Ko kakoauaa ae a kona aomata ni katoki kangaanga aika bati aika urui mweraoira ao arora nakon taai aika imwaira? N te aro bwa a na toki raoi ara kangaanga, ti riai n atai baika a karikii ao tiaki tii kanikinaeaia.

Ibukini kaikonakana, e aoraki te mwaane ae Tom ao imwina e a mate. E aera ngke e mate? E korea aei te taokita n te onnaoraki are e rin iai Tom teutana te tai imwaini matena: “Ngke e moan oti kanikinaean aorakina ao akea ae e iangoia bwa e na kakaaea bwa tera raoi ae karika aorakina.” E taraa n ae ana taokita Tom ake mai mwaina, a tii anganganna te bwainnaoraki ibukini marakina.

Anne naba aroia aomata ni katoki kangaanga? N te katoto, ibukini katokan te kakeru a a katei tuua taian tautaeka, a kanim kaai n rawetaamnei, ao ni kamatoai riki aia itera bureitiman. Ma e ngae ngke a ibuobuoki waaki aikai n itera tabeua, ma a aki katoki raoi baike a riki. E oti n taai nako man aia mwakuri aomata, aron aia iango, baike a kakoauai, ao te bae a tangiria.

E taku Daniel mai Amerika Maiaki ae te aba ae e a rikirake iai te kainnano: “E nakoraoi ngkoa maiura. Ti aki nonora te anaibwai ma te iowawa. Ma ngkai ai akea te aba ke te kaawa ae rau. Ibukin rikiraken te kainnano, e a oti raoi aroaroia aomata aika bati, ae te nanonrang ao aki karinean te maiu ke aia bwai aomata.”

Te mwaane ae ti na aranna bwa Elias, e reke birinakona man te bobuaka n te Middle East ao imwina e a reirei n te Baibara. E taku: “A bati rorobuaka n au kaawa ake a kaungaaki irouia aia utu, iroun te tautaeka ao te Aro bwa a na ira te buaka ao n taraaki bwa mwaane aika ninikoria. A tuangaki naba aei naake a aki boutokaa anne! I noria iai bwa e boni kananokawaki onimakinaia taani kairiri aika aomata.”

E eti ae taekinaki n te boki nikawai ibukin te wanawana ae kangai:

• “Nanoia tii te kani kakaraoa ae buakaka man uarerekeia rake.”​—Karikani Bwaai 8:21.

• “E rangi ni kamwamwane riki te nano nakoni bwaai ni kabane, ao e karuanikai. Antai ae kona n ataa arona?”​—Ieremia 17:9.

• “A nako man te nano iango aika bubuaka, te tiritiri, . . . te wene ni bure, te iraa, te bukibuki ni kewe.”​—Mataio 15:19.

A tuai mani kona aomata ni kunea katokan aroarora aika ti kakammarakiia iai tabemwaang. A a rikirake riki ni bubuaka aroaro akanne, n aron ae oti ni kangaanga ake a taekinaki n te kaongora are mai mwaina. (2 Timoteo 3:​1-5) A a ririkirake riki ni buakaka, e ngae naba ngkai e a rangi ni bati te atatai, ao aanga naba n reitaki ma tabemwaang! Ngaia are e aera ngkai ti aki kona ni karekea te mweraoi n te aonnaba? Ti tangira te bae e a riaon ara konaa? Ti kataia ni karaoa te bae e a riaon ara konaa?

E ngae ngkana ti kona ni katoki aroaro aika bubuaka, ma ti bon aki naba kona ni karekea mweraoia aomata ni kabane. Bukin tera? Iai tian ara konaa.

E kangai te koaua iai: “Tiaki naba ana bwai te aomata kairani maiuna.” (Ieremia 10:23) Eng, ti aki karikaki bwa ti na kaira maiura. Ti bon aki karikaki bwa  ti na tautaekania raora n aomata, n aron naba ae ti aki karikaki bwa ti na kona ni maiu n te ran ke i tinanikun te aonnaba!

Iangoa aei: Iai aika a kan tutuangaki aroni maiuia ke aroaro aika riai ni maiuakin? Te koaua bwa a kan tutuangaki aroia ae riai ibukin iangoani bwaai n aroni kabwakaan te teei ae tuai ni bungiaki ke te tuuaa ae te kamateaki, ke aroia ae a riai n reireinia iai natiia? Aikai bwaai tabeua aika karika te iraraure irouia aomata. E ngae ngke e kangaanga butimwaean anne, ma e bon eti ae e taekinna te Baibara. Bon akea ara konabwai ke riaira n tautaekania raora n aomata. Ti na karekea ia te ibuobuoki?

Te kaeka ae te kabanea n tamaroa, bon tii mairoun ara tia Karikiriki. E boni karikira! Ao ni kaitaraan aia iango tabeman, e bon aki mwaninga taekara. E bon oti man te wanawana ae n te Baibara aron tabeakinara irouna. Ngkana ti ota raoi n te boki ane okoro anne, ti na atai naba arora. Ao ti na kona n ataa bukin rawawataia aomata mangkekei n uaa ngkai. Ti a kona n ota bwa e aera ngke e korea ae kangai te tia rabakau i aon te iango ae kaain Tiaman: “E tuai man reke reireiaia aomata ao tautaeka mani baike a riki n taai aika nako, ao a tuai mani kamanenai reireiaia aika reke iai.”

E taku te mwaane ngkoa ae wanawana bwa “e kakoauaaki wanawanan te aomata man ana mwakuri aika raraoi ake e karaoi” ke mwin ana mwakuri. (Ruka 7:35) Te katoto n te wanawana anne e reke n Itaia 2:​22, ae kangai: “Ibukini kabwaiami, kam na katoka onimakinan te aomata.” E kona ni kamanoira te taeka n reirei anne mani kantaninga aika kairua ao kantaningaani baika aki kona n riki. E kangai Kenneth ae maeka ni kaawan Amerika Meang ae bati iai te iowawa: “E berita kaain te tautaeka temanna imwin temanna bwa e na kanakoraoi bwaai, ma a bon aki kona. E oti ni kabwakaia anne bwa e boni koaua te wanawana ae n te Baibara.”

E korea ae kangai Daniel are taekinaki mai mwaina: “Ni katoabong ao I a ririkirake ni kakoauaa ae e bon aki kona n nakoraoi aia tautaeka aomata. . . . Onimakinan am mwane n te bangke ke am mwane n uritaea, e bon aki kona ni karekea mweraoim. I a tia n noriia aomata aika rotakibuaka ni kaineti ma aei.”

Ma e bati riki ae e karaoia te Baibara nakon tii kamanoara mani kantaningaan baika aki kona n riki. E anganira naba te kantaninga ae ti na noria imwina.