I bungiaki n 1983, ao ngke teuana tabun au ririki, bon akea te kangaanga n rabwatau bwa I marurung raoi. Ma ngke tebwina au ririki, I a moanna n namakina te maraki ae korakora n rabwatau. Tao uoua te ririki imwina, I uti n te ingabong teuana ao I a aki kona ni kammwakura rabwatau. E ngae ngke I kataia ni kammwakurii waeu ma I bon aki konaa. Man te tai anne are I a aki kona iai n nakonako. E toki naba ikawairaken rabwatau man aorakiu anne. Ao ni boong aikai, e bon teimatoa n uarereke rabwatau n aron te teei.

N titiku n au auti i nanon namwakaina aika bati, ao I a kawaraki naba irouia aine aika kaain Ana Tia Kakoaua Iehova aika uoman. Ngkana iai iruwa aika kawarira, I aki toki ni karabaai, ma n te bong anne, I a kariaia aine akanne bwa a na maroro ma ngai. Ngke a maroroakina taekan te Bwaretaiti, I a uringa naba te baere I a tia n ongoraeia ngke nimaua au ririki. N te ririki anne, ao te mitinare temanna ae arana Jethro, ae memena i Suriname, e kakawara ara kaawa aei teuana te tai n te namwakaina ao n reirei n te Baibara ma tamau. E kaokaota te akoi nakoiu Jethro, ao I rangi n tatangiria. A aki toki naba tibuu ni kairai nakon aia bobotaki taani Kakoaua are boo n ara kaawa. Ngaia are ngke e titirakinai Florence, ae te tia Kakoaua temanna are e kawarai n te bong anne, ngkana I kan reiakina ae bati riki, ao I boni kaeng.

E a manga oki Florence ma buuna ae Justus, ao a a moana te reirei n te Baibara ma ngai. Ngke a noria bwa I babanga ni wareware, a a buokai naba iai. Imwin tabeua te tai, I a kona ni wareware i bon irou. N te bong teuana, a tuangai taanga aikai bwa a nang manga nako ni beku i Suriname. E kananokawaki bwa a akea temanna i Orealla ae e na reita au reirei n te Baibara. Ma I kukurei bwa e bon aki mwanuokina taekau Iehova.

E aki maan imwin anne, e roko i Orealla temanna te bwaiania ae arana Floyd, ao e kaitiboo ma ngai ngke e uarongorongo man te auti teuana ma teuana. Ngke e maroro nakoiu ibukin taekan te reirei n te Baibara, I boni wingare nakoina. Ao e taku: “E aera ngkai ko a boni wingare?” I tuangnga ae I a tia n reiakina te boroutia ae Tera ae Tangiria Mairoura te Atua? ao I a tia naba ni moana te reirei n te boki ae te Knowledge That Leads to Everlasting Life. * I a kabwarabwaraa ngkanne nakoina bwa e aera ngke e toki au reirei. E a reita te reirei ma ngai n te boki anne Floyd, ma imwina riki e a manga kamwaingaki naba bwa e na beku n te tabo teuana.  Ngaia are ai manga akea naba au tia reirei n te Baibara.

E ngae n anne, n 2004, a a mwiokoaki Granville ao Joshua, aika bwaiania aika okoro bwa a na beku i Orealla. A uarongorongo man te auti teuana ma teuana ao a a kuneai. Ngke a titirakinai ngkana I kan reirei ao I wingare nakoia. I tuangia bwa I kan reirei n te boki ae te Knowledge mai moana. I tangiria bwa a na reireinai naba bwaai ake e reireinai au tia reirei are mai mwaina. E tuangai Granville bwa e na kakaraoaki te taromauri n te kaawa. E ngae ngke I tuai man otinako man au auti n te maan ae kaania tebwina te ririki ma I boni kan nako ni kaea. Ngaia are e a moanai ma te kaa are kokokaki ao ni kokokai nakon te Tabo n Taromauri.

