Itaia 14:1-32
14 Bwa Iehova e na nanoangaa Iakoba,+ ao e na manga rinea Iteraera.+ E na kamaekaia* n abaia,+ ao aomata aika maeka n iruwa a na iriia ao n nimtiia tibun Iakoba.+
2 Ao botannaomata a na kairiia* ao ni kaokiia nakon aia tabo, ao tibun Iteraera a na tauia naakai bwa aia toro aika mwaane ao aia toro aika aine+ n aban Iehova, ao a na riki bwa taani kataenikaiia te koraki ake a tauaki ngkoa irouia bwa taenikai, ao a na taui aroia te koraki ake a tautoronaki ngkoa irouia.*
3 N te bong are e anganiko iai Iehova te motirawa mani marakim ao man aki raum, ao man te tautoronaki are ko toronaki iai,+
4 ao ane ko na taekina te kario* ae kangai n ekaanako ueani Baburon:
“E a roko n tokina kangaa teuare kairoroiia aomata bwa a na mwakuri!*
E a toki kangaa te karawawataaki!+
5 E a tia Iehova n otei aia kai aomata aika buakaka,Ae okoia taan tautaeka,+
6 Are teuare oreiia botannaomata ma te marakinnano n te oro ae akea tokina,+Ao teuare kataenikaiia natannaomata ma te un n te bwainikirinaki ae akea tokina.+
7 E a motirawa ngkai te aonnaba ni kabutaa ao e a aki kiriwe.
A a tatakarua ni kimwareirei aomata.+
8 A a kimwareirei naba kaai aika mwaiango ibukim,N ikotaki ma kaai aika tiira ake i Rebanon.
A taku, ‘Man te tai are ko bwaka iaiAo e tuai mani waerake te tia korokai n ekiranako.’
9 E kiriwe naba te Ruanimate* are i nanoNi kani kaitiboo ma ngkoe ngkana ko roko,Bwa ibukim ao e kateirakeia te koraki aika akea korakoraia bwa a mate,Ake taani kairiri* ni kabane n te aonnaba aika karawawataa te aba.
E kateirakeia aia uea ni kabane natannaomata man aia kaintokanuea.
10 A bane n taetae ao a taku nakoim,‘Ko a mamaara naba n aekakira?
Ko a riki bwa ai arora?
11 E a uotaki rikaaki nanorietam nakon te Ruanimate,*Ma tangitangin am bwai ni katangitang aika iai karaiia.+
A taakinaki i aam iino bwa nnem ni wene,Ao rabunam taiani mwata.’
12 Ko a bwaka kangaa mai karawa,Ngkoe ae ko raneanea ae natin tabwenani mainiku!
Ko a koreaki ni kabwakaaki kangaa nako aontano,
Ngkoe are ko kakataenikaiia natannaomata!+
13 Ko taku i nanom, ‘N na rierake nako karawa.+
N na karietaa au kaintokanuea i etan ana itoi te Atua,+Ao N na tekateka i aon te maunga ni botaki,N taabo ake taiani kabanea n raroanako i meang.+
14 N na waerake nako etan taian nang,Ao N na karaoai bwa kaanga katotongan Teuare Moan te Rietata.’
15 Ma n oneani mwin anne, ko na boni karuoaki rikaaki nakon te Ruanimate,*Nako kabin te mwarua are i nano i nano.
16 A na karekea taraam te koraki ake a noriko.
A na karauko n neneriko ao ni kangai,‘Aio ngkai te mwaane are kamwaeieiea te aonnaba,Ao e ioioi taian tautaeka n uea,+
17 Are e karaoa te aonnaba ni kabutaa bwa kaanga te rereua
Ao e kabwakai kaawana,+Ao e rawa ni kaokiia aomata ake ana bure nakoni mwengaia?’+
18 A bane ni wene ma te karineakiAia uea natannaomata ake tabemwaang,Eng, ngaiia ni kabane, temanna ma temanna n ruanimatena.*
19 Ma ko karenakoaki ao akea ruanimatem,N aron te bwebwe* ae riribaaki,Ao ko kunnikaiaki n taiani mate ake a ewaraki n te kabaang,Ake a ruo rikaaki nakon te mwarua ae kiriatibu,N aron rabwataia maate aika toutouaki i aan te wae.
