LÉSON 06
Kouman lavi-a koumansé ?
Labib-a ka di ki Bondjé « kréyé tout bagaj » (Révélation 4:11). Ès ou ka krè sa ? I gen moun ki pa ka krè ki a Bondjé ki kréyé lavi-a. Si a sa, sa lé di ki lavi-a yenki parèt konsa, pou anyen. Mé si a Bondjé ki fè nou, lavi-a blijé gen roun sans a (gadé nòt-a). Annou wè kisa Labib-a ka di asou kouman lavi-a koumansé. Annou wè osi poukisa nou pouvé krè sa.
1. Kouman linivèr-a koumansé ?
Près tout syantifik-ya dakò pou di ki linivèr-a gen roun koumansman. É a sa Labib-a ka di : « O koumansman, Bondjé kréyé syèl-a ké latè-a » (Genèse 1:1). Mé kouman Bondjé kréyé linivèr-a ? I itilizé so lèspri sen, sa lé di « fòrs Bondjé ka sèrvi pou fè sa i lé », pou fè tousa i gen annan linivèr-a, parèkzanp : galaksi-ya, zétwèl-ya ké planèt-ya (Genèse 1:2).
2. Poukisa Bondjé kréyé latè-a ?
Jéova ‘pa fè latè-a pou anyen, mé i fè l’ pou moun viv asou l’’ (Isaïe 45:18). I fè latè-a pou moun-yan viv byen asou l’ pou tou-tan (li Isaïe 40:28 ; 42:5). Syantifik-ya ka di ki i pa gen dé planèt kou latè-a. A asou latè-a rounso nou ka trapé tousa nou bézwen pou viv.
3. Ki diférans i gen ant moun-yan ké zannimo-ya ?
Jéova fè latè-a, épi i ranpli l’ ké plant é zannimo. Apré sa, ‘Bondjé kréyé wonm-an kou li menm’ (li Genèse 1:27). Poukisa imen-yan diféran di tout ròt bagaj Bondjé kréyé ? Paské Bondjé fè nou kou li menm. Sa lé di ki nou pouvé imité bèl kalité i gen, kou lanmou ké lajistis. Gras a fason i kréyé nou, nou pouvé osi anprann ròt lang, é pran plézi gadé bèl bagaj é kouté lanmizik. É nou pouvé adoré nou Kréyatèr, alòr ki zannimo-ya pa pouvé fè sa.
ANNOU FOUYÉ ANNAN LABIB-A
Annou wè trwa bagaj : (1) kisa ki ka montré ki i gen roun moun ki kréyé lavi-a, (2) poukisa nou pouvé krè sa Labib-a ka di asou kréyasyon-an é (3) kisa bèl kalité-ya imen-yan gen ka anprann nou asou Bondjé.
4. I gen roun moun ki kréyé lavi-a
Moun-yan ka rousouvwè tout lònò-a pou bagaj yé kopyé asou lanatir-a. Mé kilès ki divèt rousouvwè plis lònò : Sa-la ki kréyé ouben sa-la ki kopyé ? Gadé VIDÉYO-a, épi kozé asou sa késyon-an :
-
Kisa imen-yan kopyé asou lanatir-a ?
Roun kaz pa pouvé fèt tousèl, i blijé gen roun moun ki konstrwi l’. Mé kimoun ki pran tan réfléchi é fè bagaj-ya nou ka wè annan lanatir-a ? Li Hébreux 3:4, épi kozé asou sa késyon-yan :
-
Lanatir-a plen ké bagaj ki byen fèt. Atò, kisa annan lanatir-a ka fè ou rété èstébékwé ?
-
Pou ou menm, ès nou pouvé krè ki i gen roun moun ki fè linivèr-a ké tousa ki annan l’ ? Poukisa ou ka pansé sa ?
Ès ou savé sa ?
Asou jw.org, ou pouvé trapé artik ké vidéyo asou sa zafè-a annan parti-ya « Évolution ou conception ? » ké « Points de vue sur l’origine de la vie ».
« Tout kaz gen roun moun ki fè l’, é sa-la ki fè tout bagaj, a Bondjé. »
5. Nou pouvé krè sa Labib-a ka di asou kréyasyon-an
Annan Genèse chapit 1, Labib-a ka èspliké koumansman latè-a ké lavi-a. Ès nou pouvé krè sa Labib-a ka di ? Ouben ès ou ka pansé a jis roun istwè ki pa vré ? Gadé VIDÉYO-a, épi kozé asou sa késyon-yan :
-
Ès Labib-a ka di ki Bondjé pran sis jou pou kréyé latè-a ?
-
Ès ou ka pansé nou pouvé krè sa Labib-a ka di asou kréyasyon-an ? Poukisa ou ka pansé sa ?
Li Genèse 1:1, épi kozé asou sa késyon-an :
-
Syantifik-ya ka di ki linivèr-a gen roun koumansman. Ès sa yé ka di ka alé ké sa ou fin anprann annan Labib-a ?
I gen moun ka doumandé yé kò si Bondjé itilizé lévolisyon-an pou kréyé lavi-a. Li Genèse 1:21, 25, 27, épi kozé asou sa késyon-yan :
-
Ès Labib-a ka di ki Bondjé kréyé roun prémyé bagaj ki vivan, épi i lésé lévolisyon-an fè l’ divini poson, apré sa ròt kalité zannimo jistan yé divini moun ? Ouben ès Labib-a ka di ki Bondjé kréyé tousa ki vivan sélon yé èspès ?
6. Pa gen pyès ròt kréyatir kou imen-yan
Jéova kréyé nou diféran di zannimo-ya. Li Genèse 1:26, épi kozé asou sa késyon-an :
-
A paské Bondjé fè nou kou li menm ki nou pouvé gen lanmou ké lapenn pou ròt-ya. Kisa sa ka anprann nou asou Bondjé ?
I GEN MOUN KA DI : « Sa Labib-a ka di asou kréyasyon-an a manti. »
-
Ès ou dakò ké sa ? Poukisa ?
SA NOU WÈ
Jéova kréyé linivèr-a ké tousa ki vivan.
Kisa ou anprann
-
Kisa Labib-a ka di asou koumansman linivèr-a ?
-
Ès Labib-a ka di ki Bondjé itilizé lévolisyon-an pou fè tousa ki vivan ? Ouben ès a li ki kréyé tout bagaj ?
-
Poukisa i pa gen pyès ròt kréyatir kou imen-yan ?
SA OU POUVÉ TRAPÉ OSI
Gadé kouman lanatir-a ka montré ki i gen roun Kréyatèr.
Gadé kouman roun papa ka èspliké so tigarson sa Labib-a ka di asou kréyasyon-an.
Ès nou pouvé krè annan lévolisyon-an ké sa Labib-a ka di asou kréyasyon-an ?
« Ès Bondjé sèrvi so kò di lévolisyon-an pou fè tousa ki vivan ? » (artik jw.org)
I gen moun ka di ki fosil-ya ké èspéryans syantifik-ya fè ka byen montré ki lévolysyon-an vré. Mé ès a sa ?
a Nòt-a : Annan léson 25-a ou ké anprann plis bagaj asou sa Bondjé lé pou nou.
