1 Rongorongo 16:1-43
16 Mangaia are a uota ana Ati te Atua ae koaua ni karinna ao a kaaki i nanon te umwanrianna are e kateia Tawita bwa nnena.+ Ao a kareani karea ni kabuekaki ma karea n raoi* i matan te Atua ae koaua.+
2 Ngke e tia Tawita ni kareani karea ni kabuekaki+ ma karea n raoi,+ ao e kakabwaiaia aomata n aran Iehova.
3 Irarikin anne, e tibwatibwaa naba te kariki ae mronron, uaan te baam ae te tate aika bati aika buabuaaki, ao kureebe aika bati aika buabuaaki aika mwau, nakoia tibun Iteraera ni kabane, nakoia mwaane ma aine n tatabemania nako.
4 Ao e mwiokoiia tabeman mai buakoia tibun Rewi bwa a na beku i matan ana Ati Iehova,+ bwa a na karinea* Iehova ae Atuan Iteraera, a na katituaraoia, ao ni karaoiroia.
5 Bon te mataniwi Ataba,+ ao te kauoman i aana bon Tekaria, ao a katangi bwaai ni katangitang aika iai karaiia ma taian abi+ Ieeiera, Temiramota, Ieiera,+ Matitia, Eriaba, Benaia, Obetaetom, ao Ieeiera. Ao Ataba e katang taian timbara,+
6 ao Benaia ma Iaatiara ake ibonga,* a teimatoa ni katang taiani buu i matan ana ati ni berita te Atua ae koaua.
7 N te bong anne are e moani karioa iai Tawita ana areru* ni katituaraoa Iehova rinanoia Ataba+ ma tarina nako, ae kangai:
8 “Katituaraoa Iehova,+ taboa arana,Kaotii ana mwakuri i buakoia botannaomata!+
9 Anene nakoina, anene n neboia,*+Ao iaiangoi raoi* ana mwakuri ni kabane aika kamimi.+
10 Kamoamoaa taekan arana ae tabu.+
Ao ke a kimwareirei nanoia akana ukoukora Iehova.+
11 Ukera Iehova+ ma korakorana,Ao teimatoa n ukera ubuna.+
12 Uringi mwakuri aika kamimi ake e karaoi,+Ma ana kakai ao ana motikitaeka ake e taekin,
13 Ngkami aika kanoan* Iteraera are ana toro,+Ao ngkami aika tibun Iakoba, ake e rineiia.+
14 Bon Iehova ngaia ae Atuara.+
E buta te aonnaba n ana motikitaeka.+
15 Ururinga ana berita n aki toki,Are ana berita are e karaoia* nakoia rooro aika nga ma nga,+
16 Ae te berita are e karaoia ma Aberaam+Ao ana berita are e taetae n tuea iai nakon Itaaka,+
17 Are e kateia bwa te tua nakon Iakoba,+Ao te berita ae teimaan nakon Iteraera,
18 Ngke e kangai: ‘N na anganiko te aba ae Kanaan,+Bwa tibwangam ae ko na ababa iai.’+
19 Anne ngkoa ngke e karako mwaitimi,Eng, kam rangi ni karako, ao bon ianena ngkami n te aba.+
20 A ririaki man te natannaomata teuana nakon te natannaomata teuana,Ao man te tautaeka n uea teuana nakon te botannaomata teuana.+
