2 Rongorongo 25:1-28
25 Bon 25 ana ririki Amatia ngke e riki bwa te uea, ao e tautaeka i Ierutarem i nanon 29 te ririki. Aran tinana Ioaatan are kaain Ierutarem.+
2 E teimatoa ni karaoa ae eti i matan Iehova, ma tiaki ma te nano ae tabwanin raoi.
3 N te tai are e a boni matoa raoi iai te tautaeka n uea i aana, ao e a kamateia naba ana toro ake a kamatea tamana are te uea.+
4 Ma e aki kamateia natiia, bwa e karaoa ae kaineti ma are koreaki n te Tua, n ana boki Mote, are e tua ni kangai iai Iehova: “A aki riai ni mate taama ibukia natiia, ao a aki riai ni mate naati ibukia tamaia, ma e riai ni mate temanna ma temanna ibukin oin ana bure.”+
5 Ao Amatia e ikotiia kaain Iuta ao e kateiia ni kaineti ma aia koraki mairoun tamaia, i aaia mataniwi i aoia kaka teuana tenga ao mataniwi i aoia kaka tebubua ibukia kaain Iuta ni kabane ma Beniamin.+ E korei araia ni moa mairouia ake kaka 20 aia ririki ni waerake+ bwa a na kaaina te taanga ni buaka, ao e noria bwa iai 300,000 mwaitiia taani buaka aika a a tia ni kataneiaaki* aika rabakau ni kabongana te kainiwai ma te otanga ae bubura.
6 Irarikina, e kabooia taani buaka aika korakora aika 100,000 mai Iteraera n 100 te tarena n tirewa.*
7 Ma e roko irouna ana aomata te Atua ae koaua, ao e kangai: “Te uea, tai kariaia ana taanga ni buaka Iteraera bwa e na airi ma ngkoe, bwa e a aki mena Iehova irouia tibun Iteraera,+ e a aki mena irouia kaain Eberaim.
8 Ma bon naako ngkoe, waaki, ao ko na ninikoria n te buaka. Bwa e kaawa ni kabwakako te Atua ae koaua imwaia aiam, bwa iai mwaakan te Atua n ibuobuoki+ ao ni kabwakaa te aba.”
9 Ao e taku Amatia nakon ana aomata te Atua ae koaua: “Ma tera aron 100 te tarena are I a tia n anga nakoia ana taanga ni buaka Iteraera?” E kaeka ni kangai ana aomata te Atua ae koaua: “E kona Iehova n anganiko ae bati riki nakon anne.”+
10 Mangaia are e kaokiia kaain te taanga ni buaka Amatia ake a roko irouna mai Eberaim, ni kanakoia nakon aia tabo. Ma a a rangi n un naakai irouia kaain Iuta, ai ngaia are a a okira aia tabo ma te un ae korakora.
11 Ao e ninikoria Amatia ao e kairiia ake boni kaain ana taanga ni buaka nakon te Mwarua ae Taari,+ ao e kamateia 10,000 rorobuakan Teira.+
12 Ao mwaane aika tibun Iuta a tauia 10,000 aika maiu. Ao a kairiia nakon te katati ao a karenakoia nako naano man te katati, ao a a bane ni maeinikun rabwataia.
13 Ma kaain te taanga ni buaka ake e kaokiianako Amatia man irakina nakon te buaka,+ a nini kaawan Iuta mai Tamaria+ ni karokoa Betaoron,+ ao a kamateia 3,000 mai buakoia ao a anai bwaai ni kuri aika bati.
14 Ma ngke e a oki Amatia ni kamateia I-Etom, ao e uotii atuaia rorobuakan Teira ao e kateiia bwa atuana,+ ao e a bobaraaki i mataia ao e kabueki karea nakoia ni kabubui.
