Ieremia 7:1-34
7 Aio te taeka ae roko iroun Ieremia mairoun Iehova, ae kangai:
2 “Teei ni mataroan oon ana auti Iehova ao taekina ikanne te rongorongo aei, ‘Ongora n ana taeka Iehova, ngkami ni kabane aika tibun Iuta, aika kam rinnako ni mataroan te oo aikai bwa kam na bobaraaki nakon Iehova.
3 E kangai ana taeka Iehova ae Atuaia taanga ni buaka,* ae Atuan Iteraera: “Kaetii kawaimi ao aromi, ao N na kariaia bwa kam na teimatoa ni maeka n te tabo aei.+
4 Tai onimakin taeka aika mwamwanaa te aba ao ni kangai, ‘Aio* ana tembora Iehova, ana tembora Iehova, ana tembora Iehova!’+
5 Bwa ngkana kam boni kaetii kawaimi ao aromi, ao ngkana kam boni kateimatoa te kaetitaeka ae riai i marenan te aomata temanna ma te aomata temanna,+
6 ao ngkana kam aki karawawataia aomata aika maeka n iruwa, ataei ake a a tia ni mate aia karo,* ao aine ake a a tia ni mate buuia,+ ao ngkana kam aki katutua raraan te aomata ae akea ana bure n te tabo aei, ao ngkana kam aki kakairi irouia atua riki tabeman ni karuanikaingkami iai,+
7 ao N na kariaia bwa kam na teimatoa ni maeka n te tabo aei, n te aba are I angania ami bakatibu n aki toki.”’”*
8 “Ma kam a onimakin taeka aika mwamwanaa te aba,+ ae bon akea te kakabwaia ae e na reke iai.
9 Te koaua bwa kam kona n iraa,+ n tiritiri, ni wene ni kimoa, n taetae n tuea ni kewe,+ n angakarea* nakoni Baara,+ ao ni kakairi irouia atua aika kam aki kinaia,
10 ao rimwi kam roko n tei i matau n te auti aei ae kaotaki iai arau ao kam kangai, ‘Ti na boni kamaiuaki,’ n aki ongei karaoani baika riribaaki aikai ni kabane iroumi?
11 Iroumi e a tia n riki te auti aei ae kaotaki iai arau bwa bwangaia taani kamwarua?+ Ae I a noria i bon irou,” bon ana taeka Iehova.
12 “‘Mangaia ae naako ngkai nakon au tabo are i Tiro,+ are I moani kamena iai arau,+ ao nora te bwai are I karaoia nako iai ibukini buakakaia au aomata aika tibun Iteraera.+
13 Ma kam teimatoa ni karaoi baikai ni kabane,’ bon ana taeka Iehova, ‘ao e ngae ngke I okioki n taetae* nakoimi, ma kam aki ongo.+ I teimatoa ni weteingkami, ma kam aki kaeka.+
14 Mangaia ae N na karaoa aron are I karaoia nakon Tiro+ nakon te auti ae kaotaki iai arau,+ ae kam onimakinna,+ ao nakon te tabo aei are I anganingkami ma ami bakatibu.
15 N na tewenakoingkami mai matau, n aron are I tewenakoia tarimi ni kabane ake kanoan Eberaim ni kabane.’+
16 “Ni kaineti ngkanne ma ngkoe, tai tataro ibukia te botannaomata aei. Tai tang ke n tataro ke ni bubutiiai ibukia,+ bwa N na bon aki ongo iroum.+
