“TE KANTANINGA . . . E RANGI NI KAKAWAKI NABA IBUKIN ARA ONIMAKI” n aron ae oti n te boki ae te Hope in the Age of Anxiety. “Ao bon te bwainnaoraki ae te kabanea n raoiroi ni kaineti ma te tokanikai i aon namakinan ae akea manenam, ko ianena, ao ko maaku.”

E oti n te Baibara kainnanoan te kantaninga iroura, ao ti kauringaki naba iai taekani kantaninga aika kairua. E kangai Taian Areru 146:3: “Tai onimakinia natinuea mwaane ke natin te aomata, ae aki kona ni karekea te kamaiu.” Ti na aki onimakina korakoraia aomata ibukini kamaiuara, ma e raoiroi riki onimakinan ara tia Karikiriki ae iai irouna te mwaaka ni kakororaoi ana berita nako. Tera ana berita nakoira? Iangoi baikai.

E NANG AKEA TE BUAKAKA AO E NANG REKE TE RAU NI KOAUA NAKOIA AKANA RAOIROI: E kangai Taian Areru 37:10, 11: “Ai tii teutana riki ao a nang akea aomata aika buakaka . . . Ma a na abana te aonnaba akana nimamannei, ao e na korakora kimwareireia n te rau ae bati.” E reitaki ni kibuna 29 bwa “akana raoiroi . . . a na maeka n aki toki” n te aonnaba.

TOKIN TE BUAKA: “Iehova . . . e katoki buaka ni kabutaa te aonnaba. E ototea te kainikatebe ma ni kamaeinikuna te kainiwai, e kabueki kaa ni buaka n te ai.”—Taian Areru 46:8, 9.

AI AKEA RIKI TE AORAKI, TE RAWAWATA, KE TE MATE: “E a mena ana umwanrianna te Atua irouia aomata . . . E na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.”—Te Kaotioti 21:3, 4.

E NA BATI TE AMWARAKE IBUKIA AOMATA NI KABANE: “E na bati te uita n te aonnaba, ao e na taonako i aon taubukini maunga.”—Taian Areru 72:16.

TII TEUANA TE TAUTAEKA AE E NA TAUTAEKANA TE AONNABA N TE ARO AE ETI—ANA TAUTAEKA N UEA KRISTO: “E anganaki [Iesu Kristo] te mwaaka n tautaeka, te karineaki, ao te tautaeka n uea, bwa a aonga ni beku irouna botannaomata, natannaomata, ao taian taetae. Mwaakana n tautaeka bon te mwaaka n tautaeka ae akea tokina ae e na aki nako, ao e na bon aki kamaunaaki ana tautaeka n uea.”—Taniera 7:14.

Ti na kangaa ni kakoauai berita akanne? Ngke e mena n te aonnaba Iesu ao e katerea nakoia aomata bwa boni ngaia te Uea ae Rineaki. E kamarurungia aoraki, e kaamwarakeia akana maiu ni kainnano, ao e kautiia maate. Ae kakawaki riki bon ana angareirei bwa a reiakinaki naba iai booto n reirei aika a na karekea te maiu n aki toki ma te rau nakoia aomata ao te katiteuanaaki. E a kaman taekin naba Iesu baika a na riki n taai aika imwaira ao baika a na kanikinaei kabaneani bongin te waaki ae ngkai.

E a kaman taekinna Iesu bwa e na aki kanikinaeaki kabaneani boong n te rau ao n te mweraoi, ma boni kaitaraana raoi! Te buaka i marenaia aaba, roongo, aoraki aika kamamate, ao mwaeiein te aba aika kokorakora, boni kanoan naba ana kanikina Iesu, are e kaota “tain tokin te waaki ae ngkai i aon te aba.” (Mataio 24:3, 7; Ruka 21:10, 11; Te Kaotioti 6:3-8) E taku naba Iesu: “E nang kerikaaki aia tangira angia aomata ibukin rikiraken te buakaka.”—Mataio 24:12.

E a kerikaaki te tangira anne n aanga aika bati, are e a kamani katerea temanna riki te tia korea te Baibara. N 2 Timoteo 3:1-5 ao ti warekia iai bwa ni “kabaneani boong,” ao a na bati aomata aika a nang bon tii tangiriia i bon irouia, a na bakimwane, ao a na tangira kakukurein te rabwata. A na kainikatonga ao a na iowawa. E na karako naba kaotiotan te tangira n te utu, ao a na aki ongeaba ataei irouia aia karo. E na taabangaki aia mwamwanaa te aba Aaro.

E kamatoaaki ni baika riiriki aika kaanga ai aron te angibuaka bwa ti a mena ni kabaneani boong. E kamatoaaki naba iai bwa e a kaan roko ana kairiri te Tautaeka n Uea ae uotana te raoi. E boni karaui naba nanora Iesu n ana taetae ni burabeti ibukini kabaneani boong, ni kangai: “E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”—Mataio 24:14.

E anga te kauring te rongorongo ane raoiroi anne nakoia taani kakaraoa ae bure, ao te kantaninga nakoia akana raoiroi, bwa a na boni waekoa ni koro bukini kakabwaia ake a beritanaki. Ko kan reiakin riki taekani kakabwaia akanne? Ngkana eng, taiaoka nora akun te maekatin aei.