LÉSON 03
Ès nou pouvé krè sa Labib-a ka di ?
Annan Labib-a, i gen bokou promès ké konsèy. Pitèt ou lé savé kisa Labib-a ka di. Magré sa, ou ka pozé ou kò késyon kou : « Ès nou pouvé krè sa roun vyé liv konsa ka di ? », « Ès sa Labib-a ka di pouvé idé nou jòdla ? » ouben « Ès nou pouvé krè sa i ka di asou sa dimen ké poté ? » A sa milyon moun ka krè. Ès ou menm osi ou pouvé krè sa ?
1. Ès istwè-ya ki annan Labib-a vré ?
Labib-a ka di ki i sa roun liv ‘paròl vérité ki vréman vré’ (Ecclésiaste 12:10). Labib-a ka palé di bagaj ki vréman rivé é di moun ki vréman èkzisté (li Luc 1:3 ; 3:1, 2). Bokou istoryen ké arkéològ montré ki Labib-a ka di vré lò i ka bay enfòrmasyon asou dat, moun, koté ké bagaj ki rivé.
2. Poukisa nou pouvé gen konfyans annan Labib-a menm si a roun liv tan-lontan ?
Labib-a palé di bokou bagaj ki moun-yan pa té kò konnèt annan yé lépòk. Parèkzanp, lò i ka palé di lasyans, i pa ka tronpé. Mé lò yé ékri l’, roun lo ké roun patché moun pa té ka krè sa i té ka di asou bagaj syantifik. Mé aprézan, lasyans montré ki Labib-a ka di vré. ‘Moun-yan ké toujou pouvé fè Labib-a konfyans, jòdla é pou tout-tan’ (Psaume 111:8).
3. Poukisa nou pouvé krè sa Labib-a ka di asou sa ki ké rivé ?
Labib-a gen profési * ki ka palé di « bagaj-ya ki pòkò fèt » (Isaïe 46:10). Parèkzanp, bokou bagaj ki rivé annan istwè-a té ja ékri annan Labib-a lontan anvan yé rivé. Labib-a té ja ka bay bokou détay asou kouman monn-an té ké fika jòdla. Annan sa léson-an, nou ké wè déztrwa profési di Labib-a. Lò ou ké wè kouman sa profési-ya réyalizé kou Labib-a ka di, ou ké rété èstébékwé !
ANNOU FOUYÉ ANNAN LABIB-A
Annou wè kouman Labib-a ka maché ansanm ké lasyans é annou palé asou déztrwa gran profési ki annan l’.
4. Labib-a ka maché ansanm ké lasyans
Annan tan-lontan, bokou moun té ka pansé ki latè-a té pozé asou roun bagaj. Gadé VIDÉYO-a.
Annou gadé sa liv Job té ka di i gen 3500 lannen. Li Job 26:7 épi kozé asou sa késyon-an :
-
Poukisa nou pouvé èstébékwé lò Labib-a ka di ki latè-a ka ‘rété pandriyé san i pa tchenbé asou anyen’ ?
I gen sèlman 200 lannen di sa ki syantifik-ya byen konprann chimen dlo-a ka fè pou viré koté i soti-a. Mé, gadé sa Labib-a té ja ka di i gen milyé lannen di sa. Li Job 36:27, 28 épi kozé asou sa késyon-yan :
-
Poukisa èsplikasyon-an asou chimen dlo-a ka fè pou viré koté i soti-a bèl toubonnman ?
-
Ès vèrsé-ya ki nou li ka fè ou gen plis konfyans annan Labib-a ?
5. Labib-a palé di lévènman enpòrtan anvan yé rivé
Li Isaïe 44:27–45:2 épi kozé asou sa késyon-an :
-
Ki détay Labib-a té bay 200 lannen anvan, asou kouman yé té ké krazé Babilòn ?
Istwè-a ka byen montré ki Siris, rwa di Pèrs, ké so larmé pran vil Babilòn an 539 anvan Jézi Kris. Yé fè roun kannal pou bésé otèr gran larivyè-a ki té ka protéjé vil-a épi, yé antré annan vil-a san briga pas lapòt-ya té rété gran louvri. Jòdla, pasé 2500 lannen apré, a sèlman roun patché ròch ki ka rété Babilòn. Annou gadé sa Labib-a té ja di.
Li Isaïe 13:19, 20 épi kozé asou sa késyon-an :
-
Kouman sa profési-a fèt ?
Rwin Babilòn, an Irak.
6. Labib-a té ja ka palé di sa nou ka wè jòdla
Labib-a ka di ki nou ka viv « dèrnyé jou-ya » (2 Timothée 3:1). Men sa i di asou sa lépòk-a :
Li Matthieu 24:6, 7 épi kozé asou sa késyon-an :
-
Dapré Labib-a, kisa ki té ké rivé pannan dèrnyé jou-ya ?
Li 2 Timothée 3:1-5 épi kozé asou sa késyon-yan :
-
Kisa Labib-a ka di asou konpòrtman moun-yan pannan dèrnyé jou-ya ?
-
Kilès annan sa konpòrtman-yan ou ka wè moun-yan gen jòdla ?
I GEN MOUN KA DI : « Labib-a a roun liv kont ké bèl ti istwè pou timoun. »
-
Annan ou lidé, kisa ka fè ou plis krè ki sa Labib-a ka di vré ?
SA NOU WÈ
Istwè-a, lasyans-a ké profési-ya ka montré ki nou pouvé krè ki sa Labib-a ka di vré.
Kisa ou anprann
-
Ès istwè-ya ki annan Labib-a vréman rivé ?
-
Ki èkzanp ka montré ki lasyans ka maché ansanm ké Labib-a ?
-
Ès ou ka pansé ki Labib-a pouvé di sa dimen ké poté ? Poukisa ou ka pansé sa ?
SA OU POUVÉ TRAPÉ OSI
Lò Labib-a ka palé di lasyans, ès i ka di bagaj ki pa vré ?
« La science est-elle d’accord avec la Bible ? » (artik jw.org)
Kisa ka montré ki nou ka viv dèrnyè jou-ya ?
« 6 prophéties qui se réalisent sous vos yeux » (La Tour de Garde, 1é mé 2011)
Gadé kouman profési-ya di Labib-a asou Pwisans Grèk-a réyalizé.
Profési biblik-ya idé roun mouché chanjé sa i té ka pansé di Labib-a.
« Pour moi, Dieu n’existait pas » (La Tour de Garde no 5 2017)
^ § 9 Profési-ya, a mésaj ki ka vini di Bondjé é yé ka di sa dimen ké poté.
