Karikani Bwaai 6:1-22
6 Ao ngke a a moanna n rikirake mwaitiia aomata i aon te aba ao a bungiaki natiia aika aine,
2 ao natin te Atua* ae koaua+ aika mwaane a noriia natiia aomata aika aine bwa a baaraoi. Mangaia are a karekeia bwa buuia te koraki nako ake a rineiia.
3 E taku ngkanne Iehova: “I* a aki kona n teimatoa n taona nanou irouia aomata,+ ibukina bwa bon tii iriko* ngaiia. Ngaia are e na tii 120 tokin aia ririki.”+
4 A mena Nebirim* n te aonnaba ni boong akanne ao imwina riki. N te tai anne ao a teimatoa natin te Atua ae koaua ni wene n taanga ma natiia aomata aika aine, ao a karikiia natiia naakai aika mwaane. A boni korakora mwaane aikai ao a tanoata taekaia n taai ake ngkoa.
5 Ao Iehova e nora buakakaia aomata bwa e a korakora n te aonnaba, ao aia iango tii te kani kakaraoa ae buakaka n taai nako.+
6 E uringaaba* Iehova ni karaoaia aomata irouna n te aonnaba, ao e nanokawaki.*+
7 Mangaia are e taku Iehova: “N nang kamaunaia aomata aika I karikiia mai aon te aba, aomata n ikotaki ma maan aika manana, maan aika kawakawa, ao manin karawa aika kibakiba, bwa I a uringaaba ni karaoaia irou.”
8 Ma e reke akoan Noa i matan Iehova.
9 Aio rongorongon Noa.
Bon te aomata ae raoiroi Noa,+ ao e eti arona* i buakoia ana roro.* E nakonako Noa ma te Atua ae koaua.+
10 Imwina riki ao a bungiaki natin Noa aika teniman mwaane, aika Tem, Am, ao Iabeta.+
11 Ma e a kabuakakaaki te aonnaba i matan te Atua ae koaua ao e onrake n te iowawa.
12 Eng, e taraa te aonnaba te Atua ao e a buakaka,+ bwa a bane aomata ni karaoa ae buakaka n te aonnaba.+
13 Imwin anne ao e taku te Atua nakon Noa: “I a tia ni baireia bwa N nang kamaunaia aomata ni kabane, bwa e a onrake te aonnaba irouia n te iowawa, ngaia are N nang kamaunaia ma n urua te aonnaba.+
14 Kabaa te aake* ibukim man te kai ae te koba.+ Ko na karaoi taian ruu i nanon te aake, ao kabira nanona ma tinanikuna n te korotaa.+
15 Aio aroni karaoana iroum: E riai n 300 te mwanokunibai* abwakin te aake, 50 te mwanokunibai raababana, ao 30 te mwanokunibai rietana.
16 Ko na karaoa te kamaama* ae teuana te mwanokunibai mai eta bwa kaotaan nanon te aake. Ko riai ni karaoa mataroan te aake i rarikina,+ ao ko na karaoi tenua bwian nanon te aake, bwa teuana i nano ao uoua i etana.
17 “Ao ngai N nang karokoa te ieka ae te ran+ n te aonnaba bwa e na kamaunaia aomata ma maan* aika iai te ikeike ni maiu* irouia. A na mauna bwaai ni kabane n te aonnaba.+
18 Ao I a karaoa au berita ma ngkoe, ao ko riai n rin i nanon te aake, ngkoe ma natim ao buum ao buuia natim.+
19 Ao kairiia nako nanon te aake kaka uoman maan n aekaia nako+ ae te mwaane ao te aine, bwa a aonga n teimatoa ni maiu ma ngkoe,+
20 a na rin kaka uoman maan nakoim mai buakoia maan aika kibakiba n aekaia nako, maan aika manana n aekaia nako, ao manin aontano aika kawakawa ni kabane n aekaia nako, bwa a aonga n teimatoa ni maiu.+
21 Ao ko na rikoi ma n uotii aeka n amwarake nako bwa kanam+ ao kanaia maan.”
22 Ao e karaoi bwaai ni kabane Noa ake e tua te Atua nakoina. E boni karaoi n aron tuangana.+
Taiani Kabwarabwara Mai Nano
^ Te taetae ni karariki n te taetae n Ebera, ae kaineti ma natin te Atua aika anera.
^ Ebera, “taamneiu e.”
^ Ke tao, “ibukina bwa a karaoa ae kaineti nakon te iriko.”
^ Tao nanona, “Taani Kabwakaia Aomata,” ae taekaia te koraki aika kairiia aomata bwa a na bwaka. Nora Nanon Taeka.
^ Ke, “nanokawaki.”
^ Ke, “ao e rawawata nanona.”
^ Ke, “akea kabuakakaana.”
^ Ebera, “ana roro nako.”
^ Ebera, “te ati.” Te kaibuke ae totoa.
^ Ebera, “tso’har.” N te iango teuana te tsoʹhar bon te taubuki ae rabee, ao tiaki te bwangabwanga ibukin te oota ao tiaki te kamaama.
^ Nora Nanon Taeka, “Taamnei.”
^ Ebera, “iriko ni kabane.”
