1-2. Tera ae ti na rinanona n te kaongora aei?

A A BATI riki ngkai bwaai ni kakoaua bwa ti a maeka n raatokini kabaneani bongin te waaki ae ngkai i aon te aba. N te tai ae e a kaan ao Iehova ma Iesu Kristo a nang kamaunai tautaeka nako aika kaitaraa te Tautaeka n Uea. Imwain rikin anne, a na teimatoa ueani meang ao ueani maiaki ni buaka i marenaia ao ni buakania ana aomata te Atua.

² N te kaongora aei, ti na rinanon te taetae ni burabeti are n Taniera 11:40–12:1. Ti na noria bwa antai ueani meang n taai aikai ao ni maroroakinna bwa e aera ngkai ti kona n aki maaku ni kaaitarai kangaanga aika imwaira.

3-4. Antai ueani meang ni boong aikai? Kabwarabwaraa.

³ Imwini bwakan te Soviet Union n 1991, a anganaki “te ibuobuoki teutana” ae taekan te inaomata i nanon tabeua te tai, ana aomata te Atua ake a maeka i aan te tautaeka anne. (Tan. 11:34) Ibukin anne, a a inaomata n uarongorongo, ao e aki maan imwina, e a rikirake mwaitiia taan uarongorongo nakoni bubua ma bubua tenga n aaba ake a mena ngkoa i aan te Soviet Union. Imwin tabeua te ririki, e a riki Rutia ma aaba ake a boutokaia bwa ueani meang. N aron ae kaotaki n te kaongora are mai mwaina, e riai ni karaoi baika tenua te tautaeka ae e na riki bwa ueani meang ke ueani maiaki: (1) e tautaekani aaba ake a maeka iai ana toro te Atua aika bati ke e kaaitaraia ana aomata te Atua, (2) e kaotia n ana mwakuri bwa e kairiribai nakon Iehova ao ana aomata, ao (3) e kaiangatoa ma te uea temanna.

 ⁴ Noria bwa e aera ngkai ti kona n taekinna ni boong aikai bwa Rutia ma taani boutokaia bon ueani meang. (1) A kaaitaraia ana aomata te Atua ni katabuaka aia mwakuri n uarongorongo ao ni bwainikirinia bubua ma bubua tenga taari aika maeka n aono ake a tautaekani. (2) A kaotia n aia mwakuri aikai bwa a ribaa Iehova ma ana aomata. (3) A teimatoa ni kaiangatoa ma ueani maiaki ae te Tautaeka ae Mwaaka Riki n te Aonnaba ae Amerika ma Buritan. Ti na noria bwa e kangaa n riki bwa ueani meang Rutia ma taani boutokaia.

5. Tera are taekinaki n Taniera 11:​40-43, ao tera ae riki n te tai anne?

⁵ Wareka Taniera 11:​40-43. Mwakoron te taetae ni burabeti aei e bon taekina tain te toki. E katuruturuaki iai taekan te kaiangatoa i marenan ueani meang ma ueani maiaki. N aron are e a kaman taekinna Taniera, e na “inotunotu” ueani maiaki ma ueani meang, ke e na “kaunikoro ma ngaia” n tain te toki.​—Tan. 11:40; kbn.

