Etekiera 19:1-14
-
Te anene ae kananokawaki ibukia mataniwin Iteraera (1-14)
19 “Ko riai n anenea te anene ae kananokawaki* ni kaineti ma aia mataniwi nako tibun Iteraera,
2 ao kangai,‘Aekakira tinam? Te raian aine i buakoia raian.
E wene i buakoia raian aika ataei aika korakora ao e kaikawaiia bunna.
3 E kaikawaa temanna i buakoia bunna, ao e a riki bwa te raian ae ataei ae korakora.+
E a rabakau aron raebitiani konana,Ao e kaakang aomata naba.
4 A ongo taekana natannaomata ao a kamwanea n aia mwarua,Ao a karini matau i bwairina ao a uotia nakon te aba ae Aikubita.+
5 E tataninga tinana ao n tokina e a ataia bwa e a aki oki natina.
Mangaia are e a manga anaa riki bunna temanna ao e kanakoa bwa te raian ae ataei ae korakora.
6 E a manga ririaki naba i buakoia raian ao e a manga riki naba bwa te raian ae ataei ae korakora.
E a rabakau aron raebitiani konana, ao e kaakang aomata naba.+
7 E kakaaea konana ribuakon aia taua aika nonoaki ao e urui aia kaawa,N te aro are e a on te aba ae kamaroaeaki ni karongoaani bekorarana.+
8 A roko n ekianako natannaomata man aono ake i rarikina ao a kaaki aia karaun i aona,Ao e a mwane n aia mwarua.
9 A katikia ma taiani matau ake a karini i bwairina, ao a karinna ni nneia maan, ao a uotia nakon ueani Baburon.
A kainna ikekei, bwa e aonga n aki manga ongo te aba bwanaana riaoni maungan Iteraera.
10 Tinam kaanga ai aron te kai ae te kureebe+ i nanon raraam,* ae unikaki i rarikin te ran.
E karikiuaa ao e rangi ni mwaiti mwaangana ibukin te ran ae bati.
11 E karikii mwaanga* aika mamatoa, aika tau n riki bwa okoia taan tautaeka.
E a rikirake ma n rangi n abwabwaki riki i buakoni kaai ake tabeua,Ao e otara ibukin abwakina ao ibukini mwaitini baana.
12 Ma e taekaki wakaan neiei n te un ae korakora,+ ao e kabwakaaki i aontano,
Ao e karaia uaana te angimainiku.
A a kounako mwaangana aika mamatoa ao a a rai,+ ao a a bue n te ai.+
13 E a unikaki ngkai n te rereua,N te aba ae akea te ran iai ae mwautakataka.+
14 E rakanako te ai mani mwaangana* ao e kabueki bwebwena ma uaana,Ao ai akea te mwaanga ae matoa ae tiku, ai akea te oko n uea ibukin te tautaeka.+
“‘Anne bon te anene ae kananokawaki, ao e na riki bwa te anene ae kananokawaki.’”
Taiani Kabwarabwara Mai Nano
^ Ke, “anene n tanginiwenei.”
^ Ke tao, “kaanga ai aron te kai ae te kureebe n am nne ni kureebe.”
^ Ke, “oko.”
^ Ke, “okona.”
