Ieremia 48:1-47
-
Te taetae ni burabeti n ekaanako Moaba (1-47)
48 E kangai ana taeka Iehova ae Atuaia taanga ni buaka* ae Atuan Iteraera, ibukini Moaba:+
“Ai kananoangara Nebo+ bwa e a kamaunaaki!
E a kamaamaeaki Kiriataim+ ao e a tauaki.
E a kamaamaeaki te tabo ni kamanomano ae mano raoi* ao e a uruakaki.+
2 A aikoa kamoamoaa Moaba.
A bairea i Etiibon+ kabwakaan neiei ni kangai:
‘Kaaraki, ti na karokoa neiei n tokina n arona ae te natannaomata ngaia.’
Ngkoe naba Matemen, ko riai n teimatoa ni kainabwabu,Bwa e a ririmwiko te kabaang.
3 Iai karongoaan te tang mai Oronaim,+Ae karongoaan te kamaunaaki ma te uruaki ae korakora.
4 E a uruaki Moaba.
A a tang n takarua ana koraki n ataei.
5 A teimatoa n tang ngke a waerake ni kawain ararakean Ruita.
Ao a ongo te tangitang n rawawata i nanon te kawai n ruo mai Oronaim ibukin te karawawata.+
6 Birinako, rabanako n rawei maiumi!*
Kam riai n riki bwa te kai ae te mwaiango n te rereua.
7 Ko na tauaki nabaIbukina bwa ko onimakin am mwakuri ma am bwai aika kakawaki,Ao e na irinako Kemoti+ bwa te taenikai,Ngaia ma ana ibonga ao ana aomata aika tooka.
8 E na rin ni kaawa nako te tia kakamauna,Ao akea te kaawa ae e na reke birinakona.+
E na mauna te mwarua,*Ao e na kamaunaaki te aba ae aoraoi,* n aron are e taku Iehova.
9 Katea te kanikina teuana ibukini Moaba,Bwa e na birinako ngkai e a tabe ni bwaka n uruaki,Ao a na riki kaawan neiei bwa te bwai ni kakamaaku,Ao a na akea kaaia.+
10 E na reke kain te aomata ae karaoa ana mwakuri Iehova ma te aki tarabwai!
E na reke kain te aomata ae taua ana kabaang man te katuturaraa!
11 A tuai mani kakiriweaki I-Moaba mangke a roro n rikirake,N aron te wain ae tiku mai kabi.
A tuai mani kabwaroaki mani nneia teuana nakon are teuana,Ao a tuai mani kataenikaiaki.
Anne bukina ae e aki roko n te rikirake kangkangia,Ao e aki naba bitaki boia.
12 “‘Mangaia ae noria! a a roko boong,’ bon ana taeka Iehova, ‘ae N na kanakoia iai mwaane bwa a na karangaia. A na karangaia ao ni kabwaroi ni kabanei kanoani nneia, ao a na ibei aia kaatibu aika bubura ni kamaerikiriki.
13 Ao a na maamaa I-Moaba ibukini Kemoti, n aroia tibun Iteraera ae a maamaa ibukini Betaera, are aia mwioko.+
14 Kam kangaa ni kangai: “Bon taani buaka aika korakora ngaira, ae ti a tauraoi nakon te buaka”?’+
15 ‘E a tia ni kamaunaaki Moaba,A niniaki kaawan neiei,+Ao a kamateaki ana rorobuaka n ataei aika taiani kabanea n tamaroa,’+Bon ana taeka te Uea, ae arana Iehova ae Atuaia taanga ni buaka.+
16 E a kaan roko te kabuanibwai i aoia I-Moaba,Ao e a waekoa n roko bwakaia.+
17 A na kaota nanoangaaia naakai te koraki nako ake a mena i rarikia,Ake te koraki nako ake a atai araia.
Tuangia ni kangai: ‘E a uruaki kangaa te oko ae korakora, ae okon te tamaroa!’
18 Ruuo mani karineamAo tekateka ni bora n taka,* ngkoe ae te nati te aine ae ko maeka i Ribon,+Bwa e a ekikonako te tia kakamauna mai Moaba,Ao e na urui am tabo aika nonoaki.+
19 Teei i rarikin te kawai ao mataku, ngkoe ae kaain Aroera.+
Titirakina te mwaane ae birinako ao te aine ae rabanako ni kangai, ‘Tera ae riki?’
20 E a tia Moaba ni kamaamaeaki ao e taonakinako n te maakunrang.
Tanginiwenei ao takarua n tang.
Katanoataa i Arenon+ ae e a tia ni kamaunaaki Moaba.
21 “E a tia n roko te motikitaeka n te aba ae aoraoi,*+ n ekaanako Oron, Iaati,+ ao Mebaata,+
22 n ekaanako Ribon,+ Nebo,+ Betaribiraiam,
23 n ekaanako Kiriataim,+ Betakamura, ao Betameon,+
24 n ekaanako Keriota+ ao Botira, ao n ekinako kaawan te aba ae Moaba ni kabane, ake a raroa ao ake a kaan.
25 ‘E a tia ni koreaki ni kabwakaaki korakorani* Moaba.
E a mwaoto anganibaina,’ bon ana taeka Iehova.
26 ‘Kakoroa ni manging,+ bwa e a tia ni karietataa i bon irouna n ekaanako Iehova.+
E rabinobino Moaba i buakoni mumutana,Ao bon te bwai ni bwainingareaki ngaia.
27 Tiaki e a riki Iteraera bwa te bwai ni bwainingareaki iroum?+
Te koaua bwa e kuneaki i buakoia taan iraa,Ngaia ae ko riai n ioioa atum ao n taetae n ekianako?