6. Tera te bwai ni kakoaua ae oti iai bwa a teimatoa n inotunotu ueea ake uoman?

⁶ A teimatoa ueani meang ao ueani maiaki n uneakinna bwa antai ae mwaaka riki irouia n te aonnaba. N te katoto, iangoa te baere riki imwin te Kauoua ni Buaka Are Kabutaa Aonnaba ngke e a tautaekani angiin aonon Eurobe te Soviet Union ma taani boutokaia. Ngaia are e a boraraoi ueani maiaki ma aaba ake tabeua bwa a na ikotii aia taanga ni buaka ni kaitaraa ueani meang. E aranaki aia taanga anne bwa te NATO. E teimatoa ueani meang ni kaiangatoa ma ueani maiaki ni karaoan aia bwai ni buaka aika mwaakaroiroi aika rangi ni bobuaka. E buaka naba ueani meang ni kaitaraa ueani maiaki n arona ni boutokaiia aian ueani maiaki i Aberika, Atia, ao Latin America. N ririki aika tibwa nako, e a ririkirake riki ni korakora mwaakan Rutia ma taani boutokaia. A buaka naba ni kaitaraa ueani maiaki rinanoni kamanenaan taiani kaombiuta. A bukibuki i marenaia ueea aikai bwa a kamanenai burokuraem n te kaombiuta aika urubwai ibukini kakerikaakan kaubwain abaia ao uruakan aia tautaeka. Ao n aron ae e a kaman taekinna Taniera, e teimatoa ueani meang ni buakania ana aomata te Atua.​—Tan. 11:41.

7. Tera “te Aba ae Tamaroa”?

⁷ E taekinaki n Taniera 11:41 bwa e na rinrakea “te Aba ae Tamaroa” ueani meang. Tera te aba anne? N taai ake rimoa, e iangoaki Iteraera bwa “te aba ae te kabanea n tamaroa i buakon aaba ni kabane.” (Etek. 20:6) Ma te bwai ae rianako iai tamaroan te aba anne, bon ibukin ae e mena iai te taromauri ae koaua. Ni moa mani Bentekota 33 C.E., ao te “aba” anne ai tiaki taekan te aba ae mena n te tabo teuana, ibukina bwa a uamaenako ana aomata Iehova ni kabutaa te aonnaba. N oneani mwin anne, “te Aba ae Tamaroa” ni boong aikai bon taekan aroaroni maiuia ana aomata Iehova ae irekereke ma aia taromauri nakon Iehova rinanon taiani bobotaki ao te mwakuri n uarongorongo.

8. E kangaa ueani meang n rinrakea “te Aba ae Tamaroa”?

⁸ I nanoni kabaneani boong, e okioki ueani meang n rinrakea “te Aba ae Tamaroa.” N te katoto, ngke e riki bwa ueani meang te tautaeka n Nazi i Tiaman moarara riki n te kauoua ni buaka, e bon rinrakea “te Aba ae Tamaroa” man arona  ni bwainikirinia ao n tiringia ana aomata te Atua. Imwin te Kauoua ni Buaka Are Kabutaa Aonnaba ngke e a riki te Soviet Union bwa ueani meang, e bon rinrakea naba “te Aba ae Tamaroa” man arona ni bwainikirinia ana aomata te Atua ao ni kanakoia mai abaia.

9. N ririki aika tibwa nako, e kangaa Rutia ma taani boutokaia n rinrakea “te Aba ae Tamaroa”?

⁹ N ririki aika tibwa nako, e rinrakea naba “te Aba ae Tamaroa” Rutia ma taani boutokaia. N te aro raa? N 2017 ao Rutia e katabuaka aia mwakuri ana aomata Iehova ao e karabuutinia tabeman taari mwaane ao aine. E katabuaka naba kamanenaan ara boki n ikotaki ma Te Rairai ae te Aonnaba ae Boou. Irarikin anne, e taua te aobiti n tararua are i Rutia n ikotaki ma Taabo n Taromauri ao Taabo n Runga. Imwini karaoani baikai, e a taekinna te Rabwata n Tautaeka n 2018 bwa Rutia ma taani boutokaia bon ueani meang. Ma e ngae ngke e korakora bwainikirinaia ana aomata Iehova, ma a bon rawa ni karaoi waaki ibukini kabwakaan ke bitakin aia tautaeka aomata. A kakairi n ana reirei ni kairiri te Baibara are a na tataro ibukia “ake a kakannato ni kabane,” moarara riki ngkana a karaoi babaire ake a kona n rotaki iai inaomatara n taromauri.​—1Tim. 2:​1, 2.

