1-2. Kisa ki rivé dé disip Jézi lò yé té k’alé Émayis ?

 NOU annan lannen 33 di nou lépòk, jou 16 nizan-an. Disip Jézi-ya tris toubonnman é yé pè. Dé annan yé ka soti Jérizalèm pou alé Émayis (i gen apéprè 11 km ant Jérizalèm ké Émayis). Yé dékourajé pas yé fin tchwé Jézi, sa-la yé té ka swiv. Yé té ka pansé ki kou i té sa Mési-a, i té ké fè roun patché bèl bagaj pou Jwif-ya. Mé aprézan i mouri, yé té ké di ki i pa gen pyès èspwar ankò. Mé roun bagaj yé pa té ka antann ka rivé.

² Roun mouché yé pa konnèt ka vin bò d’ yé é i ka koumansé maché ansanm ké yé. Disip-ya ka rakonté l’ sa ki rivé Jézi é yé ka di l’ kouman yé yèg. Mouché-a ka koumansé kozé ké yé é sa kozé-a, yé pa ké janmen bliyé l’. « I koumansé ké Moyiz ké tout profèt-ya » é i èspliké yé poukisa Mési-a té divèt soufri épi mouri. Lò yé ka rivé Émayis, mouché-a ka di yé kimoun i sa : yé ka konprann ki sa mouché-a, a Jézi Bondjé résisité ! Imajiné kouman sa dé disip-ya té dèt kontan pas Mési-a té vivan ! (Luc 24:13-35).

3-4. a) Lò disip-ya wè Jézi kisa sa fè yé ? b) Kisa nou ké wè annan sa artik-a ? (Actes 1:3).

³ Jézi rété 40 jou asou latè-a anvan i routounen annan syèl-a é i parèt douvan so disip plizyèr fwa pannan sa  40 jou-ya a (li Actes 1:3). So disip té tris é yé té pè mé aprézan yé tchò té kontan é yé té gen kouraj pou préché ké ansényé bon nouvèl Rwayonm-an.

⁴ Lò nou ké étidyé sa Jézi fè pannan sa 40 jou-ya, nou ké anprann bokou bagaj. Annan sa artik-a, nou ké wè kouman Jézi sèrvi sa tan-an pou 1) ankourajé so disip, 2) idé yé konprann Ékritir-ya pi byen, é 3) préparé yé pou yé gen plis rèsponsabilité. É chak fwa, nou ké wè kouman nou pouvé imité Jézi.

ANKOURAJÉ RÒT-YA

5. Poukisa disip Jézi-ya té bézwen yé ankourajé yé ?

⁵ Disip Jézi té bézwen yé ankourajé yé. Poukisa ? Roun ran annan yé té lésé yé kaz, yé fanmi ké yé travay pou swiv li (Mat. 19:27). Rounòt ran té ka soufri pas moun té ka méprizé ké malmennen yé pas yé té divini so disip (Jean 9:22). Yé tout té fè sakrifis pas yé té sir ki Jézi té sa Mési Bondjé té promèt-a (Mat. 16:16). Mé lò yé tchwé Jézi, yé pa té gen èspwar ankò é yé dé bra té kasé.

6. Kisa Jézi fè apré so rézirèksyon ?

⁶ Lò Jézi wè kouman so disip té tris parapòrta so lanmò, i konprann yé. I pa pansé ki a paské yé pa té gen lafwa. A pou sa, lò Jéova résisité l’, sa menm jou-a, Jézi alé ankourajé so zanmi. Pou koumansé, i parèt douvan Mari Magdala ki té douvan so tonm ka pléré (Jean 20:11, 16). I parèt douvan dé disip nou palé o koumansman sa artik-a osi. É i parèt douvan apot Pyèr osi (Luc 24:34). Kisa so èkzanp ka anprann nou ? Pou réponn sa késyon-an, annou wè sa ki rivé lò i parèt douvan Mari Magdala.

