2 Rongorongo 36:1-23
36 Ao kaain te aba a kaira Ieoaatia+ are natin Iotia ao a kaueaa n onea mwin tamana i Ierutarem.+
2 Bon 23 ana ririki Ieoaatia ngke e riki bwa te uea, ao e tautaeka i Ierutarem i nanon tenua namwakaina.
3 Ma e kabwakaa teuaei man nakoana uean Aikubita i Ierutarem, ao e katuuaaea aon te aba n 100 te tarena* n tirewa ao teuana te tarena ni koora.+
4 Irarikin anne, ao uean Aikubita e kaueaa tarin Ieoaatia are Eriakim i aon Iuta ao i Ierutarem ao e bita aran teuaei nakon Ieoiakim, ma Neko+ e anaa tarina are Ieoaatia, ao e kairia nako Aikubita.+
5 Bon 25 ana ririki Ieoiakim+ ngke e riki bwa te uea, ao e tautaeka i Ierutarem i nanon 11 te ririki. E teimatoa ni karaoa ae buakaka i matan Iehova ae Atuana.+
6 Ao e roko Nebukaneta+ are Ueani Baburon n ekianako, bwa e na kabaea ni bwaai ni kabaewae aika uaai aika taiani buraati, bwa e na kairia nako Baburon.+
7 Ao e anai Nebukaneta tabeua bwain ana auti Iehova nako Baburon, ao e kaaki n ana baareti i Baburon.+
8 Ni kaineti ngkanne ma nikiran rongorongon Ieoiakim ma bwaai ni kabane ake a riribaaki ake e karaoi, ao rongorongo aika bubuaka ake a taekinaki ibukina, a koreaki n aia Boki Uean Iteraera ma Uean Iuta, ao e a riki natina are Ieoiakin bwa te uea n onea mwina.+
9 Bon 18 ana ririki Ieoiakin+ ngke e riki bwa te uea, ao e tautaeka i Ierutarem i nanon tenua namwakaina ao tebwina te bong. Ao e teimatoa ni karaoa ae buakaka i matan Iehova.+
10 Ni moan te ririki* ao e kanaanako te Uea ae Nebukaneta bwa e na kairaki teuaei nako Baburon,+ n ikotaki naba ma bwaai aika kakawaki ake n ana auti Iehova.+ Ao e kaueaa Tetekia are tarin taman teuaei i aon Iuta ao Ierutarem.+
11 Bon 21 ana ririki Tetekia+ ngke e riki bwa te uea, ao e tautaeka i Ierutarem i nanon 11 te ririki.+
12 E teimatoa ni karaoa ae buakaka teuaei i matan Iehova ae Atuana. E aki roko n te kananorinanoa i matan te burabeti ae Ieremia+ are taetae bwa e tua Iehova nakoina.
13 E karitei naba nakon te Uea ae Nebukaneta,+ are e kairia bwa e na taetae n tuea iroun te Atua, ao e teimatoa n imanono* ao ni matoatoa nanona ao n rawa n rairaki nakon Iehova ae Atuan Iteraera.
14 A bane mataniwi n ibonga* ao aomata ni kabatiaa te aki kakaonimaki, ni kakaraoan aia bwai nako aika riribaaki natannaomata, ao a kamwaraea ana auti Iehova,+ are e a tia ni katabua i Ierutarem.
15 E teimatoa Iehova ae Atuaia aia bakatibu n okioki n anga te kauring nakoia rinanoia ana tia uataeka, ibukina bwa e nanoangaiia ana aomata ma ana tabo ni maeka.
16 Ma a teimatoa ni bwainingareiia ana tia uataeka te Atua ae koaua,+ ao a ribai ana taeka+ ao a kakanikoia ana burabeti,+ ni karokoa ae e a roko unin Iehova ae korakora n ekiianako ana aomata,+ ni karokoa ae a aikoa kona ni manga kamaiuaki.
17 Mangaia are e kaira aia uea I-Kareria+ bwa e na ekiianako naakai, are e a kamateia aia rorobuaka n ataei n te kabaang+ n te auti are n aia tabo ae tabu.+ E aki nanoangaiia rorobuaka n ataei ke aine aika tuai ni boo ma mwaane, kaara ke mwauku.+ E anga bwaai ni kabane te Atua nako nanoni baina.+
18 Ao bwaai ni kabane ake n ana auti te Atua ae koaua, aika abwabwaki ma aika uarereke n ikotaki naba ma baika kakawaki ake n ana auti Iehova, ao baika kakawaki ake n ana auti te uea ma ana aomata ake tooka, e uotii bwaai ni kabane nako Baburon.+
19 E kabueka ana auti te Atua ae koaua,+ e kabwakaa oon Ierutarem,+ e kabueki tauana aika nonoaki ni kabane n te ai, ao e kamaunai bwaai nako aika kakawaki.+
20 E kairiianako taenikai nako Baburon ake te koraki ake a rawei maiuia man te kabaang,+ ao a a riki bwa ana toro+ ao aia toro natina mwaane ni karokoa rokon te tautaeka n uea* ni Botia,+
21 bwa e na kakororaoaki ana taeka Iehova are e taekinna Ieremia,+ ni karokoa ae e kabooi mwin ana taabati+ aon te aba. Ni kabane boong ake e kamaroaeaki iai ao e kawakina ana taabati, ni kakororaoa 70 te ririki.+
22 N ana moan ririki n tautaeka Tairati+ are Ueani Botia, ao Iehova e a kauekea nanon Tairati are Ueani Botia bwa e aonga ni kakororaoaki ana taeka Iehova are e taekinna Ieremia,+ bwa e na katanoataa rinanon ana aono are e tautaekanna, are e koreia naba,+ ni kangai:
23 “E kangai ana taeka Tairati are Ueani Botia, ‘E a tia Iehova ae Atuani karawa n anganai taian tautaeka n uea ni kabane n te aonnaba,+ ao e mwiokoai bwa N na katea ana auti i Ierutarem, are i Iuta.+ Ngkana iai ana aomata i buakomi ni kabane, ao ke e memena Iehova ae Atuana irouna, ao ke e nako Ierutarem.’”+
Taiani Kabwarabwara Mai Nano
^ Tao n tain te abue.
^ Ebera, “e kamatoaa roroana.”
^ Nora Nanon Taeka, “Mataniwi n ibonga.”
^ Ke, “te utu n uea.”