28 Kitani kaawa ao maeka i aon te bwaa ae rietata, ngkami aika kaaini Moaba,Ao kam na riki bwa kaanga te taobe ae karaoa ngaona i rarikin te katati.’”
29 “Ti ongo taekan nanorietani Moaba, e bon rangi ni kainikatonga,Ae taekani karietatana, nanorietana, kainikatongana, ao nanona ae kamoamoa.”+
30 “‘I ataa unna ae korakora,’ bon ana taeka Iehova,‘Ma a na aki koro bukin ana taeka aika akea uaaia.
Akea te bwai ae a na karaoia.
31 Anne bukina ae N na tanginiwenei iai ibukini Moaba,N na tang ibukini Moaba,Ao ni bwaebwaeti ibukia rorobuakani Kirereti.+
32 N na kabatiaa riki tangiu ibukim ngkoe ae te kai ae te kureebe mai Tibema,+Nakon tangiu ibukin Iatera.+
A riaon taari mwaangam aika maiureirei.
A rokoroko i taari ao i Iatera.
E ruo te tia kakamauna+Nakon am uaanikai aika reke n tain te kabuebue ao nakon uaan am kureebe aika taiaki.
33 E kanakoaki te kakatonga ma te kimwareirei man te tabo are a unikaki iai kainnamwarakeAo man te aba are Moaba.+
I a tia ni katoka raangan te wain man te nne ni kamanti kureebe.
Akea ae e na manga toutoui kureebe ma te takarua ni kimwareirei.
Bon iai te takarua ma ai tiaki te takarua ni kimwareirei.’”+
34 “‘Iai te takarua mai Etiibon+ ni karokoa Ereare.+
A kanenei bwanaaia ni karokoa Iaati,+Mai Toa nako Oronaim+ nako Ekeratateritiia.
E na kamaroaeaki naba ranin Nimrim.+
35 N na karokoia n tokia mai Moaba,’ bon ana taeka Iehova,‘Te aomata ae uouota te karea nakon te tabo ae rietataAo te aomata ae angakarea nakon atuana.
36 Anne bukina ae e na bwaebwaeti* iai nanou ibukini Moaba n aroni karongoaan te kaibwabwaa,*+Ao e na bwaebwaeti nanou ibukia rorobuakani Kirereti n aroni karongoaan te kaibwabwaa.*
Bwa e na mauna te kaubwai are e karekea.
37 Bwa a mara atu nako,+Ao a koreaki buai nako.
A mwakoro baai nako,+Ao a mena raerobwa* i aoni bebeeia!’”+
38 “‘Akea riki, ma tii te tanginiweneiI aon taubuki ni kabane i MoabaAo i nanoni maraen nako kaawan neiei.
Bwa I a tia n urua MoabaN aron te kaatibu ae e a karenakoaki,’ bon ana taeka Iehova.
39 ‘Ai maakunrangira kangaa! Tanginiwenei!
E a rairaki kangaa Moaba ma te maamaa!
E a riki Moaba bwa te bwai ni bwainingareaki,Ae te bwai ae kakamaaku nakoia kaain rarikina ni kabane.’”
40 “Bwa e kangai ana taeka Iehova:
‘Noria! E na taakini baina ni kiba i aoni Moaba+N aron te ikare ae baitii n titiku rikaaki.+
41 A na tauaki kaawaAo a na tauaki nonon neiei.
N te bong anne ao e na riki nanoia ana tia buaka MoabaBwa ai aron nanon te aine ae bung.’”
42 “‘Ao e na kamaunaaki Moaba ao e nang aki riki bwa te natannaomata,+Bwa e karietataa n ekaanako Iehova.+
43 A mena imwaim te maakunrang ma te mwarua ao te bwai ni kamwane,Ngkoe ae kaaini Moaba,’ bon ana taeka Iehova.
44 ‘Ane e birinako man te maakunrang ao e na bwaka nako nanon te mwarua,Ao ane e waerake man te mwarua e na mwane n te bwai ni kamwane.’
‘Bwa N na karokoa i aoni Moaba ririkini katuuaaeaia,’ bon ana taeka Iehova.
45 ‘A na tei n akea korakoraia n nuun Etiibon te koraki ake a birinako.
Bwa e na otinako te ai mai EtiibonAo te ura mai nanon Taion.+
E na kabueka ramwani MoabaAo tabwanouia natin nako te karongoa.’+
46 ‘E a reke kaim ngkoe ae Moaba!
A a mate ana aomata Kemoti.+
Bwa a kairakinako natim mwaane bwa taenikai,Ao a irinako natim aine bwa taenikai.+
47 Ma N na ikotiia ana taenikai Moaba ni kabaneani boong,’ bon ana taeka Iehova.
‘E a toki ikai rongorongoni motikan taekani Moaba.’”+
Taiani Kabwarabwara Mai Nano
^ Ke, “te tabo ae rietata ae mano raoi.”
^ Ke, “Tabaota.” Nora Nanon Taeka.
^ Ebera, ne’phesh, nora Nanon Taeka.
^ Ke, “te tabo ae aoraoi ae mena n te mwarua.”
^ Ke, “te aba ae rietata ae aoraoi.”
^ Ke tao, “i aon te tano ae mwau.”
^ Ke, “te aba ae rietata ae aoraoi.”
^ Ebera, “koroni.”
^ Ke, “e na ruru.”
^ Ae taekan te kaibwabwaa ae katangaki ibukin te bwaebwaeti n tain te taunimate.
^ Ae taekan te kaibwabwaa ae katangaki ibukin te bwaebwaeti n tain te taunimate.
^ Nora Nanon Taeka.
