E kautaki Maria iroun Ioteba ma n tuangaki te rongorongo ae kataweaki. E a tibwa tia ni kaoti ana anera Iehova nakon Ioteba n te mii ao n tuangnga ni kangai: “Teirake, anaa te teei ma tinana ao birinako nako Aikubita, ao tiiku iai ni karokoa tuangam irou, bwa e nang kakaaea te teei Erote ni kamatea.”​—Mataio 2:13.

A birinako n te tairiki naba anne Ioteba, Maria, ao natiia. E angaraoi birinakoia anne ibukina bwa e a tibwa ataia Erote ae mwamwanaaki irouia taani kaiwan itoi. E tuangia bwa a na kaongoa ngkana a ataa mwina. Ma a kitana te kaawa n aki kaongoa. E a rangi n un iai Erote. E teimatoa ni kan tiringa Iesu ao e a tua kamateaia ataei aika mwaane ni kabane, ake kaka uoua aia ririki rikaaki i Betereem ma kaawa ake i rarikina. E katautaua te ririki anne man aia rongorongo taani kaiwan itoi ake a roko mai Mainiku.

Bon te mwakuri ae rangi ni buakaka tiringaia ataei akanne ni kabane! Ti aki ataia bwa iraman ataei aika uarereke ake a tiringaki, ma e kakoroaki nanon te taetae ni burabeti n te Baibara are e taekinna ana burabeti te Atua are Ieremia, ibukini korakoran te tanginiwenei ao te rawawata irouia tiina.​—Ieremia 31:15.

N te tai anne, a a tia ni birinako nako Aikubita Ioteba ma ana utu ao a tiku ni maeka ikanne. E a manga kaoti riki ana anera Iehova n te tairiki teuana nakon Ioteba n te mii ao e taku: “Teirake ao kaira te teei ma tinana, ao nakon te aba ae Iteraera, bwa a a tia ni mate naake a kan anaa maiun te teei.” (Mataio 2:20) Ngaia are e iangoia Ioteba ngkai bwa a kona n okira oin aia kaawa. E a kakoroaki iai nanon te taetae ni burabeti teuana riki n te Baibara ae wetean Natin te Atua mai Aikubita.​—Otea 11:1.

E bae n iangoia Ioteba bwa a nang tiku ni maeka  ana utu i Iutaia, tao n uakaan ma te kaawa ae Betereem are a maeka ngkoa iai imwaini birinakoia nako Aikubita. Ma e ataia ae e a manga uea ngkai natin Erote ae buakaka are Arekerau i aon Iutaia. E a manga anganaki riki te kauring Ioteba n te mii iroun te Atua ibukin te kangaanga. Ngaia are e a manga nako meang Ioteba ma ana utu ni maeka n te kaawa ae Natareta, n aononi Kariraia ae raroanako ma boton aia waaki kaain te Aro n Iutaia. E ikawairake Iesu n te tabo aei ike e a kakororaoaki nanon te taetae ni burabeti riki teuana ae kangai: “E na atongaki bwa te I-Natareta.”​—Mataio 2:23.