10. E na kataenikaiaki ueani maiaki iroun ueani meang? Kabwarabwaraa.

¹⁰ E kaatuuaki riki taekan ana mwakuri ueani meang n te taetae ni burabeti are n Taniera 11:​40-45. Ae nanona bwa e na kataenikaia ueani maiaki? Tiaki ngaia anne. E na teimatoa ni “maiu” ueani maiaki ae taekan ae e na bon iai ngaia ngkana a a kamaunai tautaeka n aomata nako Iehova ao Iesu n te buaka are Aremaketon. (TeKao. 19:20) Ti kangaa ni kakoauaa anne? Iangoi taetae ni burabeti ake a kaotaki n Taniera ao Te Kaotioti.

11. Tera ae kaotaki n Taniera 2:​43-45? (Nora te taamnei ni moan te maekatin.)

¹¹ Wareka Taniera 2:​43-45. E kabwarabwarai te burabeti ae Taniera tautaeka n aomata teuana imwin teuana ake e korakora rotakia ana aomata te Atua irouia. A kaikonakaki n rabwatan nako te boua ae totoa. Te kabanea n tautaeka i buakoia e kaikonakaki bwa raurauniwaen te boua anne ae karaoaki man te biti ae irengan ma te bokaboka. E tei te raurauniwae ibukin te Tautaeka ae Mwaaka Riki n te Aonnaba, ae Amerika ma Buritan. E oti n te taetae ni burabeti anne bwa te Tautaeka ae Mwaaka Riki n te Aonnaba anne , e na bon teimatoa ni waaki ngkana e roko Ana Tautaeka n Uea te Atua ni kamaunai aia tautaeka aomata.

12. Antai ae tei ibukin atun te man ae tiritiri are te kaitiua, ao e aera bwa e kakawaki ataakina?

¹² E kabwarabwarai naba tautaeka aika mwaaka riki n te aonnaba teuana imwin teuana te abotoro Ioane, ake e korakora rotakia ana aomata Iehova irouia. N ana taetae ni burabeti Ioane, a kaikonakaki tautaeka aikai ma te man ae tiritiri ae itiua atuna. Atun te man aei are te kaitiua e tei ibukin te Tautaeka ae Mwaaka Riki n te Aonnaba, ae Amerika ma Buritan. E kakawaki ataakin anne ibukina bwa akea riki atun te man anne imwin are te kaitiua. E teimatoa n tautaeka atun te man anne n te tai are e a kamaunaaki iai irouni Kristo ma ana taanga mai karawa, n ikotaki ma nikiran rabwatan te man anne. *​—TeKao. 13:​1, 2; 17:​13, 14.

13-14. Antai “Koka man te aba ae Makoka,” ao tera ae e na kairia bwa e na buakania ana aomata te Atua?

¹³ E korea te taetae ni burabeti Etekiera ae kaotaki iai te bwai ae kona n riki imwaini kamaunaakin ueani meang ao ueani maiaki. N taraana, a taekini baika a na riki aika titeboo taetae ni burabeti ake n Etekiera 38:​10-23; Taniera 2:​43-45; 11:44–12:1; ao Te Kaotioti 16:​13-16, 21. Ngkana e koaua anne, aikai baika ti iangoi aika kona n riki.

¹⁴ Tabeua te tai imwini moanakin te rawawata ae korakora, a nang ikotaki “ueea n te aonnaba ni kabutaa” ao n riki bwa te koraki ae tii teuana. (TeKao. 16:​13, 14; 19:19) E arania natannaomata aika ikotaki aikai te Baibara bwa “Koka man te aba ae Makoka.” (Etek. 38:2) A na buakania ana aomata te Atua te koraki aei ao ni kataia ni kamaunaia ni kabane. Tera ae e na karika buakanakia? Ni kaineti ma te tai anne, e taekinna te abotoro Ioane bwa e nora te karau ae te aiti ae korakora ae bwaka i aoia taani kairiribai nakon te Atua. Tao e kaineti te karau ni kaikonaki anne ma te rongorongo ae matoatoa ae taekan te motikitaeka are a tataekinna ana aomata Iehova. E kona ni karokoa unin Koka mai Makoka te rongorongo anne ike e a kairia iai bwa e na buakania ana aomata te Atua ma kantaningaan ae e na kamaunaia mai aon te aba.​—TeKao. 16:21.

