Asiré pa pitèt sé ansèyman biblik fondamantal-ya ki annan sa brochir-a fè ou lanmou pou Jéova divini pi fò. Ou divèt toujou travay pou sa lanmou-a rété fò (1 Pierre 2:2). Kontinyé étidyé Labib-a pou vini pi pròch di Bondjé. A konsa rounso ou ké gen èspwar viv pou tout-tan. — Li Jean 17:3 ; Jude 21.

Pi ou ké konnèt Bondjé, pi ou lafwa ké divini fò. Ou lafwa ké pèrmèt ou fè li plézi (Hébreux 11:1, 6). Ou lafwa ké fè ou répanti é fè chanjman ou divèt fè, é sa ké randé ou lavi miyò. — Li Actes 3:19.

Nou tout kontan palé di bon nouvèl.Ou ké lé palé pou sé lézòt-ya di sa ou ka anprann, sa nòrmal. Lò ou ké kontinyé étidyé Labib-a, ou ké anprann itilizé l’ pou èspliké ròt moun-yan lafwa ou gen annan Jéova ké sé bon nouvèl-ya i gen pou nou. — Li Romains 10:13-15.

Bokou moun ka koumansé palé di sa bon nouvèl-ya pou yé zanmi ké yé fanmi. A pou ou montré rèspè é a pou ou janti. Olyé ou di ou fanmi ki yé rélijyon pa vré, palé yé di sé promès Bondjé fè-ya. Épi sonjé ki, souvan, tout bon bagaj ou ka fè pou ròt moun ka touché yé tchò plis ki sa ou pouvé di. — Li 2 Timothée 2:24, 25.

Étid Paròl Bondjé-a ké édé ou fè progrè. Pitipiti ou ké gen roun lanmityé èspésyal ké Jéova. Ou ké pouvé antré annan so fanmi. — Li 2 Corinthiens 6:18.

Ou pouvé fè progrè èspirityèl si ou ka kontinyé étidyé Paròl Bondjé-a (Hébreux 5:13, 14). Doumandé roun Témwen Jéova édé ou ké liv Kisa Labib-a ka anprann nou ? Pi ou ké étidyé Paròl Bondjé-a pi ou ké gen roun lavi éré. — Li Psaume 1:1-3 ; 73:27, 28.

Sé bon nouvèl-ya ki annan sa brochir-a ka vini di Jéova, ki sa Bondjé éré-a. Ou pouvé vini pi pròch di Bondjé si ou ka vini pi pròch di so adoratèr-ya (Hébreux 10:24, 25). Si ou ka kontinyé travay rèd pou fè li plézi ou ké kontinyé avansé asou chimen vré lavi-a, lavi pou tout-tan. Asiré pa pitèt, vini pi pròch di Bondjé a miyò bagaj ou pouvé fè. — Li 1 Timothée 1:11 ; 6:19.