1-2. Kisa nou divèt fè pou Jéova asèpté nou ladorasyon ?

 KISA to ka sonjé lò to ka tandé « ladorasyon » ? Pitèt to ka wè roun frè ki ka mété so dé jounou atè pou priyè é ka palé ké Jéova anvan i alé dronmi. Ouben, pitèt to ka wè roun fanmi ki ka pran plézi étidyé Labib-a ansanm.

² Annan sa dé sitiasyon-yan, yé ka fè bagaj pou adoré Bondjé. Ès Jéova ka asèpté sa yé ka fè ? Wi, i ka asèpté si yé ka fè so volonté. Nou tout nou kontan Jéova. Nou savé i mérité nou adoré li. É nou lé bay li pi bon kalité ladorasyon-an.

3. Kisa nou ké wè annan sa artik-a ?

³ Annan sa artik-a, nou ké rouwè ki kalité ladorasyon Jéova té ka asèpté tan-lontan, é nou ké wè wit bagaj Jéova lé nou fè pou nou adoré l’ jòdla. Toupannan nou ka fè sa, nou chak ké pouvé réfléchi asou sa nou pouvé fè pou adoré Bondjé ankò pi byen. Nou ké wè osi poukisa sa ka fè nou tchò kontan lò nou ka adoré Jéova kou i lé.

4. Kouman moun ki adoré Jéova anvan Jézi vini asou latè-a montré yé té kontan l’ é yé té ka rèspèkté l’ ?

⁴ Anvan Jézi vini asou latè-a, wonm fidèl kou Abèl, Noé, Abraam ké Jòb parèkzanp, montré ki yé té ka rèspèkté é ki yé té kontan Jéova. Kouman yé té ka fè sa ? Yé té ka obéyi Bondjé, yé té ka mété yé lafwa annan li, é  yé té ka fè sakrifis pou li osi. Labib-a pa ka di nou tout bagaj yé té divèt fè pou adoré li. Mé asiré, yé té ka fè tousa yé té pouvé pou bay Jéova lònò, é Jéova asèpté yé ladorasyon. Pita, Jéova bay Moyiz roun Lalwa pou Israyélit-ya. Annan sa lalwa-a, i té gen roun patché règ asou fason i té lé yé adoré li.

5. Kouman Jéova té lé disip Jézi adoré li ?

⁵ Dipi lanmò ké rézirèksyon Jézi, Jéova pa ka doumandé moun obéyi Lalwa i té bay Moyiz ankò (Rom. 10:4). Krétyen-yan té divèt swiv roun nouvo lalwa, « lalwa Kris-a » (Gal. 6:2). Pou obéyi sa « lalwa »-a, yé pa té gen pou anprann ké swiv roun patché règ. Mé yé té divèt imité Jézi ké swiv sa i té ansényé-a pito. Jòdla osi, krétyen-yan ka fè tousa yé pouvé pou swiv Kris pou fè Jéova plézi, é pou « trapé konsolasyon » (Mat. 11:29).

6. Ki késyon to pouvé pozé to kò pou to byen profité di sa nou ké wè annan sa artik-a ?

⁶ Annan sa artik-a, nou ké wè wit bagaj nou ka fè pou adoré Jéova. Toupannan nou ka fè sa, doumandé to kò : « Ki progrè mo fè annan sa zafè-a ? » To pouvé doumandé to kò osi : « Ès mo pouvé adoré Jéova pi byen ? » To pouvé kontan sa to ja ka fè jòdla, mé to pouvé osi doumandé Jéova idé to wè annan ki bagaj to divèt vin pi vayan ankò.