17 Ko aki nori baika a karaoi ni kaawa ake i Iuta ao ni kawai ake i Ierutarem?
18 A tabeaia naati mwaane, ao a kauraa te ai taama, ao a kaboboa te bua ni burawa buuaine bwa a na karaoi karea aika bwerena nakon Ueannaineni Karawa,*+ ao a kabwaroa te karea ae te moi nakoia atua riki tabeman bwa a na kaunai.+
19 ‘Ma te koaua bwa boni ngai ae a kammarakai?’* bon ana taeka Iehova. ‘Tiaki boni ngaiia, ao a kamaamaeaki iai?’+
20 Mangaia ae e kangai ana taeka te Uea ae Moan te Rietata ae Iehova, ‘Noria! E nang kabwaroaki uniu ma marakin nanou i aon te tabo aei,+ i aoia aomata ma maan, i aon arokan nako te tawaana ao uaan aontano. E na ura uniu ao e na aki tiringaki.’+
21 “E kangai ana taeka Iehova ae Atuaia taanga ni buaka, ae Atuan Iteraera, ‘Waaki ao raon ami karea ni kabuekaki aika bwanin ma ami karea riki ake tabeua ao kang irikoia i bon iroumi.+
22 Bwa n te bong are I kairiia iai ami bakatibu ni kaotinakoia man te aba are Aikubita, ao I aki taetae ma ngaiia ke n tua nakoia ni kaineti ma karea ni kabuekaki aika bwanin ao angakarea.+
23 Ma I bon angania te tua ae kangai: “Ongo ni bwanaau, ao N na riki bwa Atuami, ao ngkami kam na riki bwa au aomata.+ Kam riai n nakonako ni kawai ni kabane aika I tua bwa a aonga n nakoraoi bwaai ni kabane ibukimi.”’+
24 Ma a bon aki ongo ke ni katanimai taningaia,+ ma a nakonako n oin aia babaire,* n imanono n iririi oin nanoia aika buakaka+ ao a nakonako ni kekerikaaki ao tiaki ni keerake,
25 man te bong are a otinako iai ami bakatibu man te aba are Aikubita ni karokoa te bong aei.+ Mangaia are I teimatoa ni kanakoia ni kabane nakoimi au toro aika burabeti, ao I okioki ni kanakoia n te bong ae koraki.*+
26 Ma a rawa n ongo irou, ao a aki katanimai taningaia.+ Ma a imanono* ao a karaoa ae buakaka riki nakon are a karaoia aia bakatibu!
27 “Ko na taekin taeka aikai ni kabane nakoia,+ ma a na rawa n ongo iroum, ko na weteiia ma a na aki kaekako.
28 Ao ko na kangai nakoia, ‘Aei te natannaomata ae a aki ongo ni bwanaan Iehova ae Atuaia, ao a rawa ni butimwaea te reirei ni kaetieti. E a mauna te kakaonimaki, ao e a aki naba taekinaki i buakoia.’*+
29 “Korea iram ane aki kokoreaki* ao karenakoa, ao tabeka te anene ae kananokawaki* i aon tabuki aika akea aroka iai, bwa e a tia Iehova n rawa iroun te roro ae kaunna aei, ao e na boni kitania.
30 ‘Bwa a karaoa ae buakaka i matau tibun Iuta,’ bon ana taeka Iehova. ‘A katei aia bouannanti aika koro n ribaaki n te auti ae kaotaki iai arau, bwa a na kamwaraea.+
31 A katei taabo aika rietata i Tobeta, are n ana Mwarua Natin Innom,*+ bwa a na kabuekiia iai natiia mwaane ma aine n te ai,+ ae te bwai ae I aki tua ao e aki naba rin i nanou.’*+
32 “‘Mangaia ae noria! a a roko boong,’ bon ana taeka Iehova, ‘are e nang aki iai aranaki bwa Tobeta ke ana Mwarua Natin Innom,* ma e nang aranaki bwa te Mwarua ni Kamamate. A na taunia maate i Tobeta ni karokoa ae e a ribwa.+
33 Ao a na riki rabwataia aomata aika mate aikai bwa kanaia mannikiba ake i annang ao manin te aonnaba, ao akea temanna ae e na kakamaakuia ni kanakoia.+
34 N na karokoa n tokina te bwanaa ni kakatonga ao te bwanaa ni kimwareirei, bwanaan te tia mare te mwaane ao bwanaan te tia mare te aine,+ ni kaawa ake i Iuta ao ni kawai ake i Ierutarem, bwa e na urubekebeke te aba.’”+
Taiani Kabwarabwara Mai Nano
^ Ke, “Tabaota.” Nora Nanon Taeka.
^ Ebera, “Aikai,” e kaineti nakoni kateitei ni kabane n te tembora.
^ Ke, “ataei aika akea tamaia.”
^ Ke, “n aki totoki.”
^ Ke, “ni kabueki karea ni kabubui.”
^ Ebera, “utimwaaka n taetae.”
^ Nakoan te atua ae te aine ae taromauriaki irouia tibun Iteraera ake a tannako man te taromauri ae koaua, ae e iangoaki bwa atuan te kakariki.
^ Ke, “kaunai.”
^ Ke, “taeka n reirei.”
^ Ebera, “utimwaaka n te bong ae koraki ni kanakoia.”
^ Ebera, “a kamatoatoai roroaia.”
^ Ebera, “e koreakinako mai wia.”
^ Ke, “ane katabuaki.”
^ Ke, “te anene n tanginiwenei.”
^ Nora Nanon Taeka, “Keenna.”
^ Ke, “tuai man reke n au iango.”
^ Nora Nanon Taeka, “Keenna.”
