Tebwina te bong imwin okin Iesu nako karawa, ao a anganaki taan rimwina te taamnei ae raoiroi. Ni Bentekota 33 C.E., a a roko aomata i Ierutarem man taabo aika bati bwa a na ira te botaki aei. A ikotaki n te ruu i eta taan rimwin Iesu aika tao 120, ngke e a rina naba n riki te bwai ae kamimi. E tiku i aon atuia n tatabemania nako te bwai ae kaanga te ai, ao a a taetae n taetae aika kakaokoro. Ao e buta nanon te auti n te karongoa n aron ukin te ang ae korakora.

A ongo te karongoa anne iruwa man aaba ake tabeua ake a roko i Ierutarem, ao a biri nakon te auti anne bwa a na noria. A rangi ni kubanako ngke a a ongo oin aia taetae mairouia taan rimwin Iesu. Ao a taku: ‘Kai kaaini Kariraia aomata aikai. A kangaa n rabakau ara taetae?’

Ao e teirake Betero ma abotoro ake tabeman ao a tei i mataia te koraki ae bati. E tuangia aomata Betero taekani kamatean Iesu ao  aron Iehova ni kautia mai buakoia maate. E taku Betero: ‘E a mena ngkai Iesu i karawa i angaatain te Atua, ao e kabwaroa te taamnei ae raoiroi are beritanaki. Anne bukina ae kam nori iai kakai aikai ao n ongo taekaia.’

A rangi n anaaki nanoia aomata n ana taeka Betero ao a titiraki ni kangai: “Tera ae ti riai ni karaoia?” E tuangia ni kangai: ‘Rairi nanomi man ami bure ao bwabetitoaki n aran Iesu. Ao ane kam na anganaki naba te bwaintangira ae te taamnei ae raoiroi.’ N te bong anne, a bwabetitoaki aomata aika tao 3,000. Ni moa man te tai anne, e a waekoa n ririkirake mwaitiia taan rimwin Iesu i Ierutarem. Man ana ibuobuoki te taamnei ae raoiroi, a a katei ekaretia abotoro ao a a kona iai n reireinia taan rimwin Iesu, baike e tua Iesu nakoia.