Imwina riki, e a manga kaungaai Granville bwa N na karina arau n te Kuura ni Kataneiai Ibukia Taan Uarongorongo. E taku: “Ko aki kona n nakonako ma ko kona n taetae. N te tai teuana, ao ane ko na anga te kabwarabwara ibukia aomata nako. E na bon riki anne.” A bon rangi ni kaungaai ana taeka aikai.

I a moana uataboan te mwakuri n uarongorongo ma Granville. A baarekareka ma ni kiritabukibuki kawain te kaawa aei ibukin au kaa are I kokokaki iai. Ngaia are I a butiia Granville bwa e na kokokai n te wibwara. Ao e a raoiroi riki ara babaire aei. N Eberi 2005, I a bwabetitoaki. Teutana te tai imwin anne, a a kataneiaai taari aron tararuaani booki n te ekaretia ao te bwai ni katangitang n te Tabo n Taromauri.

E kananokawaki imwina bwa n 2007, e motirawa tamau man te kabuanibwai teuana n te booti. A rangi n nanokawaki iai ara utu. E tataro ma ngaira Granville ao ni wareki kiibu man te Baibara aika karaunano. Uoua te ririki imwina, ti a manga taonaki naba n te rawawata ni maten Granville imwini kabuanibwaina n te booti.

E a tiku ngkanne ma te rawawata ara ekaretia ae tuakarako aei ma tii temanna te tabonibai iai ao ai akea unimwaanena. I rangi n nanokawaki ni maten Granville ngkai bon te rao ngaia ae I rangi n tatangiria. Bon te mwaane ae kakaonimaki ao e rangi n tabeakina marurungiu n au onimaki ao ni bwaai n rabwata. N tain te taromauri imwini matena, I a mwiokoaki bwa te tia wareware n te Reirei n Te Taua-n-Tantani. I boni wareki barakirabe ake te moan ao te kauoua, ao imwina I a tii tang naba. A teimatoa n titiinako rannimatau n te aro are I a riai ni kitana te tabo are I wareware iai.

I a manga kukurei riki ngke a roko taari man te ekaretia teuana ni buokira i Orealla. Ao e kanakoaki naba man te aobiti n tararua temanna te bwaiania ae okoro, ae arana Kojo. I rangi ni kukurei iroun tinau ao tariu ae uarereke riki ngke a reirei n te Baibara ao n roko n tiaia ae te bwabetito. Imwina ni Maati 2015, I a mwiokoaki bwa te tabonibai n te ekaretia. E aki maan imwina, I aanga au moani kabwarabwaraa ibukia aomata nako. N te bong anne, I boni moangare ma matau aika ranran ao n uringi ana taeka ngkoa Granville aikai: “N te tai teuana, ao ane ko na anga te kabwarabwara ibukia aomata nako. E na bon riki anne.”

A reke reireiau rinanon Ara Kanakobwanaa ae JW^®, ni kaineti ma rongorongoia tarira tabeman n te onimaki ake a rinanon naba are I rinanona. E ngae ngke e aki toamau bwain rabwataia ma e kakukurei ao ni manena maiuia. Ao ni kaineti ngkanne ma ngai, I teimatoa ni kona ni karaoi bwaai tabeua. Nanou ni kan anga ngai ibukin Iehova ngkai iai korakorau, e a kairai bwa N na iangoa te bwaiania ae katoatai. Ao iai te bwai ae I aki kantaningaia are riki n Tebetembwa 2019! N te namwakaina anne, I a mwiokoaki bwa te unimwaane n te ekaretia, ae tao 40 mwaitiia taan uarongorongo iai.

I rangi ni kakaitau irouia tariu ao mwaaneu n te onimaki ake a a tia n reirei ma ngai ao ni buobuokai n au tai ni beku ibukin Iehova. Ma ae moan te kakawaki riki, I rangi ni kakaitaua Iehova bwa e a tia n aki mwanuokina taekau.