Ieremia 1:1-19
1 Aikai ana taeka Ieremia* are natin Irekia, are temanna i buakoia ibonga* i Anatota+ i abani Beniamin.
2 E roko ana taeka Iehova iroun teuaei n ana bong Iotia+ are natin Amon+ are uean Iuta, n ana ka-13 n ririki n tautaeka.
3 E roko naba n ana bong Ieoiakim+ are natin Iotia are uean Iuta, ni karokoa tokin ana ka-11 n ririki n tautaeka Tetekia+ are natin Iotia are uean Iuta, ni karokoa ae e a taenikai Ierutarem n te kanimaua n namwakaina.+
4 Ao e roko ana taeka Iehova irou, ae kangai:
5 “I kinako* imwain ae I kateiraoiko i nanon te biroto,+Ao I katabuko* imwain ae ko bungiaki.*+
I karaoiko bwa te burabeti nakoia natannaomata.”
6 Ma I taku: “Akea ngai te Uea ae Moan te Rietata ae Iehova!
I babanga n taetae+ bwa bon te teei ngai.”*+
7 Ao e taku Iehova nakoiu:
“Tai kangai, ‘Bon te teei ngai.’
Bwa ko riai n nako nakoia te koraki ni kabane ake I kanakoko nakoia,Ao ko riai n taekini bwaai nako ake I tua nakoim.+
8 Tai maakui taraakia,+Bwa ‘I memena iroum bwa N na kamaiuko,’+ bon ana taeka Iehova.”
9 Ao e arora baina Iehova ao e ringa wiu.+ Ao e taku Iehova nakoiu: “I a tia ni karin au taeka i wim.+
10 Noria, I mwiokoiko n te bong aei i aoia natannaomata ao i aoia tautaeka n uea, bwa ko na taetaeki wakaa ao ni kabwakabwaka, ao ko na kakamauna ma n ururu, ao ko na kateitei ma n ununiki.”+
11 E a manga roko naba ana taeka Iehova irou ae kangai: “Tera ae ko noria Ieremia?” Ngaia are I taku: “I nora mwaangan te aroka ae te amon.”*
12 E taku Iehova nakoiu: “E eti am taratara, bwa a bon uti matau ni kaineti ma au taeka bwa N na kakororaoia.”
13 Ao e roko ana taeka Iehova irou n te kauatai, ae kangai: “Tera ae ko noria?” Ngaia are I taku: “I nora te bwaata ni kuuka* ae buroburo,* ao e raranako matana mai meang ni kaitaraa maiaki.”
14 Ao e taku Iehova nakoiu:
“E na otinako te rekenikai mai meangN ekiianako ni kabane kaain te aba.+
15 Bwa ‘I a weteiia utu ni kabane man aia aono tautaeka n uea ake i meang,’ bon ana taeka Iehova,+‘Ao a na roko, ao e na katea ana kaintokanuea temanna ma temannaN taiani kawai n rin ni mataroan oon Ierutarem,+N ekinako oon neiei ni katobibia,Ao n ekinako kaawa ni kabane ake i Iuta.+
16 Ao N na taekin au motikitaeka n ekiianako ibukini buakakaia ni kabane,Ibukina bwa a kitanai,+Ao a kabueki karea ni kabubui nakoia atua riki tabeman,+Ao ni bobaraaki nakon aia mwakuri baia.’+
17 Ma ko riai n tauraoi ni mwakuri,*Ao ko riai n teirake ao n tuangia bwaai nako aika I tua nakoim.
Tai maakunrang irouia,+Bwa I aonga n aki kakamaakuko i mataia.
18 Bwa I karaoiko n te bong aei bwa te kaawa ae nonoaki,Ao te boua ae te biti ao taian oo aika taiani buraati, bwa ko aonga ni kona ni kaitaraa te aba ni kabutaa,+Ni kaaitaraia uean Iuta ma tokana,Ni kaaitaraia ibongana ao kaain te aba.+
19 Ao ane a na boni buakanikoMa a na aki tokanikai i aom,*Bwa ‘I memena iroum,’+ bon ana taeka Iehova, ‘bwa N na kamaiuko.’”
Taiani Kabwarabwara Mai Nano
^ Nora Nanon Taeka.
^ Tao nanona, “Iehova E Karietataa.”
^ Ke, “rineiko.”
^ Ke, “kaokoroko.”
^ Ebera, “imwain ae ko otinako man te biroto.”
^ Ke, “I ataei.”
^ Ebera, “ane e uti.”
^ Ke, “te bwaata ni kuuka ae tangainanako matana.”
^ Ebera, “iriribaki,” ae kaotaki iai te ai ae iribaki i aana.
^ Ebera, “kabaea bebeem.”
^ Ke, “a na aki kataenikaiko.”
