pròch di Jéova »).

¹⁸ Apré sa nou fin wè asou bèl kalité Jéova gen, kou rwa David, nou lé di : « A pou tout moun louwé Jéova, mo gro Ròch » (Ps. 144:1). Jéova ké toujou sa roun Bondjé nou pouvé fè konfyans. Nou pouvé sir ki, pannan tout nou lavi, é menmsi laj ka antré, i la pou idé nou rété pròch di li. Donk, nou pouvé di : « I sa mo gro Ròch » (Ps. 92:14, 15).