REIREI 06

E Riki Mai ia te Maiu?

KAMAIUA

“Ane iroum [te Atua] nibwan te maiu.” (Taian Areru 36:9) Ko kakoauaa anne? A iangoia tabeman bwa akea ae karika te maiu. Ngkana e koaua anne, nanona bwa e manennanti rikira. Ma ngkana e karika te maiu Iehova ae te Atua, nanona bwa bon iai te kantaninga ibukira. a Iangoa ae taekinaki n te Baibara ni kaineti ma moan rikin te maiu, ao e aera ngkai ti kona ni kakoauaa.

1. E kangaa ni moan riki te iuniweeti?

E kangai te Baibara: “N te moantai ao e karika karawa ma te aonnaba te Atua.” (Karikani Bwaai 1:1) A kakoauaa angia taan rabakau bwa iai moan rikin te iuniweeti. E kangaa ni karikia te Atua? E kabongana ‘mwaakana ae mwamwakuri’ ae taamneina ae raoiroi, ni kariki iai bwaai nako n te iuniweeti, n ikotaki ma nna n itoi, taian itoi, ao ai buraneti.—Karikani Bwaai 1:2.

2. Bukin tera bwa E karika te aonnaba te Atua?

“E aki [karaoa te aonnaba Iehova] bwa e na matebuaka, ma e karaoia bwa e na maekanaki.” (Itaia 45:18) E karaoa te aonnaba bwa e na kamwengaraoi ao mwengaia aomata n aki toki. (Wareka Itaia 40:28; 42:5.) A taku taan rabakau bwa e okoro te aonnaba ma buraneti nako. Tii ngaia te buraneti ae a kona ni maiu iai aomata.

3. Tera kaokoroia aomata ma maan?

Ngke e tia ni karika te aonnaba Iehova ao e a manga karikii baika maiu iai. E kaona moa te aonnaba n taian aroka ao maan. Imwina, ao “te Atua e karika te aomata n ai arona.” (Wareka Karikani Bwaai 1:27.) Tera kaokoroia aomata? Ibukina bwa ti karikaki ni katotongan te Atua, ti kona ni kaotiotii aroarona, n aron te tangira ao te kaetitaeka ae riai. E karikira naba ma te konaa n reiakin taetae aika kakaokoro, n tangiri baika kantara, ao ni kukurei n taiani katangitang. Ti kaokoro ma maan, bwa ngaira ti kona n taromauria ara tia Karikiriki.

REIAKINA AE BATI RIKI

Iangoa te bwai ni kakoaua ae e boni karikaki te maiu, ao e boni koaua ana rongorongo te Baibara ae taekan te karikibwai. Nori aroaroia aomata aika ti kona iai n reiakina taekan te Atua.

4. E karikaki te maiu

A kamoamoaaki aomata ibukin aia karaobwai ae a katotongi taiani karikibwai. Ngaia are antai ae e riai ni kamoamoaaki ibukin te moani karaobwai? Kaota te TAAMNEI, ao maroroakina te titiraki aei.

TAAMNEI: Kakoauaan te Atua (2:43)

Baikara karikibwai aika a tia ni katotongi taani karaobwai aika aomata?

A karaoaki auti nako, ao a kateaki iroun te aomata. Ma antai ae karaoi ao ni katei baika karikaki? Wareka Ebera 3:4, ao maroroakin titiraki aikai:

Tera te karikibwai ae anaaki riki iai nanom?
E kona ni kakoauaaki ae e boni karaoaki te iuniweeti ao bwaina nako? Bukin tera?

Ko ataia?

Ko kona ni karekei kaongora ao taamnei ni kaineti ma te atu n reirei aei, n jw.org n te kaongora ae rereitaki ae “E Baireaki Raoi Aroni Karaoana?”

“E koaua bwa a kateaki auti nako iroun te aomata, ma ane e katei bwaai ni kabane bon te Atua”

5. E kona n onimakinaki ana rongorongo te Baibara ae taekan te karikibwai

Ni Karikani Bwaai mwakoro 1, e taekinaki iai moan rikin te aonnaba ao te maiu iai. Ko kona ni kakoauaa te rongorongo anne, ke bon tii te otokaraki? Kaota te TAAMNEI, ao maroroakin titiraki aikai.

TAAMNEI: E Karikaki te Iuniweeti?—Mwakorona (3:51)

E koaua ae e angareirei te Baibara bwa te aonnaba ao te maiu, a karikaki i nanon onobong ae 24 te aoa maanna?
N am iango, e bon eti ana rongorongo te Baibara ni kaineti ma te karikibwai, ao a kona n onimakinaki? Kabwarabwaraa am kaeka

Wareka Karikani Bwaai 1:1, ao maroroakina te titiraki aei:

A taku taan rabakau bwa iai moan rikin te iuniweeti. Tera irekereken aia taeka ma te bae ko warekia n te Baibara?

A iangoia tabeman bwa e kabongana te ewarutin te Atua ni karika iai te maiu. Wareka Karikani Bwaai 1:21, 25, 27, ao maroroakin titiraki aikai:

E koaua ae e angareirei te Baibara bwa te Atua e kamanena te ewarutin ni karikii iai ika, maan ake tabeua riki, ao aomata? Ke e boni karikii baika maiu n “aekaia nako”? b