7. Dapré Jean 20:11-16, kisa Jézi wè Mari fè é kisa i fè pou li ? (gadé zimaj-a osi).

⁷ (Li Jean 20:11-16.) 16 nizan, a té bònò bonmanten, plizyèr madanm fidèl  alé koté yé té mété kò Jézi-a (Luc 24:1, 10). Annou wè sa ki rivé roun annan yé, Mari Magdala. Lò i rivé annan tonm-an, i wè ki Jézi pa té la. I alé di Pyèr ké Jan sa. Yé toulédé kouri alé wè tonm-an é Mari swiv yé. Lò yé wè ki Jézi pa té annan tonm-an, Pyèr ké Jan routounen a yé kaz. Mé Mari li menm rété la ka pléré. I pa té savé ki Jézi té ka gadé l’. I té ka wè sa madanm-an ki té fidèl ka pléré é sa té ka fè l’ lapenn. Donk, i parèt douvan li é i fè roun ti bagaj ki ankourajé l’ bokou. I palé ké l’ é i bay li roun bagaj enpòrtan pou fè : di so frè-ya ki i té résisité (Jean 20:17, 18).

8. Kouman nou pouvé imité Jézi ?

⁸ Kouman nou pouvé imité Jézi ? Nou pouvé fè bokou bagaj pou ankourajé nou frè ké sò kontinyé sèrvi Jéova. Pou ankourajé yé kou Jézi, nou divèt savé ki problèm yé ka jwenn. Nou divèt éséyé konprann sa yé ka rousanti é konsolé yé. A sa frè ké sò-ya fè pou Jocelyn ki té pédi so sò annan roun aksidan. I ka di : « Pannan plizyèr mwa, mo tchò té krazé nèt. » Mé roun frè ké so madanm té ka envité l’ a yé kaz é yé té ka lésé l’ di sa i té ka rousanti. Yé té ka byen kouté l’, yé té janti ké li é yé té ka di l’ ki i té gen valò pou Jéova. Jocelyn ka di : « Mo té pédi. A té kousidiré mo té annan roun gro tanpèt anmitan lanmè é ki mo té ka néyé. Mé Jéova sèrvi sa frè-a ké sa sò-a pou sové mo. Yé roubay mo anvi sèrvi Jéova ké fidélité. » Nou menm osi nou pouvé ankourajé nou frè ké sò-ya kontinyé sèrvi Jéova si nou ka lésé yé di sa yé ka rousanti é si nou ka byen kouté sa yé ka di (Rom. 12:15).

IDÉ RÒT-YA KONPRANN PARÒL BONDJÉ-A

9. Kisa disip Jézi-ya pa té ka konprann é kouman Jézi idé yé ?

⁹ Disip Jézi-ya té ka krè Paròl Bondjé-a é yé té ka fè tousa yé té pouvé pou obéyi Jéova (Jean 17:6). Mé yé pa té ka konprann poukisa Jézi té mouri asou roun poto kou roun bandi. Jézi té savé ki si yé té ka douté, a pa paské yé tchò té mové mé a paské yé pa té ka konprann tout bagaj (Luc 9:44, 45 ; Jean 20:9). Donk, i idé yé konprann sa yé té ka li annan Ékritir-ya. Annou wè kouman i fè sa lò i parèt douvan dé di so disip ki té k’alé Émayis.

10. Kouman Jézi idé so disip konprann ki i té sa Mési-a vré ? (Luc 24:18-27).

¹⁰ (Li Luc 24:18-27). Nou ka wè ki Jézi pa di sa dé disip-ya lanmenm kimoun i té sa. Anvan sa, i pozé yé késyon. Poukisa ? Pitèt i té lé yé di sa yé té ka pansé ké sa yé té ka rousanti. É a sa yé fè. Yé di l’ ki yé té ka pansé ki Jézi té ké libéré Israyèl anba lanmen Romen-yan. Jézi lésé yé di sa ki té ka fè yé enkyèt é apré sa, i sèrvi Ékritir-ya pou idé yé konprann ki roun patché profési té fèt b. Pita, sa menm jou-a, Jézi pran tan èspliké ròt disip-ya sa menm bagaj-ya (Luc 24:33-48). Kisa sa ka anprann nou ?

11-12. a) Kisa fason Jézi té ka ansényé vérité-ya ki annan Labib ka anprann nou ? (gadé zimaj-ya osi). b) Kouman frè-a ki té ka étidyé ké Nortey idé l’ ?

