Itaia 13:1-22
13 E kangai te taeka n ekaanako Baburon+ are e noria n te miitara Itaia+ are natin Amoti:
2 “Katea te kanikina*+ i aon te maunga ae akea aroka iai.
Takarua nakoia ao kateitea baim,Bwa a aonga n rinnako n aia mataroa bwaanuea.
3 I a tia ni kanakoa te tua nakoia te koraki ake I mwiokoiia.*+
I a tia ni weteiia au tia buaka aika a na kaota uniu,Aika au aomata aika kamoamoa ni kakatonga.
4 Ongora! A mena aomata aika uanao n taiani maunga,Ao karongoaaia ai aroia aomata aika rangi ni bati!
Ongora! A kiriwe tautaeka n ueaAika aia tautaeka natannaomata aika ikotaki!+
E a ikoikota te taanga ni buaka ibukin te buaka Iehova ae Atuaia taanga ni buaka.*+
5 A roko man te aba ae raroa+Mai rabarabani karawa,Iehova ma bwaai ni buaka aika bwain unna,Bwa a na urua te aonnaba ni kabutaa.+
6 Tanginiwenei bwa e a kaan ana bong Iehova!
E na roko bwa te kamaunanakoaki mairoun Teuare Moan te Mwaaka.+
7 Anne bukina ae a na bane baai ni mamaara,Ao a na bane aomata ni bwara nanoia n te maaku.+
8 A oreaki aomata n te nakonnano,+Ao a taonakinako n te ariri ma te maraki,N aron te aine ae ariri.
A taraiia i bon irouia ma te maakunrang,Ma ubuia aika ubu n rawawata.
9 Noria! E a roko ana bong Iehova,Ae karawawata n te un ae korakora ao n te urarake n un,Bwa e na karika te aba bwa te bwai ni kakamaaku,+Ao e na kamaunaia mai iai taani bure n te aba.
10 Bwa a na aki anga ootaiaItoini karawa ma aia nna n itoi.*+
E na roo taai ngkana e oti,Ao e na aki maama namwakaina.
11 N na kaeta taekan te aonnaba ni kabutaa ibukini buakakana,+Ao akana buakaka ibukin aia bure.
N na karokoa n tokina nanorietaia akana kan rarabakau,Ao N na kananorinanoi kainikatongaia taani karawawataa te aba.+
12 N na karaoa te aomata bwa e na karako riki mwaitina nakon te koora ae kaitiakaki,+Ao aomata bwa a na karako riki mwaitiia nakoni kooran Obira.+
13 Anne bukina ae N na kamwaeieiea iai karawa,Ao e na kamwaeieieaki te aonnaba n nako mani nnena+N unin Iehova ae Atuaia taanga ni buaka ni bongin uraraken unna.
14 E na oki temanna ma temanna nakoia ana aomata,Ao e na birinako temanna ma temanna nakon oin abana,N aron te katere* ae kaeaki ao n aron te nanai ae akea ae e na ikotiia.+
15 Ane e kuneaki ao e na ewaraki,Ao ane e reke e na bwaka n te kabaang.+
16 A na kamaeinikunaki rabwataia natiia bon i mataia,+Ao a na kuribwaiaki aia auti,Ao a na tauaki buuia.
17 Ae I a kateirakeia I-Miria bwa a na ekiianako,+Aika a iangoa te tirewa bwa akea bonganana,Ao akea kimwareireia n te koora.
18 A na kamaeinikunia rorobuaka n ataei aia kainikatebe,+Ao a na aki nanoangaa uaan te biroto,Ao a na aki naba nanoangaiia ataei.
19 Ao Baburon ae te kabanea ni karineaki* i buakoia tautaeka n uea,+Ae tamaroaia ao kainikatongaia I-Kareria,+E na riki bwa ai aron Totom ma Komora ngke e kamaunaia te Atua.+
20 E na aki manga kaainaki neiei,Ao e na aki manga riki bwa te tabo ni maeka i nanon rooro ni kabane.+
Akea te I-Arabia ae e na katea ana umwanrianna ikanne,Ao akea naba taani kawakintiibu aika a na kamotirawaia aia nanai ikanne.
21 A na wene ikanne manin te rereua,Ao a na onrake aia auti n taian aure.*
A na maeka ikanne aotireti,*+Ao a na ewewe rikanne kooti aika moaanti.*
22 A na tang n ana taua neiei maan aika karongoa tangitangia,Ao tiakaore* n ana baareti neiei aika tamaroa.
E a kaan ana tai, ao a na aki kamaanaki ana bong.”+
Taiani Kabwarabwara Mai Nano
^ Ke, “te kai ae te kanikina.”
^ Ebera, “nakoia au aomata aika katabuaki.”
^ Ke, “Tabaota.” Nora Nanon Taeka.
^ Ebera, “aia nna n itoi ae Keeti,” tao e kaineti nakon Oraian ao nna n itoi ake i rarikina.
^ Nora Nanon Taeka, “Maan.”
^ Ke, “te bwai ni katamaroa.”
^ Nora Nanon Taeka, “Maan.”
^ Nora Nanon Taeka, “Maan.”
^ Ke tao, “taimonio aika ai aron te kooti.”
^ Nora Nanon Taeka, “Maan.”