7. Kisa Jéova ka rousanti lò nou ka priyè l’ ké tout nou tchò ?

⁷ Nou ka priyè Jéova. Labib-a ka konparé lapriyè nou ka fè ké lansan yé té ka sèrvi annan tabèrnak-a, é pita annan Tanp-a. Yé té ka pran tan byen préparé l’ (Ps. 141:2). Sa lansan-an té ka bay roun lòdò Bondjé té kontan. Menm fason-an, lapriyè nou ka fè ki ka vini di nou tchò sa roun « plézi » pou li, menm si nou ka sèrvi mo ki senp (Prov. 15:8 ; Deut. 33:10). Nou pouvé sir ki Jéova kontan tandé nou di li ki nou kontan li ké di li mèrsi. I lé nou palé li di sa ki ka fè nou enkyèt, di èspwar nou gen, ké di sa nou lé fè. Anvan nou priyè Jéova, annou pran tan réfléchi asou sa nou ké di. A konsa nou ké bay nou Papa ki annan syèl-a, pi bon kalité « lansan » i pouvé gen.

8. Ki okazyon nou gen pou louwé Bondjé ?

⁸ Nou ka louwé Jéova (Ps. 34:1). Nou ka louwé Jéova lò nou ka di ròt moun-yan kouman nou kontan bèl kalité i gen, é kouman nou kontan sa i fè. Si nou gen rékonésans pou Jéova, nou ké gen bokou bèl bagaj pou di asou li. Si nou ka pran tan sonjé tout bèl bagaj Jéova fè pou nou, nou ké toujou gen roun bagaj pou di pou louwé li. Lò nou ka préché, a pi bon okazyon pou nou « bay roun sakrifis pou louwé Bondjé, sa lé di paròl ki ka vini di nou bouch » (Héb. 13:15). Menm fason nou ka pran tan réfléchi asou sa nou ké di anvan nou priyè Jéova, nou divèt réfléchi osi asou sa nou ké di moun-yan lò nou ké préché pou yé. Nou lé bay pi bèl « sakrifis » nou pouvé bay « pou louwé Bondjé ». A pou sa nou ka palé ké nou tchò lò nou ka préché.

9. Kou Israyélit-ya, ki bénédiksyon nou ka trapé lò nou ka alé annan réinyon-yan ? Bay roun èkzanp asou fason réinyon-yan idé to.

⁹ Nou k’alé annan réinyon-yan. Jéova té di Israyélit-ya : « Trwa fwa chak  lannen, tout mouché-ya ké vini douvan Jéova to Bondjé, koté i ké chwazi-a » (Deut. 16:16). Pannan sa lafèt-ya, yé té divèt lésé yé kaz ké yé bati, san pyès moun pou véyé yé. Mé Jéova té promèt yé : « Pyès moun pa ké anvi pran to péyi pannan tout tan to ké monté pou alé douvan Jéova to Bondjé » (Ex. 34:24). Paské Israyélit-ya té sir ki i té ké tchenbé so promès, yé té k’alé annan sa lafèt-ya chak lannen. A konsa yé té ka trapé bèl bénédiksyon : yé té ka anprann plis asou Lalwa Bondjé, yé té pouvé réfléchi asou kouman Jéova té bon ké yé, é yé té ka pran plézi rété ansanm ké sa-ya ki té ka adoré Jéova kou yé menm (Deut. 16:15). Nou ka trapé menm kalité bénédiksyon-yan lò nou ka fè tousa nou pouvé pou alé annan réinyon-yan. Épi sonjé kouman Jéova kontan lò to ka byen préparé déztrwa bèl ti répons ki kourt !

10. Poukisa nou pouvé di ki chanté enpòrtan annan nou ladorasyon ?

¹⁰ Nou ka chanté pou Jéova ansanm ké nou frè ké sò-ya (Ps. 28:7). Pou Israyélit-ya, chanté té enpòrtan annan yé ladorasyon. Parèkzanp, rwa David té chwazi 288 Lévit pou yé té chanté annan Tanp-a (1 Chron. 25:1, 6-8). Jòdla osi, lò nou ka chanté pou louwé Bondjé, nou ka montré li ki nou kontan li. É si nou pa konnèt byen chanté, a pa roun problèm. Lò nou ka palé, « nou tout ka bité souvan », mé sa pa ka anpéché nou palé, ki a annan asanblé-a, ki a annan prédikasyon-an (Jacq. 3:2). Menm fason-an, si nou ka pansé ki nou pa konnèt byen chanté, sa pa divèt anpéché nou chanté pou louwé Jéova.