¹¹ Kouman nou pouvé imité Jézi ? Lò to ka étidyé ké roun moun, pozé késyon ki ké idé to savé sa i ka pansé ké sa i ka  rousanti (Prov. 20:5). Lò to konprann sa i gen ofon so tchò, montré l’ kouman i pouvé trapé vèrsé annan Labib ki ké idé l’ annan so sitiasyon. A pa pou to di li sa i gen pou fè. Pasé to fè sa, pozé késyon asou vèrsé-ya, ankourajé l’ réfléchi asou sa i ka li é asou kouman i pouvé sèrvi sa i fin anprann. A sa yé fè ké Nortey, roun frè ki ka rété Gana.

¹² Nortey koumansé étidyé Labib lò i té gen 16 lannen. Mé, lanmenm, so fanmi koumansé baré so chimen. Kisa ki idé l’ kontinyé étidyé Labib ? Frè-a ki té ka étidyé Labib ké li sèrvi Matthieu 10 pou èspliké l’ ki yé té ké pèrsékité vré krétyen-yan. Nortey ka èspliké : « Donk, lò yé koumansé pèrsékité mo, mo té sir ki mo té trapé lavérité. » Frè-a montré l’ osi Matthieu 10:16 é i di l’ ki a té pou i fè atansyon pou i pa lévé blo annan so fanmi. Apré sa, yé wè kouman sa vèrsé-a té pouvé idé Nortey èspliké so fanmi sa i té ka krè é kouman i té pouvé fè l’ ké rèspè. Apré i batizé, Nortey té lé divini pyonyé, mé so papa té lé i fè gran lékòl. Pasé i di Nortey sa i té gen pou fè, frè-a ki té ka étidyé ké li pozé l’ késyon é i pran plizyèr prensip annan Labib pou idé l’ réfléchi é pran bon désizyon-an. Kisa sa bay ? Nortey désidé divini pyonyé. Atò, so papa mété l’ dèrò. Mé jòdla, kisa Nortey ka pansé di sa ki rivé l’ ? I ka di : « Mo sir ki mo pran bon désizyon-an. » Lò nou ka ankourajé ròt-ya réfléchi asou Labib, nou ka idé yé fè yé lafwa vin pi fò é kontinyé sèrvi Jéova (Éph. 3:16-19).

ANSYEN, IDÉ FRÈ-YA DIVINI DÉ WONM KI SA DÉ « KADO »

13. Anvan i routounen annan syèl-a, kisa Jézi fè pou travay so Papa té bay li fè-a kontinyé fèt asou latè-a ? (Éphésiens 4:8).

¹³ Jézi byen fè sa so Papa té doumandé li fè asou latè-a (Jean 17:4). Mé i pa di so kò ki i pa té gen pyès ròt moun ki té pouvé fè travay so Papa. Pannan trwa lannen é dimi, i préché asou latè-a é pannan sa tan-an, i fòrmé so disip. I té ka fè so disip konfyans. I ba yé rèsponsabilité préché ké ansényé bon nouvèl-a épi okipé di pèp Jéova-a. Sèrten annan so disip ki té gen pou fè sa travay-a pa menm té  gen 30 lannen (li Éphésiens 4:8). Yé té ka travay rèd ké Jézi é yé té fidèl. Mé anvan i routounen annan syèl-a, pannan 40 jou, Jézi fòrmé yé pou yé divini dé wonm ki sa dé « kado ». Kouman i fòrmé yé ?

14. Anvan Jézi routounen annan syèl-a, kisa i ansényé so disip ? (gadé zimaj-a osi).

¹⁴ Jézi bay so disip plizyèr konsèy ki té ké idé yé é i fè l’ jantiman. Parèkzanp, i idé sa-ya ki pa té ka rivé krè ki i té résisité (Luc 24:25-27 ; Jean 20:27). Anplis di sa, i idé yé konprann ki sa té pi enpòrtan ki yé okipé di pèp Jéova-a pasé yé chaché fè soumaké (Jean 21:15). É i fè yé sonjé ki yé pa té divèt konparé sa yé té ka fè pou Jéova ké sa ròt-ya té ka fè pou Jéova osi (Jean 21:20-22). Pou fini, i idé yé pi byen konprann sèrten bagaj asou Rwayonm-an é i idé yé konprann ki préché bon nouvèl-a, a té sa yé té divèt mété an prémyé annan yé lavi (Actes 1:6-8). Kouman ansyen-yan pouvé imité Jézi ?

