ARTIK POU ÉTIDYÉ 43
KANTIK 90 Encourageons-nous les uns les autres
Kisa ki pouvé idé nou lò nou ka pozé nou kò késyon ki ka dékourajé nou ?
« A pou zòt vérifyé tout bagaj » (1 THESS. 5:21).
SA NOU KÉ ANPRANN
Kisa nou pouvé fè si nou pa sir ki nou gen valò pou Jéova, si nou ka rigrété désizyon nou pran pou sèrvi Jéova ouben si nou pa pouvé fè tousa nou lé pou Jéova kou anvan ?
1-2. a) Ki kalité késyon sèrvitèr Jéova-ya pouvé doumandé yé kò ? b) Kisa nou ké wè annan sa artik-a ?
KÈLKÉSWA nou laj, détan, nou ka doumandé nou kò si nou gen valò pou Jéova é si sèrten désizyon nou pran anvan té bon. Parèkzanp, roun jennjan pouvé doumandé so kò si Jéova ka gadé pou li vré é akoz di sa, i ka ézité anvan i batizé. Pitèt roun frè lò i té jennjan, désidé mété Jéova an prémyé pasé i pran roun travay ki té ké pèrmèt li gen bokou soumaké. Mé aprézan, i maryé, i gen timoun é i pa gen bokou soumaké. Atò, i ka doumandé so kò si désizyon i té pran lò i té jenn té bon. Épi roun sò ki ja granmoun é ki pa gen bokou fòrs pouvé dékourajé paské i pa pouvé fè bokou bagaj kou anvan. Ès to ja doumandé to kò : « Ès mo gen valò pou Jéova ? Ès a té pou mo fè tout sa sakrifis-ya ? Ès mo itil pou li toujou ? »
2 Si nou pa ka chaché répons-ya, pitèt nou pa ké gen lafwa ankò é pitèt menm nou ké arété sèrvi Jéova. Annan sa artik-a, nou ké wè kouman si nou ka pran tan réfléchi asou prensip-ya annan Labib, sa ké idé nou si nou pa sir ki 1) Jéova ka gadé pou nou, 2) ki sèrten désizyon nou pran anvan té bon ouben 3) ki nou itil pou Jéova toujou.
SA KI POUVÉ IDÉ TO LÒ TO KA POZÉ TO KÒ SÈRTEN KÉSYON
3. Kisa nou pouvé fè si nou dékourajé lò nou ka pozé nou kò sèrten késyon ?
3 Lò nou ka pozé nou kò sèrten késyon sa enpòrtan pou nou alé chaché répons-ya annan Labib. Si a sa nou ka fè, nou lafwa ké vin pi fò. Nou lanmityé ké Jéova ké vin pi fò é sa ké pi fasil pou nou « tchenbé rèd annan lafwa » (1 Cor. 16:13).
4. Kisa nou pouvé fè pou nou « vérifyé tout bagaj » ? (1 Thessaloniciens 5:21).
4 (Li 1 Thessaloniciens 5:21.) Labib ka ankourajé nou « vérifyé tout bagaj ». Kouman nou pouvé fè sa ? A pou nou konparé sa nou ka pansé ké sa Labib ka di. Annou viré asou èkzanp jennjan-an ki ka doumandé so kò si i gen valò pou Bondjé. Ès i pa divèt chaché répons-a ? Wi a pou i chaché, a pou i « vérifyé tout bagaj », sa lé di ki i divèt chaché savé sa Jéova ka pansé.
5. Kouman nou pouvé « tandé » Jéova réponn nou ?
5 Lò nou ka li Labib nou ka « tandé » Jéova palé pou nou. Mé pou nou konprann kouman i ka wè roun bagaj, a pou nou fè roun éfòr èspésyal. A pou nou trapé vèrsé-ya ki ka réponn késyon nou ka pozé nou kò-a é a pou nou fè réchèrch asou sa vèrsé-ya. Pou fè sa, annou sèrvi tout zouti òrganizasyon Jéova-a ka bay nou (Prov. 2:3-6). Lò nou ka fè réchèrch, annou doumandé Jéova gidé nou épi idé nou konprann kouman i ka wè bagaj-ya. Annou chaché prensip-ya annan Labib ki ka alé ké nou sitiasyon. É annou pran tout konsèy ki pouvé idé nou. Pou fini, annou chaché sa moun annan Labib ki té gen menm problèm ké nou ka anprann nou.
6. Kouman nou réinyon pouvé idé nou réponn sèrten késyon nou ka pozé nou kò ?
6 Nou ka « tandé » Jéova palé pou nou annan nou réinyon osi. Donk, a pou nou alé annan réinyon-yan chak simenn. Pitèt nou ké tandé répons késyon nou ka pozé nou kò-a annan roun diskour ouben annan répons roun moun ké bay (Prov. 27:17). Aprézan, annou wè sa ki pouvé idé nou réponn sèrten késyon.
