2 I-Korinto 4:1-18
4 Mangaia ae ti aki kabwarai nanora iai, kioina ngkai ti nanoangaaki n anganaki te mwakuri ni minita aei.
2 Ma ti a tia ni kakeai mwakuri ni karaba aika karaoaki aika kamaamaa, n aki nakonako ni kamwamwane, ke ni betana ana taeka te Atua,+ ma ti kaotiota te koaua ao ti a riki bwa te katoto ae raoiroi nakoni mataniwin nanoia aomata nako, i matan te Atua.+
3 Ngkana e rabunaki te rongorongo are ti tataekinna, kaanga n te rabuna ni mata, ao e rabunaki i buakoia te koraki ake a tabe ni mauna,
4 ake te koraki ake a aki onimaki+ ake e kamataki nanoia atuan te waaki ae ngkai i aon te aba,*+ bwa e aonga n aki oti i aoia ootan+ te rongorongo ae raoiroi ae mimitong ae taekan te Kristo, are katotongan te Atua.+
5 Bwa ti aki uarongorongoa taekara ma ti uarongorongoa taekan Iesu Kristo ae te Uea, ao ti taekinira bwa ami toro ngaira ibukin Iesu.
6 Bwa bon te Atua ae kangai: “Ke e ootanako te oota man te rotongitong,”+ ao e kaotai nanora bwa a aonga n oota+ n te atatai ae mimitong ibukin te Atua rinanon ubuni Kristo.
7 Ma iai iroura te bwai ae kakawaki+ i nanoni mwangko aika taano,*+ bwa e aonga n ataaki bwa ti karekea te korakora ae riaoni korakoraia aomata, ae te korakora ae nako mairoun te Atua ao tiaki mairoura.+
8 Ti taotaonaki n rawawata nako, ma ti aki karibwaaki n akea ara anga ni kakammwakuri. Ti babanga arora, ma tiaki n ae akea te kawai ni birinako mai iai.*+
9 Ti bwainikirinaki, ma tiaki n ae ti katukaki+ n aki buokaki, ti kabwakaaki, ma ti aki kamaunaaki.+
10 Ti aki toki n uouotii rawawata aika kamamate n rabwatara, n aron are e karawawataaki naba iai Iesu,+ bwa e aonga ni kaotiotaki naba maiun Iesu n rabwatara.
11 Bwa ngaira aika ti maiu, ti aki toki ni kaaitara ma te mate+ ibukin Iesu, bwa e aonga ni kaotiotaki naba maiun Iesu n rabwatara ae mamate.
12 Mangaia ae e mwamwakuri te mate i nanora, ma te maiu i nanomi.
13 Kioina ngkai tii te arona te nano n onimaki ae iroura ma are e koreaki ni kangai: “I onimaki, mangaia ae I taetae,”+ ti onimaki naba ngaira, mangaia ae ti taetae,
14 ngkai ti ataa Teuare kauta Iesu bwa e na kautiira naba ma Iesu, ao e na uaia n uotira ma ngkami nako matan Iesu.+
15 Bwa a riki baikai ni kabane ibukimi bwa e aonga ni kabatiaaki riki te akoi ae rianako are kamwaitaki ngkoa, ibukina bwa a mwaiti aomata aika katituaraoa te Atua, ao e neboaki te Atua iai.+
16 Mangaia ae e aki bwara nanora, bwa e ngae ngke e a tabe ni mamaara rabwatara, ma e a tabe ni kakorakoraaki riki nanora n te bong teuana ma teuana.
17 Bwa e ngae ngkai e kai toki te rawawata* ao e bebete, ma e karekea nakoira te mimitong ae ririkirake ni korakora, ae teimatoa n aki toki,+
18 ngkai ti teimatoa n tatarai baika aki nonoraki ao tiaki baika nonoraki.+ Bwa a kai toki baika nonoraki, ma a teimatoa n aki toki baika aki nonoraki.
Taiani Kabwarabwara Mai Nano
^ Ke, “te tai aei.” Nora Nanon Taeka, “Waaki ae ngkai.”
^ Ke, “i nanoni kaatibu aika karaoaki man te bokaboka.”
^ Ke tao, “ti aki katukaki ma te bwarannano.”
^ Ke, “te kataaki.”
