Iobi 42:1-17
42 E kaeka ngkanne Iobi ni kangai nakon Iehova:
2 “I a ataia ngkai bwa ko boni kona ni karaoi bwaai ni kabane,Ao akea te bae ko iangoa karaoana ae e na aki konaaki iroum.+
3 Ko taku, ‘Antai teuaei ae kamaabubua au babaire n aki atatai?’+
Mangaia are I taetae, ma akea otauNi bwaai aika rangi ni kamimi irou, aika I aki atai.+
4 Ko taku, ‘Taiaoka ongora irou, ao N na taetae.
N na titirakiniko, ao ko na tuangai.’+
5 A a tia taningau n ongo taekam,Ma ngkai I a noriko ni matau.
6 Anne bukina ae I a kakeai iai baike I taekin,*+Ao I raira nanou i buakon te tano ma te mannang.”+
7 Ngke e a tia Iehova n taetae nakon Iobi, ao e a taku Iehova nakon Eribati are te I-Teman:
“E a urarake uniu nakoim ma raom akana uoman,+ bwa kam aki taekina te koaua ibukiu,+ n aron are e karaoia au toro ae Iobi.
8 Mangaia ae kairiia kaao mwaane aika itiman ao tiibu mwaane aika itiman ao naako nakon au toro ae Iobi, ao kam na anga te karea ni kabuekaki ibukimi. Ao e na tataro ibukimi au toro ae Iobi.+ N na boni butimwaea ana bubutii* bwa N na aki katuuaaeingkami ibukin aromi n nanobaba, bwa kam aki taekina te koaua ibukiu n aron are e karaoia au toro ae Iobi.”
9 Ngaia are a a nako Eribati are te I-Teman, Biretata are tibun Tuua, ao Toba are te I-Naama,* ao a karaoa are e tuangia Iehova bwa a na karaoia. Ao Iehova e butimwaea ana tataro Iobi.
10 Ngke e a tia Iobi n tataro ibukia raona,+ ao Iehova e a katoka rawawatan Iobi+ ao ni kaoka toronibwaina.* E anganna Iehova baike iai ngkoa irouna ma e a kauouai mwaitiia.+
11 A a bane n roko irouna tarina ma mwaanena ao raoraona nako ngkoa,+ ao n amwarake ma ngaia n ana auti. A kaota nanoangaana ao ni kabebetea nanona ni kabuanibwai ni kabane ake e aki totokoi rikia Iehova nakoina. Ao a anganna te mwane ao te mwamwa ae te koora, ngaiia n tatabemania nako.
12 Ao Iehova e kakabwaiai ririki ake ni kabaneani maiun Iobi nakon ake rimoa,+ ao a a reke iroun Iobi tiibu aika 14,000, kamero aika 6,000, kaao aika 2,000, ao taongki aika aine aika 1,000.+
13 A reke naba natina mwaane aika itiman riki ao natina aine aika teniman riki.+
14 E arana ana karimoa ae te aine bwa Iemima, te kauoman bwa Ketia, ao te kateniman bwa Kirenabuka.
15 Akea aine aika baaraoi riki nakoia natin Iobi aine i aon te aba ni kabutaa, ao e angania tibwangaia tamaia i rarikia mwaaneia.
16 Imwin anne ao e maiu Iobi i nanon 140 te ririki, ao e noriia natina ma tibuna ake te kaaroro.
17 N tokina ao e a mate Iobi imwini maiuna ae abwabwaki, ao e rauaki ni maiuna.*
Taiani Kabwarabwara Mai Nano
^ Ke, “kaoka au taeka.”
^ Ebera, “N na bon tabeka ubuna.”
^ Ke, “tibun Naama.”
^ Ebera, “Iehova e rairaanako kataenikaian Iobi.”
^ Ebera, “ngke e a kara ao a a bati ana bong.”