20 Ko na aki raonia n te ruanimate,Bwa ko kamauna oin abamAo ko kamateia oin am aomata.
E na aki manga atongaki araia aomata aika kanoaia taani kakaraoa ae buakaka.
21 Katauraoa te atibu n tiritiri ibukin tiringakia natina mwaane,Ibukin aia bure aia bakatibu,Bwa a aonga n aki teirake ao n taua aron te aonnabaAo ni kaona aon te aba n aia kaawa.”
22 “N na teirake n ekiianako,”+ bon ana taeka Iehova ae Atuaia taanga ni buaka.*
“Ao N na kamauna mai Baburon te ara ao te nikira ma te nati ao te kanoa,”+ bon ana taeka Iehova.
23 “Ao N na karika neienne bwa aia tabo maan aika baokubain, ao te aono ae neinei, ao N na iaakinna n te kai n iaaki n urubwai,”+ bon ana taeka Iehova ae Atuaia taanga ni buaka.
24 E taetae n tuea ni kangai Iehova ae Atuaia taanga ni buaka:
“E na bon riki n aron are I kantaningaia,Ao e na boni koro bukina n aron are I baireia.
25 N na kamanatuaa te I-Aturia i abau,Ao N na toutoua i aon au maunga nako.+
E na kanakoaki ana amo mai aoia,Ao e na kanakoaki uotana mai aon angaia.”+
26 Anne te bwai ae e a tia ni baireaki* n ekaanako te aonnaba ni kabutaa,Ao anne te bai ae aroraki* n ekiianako natannaomata ni kabane.
27 Bwa e a tia ni baireia Iehova ae Atuaia taanga ni buaka,Ao antai ae kona n tokobitoia?+
E aroraki baina,Ao antai ae kona ni kaokia?+
28 N te ririki are e mate iai te Uea ae Aati,+ ao e a taekinaki te taeka ae kangai:
29 “Tai kimwareirei ngkoe ae Biritia, akea naba temanna,Tii ibukina bwa e a mwaoto okon teuare ororeiko.
Bwa e na otinako te naeta+ ae boitin mani wakaan te naeta,+Ao e na riki bunna ae te naeta ae te ai ae kikiba.*
30 Ngkana a amwamwarake aia karimoa akana mangori,Ao a wene ma te mweraoi akana maiu ni kainnano,Ao N na kaaki wakaam bwa e na mate n te rongo,Ao a na kamateaki nikiram.+
31 Tanginiwenei ngkoe ae mataroan te oo! Ko na tang ngkoe ae te kaawa!
A na bane ni bwara nanomi, ngkami aika kaaini Biritia!
Bwa e a roko te bubu mai meang,Ao akea ana tautia temanna ae tio i buki.”
32 A na kangaa ni kaeka nakoia aia tia uataeka natannaomata?
E a tia Iehova ni kawenea aan Tion,+Ao a na kamanoia i nanon neiei, te koraki aika mangori mai buakoia ana aomata.
Taiani Kabwarabwara Mai Nano
^ Ke, “angania te motirawa.”
^ Ae taekaia tibun Iteraera.
^ Ke, “taani kammwakuriia.”
^ Ke, “te kakaniko.”
^ Ke, “te tia kammwakuriia aomata.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ebera, “kooti mwaane.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ke, “Tiore,” ae taekan ruanimaten te botannaomata. Nora Nanon Taeka.
^ Ebera, “ana auti.”
^ Ke, “te mwaanga.”
^ Ke, “Tabaota.” Nora Nanon Taeka.
^ Ebera, “te reirei ni kairiri ae motikaki.”
^ Ke, “tauraoi n oro.”
^ Ke, “te naeta ae birimwaaka ae boitin.”