11. Kou sa marké annan Psaume 48:13, poukisa nou divèt pran tan pou étidyé Labib-a ké nou fanmi ?

¹¹ Nou ka étidyé Labib-a é nou ka idé nou timoun anprann konnèt Jéova. Saba-a té ka pèrmèt Israyélit-ya arété travay é fè yé lanmityé ké Jéova vin pi fò (Ex. 31:16, 17). Adoratèr fidèl-ya té ka profité pou anprann yé timoun konnèt Jéova ké so bonté. Nou menm osi, nou divèt pran tan pou li ké étidyé Paròl Bondjé-a. Sa ka fè parti di nou ladorasyon pou Jéova é sa ka idé nou vin pi pròch ké li (Ps. 73:28). É lò nou ka étidyé ansanm ké nou fanmi, nou ka idé nou timoun pou yé gen yépa lanmityé ké nou Papa ki annan syèl-a (li Psaume 48:13).

12. Kouman Jéova té ka wè travay sa-ya ki té ka konstrwi tabèrnak-a ké tousa ki té annan l’, é kisa sa ka anprann nou ?

¹² Nou ka konstrwi ké ranjé koté nou ka adoré Jéova. Pou Jéova, lò yé fè tabèrnak-a ké tousa ki té annan l’, sa té ka fè parti di « travay ki sakré-a » (Ex. 36:1, 4). Jòdla osi, lò nou ka fè sal di Rwayonm ké ròt batiman-yan, a pou Jéova, sa ka fè parti di ladorasyon nou ka bay li. Sèrten frè ké sò ka pasé bokou tan ka fè sa bagaj-ya. Ès nou pa kontan pou bèl travay yé ka fè ? Nou pa bézwen di yé ka préché osi. I jis gen sa ki lé divini pyonyé. Ansyen-yan ka montré yé ka soutni travay konstriksyon-an lò yé ka pèrmèt sa frè ké sò-ya ki ka travay rèd divini pyonyé pèrmanan lò yé gen kalité pou sa. Épi, ki nou vayan, ki nou pa vayan annan zafè konstriksyon-an, nou pouvé idé pou sa batiman-yan rété pròp é pou yé pa abimé.

13. Kouman nou divèt wè soumaké nou ka bay pou soutni travay-a ki ka fèt toupatou asou latè-a ?

 ¹³ Nou ka bay soumaké pou soutni travay-a ki ka fèt toupatou asou latè-a. Israyélit-ya pa té divèt vini douvan Jéova yé dé lanmen vid (Deut. 16:16). Yé té divèt mennen roun kado soulon sa yé té pouvé bay. Konsa, yé té ka montré ki yé té gen rékonésans pou tout bagaj Jéova té ka fè pou yé. É nou menm, kouman nou pouvé montré nou lanmou pou Jéova ké nou rékonésans pou tousa i ka fè pou nou ? Roun fason nou pouvé fè sa, a lò nou ka bay soumaké pou idé nou asanblé ké travay prédikasyon-an asou tout latè-a, soulon sa nou pouvé bay. Men sa apot Pòl di asou sa : « Si roun moun paré pou fè roun bagaj ké tout so tchò, Bondjé ka èspésyalman asèpté sa i ka bay parapòrta sa i gen, é pa parapòrta sa i pa gen » (2 Cor. 8:4, 12). Jéova kontan sa nou pouvé bay, menm si a pa gran kichoz (Marc 12:42-44 ; 2 Cor. 9:7).

14. Dapré Proverbes 19:17, kouman Jéova ka wè sa nou ka fè pou idé nou frè ké nou sò ki bézwen ?

¹⁴ Nou ka idé konpanyen krétyen ki bézwen. Jéova té promèt Israyélit-ya ki i té ké bay yé roun rékonpans si yé té janti ké maléré-ya (Deut. 15:7, 10). Chak kou nou ka idé roun frè ouben roun sò, Jéova ka wè sa kou roun kado nou ka bay li (li Proverbes 19:17). Parèkzanp, lò krétyen ki té ka rété Filip voyé roun kado pou Pòl ki té lajòl, i aplé sa « roun bèl sakrifis, roun bagaj Bondjé kontan » (Phil. 4:18). Sonjé sa-ya ki annan to asanblé é doumandé to kò : « Ès mo pouvé idé roun moun ? » Jéova kontan lò i ka wè nou sèrvi nou tan, nou fòrs, sa nou konnèt fè ké sa nou gen pou idé sa-ya ki bézwen. Pou li, sa ka fè parti di nou ladorasyon (Jacq. 1:27).