15-16. a) Kouman ansyen-yan pouvé imité Jézi ? b) Ki bénédiksyon Patrick jwenn lò i kouté konsèy yé té bay li-a ?

¹⁵ Kouman ansyen-yan pouvé imité Jézi ? Zòt ki ansyen, zòt ké imité Jézi si zòt ka fòrmé é si zòt ka soutni zòt frè-ya, menmsi yé jenn c. Idé yé fè sa ki fo pou yé gen plis rèsponsabilité. Yé pa bézwen konnèt fè roun lo ké roun patché bagaj. É bay yé konsèy ki plen ké lanmou pou yé divini dé moun ki pa ka fè ròklò, ki fidèl é ki lé idé ròt-ya (1 Tim. 3:1 ; 2 Tim. 2:2 ; 1 Pierre 5:5).

¹⁶ Annou wè sa ki rivé roun frè yé ka aplé Patrick. Lò i té jenn, i té gen roun pat ka palé rèd ké ròt-ya é i pa té janti ké yé. I té ka fè menm bagaj-a ké sò-ya. Mé, roun ansyen wè ki Patrick té bézwen chanjé é i byen èspliké l’ sa i té gen pou chanjé. Mé i fè l’ jantiman. Patrick ka di : « Mo byen kontan sa ansyen-an montré  mo kisa mo té bézwen chanjé. Lò mo té ka wè ròt-ya ki té gen rèsponsabilité, sa té ka dékourajé mo pas mo té lé gen rèsponsabilité osi. I idé mo konprann ki mo té bézwen fè mo kò toupiti é montré mo frè ké sò-ya ki mo kontan yé pasé mo mété mo lidé asou zafè gen rèsponsabilité rounso. » Grasa konsèy i rousouvwè-a, Patrick divini ansyen lò i té gen 23 lannen (Prov. 27:9).

17. Kouman Jézi montré ki i té ka fè so disip konfyans ?

¹⁷ Jézi bay so disip rèsponsabilité préché bon nouvèl-a mé i ba yé rèsponsabilité ansényé ròt-ya osi. Disip-ya dèt pansé ki yé pa té ké pouvé fè sa Jézi té doumandé yé fè-a. Mé Jézi té sir ki yé té pouvé fè sa travay-a. É i té tèlman sir di sa ki i di yé : « Menm fason Papa-a voyé mo, mo menm osi mo ka voyé zòt » (Jean 20:21).

18. Kouman ansyen-yan pouvé imité Jézi ?

¹⁸ Kouman ansyen-yan pouvé imité Jézi ? Ansyen-yan ki gen èspéryans ka fòrmé ròt-ya é ka bay yé sèrten rèsponsabilité (Phil. 2:19-22). Parèkzanp, yé pouvé doumandé jennjan-yan bay roun lanmen pou nétwayé épi ranjé sal di Rwayonm-an. Ansyen-yan pouvé bay frè-ya roun travay pou fè, yé pouvé fòrmé yé pou fè sa travay-a é apré sa, a pou yé fè yé konfyans. Yé sir ki yé ké fè sa travay-a. Roun frè yé ka aplé Matthew é ki divini ansyen pa gen lontan ka di ki i gen bokou rékonésans pas plizyèr ansyen ki gen èspéryans byen fòrmé l’ é pas yé té sir ki i té ké byen fè travay yé té ka bay li fè annan asanblé-a. I ka di : « Lò mo té ka tronpé mo kò, yé té ka rasiré mo é yé té ka di mo ki sa té ké pèrmèt mo fè pi byen prochen kou-a d. »

19. Kisa nou divèt byen désidé fè ?

¹⁹ Anvan Jézi routounen annan syèl-a, pannan 40 jou i ankourajé, i ansényé é i fòrmé ròt-ya. A pou nou byen désidé imité tousa i fè (1 Pierre 2:21). Nou pouvé sir ki i ké idé nou fè sa pas men sa i promèt : « Mo ké la ké zòt touléjou jistan lafen monn-an rivé » (Mat. 28:20).