LÉSON 17

Ki kalité moun Jézi sa ?

KOUTÈ SA

Lò nou ka anprann tousa Jézi di ké fè asou latè-a, nou ka anprann bèl kalité i gen. Sa ka fè nou vin pi pròch di li é so Papa, Jéova. Ki bèl kalité Jézi gen ? É kouman nou pouvé imité Jézi annan nou lavi ?

1. Poukisa nou pouvé di ki Jézi kou so Papa, Jéova ?

Jézi viv bò d’ so Papa annan syèl-a pannan milyar lannen é i anprann patché bagaj ké li. A pou sa Jézi ka pansé, ka rousanti é ka fè menm bagaj-ya ki so Papa (li Jean 5:19). Pou byen di, Jézi ka imité tèlman byen bèl kalité so Papa gen ki i di : « Moun-an ki wè mo, wè Papa-a osi » (Jean 14:9). Pi ou ké anprann bèl kalité Jézi gen, pi ou ké konnèt Jéova. Parèkzanp, lò nou ka wè kouman Jézi té gen lapenn pou moun-yan sa ka montré kouman Jéova ka gadé pou nou.

2. Kouman Jézi montré i kontan so Papa, Jéova ?

Jézi di : « Pou tout moun savé ki mo kontan Papa-a, sa Papa-a ka di mo fè, a sa mo ka fè » (Jean 14:31). Lò i té asou latè-a, Jézi montré i té kontan so Papa bokou pas i té ka obéyi l’, menm si sa té rèd. Anplis di sa, Jézi té kontan palé di so Papa ké idé ròt moun divini zanmi Bondjé (Jean 14:23).

3. Kouman Jézi montré i kontan moun-yan ?

Labib-a ka di ki Jézi ‘èspésyalman kontan moun-yan’ (Proverbes 8:31). Jézi té janti ké tout moun. I pa té pi janti ké roun moun pasé rounòt moun. Anplis di sa, Jézi té ka toujou ankourajé ròt-ya é i té toujou paré idé yé. Mirak i fè pa té ka montré sèlman so fòrs, mé osi ki i té gen lapenn pou moun-yan (Marc 1:40-42). Sa Jézi té ka di té ka konsolé é té ka bay èspwar pou tout sa-ya ki té gen bon tchò. Jézi asèpté soufri ké mouri paské i kontan moun-yan. Mé i pi kontan sa-ya ki ka obéyi sa i ansényé (li Jean 15:13, 14).

ANNOU FOUYÉ ANNAN LABIB-A

Annou anprann plis bagaj asou bèl kalité Jézi gen. Nou ké wè ki Jézi gen bokou lanmou pou ròt-ya é ki i kontan bay. É nou ké wè kouman nou pouvé imité l’.

4. Jézi kontan so Papa

Èkzanp Jézi ka anprann nou kouman nou pouvé montré ki nou kontan Bondjé. Li Luc 6:12 ké Jean 15:10 ; 17:26. Apré chak vèrsé, kozé asou sa késyon-an :

Kouman nou pouvé imité Jézi é montré ki nou kontan Jéova ?

Jézi té kontan so Papa é i toujou té ka priyè l’.

5. Jézi kontan moun-yan

Jézi té ka gadé plis pou ròt-ya ki pou li menm. Menm si i té las, i té ka itilizé so tan ké so fòrs pou idé moun-yan. Li Marc 6:30-44, épi kozé asou sa késyon-yan :

Kouman Jézi montré i té ka gadé pou ròt-ya ? (gadé vèrsé-ya 31, 34, 41 ké 42).
Poukisa Jézi té lé idé moun-yan ? (gadé vèrsé 34-a).
Nou wè ki Jézi ka imité bèl kalité so Papa gen. Kisa sa ka anprann nou asou Jéova ?
Jézi té ka gadé pou ròt-ya. Kouman nou pouvé fè kou li menm ?

6. Jézi kontan bay

Jézi pa té gen bokou bagaj, mé i té ka partajé sa i té gen ké ròt-ya. I ka di nou fè kou li menm. Li Actes 20:35, épi kozé asou sa késyon-an :

Soulon sa Jézi di, kisa ki ka bay nou tchò kontan ?

Gadé VIDÉYO-a, épi kozé asou sa késyon-an.

VIDÉYO : « Nou gen plis tchò kontan lò nou ka bay » (roun parti) (4:00)

Menm si nou pa gen bokou bagaj, kouman nou pouvé kontan bay ròt-ya ?

Ès ou savé sa ?

Labib-a ka anprann nou priyè Jéova o non di Jézi (li Jean 16:23, 24). Lò nou ka fè sa, nou ka montré ki sa Jézi fè pou nou divini zanmi Jéova, gen valò pou nou.

I GEN MOUN KA DI : « Bondjé pa mélé ké soufrans moun-yan. I gen ròt bagaj pou fè ! »