Itaia 6:1-13
6 N te ririki are e mate iai te Uea ae Utia,+ ao I nora Iehova n tekateka i aon te kaintokanuea ae rangi n rietata ma ni karietataaki,+ ao e buta te tembora n rabin ana kamwarai.
2 A tei terabim* i etana, ao kaka oneai baia ni kiba. A rabuni mataia ni baia ni kiba ake kaka uaai ao a rabuni waeia n ake kaka uaai, ao a kibakiba ni baia ake kaka uaai riki.
3 Ao e takarua temanna nakon are temanna ni kangai:
“E tabu, e tabu, e tabu Iehova ae Atuaia taanga ni buaka.*+
E on te aonnaba ni kabutaa ni mimitongina.”
4 Ao a ruru bouani mataroan te kawai n rin ni karongoaan te tatakarua,* ao e a onrake te auti n te bubu.+
5 Ao I taku: “Ai kananoangara ngai!
Bwa kaanga I a boni mate,*Bwa te mwaane ngai ae a kamwara riau,Ao I maeka i buakoia aomata aika kamwara riaia,+Bwa a a tia matau n nora te Uea ae Iehova ae Atuaia taanga ni buaka!”
6 Mangaia are e kiba nakoiu te terabim temanna, ao iai i nanoni baina te mwaakaro ae ura+ ae e anaia man te baonikarea+ ni bwain anaakina.
7 E ringa wiu ao e taku:
“Noria! E a tia te baei ni boo ma riam.
E a kamaunaaki am kairuaAo e a kabwaraaki am bure.”
8 Ao I ongo bwanaan Iehova ae kangai: “Antai ae N na kanakoa, ao antai ae e na nako ibukira?”+ Ao I taku: “Aio ngai! Kanakoai!”+
9 Ao e kaeka ni kangai, “Naako, ao kangai nakoia aomata aikai:
‘Ane kam na ongongo,Ma kam na aki ota,Kam na mamataku,Ma kam na aki atatai.’+
10 Karaoi nanoia aomata aikai bwa a na aki muti,+Ao kaini taningaia,+Ao kaini mataia,Bwa a aonga n aki noraaba ni mataiaAo n aki ongo n taningaia,Bwa e aonga n aki ota nanoiaAo a na aki rairaki n oki ma ni kamarurungaki.”
11 Ngaia are I taku: “Iehova, e na maanra?” Ao e taku:
“Ni karokoa ae a a urubekebeke kaawa ao ai akea kaaia,Ao ai akea aomata n taian auti,Ao e a uruaki te aba ao e a kamaroaeaki.+
12 Ni karokoa ae e kamwaawaia aomata Iehova ni kararoaia nako,+Ao e a rangi n rakanako kamaroaean te aba.
13 “Ma e na teimatoa n iai i nanona te katebwina ni mwakoro, ao e na manga kabuekaki riki, n aron te aroka ae bubura ao n aron te aroka ae te oke, are imwini koreaia ao a tiku botoia. E na riki te kariki* ae tabu bwa botona.”
Taiani Kabwarabwara Mai Nano
^ Nora Nanon Taeka.
^ Ke, “Tabaota.” Nora Nanon Taeka.
^ Ebera, “ni bwanaan temanna ae wewete.”
^ Ebera, “I kainabwabuaki.”
^ Ke, “te kanoa.”
