Ieremia 16:1-21
16 E a manga roko naba ana taeka Iehova irou, ae kangai:
2 “Ko na tai karekea buum, ao ko na tai karekeia natim mwaane ma natim aine n te tabo aei.
3 Bwa e kangai ana taeka Iehova ni kaineti ma naati mwaane ao naati aine ake a bungiaki ikai, ao ni kaineti ma tinaia ake a bungia naakai, ao ni kaineti ma tamaia ake a karikiia n te aba aei:
4 ‘A na mate n aoraki aika kamamate,+ ma akea ae e na tanginiweneiia ke ni kaiia. A na riki bwa kaanga nakotaarin te man i aontano.+ A na mate n te kabaang ao n te rongo,+ ao e na riki rabwataia ngkai a a mate bwa kanaia mannikiba ake i annang ao manin te aonnaba.’
5 Bwa e kangai ana taeka Iehova,‘Tai rinnako n te auti are e booaki iai aia baka n amwarake taan tanginiwenei,Ao tai nako n tanginiwenei ke ni kaota am nanoanga.’+
‘Bwa I a tia n uotaanako au rau mairouia aomata aikai,’ bon ana taeka Iehova,‘Ao au tangira ae koaua* ma au nanoanga.+
6 A na kaai ni mate n te aba aei akana kakannato ma akana mangori.
A na aki kaiiaki,Ao akea ae e na tanginiweneiia,Ao akea naba ae e na korokoreia ke ni kamaraa atuna ibukia.*
7 Ao akea ae e na karekei kanaia te koraki aika tanginiwenei aikai,Ni kabebeteia ibukia aia mate,Ao akea naba ae e na angania te mwangko ni kabebetenano,Bwa a na moi ibukini maten tamaia ke tinaia.
8 Ao tai rin n te auti ae booaki iai te baka n amwarake,Bwa ko na tekateka ma ngaiia n amwarake ao ni moi.’
9 “Bwa e kangai ana taeka Iehova ae Atuaia taanga ni buaka,* ae Atuan Iteraera, ‘N na karokoa n tokina ikai n te tabo aei n ami bong ao bon i matami, te bwanaa ni kakatonga ao ni kimwareirei, bwanaan te tia mare te mwaane, ao bwanaan te tia mare te aine.’+
10 “Ngkana ko tuangia aomata aikai taeka aikai ni kabane, ao a na titirakiniko ni kangai, ‘E aera ngkai e a taekini kabuanibwai ni kabane aika korakora aikai Iehova n ekiranako? Tera te kairua ao tera te bure ae ti karaoia nakon Iehova ae Atuara?’+
11 Ao ko riai ni kaekaia ni kangai, ‘“Ibukina bwa a kitanai ami bakatibu,”+ bon ana taeka Iehova, “ao a teimatoa ni kakairi irouia atua riki tabeman ma n toro irouia ao ni bobaraaki nakoia.+ Ma a kitanai, ao a aki kawakina au tua.+
12 Ao kam buakaka riki nakoia ami bakatibu,+ ao kam iririi imanonon nanomi aika bubuaka ngkami n tatabemaningkami nako, n oneani mwin are kam na ongeaba irou.+
13 Mangaia ae N na tewenakoingkami man te aba aei nakon te aba ae kam aki ataia ao a aki ataia naba ami bakatibu,+ ao kam na toro ikanne irouia atua riki tabeman ni ngaina ao ni bong,+ ibukina bwa N na aki akoingkami.”’
14 “‘Ma a a roko boong,’ bon ana taeka Iehova, ‘ike a nang aki iai manga kangai: “Ngkai bon iai Iehova, are e kairiia tibun Iteraera ni kaotinakoia man te aba are Aikubita!”+
15 ma a nang kangai: “Ngkai bon iai Iehova, are e kairiia tibun Iteraera man te aba are i meang ao man aaba ni kabane ake e kamaenakoia nako iai!” ao N na kaokiia nakon abaia, are I angania aia bakatibu.’+
16 ‘Noria, ae I a kanaanako bwa a na weteaki taan akawa aika bati,’ bon ana taeka Iehova,‘Ao a na akawaia naakai.
Imwin anne ao N na kanaanako bwa a na weteaki taani kaeman aika bati,Ao a na kaeiia ma ni karekeia naakai riaoni maunga nako ao tabuki nako,Ao man tabwenan taiani bwaa aika rietata.
17 Bwa a mena matau i aoni bwaai nako ake a karaoi.*
A aki raba mairou,Ao a aki naba raba aia bure mai matau.
18 N na kabwakaa moa te mwaiti ae koro raoi ae bon riai n reke ibukin aia kairua ao aia bure,+Bwa a kamwaraea abau ni bannaia aia bouannanti aika kamwara aika aki maiu,Ao a kaona tibwangau n aia bwai aika riribaaki.’”+
19 Ngkoe ae Iehova ae korakorau ma au nono,Ae nneu ae N na birinako nako iai ni bongin te rawawata,+A na nakoim natannaomata man te aonnaba ni kabutaa,Ao a na kangai: “A boni bwaibwai ara bakatibu ni bouannanti,*Ni baika akea uaaia, ao ni bwaai aika akea manenaia aika akea te kabwaia iai.”+
20 E kona te aomata ni karaoi atuana,Ngkana bon tiaki atua ni koaua?+
21 “Mangaia ae N na kairoroiia bwa a na ataia,Ao n te tai aei N na kairoroiia bwa a na ataa mwaakau ao korakorau,Ao a na ataia bwa bon Iehova arau.”
Taiani Kabwarabwara Mai Nano
^ Ke, “tangira ae kona n onimakinaki.”
^ Aia katei n tanginiwenei beekan ae n taraana a kakaraoaki irouia kaain Iteraera aika tannako man te koaua.
^ Ke, “Tabaota.” Nora Nanon Taeka.
^ Ebera, “i aoni kawaia ni kabane.”
^ Ebera, “n te kewe.”