21 E aki kariaia te aomata temanna bwa e na karawawataia,+Ma e boaiia ueea ibukia+
22 Ni kangai: ‘Tai ringia au aomata aika kabiraki,Ao tai karaoa ae buakaka nakoia au burabeti.’+
23 Anene nakon Iehova, ngkami kaain te aonnaba ni kabane!
Katanoataa ni katoabong taekan ana kakamaiu!+
24 Tataekina mimitongina i buakoia natannaomata,Ao ana mwakuri aika kamimi i buakoia botannaomata ni kabane.
25 Bwa e kakannato Iehova ao e rangi n tau ni karaoiroaki.
E kamimi ma ni kakamaaku riki nakoia atua ni kabane.+
26 Akea manenaia atua ni kabane aika atuaia botannaomata,+Ma Iehova boni ngaia ae e karaoa karawa.+
27 A mena i matana te karineaki ma te mimitong,+Ao te korakora ma te kimwareirei n ana tabo ni maeka.+
28 Angan Iehova te bae riai n anganaki ngkami aika aia utu botannaomata,Angan Iehova te bae riai n anganaki ibukini mimitongina ma korakorana.+
29 Neboa Iehova ibukin arana,+Uota te bwaintituaraoi ao rinnako i matana.+
Bobaraaki nakon* Iehova ni kunnikai aika katamaroaaki aika tabu.*+
30 Kam na rurubenebene i matana, ngkami kaain te aonnaba ni kabane!
E kateaki ni kamatoaaki te aonnaba,* ao e aki kona ni kaingingaki.*+
31 Ke e kakatonga karawa, ao ke e kimwareirei te aonnaba,+Tataekina ae kangai i buakoia natannaomata: ‘E a tia n riki Iehova bwa te Uea!’+
32 Ke e rurunga taari ma kanoana ni kabane,Ke a kakatonga taian tawaana ma bwaai nako ake iai.
33 Ke a takarua ni kimwareirei n te tai naba anne aroka ake n te buakonikai, i matan Iehova,Bwa e a nakomai* bwa e na motika taekan te aonnaba.
34 Katituaraoa Iehova bwa e raoiroi,+E teimatoa n aki toki ana tangira ae koaua.*+
35 Ao kangai, ‘Kamaiuira ngkoe ae te Atua ae ara tia kamaiu,+Ikotiira ao kamaiuira mai buakoia natannaomataBwa ti aonga ni karaoiroa aram ae tabu,+Ao ni kakatonga ni karaoiroiko.*+
36 Ke e karaoiroaki Iehova ae Atuan Iteraera,N aki totoki.’”*
Ao a taku aomata ni kabane, “Amen!”* ao a karaoiroa Iehova.
37 Ao Tawita e katuka ikekei Ataba+ ma tarina nako i matan ana ati ni berita Iehova bwa a na beku n taai nako i matan te Ati,+ ni kaineti ma aroni baireana ni katoabong.+
38 E katuka naba Obetaetom ma tarina aika 68 mwaitiia, ao e rinea Obetaetom are natin Ierutun ao Otia bwa taan teiakina mataroan te oo.
39 Ao a mena i matan ana umwanrianna ae tabu* Iehova n te tabo ae rietata i Kibeon,+ Tatoka+ are te ibonga ma raona n ibonga,
40 bwa a na anganga taiani karea ni kabuekaki nakon Iehova i aoni baonikarean te karea ni kabuekaki, n te ingabong ao n te tairiki, ao a na karaoi bwaai ni kabane ake a koreaki n ana Tua Iehova ake e tua nakoia tibun Iteraera.+
41 Raoia bon Eman ao Ierutun+ ao nikiraia mwaane ake a rineaki, ake a kaotaki araia bwa a na katituaraoa Iehova+ ibukina bwa “e teimatoa n aki toki ana tangira ae koaua.*”+
42 Raoia bon Eman+ ao Ierutun bwa a na katang taiani buu ma timbara ao bwaai ni katangitang ake a kabonganaaki ibukin neboan* te Atua ae koaua, ao a mena natin Ierutun+ ni mataroan te oo.
43 Ao a a bane n nako aomata nakoni mwengaia, ao e nako Tawita ni kakabwaiaia kaaini batana.
Taiani Kabwarabwara Mai Nano
^ Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
^ Ebera, “uringa.”
^ Nora Nanon Taeka.
^ Ke, “angabwai.”
^ Ke, “katangitang nakoina.”
^ Ke tao, “tataekin.”
^ Ebera, “ana kariki.”
^ Ebera, “te taeka are e tua.”
^ Ke, “Taromauria.”
^ Ke tao, “ibukin tamaroan tabuna.”
^ Ke, “te aba ae maiureirei.”
^ Ke, “n ioioaki; ni kamwaeieieaki.”
^ Ke, “e a roko.”
^ Ke, “tangira ae kona n onimakinaki.”
^ Ke, “kakatonga ni karaoiroam.”
^ Ke, “Mangkoangkoa ni karokoa n aki totoki.”
^ Ke, “Ngaia anne!”
^ Nora Nanon Taeka.
^ Ke, “tangira ae kona n onimakinaki.”
^ Ke, “bwaai ni katangitang ibukin anenean.”