15-16. (a) Tao baikara baika a na riki ake a taekinaki n Taniera 11:​44, 45? (b) Tera ae e na riki nakon ueani meang ao natannaomata ake a riki bwa Koka mai Makoka?

¹⁵ Te rongorongo ae matoatoa aei ao buakanakia ana aomata te Atua irouia taani kairiribai, tao boni baike a taekinaki naba n Taniera 11:​44, 45. (Warekia.) E taekinna ikanne Taniera bwa a aki karaua ueani meang “rongorongo mai mainiku ao mai meang,” ao e otinako ma “unna ae korakora.” E iangoia ueani meang bwa e na “kamaunaia aika bati.” N taraana ao “aika bati” e kaineti nakoia ana aomata Iehova. *  Tao e nanona ikai Taniera kamaunaakia ni kabane ana aomata te Atua.

¹⁶ N te tai are a buakania iai ana aomata te Atua ueani meang ma tautaeka nako n te aonnaba, e na roko unin Teuare Moan te Mwaaka ao e a roko naba te buaka are Aremaketon. (TeKao. 16:​14, 16) N te tai anne, e nang kamaunaaki ueani meang ma natannaomata ake a riki bwa Koka mai Makoka, ao bon “akea ae e na buokia.”​—Tan. 11:45.

17. Antai Mikaere are “te natinuea te mwaane ae kakannato” are n Taniera 12:​1, ao tera ae e karaoia?

¹⁷ E kabwarabwaraaki riki n te kibu are imwina n ana rongorongo Taniera aroni kamaunaakin ueani meang ma taani boutokaia, ao aroni kamaiuakira. (Wareka Taniera 12:1.) Tera ae nanonaki n te kibu aei? Mikaere bon aran naba ara Uea ae tautaeka ae Kristo Iesu. E bon “tei ibukia” ana aomata te Atua ni moa man 1914 ngke e tei ana Tautaeka n Uea i karawa. N te tai ae e a kaan roko, e nang “teirake” ke ni kamaunaia taani kairiribai nakoina n te buaka are Aremaketon. E na riki te buaka anne n raatokin te baere e taekinna Taniera bwa “tain te rawawata” ae te kabanea ni korakora ae tuai man riki mai mwaina. Ana taetae ni burabeti Ioane are koreaki n Te Kaotioti e taekina te tai are imwain te buaka ae Aremaketon bwa “te rawawata ae korakora.”​—TeKao. 6:2; 7:14.

18. E aera ngkai ti kona n aki maaku ni kaitaraa te tai ae imwaira?

¹⁸ A uaia n taekinna Taniera ao Ioane bwa Iehova ao Iesu a na boni kamaiuia aia toro n tain te rawawata ae korakora. Ngaia are ti boni kona n aki maaku ni kaitaraa te tai ae imwaira. E taekinna Taniera bwa naake a reke maiuia a na “mwakoro [araia] n te boki.” (Tan. 12:1) E na kangaa ni mwakoro arara n te boki anne? Ti riai ni kaotia raoi bwa ti onimakina Iesu ae ana Tiibutetei te Atua. (Ioa. 1:29) Ti riai ni katabui maiura nakon te Atua ao ni bwabetitoaki. (1Bet. 3:21) Ao ti riai ni kaota boutokaan Ana Tautaeka n Uea te Atua man arora ni buokiia aomata n reiakina taekan Iehova.

19. Tera ae ti riai ni karaoia ngkai, ao bukin tera?

¹⁹ Boni ngkai ara tai ni karikirakea onimakinan Iehova ao ana botaki ae kaainaki irouia ana toro aika kakaonimaki ni koaua. Boni ngkai ara tai ni boutokaa Ana Tautaeka n Uea te Atua. Ni karaoan anne, ti na boni kamaiuaki ngkana e a kamaunaaki ueani meang ao ueani maiaki n Ana Tautaeka n Uea te Atua.