Ieremia 27:1-22
27 Ngke e moan tautaeka Ieoiakim are natin Iotia are uean Iuta, ao e roko iroun Ieremia te taeka aei mairoun Iehova:
2 “E kangai te bwai ae e tuangai Iehova, ‘Karaoi am bwai ni kabaebae ao taian amo ao katokai i aon roroam.
3 Ao kanakoi nakon uean Etom,+ ueani Moaba,+ aia uea tibun Ammon,+ uean Turo,+ ao uean Titon,+ ni baia taan uataeka ake a roko i Ierutarem iroun Tetekia are Uean Iuta.
4 Ao ko na angania te tua aei ibukia aia toka:
“‘“E kangai ana taeka Iehova ae Atuaia taanga ni buaka,* ae Atuan Iteraera, kam riai ni kangai nakoia ami toka,
5 ‘Boni ngai ae I karaoa te aonnaba, aomata, ao maan aika i aon te aba, ni mwaakau ae korakora ao ni baiu ae aroraki, ao I angan ane I kan anganna.*+
6 Ao I a anga ngkai aaba aikai ni kabane nako nanoni bain au toro, ae Nebukaneta+ ae Ueani Baburon. I anga naba manin te tawaana aika moaanti nakon teuaei bwa a na toro irouna.
7 A na bane natannaomata n toro iroun teuaei ma natina te mwaane ao tibuna te mwaane, ni karokoa ae e roko tain abana,+ ngkana a a roko natannaomata aika bati ao ueea aika kakannato ni karikia bwa aia toro.’+
8 “‘“‘Ngkana iai te natannaomata teuana ke te tautaeka n uea ae rawa n toro iroun Nebukaneta ae Ueani Baburon, ao e rawa ni kaaki roroana i aan ana amo ueani Baburon, ao N na katuuaaea te natannaomata anne n te kabaang,+ n te rongo, ao n te aoraki ae kamamate,’ bon ana taeka Iehova, ‘ni karokoa ae I katiai aroia ni bain teuaei.’
9 “‘“‘Mangaia ae tai ongo irouia ami burabeti, ami tia kaiwa, ami tia mii, ami tia tabunea, ao ami ibonga, ake a kangai nakoimi: “Kam na bon aki toro iroun ueani Baburon.”
10 Bwa a taetae ni burabetini keewe nakoimi, bwa kam aonga ni kairakinako ni kararoaaki ma abami, ao N na kamaenakoingkami ao kam na mate.
11 “‘“‘Ma te natannaomata ae kaaki roroana i aan ana amo ueani Baburon ao n toro irouna, N na kariaia bwa e na tiku* i abana,’ bon ana taeka Iehova, ‘bwa e na ribanaia ao ni maeka iai.’”’”
12 I taetae naba n aron anne nakon Tetekia+ are Uean Iuta, ni kangai: “Kaaki roroami i aan ana amo ueani Baburon ao tooro irouna ma ana aomata, ao kam na teimatoa ni maiu.+
13 E aera ngkai ko na mate ma am aomata n te kabaang,+ n te rongo,+ ao n te aoraki ae kamamate,+ n aron are e taekinna Iehova ibukin te natannaomata ae e na aki toro iroun ueani Baburon?
14 Tai ongo n aia taeka burabeti ake a kangai nakoimi, ‘Kam na bon aki toro iroun ueani Baburon,’+ ibukina bwa a taetae ni burabetini keewe nakoimi.+
15 “‘Bwa I bon aki kanakoia,’ bon ana taeka Iehova, ‘ma a taetae ni burabetini keewe n arau ao ngkana kam ongo irouia ao N na boni kamaenakoingkami, ao kam na mate, ngkami ma burabeti ake a taetae ni burabeti nakoimi.’”+
16 Ao I taku nakoia ibonga ma aomata aikai ni kabane: “E kangai ana taeka Iehova, ‘Tai ongo n aia taeka burabeti aika taetae ni burabeti nakoimi ni kangai: “Noria! A na uotaki n oki mai Baburon n te tai ae waekoa bwain ana auti Iehova!”+ bwa a taetae ni burabetini keewe nakoimi.+
17 Tai ongo irouia. Tooro iroun ueani Baburon ao kam na teimatoa ni maiu.+ E aera ngkai e na riki te kaawa aei bwa te tabo ae uruaki?
18 Ma ngkana boni burabeti ngaiia, ao ngkana e mena irouia ana taeka Iehova, ao taiaoka ma ke a bubutiia Iehova ae Atuaia taanga ni buaka bwa a na aki uotakinako nako Baburon nikirani bwaai ake n ana auti Iehova, n ana auti* uean Iuta, ao i Ierutarem.’
19 “Bwa e kangai ana taeka Iehova ae Atuaia taanga ni buaka ni kaineti ma taiani boua,+ nnen te ran are buburakaei are arana Taari,*+ kaa n uabwai aika kokokaki,+ ao nikirani bwaai ni mwakuri ake a tiku n te kaawa aei,
20 ake e aki anai Nebukaneta are Ueani Baburon ngke e kairaanako Iekonia are natin Ieoiakim are uean Iuta bwa te taenikai, mai Ierutarem nako Baburon, ngaia ma bwaanuea ni kabane mai Iuta ao Ierutarem,+
21 eng, e kangai ana taeka Iehova ae Atuaia taanga ni buaka ae Atuan Iteraera, ni kaineti ma bwaai ake a tiku n ana auti Iehova, n ana auti* uean Iuta, ao i Ierutarem:
22 ‘“A na kairaki nako Baburon+ ao a na tiku ikekei ni karokoa te bong are I mutiakinia iai,” bon ana taeka Iehova. “Ao N na kairiia n oki ao ni manga kaokiia nakon te tabo aei.”’”+
Taiani Kabwarabwara Mai Nano
^ Ke, “Tabaota.” Nora Nanon Taeka.
^ Ebera, “ane e riai i matau.”
^ Ebera, “motirawa.”
^ Ke, “baareti.”
^ Ae taekan Taari ae te buraati are n te tembora.
^ Ke, “baareti.”
