Ngkana e riki te kangaanga ae rangi ni kakaiaki, ao e na boni bae n tabekaki te titiraki ae kangai: “Bukin tera?” Ai kukureira ngaira ngkai iai kaeka aika mataata n te Baibara ibukin te titiraki aei!

1. E kangaa Tatan ni karokoa te buakaka n te aonnaba?

E boni karitei Tatan te Riaboro nakon te Atua. E kan taui aroia aomata Tatan, ngaia are e a kariria ara moan aomata ake Atam ao Ewa, bwa a na raonna ni karitei. E karaoa aei Tatan ngke e taekina te kewe teuana nakon Ewa. (Karikani Bwaai 3:​1-5) E bukina Iehova nakon neiei bwa aongkoa iai te bwai ae raoiroi ae karabaa mairouna. E taku bwa a na kukurei riki aomata ngkana a aki ongeaba iroun te Atua. E taekina te moani kewe Tatan ngke e tuanga Ewa ae e na bon aki mate. Ngaia are e aranaki Tatan n te Baibara bwa “te tia kewe ngaia, ao taman te kewe.”​—Ioane 8:44.

2. Tera are a rineia Atam ao Ewa bwa a na karaoia?

E rangi n tituaraoi Iehova nakon Atam ao Ewa. E tuangia bwa a kona n amwarake mani kain nako te onnaroka are i Eten ma tii tekaina te aroka ae a aki riai ni kanna. (Karikani Bwaai 2:​15-17) Ma a bon rineia bwa a na kana uaan te aroka arei. Bon Ewa are e moani “kinika uaana ao e kanna.” Imwina e a manga “kanna naba” Atam. (Karikani Bwaai 3:6) A uaia n aki ongeaba iroun te Atua. Ibukina bwa a kororaoi Atam ao Ewa, a boni kona ni karaoa ae riai. Ma ibukina bwa bon nanoia n aki kan ongeaba iroun te Atua, a a bure iai ao n rawa nakon riain Iehova n tautaekania. A rotaki n te rawawata ae rangi ni bati man aia motinnano anne.​—Karikani Bwaai 3:​16-19.

3. Ti kangaa n rotaki man aia motinnano Atam ao Ewa?

Ngke a bure Atam ao Ewa, a a riki n aki kororaoi iai ao a a ituaki iai kanoaia ni kabane. E taekina ae kangai te Baibara ibukin Atam: “Rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate.”​—I-Rom 5:12.

Ti rawawata i aani bukina aika kakaokoro. N tabetai ti rawawata ibukini motinnano aika bubuaka aika ti karaoi. N tabetai ti rawawata ibukin aia motinnano aika buakaka tabemwaang. N tabetai ti rawawata ibukina bwa ti mena n te tabo ao n te tai ae a riki iai baika aki kantaningaaki.​—Wareka Te Minita 9:11.

 REIAKINA AE BATI RIKI

4. Teuare riai ni bukinaki n rawawatara

A bati aomata aika kakoauaa ae e tautaekana te aonnaba te Atua. E koaua anne? Kaota te TAAMNEI.

Wareka Iakobo 1:13 ao 1 Ioane 5:​19, ao maroroakina te titiraki aei:

• E riai ni bukinaki te Atua ibukin te rawawata ao te buakaka?

5. Nora mwin ana tautaeka Tatan

1. A kororaoi ngkoa Atam ao Ewa ao a maeka n te Bwaretaiti. Ma a ongo iroun Tatan ao a karitei nakon Iehova

2.   Imwin te karitei, e a on te aonnaba n te bure, te rawawata, ao te mate

3. E na katoka te bure, te rawawata ao te mate Iehova. Ao a nang manga kororaoi aomata ao ni maeka n te Bwaretaiti

6. E mutiakina rawawatara Iehova

Te koaua bwa e aki tabeakinira te Atua ngkana ti rawawata? Nora te baere a koreia te Uea are Tawita ao te abotoro Betero. Wareka Taian Areru 31:7 ao 1 Betero 5:​7, ao maroroakina te titiraki aei:

• Tera am namakin n ataakin ae e atai ao e mutiakin rawawatara Iehova?

 KAKIMOTOTOANA

A bon riai ni bukinaki ibukin te buakaka n te aonnaba Tatan te Riaboro ao ara moan aomata ake uoman ake Atam ao Ewa. E rangi ni mutiakin raoi rawawatara Iehova, ao e na boni waekoa ni katoki.

Kauring

• Tera te kewe are e taekinna Tatan te Riaboro nakon Ewa?

• Ti kangaa n rotaki ngaira ni kabane man aia karitei Atam ao Ewa?

• Ti kangaa n ataia ae e mutiakin rawawatara Iehova?