A kakaokoro aia iango aomata ni katobibia te aonnaba ibukin te kamanging. Tabeman a rineia bwa a na nima te kamanging n tabetai ngkana a botaki ma raoraoia. Ake tabeman a rineia bwa a na aki nimma naba teutana. Ma bon iai naba aika a moi ni karokoa ae a koro ni manging. Tera ae e taekinaki n te Baibara ibukin te kamanging?

1. E bure nimakini moi aika kamanging?

E aki taekinna te Baibara bwa e bure te moi kamanging. Ma ngke e taekini baika raraoi aika bati te Baibara ao e taekinna naba bwa te ‘wain e kakimwareireia nanon te aomata.’ (Taian Areru 104:​14, 15) E taekinaki n te Baibara bwa tabeman mwaane ao aine aika kakaonimaki, a nim moi aika kamanging.​—1 Timoteo 5:23.

2. Tera te taeka n reirei n te Baibara nakoia ake a rineia bwa a na nima te kamanging?

E kabuakakaa Iehova kabatiaan te nim kamanging ao te koro ni manging. (I-Karatia 5:21) E kangai Ana Taeka: “Tai mena i buakoia te koraki aika nima te wain ae riao.” (Taeka N Rabakau 23:20) Ngaia are ngkana ti rineia bwa ti na nima te kamanging, e ngae naba ngkana tii ngaira, ti aki riai n nimma n te aro ae riao are a na bua iai ara iango, ti aikoa ataa te bae ti taekinna ao ni karaoia, ke n urua iai marurungira. Ngkana ti aki kona n tiatiana nimara, ti riai n aki nimma naba teutana.

3. Ti na kangaa ni karinei aia motinnano tabeman ni kaineti ma te kamanging?

E riai n rineia temanna ma temanna bwa e na nima te kamanging ke e na aki. Ti aki riai ni motika taekan temanna are e rineia bwa e na nima teutana te kamanging, ao ti aki riai naba ni kairoroa temanna ae e aki kani moi bwa e na moi. (I-Rom 14:10) Ti rineia bwa ti na aki nima te kamanging ngkana ti ataia bwa e kona ni kabwakaia tabemwaang. (Wareka I-Rom 14:21.) Ti aki ‘ukera oini kabwaiara, ma ti ukera ae e na kabwaia iai raora.’​—Wareka 1 I-Korinto 10:​23, 24.

 REIAKINA AE BATI RIKI

4. Iangoia bwa ko na nima te kamanging ke ko na aki

Tera ana iango Iesu n nimakin te kamanging? Ni kaekaan anne, nora te moani kakai are e karaoia. Wareka Ioane 2:​1-11, ao maroroakin titiraki aikai:

• Tera reireiara man ana iango Iesu ae ti noria man te kakai aei ibukin te kamanging ao naake a nimma?

• Ngkai e aki kabuakakaa nimakin te kamanging Iesu, tera ngkanne ae e riai n iangoia te Kristian ibukin ane e nima te kamanging?

Ma e ngae ngke iai inaomatan te Kristian n nima te kamanging, ma tiaki nanona bwa e riai ni kakaraoia n taai nako. Wareka Taeka N Rabakau 22:​3, ao iaiangoia bwa ko na moi ke ko na aki ngkana:

• Ko kabuta te kaa ke ni mwakuri mitiin aika bubura.

• Ko bikoukou.

• E kauringko te taokita bwa ko na aki nima te kamanging.

• E kangaanga iroum tianakin nimam te kamanging.

• E aki kariaiakaki n te tua bwa ko na nima te kamanging.

• Ko mena i rarikin te aomata ae rineia bwa e na aki manga moi, ibukina bwa iai ngkoa ana kangaanga ma tianakin nimana.

Ko na katauraoa te kamanging n am botaki ni mare ke n am botaki riki ake tabeua? Ibukini buokam ni karaoan am motinnano, kaota te TAAMNEI.

Wareka I-Rom 13:13 ao 1 I-Korinto 10:​31, 32. Imwini warekan te kibu teuana ma teuana, maroroakina te titiraki aei:

• E na kangaa ni buokiko maiuakinan te boto n reirei aei, bwa ko na karaoa am motinnano ae e na kakukureia Iehova?

 5. Iangoia bwa mwaitira ae ko na nimma

Ngkana ko rineia bwa ko na nima te kamanging ao ururinga aei: E aki kabuakakaa nimakin te kamanging Iehova, ma e kabuakakaa nimakina n te aro ae riao. Bukin tera? Wareka Otea 4:​11, 18, ao maroroakina te titiraki aei:

• Tera ae kona n riki ngkana iai ae nima te kamanging n te aro ae riao?

Ti na kangaa n rarawa nakon nimakin te kamanging n te aro ae riao? Ti riai n nanorinano, ke n ataa tian ara konaa. Wareka Taeka N Rabakau 11:​2, ao maroroakina te titiraki aei:

• E aera ngkai e raoiroi katauani mwaitin nimam te kamanging?

6. Buokam ni katoka nimakin te kamanging n te aro ae riao

 KAKIMOTOTOANA

E katauraoa Iehova te kamanging bwa ti aonga ni kukurei iai, ma e kabuakakaa nimakina n te aro ae riao ao te koro ni manging.

Kauring

• Tera ae e taekinaki n te Baibara ibukin te kamanging?

• Baikara kangaanga man nimakin te kamanging n te aro ae riao?

• Ti na kangaa ni karinei aia motinnano tabeman ni kaineti ma nimakin te kamanging?