Te kurubu imwain te nakonako, bon titeboo ma te taromauri n te ekaretia, aika ana bwaintituaraoi Iehova nakoira, ake ti a kona iai ni kaungaira i marenara nakon te tangira ao mwakuri aika raraoi. (Ebr 10:​24, 25) A riai n nimaua nakon itua te miniti maania, ao e na rinanoaki iai bairean te kurubu, te mwabe ae e na karaoaki, ao te tataro. (Ngkana iai te botaki imwina, e riai ni kimototo riki.) E riai te tia kaira te kurubu ni katauraoa te bwai ae manena ibukia naake a roko n te tai anne. N te katoto, ngkana ko noria n te Kaonobong bwa a bati aika roko ake a aki iri n te wikeen ae nako, e na bae ni manena ngkana ko maroroakini baika kona n taekinaki nakoia kaain te auti. Baikara riki baika a na manena maroroakinaia?

• Aron te maroro aika n Ara Boki n Reirei ae Maiura ni Kristian ao Ara Mwakuri ni Minita

• Aroni moanakin te maroro n taekinani bwaai ke rongorongo aika tibwa riki

• Aroni kaekaan taeka n totoko aika kabuta

• Aroni kaekaan te aomata ae aki kakoaua te Atua, ae kakoauaa te ewarutin, ae kabongana te taetae ae kaokoro, ke kaain te Aro teuana ae boou n am aono

• Aroni kamanenaani kanoan ara atureti ae jw.org, te JW Library^®, ke te Baibara

• Aroni kamanenaani bwaai ni mwakuri man Ara Bwai ni Mwakuri Ibukin te Angareirei

• Arora ni karaoa ara mwakuri ni minita ae okoro, n aron te uarongorongo n te tareboon, te kororeta, te uarongorongo n ana tabo te botannaomata, te manga oki, ke te reirei n te Baibara

• Kauring ni kaineti ma kamanoakira, karaoani bitaki, ataakin te katei, te aroaro ae riai, ke aekaki nako akanne

• Te reirei ke te taamnei man te boroutia ae Kanakoraoa Am Wareware ao Am Angareirei

• Arom ni kaungaa ao ni buoka toam n uarongorongo

• Te kibu ae irekereke ma te mwakuri ni minita ke te rongorongo n te mwakuri ni minita ae kaungaunga