15. Adoré Jéova, sa ka pran tan, é to divèt fè éfòr, mé poukisa sa pa fòrsan ?

¹⁵ Adoré Jéova, sa ka pran tan é to divèt fè éfòr, mé sa pa fòrsan (1 Jean 5:3). Poukisa nou pouvé di sa ? Paské a nou lanmou pou Jéova ki ka fè nou adoré li. Annou pran èkzanp roun timoun ki lé bay so papa roun kado. I ka pasé roun patché tan ka fè roun désen pou li. Mé i pa ka gadé tan i ka pasé ka fè sa. I kontan so papa, é i kontan bay li sa kado-a. A menm bagaj-a pou nou : nou kontan Jéova, é nou kontan sèrvi nou tan ké nou fòrs pou adoré l’.

16. Dapré Hébreux 6:10, kouman Jéova ka wè éfòr nou ka fè pou fè l’ plézi ?

¹⁶ Papa ké manman ki kontan yé timoun pa ka antann yé chak bay yé menm kalité kado-a. Yé savé ki yé diféran é yé pa pouvé fè menm bagaj-a. Menm fason-an, nou Papa ki annan syèl-a ka konprann ki nou chak pa pouvé fè menm bagaj-a. Pitèt to pouvé fè plis ki roun patché ròt frè ké sò annan to asanblé. Ouben, pitèt to pa pouvé fè bokou pou ròt-ya pitèt akoz di to laj, to lasanté ouben to fanmi. A pa pou to dékourajé ! (Gal. 6:4). Jéova pa ké bliyé to travay. Dipi to ka fè tousa to pouvé ké tout to tchò, sa ké fè l’ plézi (li Hébreux 6:10). Jéova jis ka wè sa to té ké lé fè pou li. É i lé to kontan ké sa to pouvé fè pou adoré li.

17. a) Si nou ka trouvé ki sèrten bagaj annan nou ladorasyon rèd pou fè, kisa nou pouvé fè ? b) Ki bagaj idé to annan ti karé-a «  Bagaj ki ka fè nou tchò kontan » ?

 ¹⁷ Kisa to pouvé fè si to ka trouvé sa rèd pou to fè sèrten bagaj nou palé anvan, kou étidyé Labib-a ouben préché ? To ké wè ki pi to ka fè sa bagaj-ya, pi to ké kontan yé é pi to ké pran plézi annan sa. A kousidiré nou té ka fè èspòr ouben nou té ka anprann jwé lanmizik. Si nou pa ka fè sa souvan, nou pa ké progrésé bokou. A pou nou fè l’ touléjou. Pou koumansé, nou pouvé fè sa plizyèr minit chak jou épi pitit piti fè roun tibi plis chak fwa. Pi nou ké wè bèl rézilta nou ka jwenn, pi nou ké présé roukoumansé. A menm bagaj-a pou nou ladorasyon.

18. Ki pi bèl bagaj nou pouvé fè, é ki bénédiksyon nou ka jwenn si nou ka fè l’ ?

¹⁸ Pi bèl bagaj nou pouvé fè, a adoré Jéova ké tout nou tchò. Ki bénédiksyon nou ka jwenn ? Nou lavi bèl é i gen roun sans. Anplis di sa, nou pouvé èspéré adoré Jéova pou tout-tan (Prov. 10:22). Dipi aprézan, nou gen lapè annan nou tchò paské nou savé ki Jéova ka idé so adoratèr lò yé gen problèm (Is. 41:9, 10). Nou blijé kontan lò nou ka adoré nou Papa ki kontan nou é ki ka mérité tou so kréyasyon bay li « laglwar ké lònò » (Rév. 4:11).