SI TO PA SIR KI JÉOVA KA GADÉ POU TO
7. Kisa roun ran pouvé doumandé yé kò ?
7 Ès to ja doumandé to kò si Jéova ka gadé pou to ? Si to ka pansé ki to pa anyen, pitèt to ka di ki to pa ké janmen divini zanmi ké Sa-la ki fè tout bagaj. Pitèt a sa Rwa David té ka pansé osi. Lò i konprann ki Jéova ka gadé pou nou, sa té tèlman fò pou li ki i di : « O Jéova, kisa roun moun sa pou to rémarké l’, kisa pitit roun moun sa pou to pran tan gadé l’ ? » (Ps. 144:3). Koté to pouvé trapé répons-a ?
8. Dapré 1 Samuel 16:6, 7, 10-12, kisa Jéova ka wè lò i ka gadé nou ?
8 Labib ka byen montré ki Jéova ka wè sa-ya moun ka wè kou dé ti tchatcha. Annou wè sa ki rivé lò Jéova voyé Samiyèl koté Jésé pou i vidé dilwil asou tèt roun di so pitit pou i divini rwa Israyèl. Jésé montré Samiyèl sèt annan so wit pitit-ya, mé i pa fè David, pi piti-a, vini a. Pourtan, a David Jéova chwazi (li 1 Samuel 16:6, 7, 10-12). Jéova té wè kimoun David té sa vréman : a té roun jennjan ki té kontan l’ bokou.
9. Poukisa to pouvé sir ki Jéova ka gadé pou to ? (gadé zimaj-a osi).
9 Jéova ja montré ki i ka gadé pou to. Kouman i fè sa ? Réfléchi asou sa : I ka bay to pi bon konsèy to pouvé gen ki k’alé ké to sitiasyon (Ps. 32:8). Ès sa pa ka montré ki i byen konnèt to ? (Ps. 139:1). Anplis di sa, si to ka apliké sa konsèy-ya to ké wè ki yé bon pou to é sa ké pèrmèt to sir ki i ka gadé pou to (1 Chron. 28:9 ; Actes 17:26, 27). Jéova ka wè éfòr to ka fè. I ka wè kimoun to sa é ki bèl kalité to gen. I lé divini to Zanmi (Jér. 17:10). É i lé to asèpté divini so zanmi (1 Jean 4:19).
« Si to ka chaché [Jéova], i ké lésé to trouvé li » (1 Chron. 28:9) b (gadé paragraf 9).
SI TO PA SIR KI SÈRTEN DÉSIZYON TO PRAN ANVAN TÉ BON
10. Lò nou ka sonjé désizyon nou pran anvan, ki késyon nou pouvé pozé nou kò ?
10 Roun ran pouvé doumandé yé kò si désizyon yé pran lò yé té pi jenn té bon. Pitèt, yé désidé lésé roun bon travay koté yé té ka touché roun bon soumaké ouben yé désidé pa louvri roun antrépriz pou fè plis pou Jéova. Aprézan, roun patché tan pasé, é lò yé ka wè moun yé konnèt ki pa pran menm désizyon-an, yé té ké di ki yé plen ké plon é ki yé pa gen pyès problèm. Yé pouvé doumandé yé kò : « Ès a té pou mo fè sa sakrifis-ya pou Jéova ? Ès mo pa raté roun bagaj ? »
11. Poukisa moun-an ki ékri Psaume 73-a té dékourajé ?
11 Si to ka pozé to kò sa kalité késyon-yan, sonjé sa moun-an ki ékri Psaume 73-a rousanti. I té ka wè moun ki pa té ka sèrvi Jéova é yé té ké di ki yé lavi té dous, yé pa té malad é yé té plen ké soumaké (Ps. 73:3-5, 12). Lò i té ka gadé yé, i té gen lenprésyon ki tousa i té ka fè pou Jéova pa té ka sèrvi anyen. Sa té ka dékourajé l’ é i « té enkyèt tout lajournen » (Ps. 73:13, 14). Kisa i fè pou i pa rété asou sa lidé-a ?
12. Dapré Psaume 73:16-18, kisa ki idé moun-an ki ékri sa Psaume-an pa rété asou sa ki té ka dékourajé l’ ?
12 (Li Psaume 73:16-18.) I alé annan tanp Jéova-a. Annan sa koté-a, i rivé roukoumansé byen réfléchi. I konprann ki menmsi lavi roun ran té ka sanblé byen bèl, yé pa té gen pyès èspwar pou dimen. A konsa i vin sir ki adoré Jéova, a té pi bon désizyon i té pran. É i té ankò pi désidé kontinyé adoré l’ (Ps. 73:23-28).