15 Ngaia are e a rangi n un Iehova iroun Amatia, ao e kanakoa te burabeti ao e taku teuaei nakoina: “E aera ngkai ko a kakairi irouia atuaia aomata aika aki kona ni kamaiuia oin aia aomata mai nanoni baim?”+
16 Ngke e taetae nakoina ao e a taku naba te uea: “Ti rineiko bwa te tia anga te taeka n reirei nakon te uea?+ Katokia!+ E aera ngkai a na oreiko?” Mangaia are e a toki naba te burabeti arei ma e reitia ni kangai: “I ataia bwa e iangoia te Atua bwa e na kamaunako, ibukina bwa ko karaoa aei, ao ko aki ongo n au taeka n reirei.”+
17 Imwin ana kaai ni maroro ma naake taan anga te taeka n reirei nakoina, ao e a kanakotaeka Amatia ae Uean Iuta nakon Ioati are natin Ieoaatia are natin Ieu are uean Iteraera, ao e kangai: “Nakomai bwa ti na aitara ni boo ni buaka.”*+
18 E kanakoa te rongorongo Ioati are Uean Iteraera nakon Amatia are Uean Iuta, ae kangai: “E kanakotaeka te uteute ae kateketeke i Rebanon nakon te kai ae te tiira i Rebanon, ni kangai, ‘Aanga natim te aine nakon natiu te mwaane bwa buuna.’ Ma e rikekei te man ae tiritiri temanna mai Rebanon ao e toutoua te uteute are kateketeke.
19 Ao ko taku, ‘Noria! I* orea Etom+ ni kabwakaa.’ Ai ngaia ae e a kainikatonga iai nanom bwa ko kani kamoamoaaki. Ma ko na tiku ngkai n oin am auti.* E aera ngkai ko na kauekea te kabuanibwai ao ni bwaka, ni kabwakaa Iuta ma ngkoe?”
20 Ma e aki kan ongo Amatia,+ bwa e roko aei mairoun te Atua ae koaua bwa e na anga ngaiia nako nanoni baia aiaia,+ ibukina bwa a iriia atuaia I-Etom.+
21 Mangaia are e a waerake Ioati are Uean Iteraera, ao e aitara ni boo ni buaka ma Amatia are Uean Iuta i Betatemeti,+ are kaawan Iuta.
22 A konaaki kaain Iuta irouia kaain Iteraera, ngaia are e a birinako temanna ma temanna nakoni mwengana.*
23 Ao Ioati are Uean Iteraera e taua Amatia are Uean Iuta, are natin Ioati are natin Ieoaatia,* i Betatemeti. Imwina ao e kairia nako Ierutarem, ao e kabwangabwangaa oon Ierutarem man te Mataroa ae Eberaim+ nakon te Mataroa ae te Maninganinga,+ 400 te mwanokunibai.*
24 Ao e anai koora ni kabane ma tirewa ao bwaai ni kabane ake a reke n ana auti te Atua ae koaua ma* Obetaetom, ao ni nneni baika kakawaki ake n ana auti* te uea,+ n ikotaki ma taenikai. Imwina ao e a okira Tamaria.
25 Ao Amatia+ are natin Ioati are uean Iuta, e maiu i nanon 15 riki te ririki imwini maten Ioati+ are natin Ieoaatia are uean Iteraera.+
26 Ni kaineti ngkanne ma nikiran rongorongon Amatia, mai moana ni karokoa tokina, noria! tiaki a koreaki n aia Boki Uean Iuta ma Uean Iteraera?
27 Man te tai are e a rairakinako iai Amatia man irirakin Iehova, ao a kauekea te karitei+ n ekaanako teuaei i Ierutarem, ao e birinako teuaei nako Rakiti, ma a kanakoia mwaane n rimwina nako Rakiti ao a kamatea ikekei.
28 Mangaia are a uotia rikaaki i aoia aoti ao a kaiia i rarikia ana bakatibu n te kaawa ae Iuta.
Taiani Kabwarabwara Mai Nano
^ Ebera, “rineaki.”
^ Ke, “itaramata.”
^ Ebera, “Ko.”
^ Ke, “baareti.”
^ Ebera, “ana umwanrianna.”
^ E aranaki naba bwa Aatia.
^ Ke, “ake i aan ana tararua.”
^ Ke, “baareti.”