13. Kisa to pouvé fè pou to briga ké tout vyé lidé ki ka dékourajé to ? (gadé zimaj-a osi).
13 To menm osi, to pouvé briga ké tout vyé lidé ki ka dékourajé to. Kouman to pouvé fè sa ? Réfléchi asou tout bon bagaj to gen, parèkzanp, bénédiksyon Jéova-a, é pa bliyé ki, apar sa sa monn-an pouvé ba yé, moun-yan pa gen anyen di tou. Tousa yé pouvé fè annan yé lavi enpòrtan pou yé paské apré sa i pa gen anyen ankò. Mé to menm, Jéova ka promèt to béni to lontan plis ki sa to pouvé imajiné (Ps. 145:16). Réfléchi asou sa osi : Ès nou pouvé vréman savé ki kalité lavi nou té ké gen si nou té pran rounòt chimen ? Roun bagaj nou pouvé sir, a ki sa-ya ki ka pran yé désizyon paské yé kontan Bondjé é yé kontan ròt-ya pa janmen ka raté pyès bon bagaj.
Pran tan réfléchi souvan asou tout bèl bagaj Jéova ké bay to dimen c (gadé paragraf 13).
SI TO PA SIR KI TO ITIL POU JÉOVA TOUJOU
14. Annan ki sitiasyon roun ran fika, é ki késyon yé pitèt ka pozé yé kò ?
14 Roun ran sèrvitèr Jéova ka pran laj é yé lasanté pa bon ouben yé andikapé. Akoz di sa, yé pouvé krè ki yé pa gen valò pou li ankò. Pitèt yé pouvé doumandé yé kò : « Ès mo itil pou li toujou ? »
15. Di kisa moun-an ki ékri Psaume 71-a té sir ?
15 Moun-an ki ékri Psaume 71-a té dékourajé pas i pa té gen fòrs ankò. Donk, i priyè Jéova. I di : « Pa anbandonnen mo lò mo ka pédi mo fòrs » (Ps. 71:9, 18). Mé i pa janmen arété krè ki si i té ka kontinyé adoré l’ ké fidélité, so Bondjé té ké gidé l’ épi soutni l’. I té anprann ki sa-ya ki ka fè sa yé pouvé pou adoré Jéova soulon yé sitiasyon, yé ka fè l’ plézi (Ps. 37:23-25).
16. Poukisa frè ké sò ki ja granmoun pouvé sir ki yé itil pou Jéova ? (Psaume 92:12-15).
16 Nou frè ké sò-ya, zòt ki ja granmoun, éséyé wè zòt sitiasyon kou Jéova ka wè l’. I pouvé idé zòt kontinyé adoré l’ menmsi zòt pa gen fòrs ankò (li Psaume 92:12-15). Pasé zòt mété zòt lidé asou sa zòt pa pouvé fè ankò, mété zòt lidé asou sa zòt pouvé fè. Parèkzanp, roun bagaj zòt pouvé fè pou ankourajé ròt-ya, a kontinyé rété fidèl épi pran tan gadé pou yé chak. Rakonté yé kouman Jéova idé zòt pannan tout zòt lavi é montré yé ki zòt sir ki i ké fè tout so promès fèt. Anplis di sa, pa bliyé ki lò zòt ka priyè pou ròt-ya sa pouvé idé yé bokou (1 Pierre 3:12). Kèlkéswa nou sitiasyon, nou tout pouvé ofri Jéova ké ròt-ya roun bagaj.
17. Poukisa nou pa divèt konparé nou kò ké ròt-ya ?
17 Si to tris paské to pa pouvé fè plis pou Jéova, to pouvé sir ki i kontan sa to ka fè pou li. Pitèt détan to ka konparé to kò ké ròt-ya. Mé a pou to briga ké sa ! Poukisa ? Paské Jéova pa ka konparé pyès moun (Gal. 6:4). Sonjé sa : Mari fè Jézi roun kado, roun dilwil ki té ka santi bon é ki té ka kouté chè (Jean 12:3-5). Vèv-a ki té maléré li menm mété dé ti pyès ki pa té gen valò annan bwèt pou mété ofrann-yan annan Tanp-a (Luc 21:1-4). Mé pou Jézi, sa dé madanm-yan fè sa pas yé té gen lafwa. Pou so Papa, Jéova, tousa to ka fè paské to gen lafwa é paské to kontan li gen bokou valò, menmsi pou to a pa anyen.
18. Kisa ki ké idé nou réponn késyon-yan ki pouvé dékourajé nou ? (gadé osi karé-a « Paròl Jéova-a pouvé idé to réponn késyon-yan ki ka dékourajé to »).
18 Nou tout ka pozé nou kò sèrten késyon ki pouvé dékourajé nou. Mé kou nou wè l’, nou pouvé krè sa Labib ka di é i pouvé idé nou réponn sa késyon-yan. Atò, kontinyé fè tousa to pouvé pou to réponn sa késyon-yan. Konsa, pasé to dékourajé, sa ké fè to vin pi fò. A pou to sir ki Jéova ka gadé pou to èspésyalman. Tout sakrifis to ka fè pou li gen valò é i ké rékonpansé to. To pouvé sir ki i kontan é i ka pran swen di tout sa-ya ki ka adoré l’.
KANTIK 111 Nou lajwa ka vini di Jéova
a Labib pa ka di ki laj David té gen lò Jéova chwazi l’, mé i dèt té sa roun jennjan toujou (gadé La Tour de Garde 1é sèptanm 2011, p. 29, § 2).
